ਗੀਤ ਕੰਧੇ ਸਰਹੰਦ ਦੀਏ ਅਮਰ ਆਡਿਓ ਵੱਲੋਂ ਲੋਕ ਅਰਪਨ

ਪ੍ਰੋਫੈਸਰ ਗੁਰਭਜਨ ਗਿੱਲ ਦਾ ਛੋਟੇ ਸਾਹਿਬਜ਼ਾਦਿਆਂ ਨੂੰ ਸਮਰਪਿਤ ਗੀਤ

ਲੁਧਿਆਣਾ: 28 ਦਸੰਬਰ 2019: (ਸਾਹਿਤ ਸਕਰੀਨ)::

ਪ੍ਰੋਫੈਸਰ ਗੁਰਭਜਨ ਗਿੱਲ ਇੱਕ ਅਜਿਹੀ ਸ਼ਖ਼ਸੀਅਤ ਹੈ ਜਿਸ ਨੇ ਸਮੇਂ ਦੀ ਨਬਜ਼ 'ਤੇ ਹੱਥ ਰੱਖ ਕੇ ਉਸ ਦੀ ਚਾਲ ਨੂੰ ਮਹਿਸੂਸ ਕੀਤਾ ਹੈ।  ਉਸ ਦੀਆਂ ਅੱਖਾਂ ਵਿੱਚ ਅੱਖਾਂ ਪਾ ਕੇ ਉਸਦੀਂ ਚੁਣੌਤੀਆਂ ਦਾ ਸਾਹਮਣਾ ਕੀਤਾ ਹੈ। ਬਿਨਾ ਕਿਸੇ ਸਿਆਸਤ ਦਾ ਲੇਬਲ ਆਪਣੀ ਕਲਮ ਤੇ ਲਗਵਾਏ ਗੁਰਭਜਨ ਗਿੱਲ ਨੇ ਪੰਜਾਬ ਦੀ ਗੱਲ ਵੀ ਕੀਤੀ, ਦੇਸ਼ ਦੀ ਵੀ ਅਤੇ ਵਿਸ਼ਵ ਦੀ ਵੀ। ਜਾਬਰਾਂ, ਹਮਲਾਵਰਾਂ ਅਤੇ ਮਨੁੱਖਤਾ ਦੇ ਵੈਰੀਆਂ ਦੀ ਗੱਲ ਕਰਦਿਆਂ ਉਸਦੀ ਕਲਮ ਨੇ ਕਦੇ ਲਿਹਾਜ਼ ਨਹੀਂ ਕੀਤਾ। ਏਸੇ ਤਰਾਂ ਸ਼ਹੀਦਾਂ ਨੂੰ ਆਪਣੀ ਸ਼ਰਧਾ ਦੇ ਫੁਲ ਅਰਪਿਤ ਕਰਦਿਆਂ ਕਦੇ ਸਿਆਸੀ ਜਾਂ ਮਜ਼ਹਬੀ ਵਿਚਾਰਾਂ ਨੂੰ ਦੀਵਾਰ ਵੀ ਨਹੀਂ ਬਣਨ ਦਿੱਤਾ। ਸਰਹਿੰਦ ਦੀਆਂ ਕੰਧਾਂ ਸਾਡਾ ਉਹ ਇਤਿਹਾਸ ਹੈ ਜਿਸ ਨਾਲ ਬਹੁਤੇ ਅਗਾਂਹਵਧੂ ਕਲਮਕਾਰਾਂ ਨੇ ਇਨਸਾਫ ਨਹੀਂ ਕੀਤਾ। ਉਹ ਆਗਰੇ, ਕਾਨਪੁਰ, ਮੇਰਠ ਦੇ ਨਾਲ ਮਾਸਕੋ ਅਤੇ ਬੀਜਿੰਗ ਦੀਆਂ ਗੱਲਾਂ ਤਾਂ ਕਰਦੇ ਰਹੇ ਪਰ ਸਰਹਿੰਦ ਨੂੰ ਅਕਸਰ ਭੁੱਲ ਜਾਂਦੇ ਰਹੇ। ਸਾਡੇ ਸਮਿਆਂ ਦੇ ਸਰਗਰਮ ਸ਼ਾਇਰ ਪ੍ਰੋਫੈਸਰ ਗੁਰਭਜਨ ਗਿੱਲ ਹੁਰਾਂ ਦਾ ਲਿਖਿਆ ਇੱਕ ਗੀਤ ਸਾਹਮਣੇ ਆਇਆ ਹੈ ਜਿਹੜਾ ਉਹਨਾਂ ਕੁਝ ਸਾਲ ਪਹਿਲਾਂ ਲਿਖਿਆ ਸੀ ਪਰ ਹੁਣ ਇੱਕ ਵਾਰ ਫੇਰ ਚਰਚਾ ਵਿੱਚ ਹੈ;ਦਸੰਬਰ ਦੇ ਮਹੀਨੇ ਦੌਰਾਨ ਜਦੋਂ ਅਸੀਂ ਅਕਸਰ ਹੀ ਸਰਹਿੰਦ ਨੂੰ ਭੁੱਲ ਜਾਂਦੇ ਹਾਂ। ਜਿਹੜੇ ਲੋਕ ਉੱਥੇ ਸਜਦਾ ਕਰਨ ਪਹੁੰਚ ਵੀ ਜਾਂਦੇ ਹਨ ਉਹ ਵੀ ਜੋੜ ਮੇਲੇ ਵਿੱਚ ਘੱਟ ਅਤੇ ਆਪੋ ਆਪਣੀਆਂ ਸਿਆਸੀ ਕਾਨਫਰੰਸਾਂ ਵਿੱਚ ਵਧੇਰੇ ਸ਼ਰਧਾ ਨਾਲ ਸ਼ਾਮਲ ਹੁੰਦੇ ਹਨ।  ਉੱਥੇ ਬਹੁਤਿਆਂ ਲਈ ਗੁਰੂ ਨਾਲੋਂ ਲੀਡਰ ਪਹਿਲਾਂ ਹੁੰਦਾ ਹੈ। ਅਜਿਹੇ ਮਾਹੌਲ ਵਿੱਚ ਜਦੋਂ ਸਿੱਖ ਇਤਿਹਾਸ ਦੇ ਸ਼ਹੀਦਾਂ ਨੂੰ  ਭੁਲਾਇਆ ਜਾ ਰਿਹਾ ਹੈ। ਸਿੱਖ ਇਤਿਹਾਸ ਦਾਨ ਨਿਸ਼ਾਨੀਆਂ ਨੂੰ  ਕਾਰਸੇਵਾ ਅਤੇ ਹੋਰਨਾਂ ਬਹਾਨਿਆਂ ਨਾਲ ਖਤਮ ਕੀਤਾ ਜਾ ਰਿਹਾ ਹੈ ਉਦੋਂ ਸ਼ਬਦ ਗੁਰੂ ਦਾ ਆਸਰਾ ਲੈ ਕੇ ਦਿਲ ਟੁੰਬਵੀਂ ਰਚਨਾ ਦਾ ਸਾਹਮਣੇ ਆਉਣਾ ਸਾਡੇ ਸਾਰਿਆਂ ਲਈ ਫਖਰ ਦੀ ਗੱਲ ਹੈ। 

ਪੰਜਾਬੀ ਸਾਹਿੱਤ ਅਕਾਡਮੀ  ਦੇ ਸਾਬਕਾ ਪ੍ਰਧਾਨ ਤੇ ਪੰਜਾਬੀ ਕਵੀ ਪ੍ਰੋ: ਗੁਰਭਜਨ ਗਿੱਲ ਵੱਲੋਂ ਲਿਖੇ ਗੀਤ ਕੰਧੇ ਸਰਹੰਦ ਦੀਏ, ਅੱਥਰੂ ਨਾ ਕੇਰ ਨੀ। ਦੱਸ ਕਿਹੜੀ ਰਾਤ ਜੀਹਦੀ ਹੁੰਦੀ ਨਾ ਸਵੇਰ ਨੀ...। ਇਸ ਗੀਤ ਨੂੰ ਉੱਘੇ ਲੋਕ ਗਾਇਕ ਅਸ਼ਵਨੀ ਵਰਮਾ ਲੁਧਿਆਣਵੀ ਨੇ ਸੁਰੀਲੀ ਤੇ ਦਰਦੀਲੀ ਆਵਾਜ਼ ਚ ਰੀਕਾਰਡ ਕਰਕੇ ਪ੍ਰਸਿੱਧ ਕੰਪਨੀ ਅਮਰ ਆਡਿਉ ਵੱਲੋਂ ਰਿਲੀਜ਼ ਕੀਤਾ ਹੈ। 

ਪਿੰਕੀ ਧਾਲੀਵਾਲ ਤੇ ਪੰਜਾਬੀ ਲੋਕ ਵਿਰਾਸਤ ਅਕਾਡਮੀ ਦੀ ਇਸ ਪੇਸ਼ਕਸ਼ ਨੂੰ ਯੂ ਟਿਊਬ ਤੇ ਹੋਰ ਸੰਚਾਰ ਮਾਧਿਅਮਾਂ ਰਾਹੀਂ ਅੱਜ ਸ਼ਾਮੀਂ ਲੋਕ ਅਰਪਨ ਕਰ ਦਿੱਤਾ ਗਿਆ ਹੈ। 

ਇਸ ਦਾ ਸੰਗੀਤ ਨੌਜਵਾਨ ਸੰਗੀਤਕਾਰ ਕਰਣ ਪ੍ਰਿੰਸ ਨੇ ਦਿੱਤਾ ਹੈ। ਛੋਟੇ ਸਾਹਿਬਜ਼ਾਦਿਆਂ ਦੀ ਕੁਰਬਾਨੀ ਨੂੰ ਸਮਰਪਿਤ ਇਹ ਗੀਤ ਗੁਰਭਜਨ ਗਿੱਲ ਨੇ 2004 ਚ ਸਾਹਿਬਜ਼ਾਦਿਆਂ ਦੀ ਸ਼ਹਾਦਤ ਦੀ ਤੀਸਰੀ ਸ਼ਤਾਬਦੀ ਵੇਲੇ ਲਿਖਿਆ ਸੀ।

ਇਹ ਗੀਤ ਸਿੱਖ ਸ਼ਹੀਦਾਂ ਦੀਆਂ ਪੇਂਟਿੰਗ ਤੇ ਆਧਾਰਿਤ ਤਸਵੀਰਾਂ ਨਾਲ ਸ਼ੁਰੂ ਹੁੰਦਾ ਹੈ ਅਤੇ ਹਰ ਸਤਰ ਦਿਲ ਨੂੰ ਹਲੂਣਾ ਦੇਂਦੀ ਹੈ। ਦਿਮਾਗ ਨੂੰ ਵੀ ਝੰਜੋੜਦੀ ਹੈ। ਨਵੇਂ ਸਾਲ ਅਤੇ ਕ੍ਰਿਸਮਿਸ ਦੀਆਂ ਵਧਾਈਆਂ ਵਿੱਚ ਗੁਆਚਿਆਂ ਨੂੰ ਉਹਨਾਂ ਸ਼ਹੀਦਾਂ ਦੀ ਯਾਦ ਕਰਾਉਂਦੀ ਹੈ ਜਿਹਨਾਂ ਨੂੰ ਭੁਲਾਉਣ ਦੀਆਂ ਸਾਜ਼ਿਸ਼ਾਂ ਲੰਮੇ ਸਮੇਂ ਤੋਂ ਜਾਰੀ ਹਨ। ਇਸ ਗੀਤ ਨੂੰ ਤੁਸੀਂ ਇਥੇ ਕਲਿੱਕ ਕਰਕੇ ਵੀ ਦੇਖ ਸੁਣ ਸਕਦੇ ਹੋ।  ਕਿਹੋ ਜਿਹਾ ਲੱਗਿਆ ਇਹ ਗੀਤ ਦੱਸਣਾ ਜ਼ਰੂਰ। --ਰੈਕਟਰ ਕਥੂਰੀਆ (+919915322407)

ਪੁਸਤਕ ਚਰਚਾ//ਗਿਆਰਾਂ ਵਿਸ਼ਵ ਪ੍ਰਸਿੱਧ ਕਹਾਣੀਆਂ

ਇੰਦਰਜੀਤ ਪਾਲ ਕੌਰ ਹੁਰਾਂ ਨੇ ਕੀਤਾ ਹੈ ਗਿਆਰਾਂ ਕਹਾਣੀਆਂ ਦਾ ਅਨੁਵਾਦ  

ਲੁਧਿਆਣਾ: 27 ਦਸੰਬਰ 2019: (ਰੈਕਟਰ ਕਥੂਰੀਆ//ਸਾਹਿਤ ਸਕਰੀਨ)::

ਇੰਦਰਜੀਤ ਪਾਲ ਕੌਰ 

ਪੰਜਾਬੀ ਭਵਨ ਦੇ ਖੁੱਲੇ ਗਰਾਊਂਡ ਨੁਮਾ ਪਾਰਕ ਵਿੱਚ ਇੱਕ ਦੀਵਾਰ ਡਾਕਖਾਨੇ ਨਾਲ ਲੱਗਦੀ ਹੈ। ਪਰਲੇ ਪਾਸੇ ਡਾਕਖਾਨਾ ਅਤੇ ਏਧਰਲੇ ਪਾਸੇ ਪੰਜਾਬੀ ਭਵਨ ਦੇ ਉੱਚੇ ਲੰਮੇ ਦਰੱਖਤਾਂ ਦੀ ਕਤਾਰ ਅਤੇ ਜ਼ਮੀਨ ਤੇ ਬੜੇ ਹੀ ਸਲੀਕੇ ਨਾਲ ਉਗਾਏ ਗਏ ਵੱਖ ਵੱਖ ਤਰਾਂ ਦੇ ਰੰਗ ਬਿਰੰਗੇ ਫੁੱਲ। ਇਹਨਾਂ ਉੱਤੇ ਮੰਡਰਾਉਂਦੀਆਂ ਤਿਤਲੀਆਂ ਏਥੋਂ ਦੇ ਕੁਦਰਤੀ ਨਜ਼ਾਰਿਆਂ ਨੂੰ ਚਾਰ ਚੰਨ ਲਾਉਂਦੀਆਂ ਹਨ। ਪੰਜਾਬੀ ਭਵਨ ਦੇ ਇਸ ਕਿਨਾਰੇ ਤੇ ਪਏ ਕਿਸੇ ਬੈਂਚ ਤੇ ਧੁੱਪ ਸਕਦੀ ਪ੍ਰਿੰਸੀਪਲ ਇੰਦਰਜੀਤ ਪਾਲ ਕੌਰ ਅਕਸਰ ਦੇਖੀ ਜਾ ਸਕਦੀ ਹੈ। ਪਿੱਠ ਪੰਜਾਬੀ ਭਵਨ ਦੇ ਖੁੱਲੇ ਗਰਾਊਂਡ ਵੱਲ ਅਤੇ ਮੂੰਹ ਡਾਕਖਾਨੇ ਵਾਲੀ ਦੀਵਾਰ ਵੱਲ। ਪੂਰੀ ਤਰਾਂ ਲਿਖਣ ਵਿੱਚ ਧਿਆਨ ਮਗਨ। ਵਿੱਚ ਵਿਚਾਲੇ ਕਦੇ ਕਦਾਈਂ ਸਾਹਿਤ ਅਕਾਦਮੀ ਦੇ ਦਫਤਰ ਵਾਲੇ ਕਮਰੇ ਵਿੱਚੋਂ "ਮਨ ਦੇ ਮੋਤੀ" ਵਾਲੀ ਸੁਰਿੰਦਰ ਦੀਪ ਕੌਰ ਆ ਬੁਲਾਉਂਦੀ ਹੈ। ਉਦੋਂ ਚਾਹ ਜਾਂ ਲੰਚ ਦੀ ਬਰੇਕ ਸਮਝੋ। ਵਰਨਾ ਇੰਦਰਜੀਤ ਪਾਲ ਕੌਰ ਹੁਰਾਂ ਨੇ ਉਸ ਬੈਂਚ ਤੇ ਹੀ ਆਪਣਾ ਲੰਚ ਬਾਕਸ ਖੋਹਲ ਕੇ ਲੰਚ ਕਰ ਲੈਣਾ ਹੈ। ਇਸ ਤਰਾਂ ਕੁਦਰਤ ਦੇ ਨੇੜੇ ਨੇੜੇ ਅਤੇ ਪੂਰੀ ਤਰਾਂ ਧਿਆਨ ਮਗਨ ਹੋ ਕੇ ਚੱਲਦੀ ਇਸ ਰਚਨਾ ਪ੍ਰਕਿਰਿਆ ਦੌਰਾਨ ਹੀ ਰਚੀ ਗਈ ਹੈ 138 ਸਫ਼ਿਆਂ ਦੀ ਪੁਸਤਕ "ਗਿਆਰਾਂ ਵਿਸ਼ਵ ਪ੍ਰਸਿੱਧ ਕਹਾਣੀਆਂ"। ਊਸ਼ਾ ਪ੍ਰੀਆਵੰਦਾ, ਸ਼ੇਖਰ ਜੋਸ਼ੀ ਅਤੇ ਅੰਮ੍ਰਿਤਲਾਲ ਨਾਗਰ ਸਮੇਤ ਦੁਨੀਆ ਦੀਆਂ ਦੂਜੀਆਂ ਭਾਸ਼ਾਵਾਂ ਦੇ ਲੇਖਕਾਂ ਦੀਆਂ ਕਹਾਣੀਆਂ ਹਨ। ਇਹਨਾਂ ਲੇਖਕਾਂ ਵਿੱਚ ਓ ਹੈਨਰੀ, ਐਂਟਨ ਚੈਖ਼ੋਵ, ਹੋਨੋਰ ਡਿ ਬਾਲਜ਼ਾਕ, ਲਿਓ ਟਾਲਸਟਾਏ, ਪਰਲ ਐਸ ਬੱਕ, ਕੈਥਰੀਨ ਮੇਨਸਫੀਲਡ ਅਤੇ ਸਾਲ ਬੇਲੋ। ਇਹ ਕਹਾਣੀਆਂ ਸਾਡੇ ਸਾਂਝੇ ਸੁੱਖਾਂ ਦੁੱਖਾਂ ਦੀ ਬਾਤ ਪਾਉਂਦੀਆਂ ਹਨ। ਇਹ ਦੱਸਦੀਆਂਹਨ ਕਿ ਸਾਡੀਆਂ ਮਜਬੂਰੀਆਂ, ਸਾਡੀਆਂ ਬੇਬਸੀਆਂ, ਸਾਡੇ ਹੰਝੂ, ਸਾਡੇ ਗਮ, ਸਾਡੀਆਂ ਖੁਸ਼ੀਆਂ, ਸਾਡੀਆਂ ਇੱਛਾਵਾਂ, ਸਾਡੇ ਹਾਲਾਤ ਤਕਰੀਬਨ ਸਾਰੀ ਦੁਨੀਆ ਵਿੱਚ ਇੱਕੋ ਜਿਹੇ ਹੀ ਹਨ। ਅਸੀਂ ਇੱਕ ਦੂਜੇ ਕੋਲੋਂ ਬਹੁਤੇ ਵੱਖਰੇ ਨਹੀਂ ਹਾਂ। ਫਿਰ ਵੀ ਅਸੀਂ ਸਿਆਸੀ ਨਕਸ਼ਿਆਂ ਅਤੇ ਦਿਲਾਂ ਦਿਮਾਗਾਂ ਦੇ ਨਕਸ਼ਿਆਂ 'ਤੇ ਕਿੰਨੀਆਂ ਲਕੀਰਾਂ ਖਿੱਚੀਆਂ ਹੋਈਆਂ ਹਨ। ਇੰਦਰਜੀਤ ਪਾਲ ਕੌਰ ਹੁਰਾਂ ਨੇ ਸਾਡੇ ਦੁੱਖਾਂ ਸੁੱਖਾਂ ਦੇ ਸਿਲਸਲੇ ਨੂੰ ਕਹਾਣੀਆਂ ਰਾਹੀਂ ਇੱਕੋ ਜਿਲਦ ਵਿੱਚ ਲਿਆ ਕੇ ਸਾਨੂੰ ਹੌਂਸਲਾ ਵੀ ਦਿੱਤਾ ਹੈ ਜਿਹੜਾ ਆਖਦਾ ਹੈ- 

ਦੁਨੀਆ ਮੈਂ ਕਿਤਨਾ ਗਮ ਹੈ!

ਮੇਰਾ ਗਮ ਕਿਤਨਾ ਕਮ ਹੈ!

ਇੰਦਰਜੀਤ ਪਾਲ ਕੌਰ ਆਪਣੀ ਇਸ ਸਫਲ ਪ੍ਰਾਪਤੀ ਬਾਰੇ ਦੱਸਦੀ ਹੈ ਕਿ ਇਹ ਇੱਕ ਔਖਾ ਕੰਮ ਸੀ। ਇਸ ਮਕਸਦ ਲਈ ਲੰਮੀ ਸਾਧਨਾ ਕਰਨੀ ਪਈ। ਦਿਨ-ਰਾਤ ਇੱਕ ਕਰਕੇ ਵੀ ਇੱਕ ਸਾਲ ਤੋਂ ਵਧੇਰੇ ਸਮਾਂ ਇਹਨਾਂ ਕਹਾਣੀਆਂ ਦੇ ਅਨੁਵਾਦ ਤੇ ਲੱਗ ਗਿਆ। ਇਹ ਕਿਤਾਬ ਬਿਨਾ ਕਿਸੇ ਭੂਮਿਕਾ ਜਾਂ ਮੁੱਖਬੰਦ ਤੋਂ ਤੁਹਾਨੂੰ ਸਿੱਧਾ ਕਹਾਣੀਆਂ ਵੱਲ ਲੈ ਜਾਂਦੀ ਹੈ ਅਤੇ ਅਖੀਰ ਤੱਕ ਕਹਾਣੀਆਂ ਸੁਣਾਉਂਦੀ ਹੈ। ਜਿਲਦ ਤੋਂ ਇਲਾਵਾ 138 ਸਫ਼ਿਆਂ ਵਾਲੀ ਇਸ ਪੁਸਤਕ ਦੀ ਕੀਮਤ ਹੈ ਸਿਰਫ 200/-ਰੁਪਏ ਅਤੇ ਇਸ ਨੂੰ ਬਹੁਤ ਹੀ ਖੂਬਸੂਰਤ ਦਿੱਖ ਅਤੇ ਛਪਾਈ ਵਿੱਚ ਪ੍ਰਕਾਸ਼ਿਤ ਕੀਤਾ ਹੈ ਚੇਤਨਾ ਪ੍ਰਕਾਸ਼ਨ ਵਾਲੇ ਸਤੀਸ਼ ਗੁਲਾਟੀ ਹੁਰਾਂ ਨੇ। ਕੁਲ ਮਿਲਾ ਕੇ ਇਹ ਪੁਸਤਕ ਪੜ੍ਹਨ ਵਾਲੀ ਵੀ ਹੈ ਅਤੇ ਸੌਗਾਤ ਵੱਜੋਂ ਦੇਣ ਵਾਲੀ ਵੀ। --ਰੈਕਟਰ ਕਥੂਰੀਆ 

ਪ੍ਰਿੰ. ਪ੍ਰੇਮ ਸਿੰਘ ਬਜਾਜ ਦੇ ਦੇਹਾਂਤ ਤੇ ਡੂੰਘੇ ਦੁੱਖ ਤੇ ਅਫ਼ਸੋਸ ਦਾ ਪ੍ਰਗਟਾਵਾ

Tuesday: 24th December: 5:49 PM

ਪੰ.ਸਾ.ਅਕਾ. ਦੀ ਰੈਫ਼ਰੈਂਸ ਲਾਇਬ੍ਰੇਰੀ ਦੇ ਡਾਇਰੈਕਟਰ ਸਨ ਪ੍ਰਿੰਸੀਪਲ ਬਜਾਜ 

ਇੱਕ ਮੁਲਾਕਾਤ ਦੌਰਾਨ ਪੰਜਾਬ ਸਕਰੀਨ ਲਈ  ਆਪਣੇ ਸ਼ਗਿਰਦ ਪੱਤਰਕਾਰ ਐਮ ਐਸ ਭਾਟੀਆ ਨਾਲ ਗੱਲਬਾਤ ਕਰਦਿਆਂ ਪ੍ਰਿੰਸੀਪਲ ਪ੍ਰੇਮ ਸਿੰਘ ਬਜਾਜ 

ਲੁਧਿਆਣਾ: 24 ਦਸੰਬਰ 2019: (ਸਾਹਿਤ ਸਕਰੀਨ ਬਿਊਰੋ)::

ਪੰਜਾਬੀ ਸਾਹਿਤ ਅਕਾਡਮੀ, ਲੁਧਿਆਣਾ ਦੇ ਅਹੁਦੇਦਾਰਾਂ ਅਤੇ ਸਮੂਹ ਮੈਂਬਰਾਂ ਵਲੋਂ ਰੈਫ਼ਰੈਂਸ ਲਾਇਬ੍ਰੇਰੀ ਦੇ ਡਾਇਰੈਕਟਰ ਅਤੇ ਉੱਘੇ ਸਿੱਖਿਆ ਸ਼ਾਸਤਰੀ ਪ੍ਰਿੰ. ਪ੍ਰੇਮ ਸਿੰਘ ਬਜਾਜ ਸਾਬਕਾ ਪ੍ਰਿੰਸੀਪਲ ਲਾਜਪਤ ਰਾਏ ਮੈਮੋਰੀਅਲ ਕਾਲਜ ਜਗਰਾਉਂ ਦੇ ਦੇਹਾਂਤ 'ਤੇ ਡੂੰਘੇ ਦੁੱਖ ਤੇ ਅਫ਼ਸੋਸ ਦਾ ਪ੍ਰਗਟਾਵਾ ਕੀਤਾ ਗਿਆ ਹੈ। ਅੱਜ ਸ਼ਾਮੀ 4.45 ਵਜੇ ਉਹਨਾਂ ਦਾ ਦੇਹਾਂਤ ਹੋ ਗਿਆ। ਪ੍ਰਿੰ. ਪ੍ਰੇਮ ਸਿੰਘ ਬਜਾਜ ਪੰਜਾਬੀ ਸਾਹਿਤ ਅਕਾਡਮੀ ਲੁਧਿਆਣਾ ਦੇ ਸਾਬਕਾ ਜਨਰਲ ਸਕੱਤਰ ਅਤੇ ਪਿਛਲੇ ਤਿੰਨ ਦਹਾਕਿਆਂ ਤੋਂ ਰੈਫ਼ਰੈਂਸ ਲਾਇਬ੍ਰੇਰੀ ਦੇ ਡਾਇਰੈਕਟਰ ਸਨ। ਸੰਨ 1947 ਵਿਚ ਦੇਸ਼ ਵੰਡ ਸਮੇਂ ਉਹ ਪਾਕਿਸਤਾਨ ਤੋਂ ਆਏ, ਇਧਰ ਆ ਕੇ ਇਕ

ਕਲਰਕ ਤੋਂ ਲੈ ਕੇ ਕਾਲਜ ਦੇ ਪ੍ਰਿੰਸੀਪਲ ਤੱਕ ਦੀ ਯਾਤਰਾ ਉਹਨਾਂ ਦੇ ਸਿਰੜ ਦੀ ਗਵਾਹੀ ਭਰਦੀ ਹੈ। ਉਹ ਲੰਮਾ ਸਮਾਂ ਲਾਜਪਤ ਰਾਏ ਮੈਮੋਰੀਅਲ ਕਾਲਜ ਜਗਰਾਉਂ ਦੇ ਪ੍ਰਿੰਸੀਪਲ ਰਹੇ ਅਤੇ ਉਹਨਾਂ ਦੇ ਯਤਨਾਂ ਸਦਕਾ ਹੀ ਇਹ ਕਾਲਜ ਡੀ. ਏ. ਵੀ. ਸੰਸਥਾਵਾਂ ਵਿਚ ਸ਼ਾਮਲ ਹੋਇਆ।

ਯਾਦ ਰਹੇ ਕਿ ਪ੍ਰਿੰ. ਬਜਾਜ 89 ਸਾਲਾਂ ਦੀ ਉਮਰ ਦੇ ਸਨ। ਉਹ ਆਪਣੇ ਪਿੱਛੇ ਆਪਣੀ ਜੀਵਨ ਸਾਥਣ ਆਗਿਆ ਕੌਰ, ਬੇਟਾ ਤੇਜਿੰਦਰਪਾਲ ਸਿੰਘ ਅਤੇ ਬੇਟੀ ਹਰਪ੍ਰੀਤ ਕੌਰ ਛੱਡ ਗਏ ਹਨ। ਉਹਨਾਂ ਡੀ. ਏ. ਵੀ. ਪਬਲਿਕ ਸਕੂਲ ਮੁਕੰਦਪੁਰ (ਨਵਾਂ ਸ਼ਹਿਰ) ਦੇ ਵੀ ਬਾਨੀ ਪ੍ਰਿੰਸੀਪਲ ਸਨ।

ਅਕਾਡਮੀ ਦੇ ਸਾਬਕਾ ਪ੍ਰਧਾਨ ਡਾ. ਸਰਦਾਰਾ ਸਿੰਘ ਜੌਹਲ ਨੇ ਪ੍ਰਿੰ. ਪ੍ਰੇਮ ਸਿੰਘ ਬਜਾਜ ਨੂੰ ਸ਼ਰਧਾਂਜਲੀ ਭੇਟ ਕਰਦਿਆਂ ਕਿਹਾ ਕਿ ਡਾ. ਪਰਮਿੰਦਰ ਸਿੰਘ ਤੋਂ ਬਾਅਦ ਅਕਾਡਮੀ ਦੀ ਰੀੜ ਦੀ ਹੱਡੀ ਸਨ ਜਿਹਨਾਂ ਨੇ ਰੈਫ਼ਰੈਂਸ ਲਾਇਬ੍ਰੇਰੀ ਨੂੰ 62 ਹਜ਼ਾਰ ਪੁਸਤਕਾਂ ਦੇ ਭੰਡਾਰ ਤੀਕ ਪਹੁੰਚਾਇਆ।

ਪੰਜਾਬੀ ਸਾਹਿਤ ਅਕਾਡਮੀ, ਲੁਧਿਆਣਾ ਦੇ ਪ੍ਰਧਾਨ ਪ੍ਰੋ. ਰਵਿੰਦਰ ਸਿੰਘ ਭੱਠਲ ਅਤੇ ਜਨਰਲ

ਸਕੱਤਰ ਡਾ. ਸੁਰਜੀਤ ਸਿੰਘ ਨੇ ਡੂੰਘੇ ਦੁੱਖ ਦਾ ਅਫ਼ਸੋਸ ਦਾ ਪ੍ਰਗਟਾਵਾ ਕਰਦਿਆਂ ਕਿਹਾ ਕਿ ਪ੍ਰਿੰ. ਪ੍ਰੇਮ ਸਿੰਘ ਬਜਾਜ ਸਾਡੇ ਸਾਰਿਆਂ ਦੇ ਪਿਤਾ ਸਮਾਨ ਸਨ। ਉਹਨਾਂ ਦੀ ਹਾਜ਼ਰੀ ਸਦਕਾ ਸਾਨੂੰ ਪੰਜਾਬੀ ਭਵਨ ਭਰਿਆ ਭਰਿਆ ਲਗਦਾ ਸੀ। ਉਹਨਾਂ  ਦਸਿਆ ਕਿ ਬਜਾਜ ਸਾਹਿਬ ਬਹੁ ਭਾਸ਼ਾਈ ਵਿਦਵਾਨ ਸਨ। 1994 ਤੋਂ ਭਾਸ਼ਾ ਵਿਭਾਗ ਪੰਜਾਬ ਦੀਆਂ ਉਰਦੂ ਆਮੋਜ਼ ਕਲਾਸਾਂ ਦੀ ਸਿਖਲਾਈ ਲਈ ਆਖਰੀ ਸੁਆਸਾਂ ਤੱਕ ਨਿਰੰਤਰਤਾ ਬਰਕਰਾਰ ਰੱਖੀ।

ਇਸ ਮੌਕੇ ਅਕਾਡਮੀ ਦੇ ਸਾਬਕਾ ਪ੍ਰਧਾਨ ਅਤੇ ਕੇਂਦਰੀ ਪੰਜਾਬੀ ਲੇਖਕ ਸਭਾ ਦੇ ਜਨਰਲ ਸਕੱਤਰ ਡਾ. ਸੁਖਦੇਵ ਸਿੰਘ, ਸ੍ਰੀ ਦਰਸ਼ਨ ਬੁੱਟਰ, ਪ੍ਰਧਾਨ ਕੇਂਦਰੀ ਪੰਜਾਬੀ ਲੇਖਕ ਸਭਾ ਨੇ ਸ਼ੌਕ ਸੰਦੇਸ਼ ਭੇਜਿਆ ਹੈ। ਅਕਾਡਮੀ ਦੇ ਸਾਬਕਾ ਪ੍ਰਧਾਨ ਪ੍ਰੋ. ਗੁਰਭਜਨ ਸਿੰਘ ਗਿੱਲ ਅਕਾਡਮੀ ਵਿਚ ਹਾਜ਼ਰ ਸਨ। ਉਹਨਾਂ ਕਿਹਾ ਕਿ ਪ੍ਰਿੰ. ਬਜਾਜ ਉਹਨਾਂ ਦੇ ਪਹਿਲੇ ਪੱਕੇ ਰੁਜ਼ਗਾਰ ਦਾਤਾ ਸਨ। ਪ੍ਰੋ. ਗਿੱਲ ਖ਼ੁਦ ਲਾਜਪਤ ਰਾਏ ਮੈਮੋਰੀਅਲ ਕਾਲਜ ਜਗਰਾਉਂ ਵਿਚ ਪੜ੍ਹਾਉਂਦੇ ਰਹੇ ਹਨ। ਪ੍ਰਿੰ. ਪ੍ਰੇਮ ਸਿੰਘ ਬਜਾਜ ਉਹ ਦੂਰਦਰਸ਼ੀ ਸਿੱਖਿਆ ਸ਼ਾਸਤਰੀ ਸਨ ਜਿਹਨਾਂ ਨੇ 1965 ਵਿਚ ਖੁਦ ਗ਼ਦਰ ਲਹਿਰ ਦੇ ਬਾਨੀ ਬਾਬਾ ਸੋਹਨ ਸਿੰਘ ਭਕਨਾ ਅਤੇ ਸਿਰਕੱਢ ਦੇਸ਼ ਭਗਤ ਅਤੇ ਚੋਟੀ ਦੇ ਕਵੀ ਮੁਨਸ਼ਾ ਸਿੰਘ ਦੁਖੀ ਦੀਆਂ ਵਿਸ਼ਾਲ ਮੁਲਾਕਾਤਾਂ ਕਰਕੇ ਪੰਜਾਬੀ ਸਾਹਿਤ ਅਕਾਡਮੀ ਲੁਧਿਆਣਾ ਦੇ ਤ੍ਰੈ ਮਾਸਿਕ ਪੱਤਰ ਆਲੋਚਨਾ ਵਿਚ ਪ੍ਰਕਾਸ਼ਤ ਕੀਤੀਆਂ ਜਿਹਨਾਂ ਨੂੰ 2004 ਵਿਚ ਪ੍ਰੋ. ਗੁਰਭਜਨ ਸਿੰਘ ਗਿੱਲ ਨੇ ਸੰਪਾਦਤ ਕਰਕੇ ਦੋ ਪੈੜਾਂ ਇਤਿਹਾਸ ਦੇ ਨਾਂ ਹੇਠ ਪ੍ਰਕਾਸ਼ਿਤ ਕੀਤਾ ਗਿਆ।

ਅਫ਼ਸੋਸ ਦਾ ਪ੍ਰਗਟਾਵਾ ਕਰਨ ਵਾਲਿਆਂ ਵਿਚ ਡਾ. ਸੁਰਜੀਤ ਪਾਤਰ, ਡਾ. ਗੁਰਇਕਬਾਲ ਸਿੰਘ, ਸਹਿਜਪ੍ਰੀਤ ਸਿੰਘ ਮਾਂਗਟ, ਡਾ. ਗੁਲਜ਼ਾਰ ਸਿੰਘ ਪੰਧੇਰ, ਮਨਜੀਤ ਕੌਰ ਅੰਬਾਲਵੀ, ਖੁਸ਼ਵੰਤ ਸਿੰਘ ਬਰਗਾੜੀ, ਭੁਪਿੰਦਰ ਸਿੰਘ ਸੰਧੂ, ਮਨਜਿੰਦਰ ਸਿੰਘ ਧਨੋਆ, ਡਾ. ਜਗਵਿੰਦਰ ਜੋਧਾ, ਤ੍ਰੈਲੋਚਨ ਲੋਚੀ, ਸ੍ਰੀ ਰਾਮ ਅਰਸ਼, ਭਗਵੰਤ ਰਸੂਲਪੁਰੀ, ਕਮਲਜੀਤ ਨੀਲੋਂ, ਜਸਵੀਰ ਝੱਜ,

ਡਾ. ਸੁਦਰਸ਼ਨ ਗਾਸੋ, ਸੁਦਰਸ਼ਨ ਗਰਗ, ਤਰਸੇਮ, ਡਾ. ਸ਼ਰਨਜੀਤ ਕੌਰ, ਅਮਰਜੀਤ ਕੌਰ ਹਿਰਦੇ, ਸੁਰਿੰਦਰ ਨੀਰ, ਗੁਲਜ਼ਾਰ ਸਿੰਘ ਸ਼ੌਂਕੀ, ਪ੍ਰੇਮ ਸਾਹਿਲ, ਜਨਮੇਜਾ ਸਿੰਘ ਜੌਹਲ, ਸਤੀਸ਼ ਗੁਲਾਟੀ, ਸੁਰਜੀਤ ਸਿੰਘ ਲਾਂਬੜਾ, ਸਤਿਬੀਰ ਸਿੰਘ, ਪਰਮਜੀਤ ਸਿੰਘ ਸੋਹਲ, ਡਾ. ਗੁਰਚਰਨ ਕੌਰ ਕੋਚਰ, ਸੁਰਿੰਦਰ ਦੀਪ ਸਮੇਤ ਸਥਾਨਕ ਲੇਖਕ ਸ਼ਾਮਲ ਹਨ।

"ਅਣੂ" ਦੇ ਵਿਸ਼ੇਸ਼ ਅੰਕ ਲਈ ਕਹਾਣੀਆਂ ਭੇਜਣ ਦਾ ਸੱਦਾ

Tuesday: 24th December 2019:1:12 PM

ਅਣੂ (ਮਿੰਨੀ ਪੱਤ੍ਰਿਕਾ) ਦਾ ਆਗਾਮੀ ਵਿਸ਼ੇਸ਼ ਅੰਕ ਕਿਸਾਨੀ ਜਨ ਜੀਵਨ ਹੋਵੇਗਾ

ਲੁਧਿਆਣਾ: 24 ਦਸੰਬਰ 2019: (ਰੈਕਟਰ ਕਥੂਰੀਆ//ਸਾਹਿਤ ਸਕਰੀਨ ਬਿਊਰੋ)::

ਬੜੀ ਹੀ ਸਿਦਕਦਿਲੀ ਨਾਲ ਅਣੂ ਨਾਮ ਦੀ ਮਿੰਨੀ ਪਤ੍ਰਿਕਾ ਨੂੰ ਲਗਾਤਾਰ ਚਾਰ ਦਹਾਕਿਆਂ ਓਂ ਵੀ ਵੱਧ ਸਮੇਂ ਤੋਂ ਕੱਢਦੇ ਆ ਰਹੇ ਜਨਾਬ ਸੁਰਿੰਦਰ ਕੈਲੇ ਹੁਰਾਂ ਦਾ ਸ੍ਰੀਦ ਅਜੇ ਵੀ ਜਾਰੀ ਹੈ। ਜ਼ਿੰਦਗੀ ਦੇ ਬਹੁਤ ਸਾਰੇ ਰੁਝੇਵਿਆਂ ਦੇ ਬਾਵਜੂਦ ਉਹ ਸਾਹਿਤ ਰਚਨਾ ਰੇ ਸਾਹਿਤਿਕ ਸਰਗਰਮੀਆਂ ਲਈ ਸਮਾਂ ਕੱਢ ਹੀ ਲੈਂਦੇ ਹਨ। ਜਦੋਂ ਨਕਸਲਬਾੜੀ ਲਹਿਰ ਦਾ ਜ਼ੋਰ ਸੀ ਉਦੀਂ ਵੀ ਅਤੇ ਜਦੋਂ ਸਿੱਖ ਖਾੜਕੂ ਲਹਿਰ ਅਸਮਾਨੀਂ ਚੜ੍ਹੀ ਉਦੋਂ ਵੀ ਸੁਰਿੰਦਰ ਕੈਲੇ ਹੁਰਾਂ ਨਾ ਤਾਂ ਆਪਣੇ ਵਿਚਾਰ ਬਦਲੇ ਅਤੇ ਨਾ ਹੀ ਸਰਗਰਮੀਆਂ ਛੱਡੀਆਂ। ਅਣੂ ਉਦੋਂ ਵੀ ਜਾਰੀ ਰਿਹਾ। ਇਹ ਸਾਰਾ ਕੁਝ ਬਿਨਾ ਕਿਸੇ ਇਸ਼ਤਿਹਾਰ ਦੇ ਆਪਣੇ ਪੱਲਿਓਂ ਕਰਨਾ ਕਿਸੇ ਸਾਧਨਾ ਤੋਂ ਘੱਟ ਨਹੀਂ। "ਅਣੂ" ਨੂੰ ਚਾਹੁਣ ਵਾਲੇ  ਦੇਸ਼ ਵਿੱਚ ਵੀ ਹਨ ਅਤੇ ਵਿਦੇਸ਼ਾਂ ਵਿੱਚ ਵੀ। ਸੁਰਿੰਦਰ ਕੈਲੇ ਹੁਰਾਂ ਦਾ ਇੱਕ ਇਸ਼ਾਰਾ ਸਰਦੇ ਪੁੱਜਦੇ ਲੋਕਾਂ ਕੋਲੋਂ ਇਸ਼ਤਿਹਾਰਾਂ ਦਾ ਹੜ੍ਹ ਲਿਆ ਸਕਦਾ ਹੈ ਪਰ ਉਹਨਾਂ ਕਦੇ ਕਿਸੇ ਨੂੰ ਨਹੀਂ ਕਿਹਾ। ਅਣੂ ਦਾ ਇਹੀ ਆਕਾਰ, ਇਹੀ ਅੰਦਾਜ਼ ਲਗਾਤਾਰ ਜਾਰੀ ਹੈ ਬਿਨਾ ਕਿਸੇ ਕੋਲੋਂ ਕੋਈ ਮਦਦ ਮੰਗਿਆਂ। ਕਿ ਵਾਰ ਮਨ ਵਿੱਚ ਆਉਂਦਾ ਹੈ ਅਣੂ ਦਾਨ ਸਾਰੀਆਂ ਪੁਰਾਣੀਆਂ ਫਾਈਲਾਂ ਨੂੰ ਨੂੰ ਸਾਰੀਆਂ ਪ੍ਰਸਿੱਧ ਲਾਇਬ੍ਰੇਰੀਆਂ ਤੱਕ ਪਹੁੰਚਾਇਆ ਜਾਵੇ।  ਸਮੇਂ ਦਾ ਸੱਚ ਬੋਲਣ ਵਾਲੀ ਇਸ ਮਿੰਨੀ ਪੱਤ੍ਰਿਕਾ ਤੋਂ ਖੋਜ ਕਰਨ ਵਾਲੇ ਬਹੁਤ ਸਾਰੇ ਇੱਛੁਕ ਸ਼ਾਇਦ ਇਹਨਾਂ ਫਾਈਲਾਂ ਤੋਂ ਕੋਈ ਲਾਹਾ ਲੈ ਸਕਣ। ਹੁਣ ਕੈਲੇ ਹੁਰਾਂ ਨੇ ਕਿਸਾਨੀ ਮਸਲਿਆਂ ਬਾਰੇ ਅਣੂ ਦਾ ਵਿਸ਼ੇਸ਼ ਅੰਕ ਕੱਢਣ ਵਾਲਾ ਐਲਾਨ ਕੀਤਾ ਹੈ। ਜਦੋਂ ਕਿਸਾਨ ਖੁਦਕੁਸ਼ੀਆਂ ਕਰ ਰਿਹਾ ਹੈ। ਉਹ ਵੀ ਉਦੋਂ ਜਦੋਂ ਉਸ ਕੋਲੋਂ ਦਸ ਪੰਦਰਾਂ ਰੁਪਏ ਕਿੱਲੋ ਖਰੀਦਿਆ ਪਿਆਜ਼ ਸੌ  ਸੌ ਰੁਪਏ ਕਿੱਲੋ ਤੋਂ ਵੱਧ ਦੇ ਭਾਅ ਵਿਕ ਰਿਹਾ ਹੈ। ਸੱਤਾ ਅਤੇ ਆਪੋਜੀਸ਼ਨ ਵਿੱਚ ਬੈਠੀਆਂ ਸਿਆਸੀ ਪਾਰਟੀਆਂ ਸਰਕਾਰਾਂ ਸਮੇਤ ਕਿਸਾਨਾਂ ਦੀ ਭਲਾਈ ਦਾ ਖੇਖਣ ਕਰ ਰਹੀਆਂ ਹਨ। ਉਸ ਹਾਲਤ ਵਿੱਚ ਅਣੂ ਦੇ ਕਿਸਾਨੀ ਜੀਵਨ ਬਾਰੇ ਵਿਸ਼ਹਿਸ ਅੰਕ ਦਾ ਐਲਾਨ ਬਹੁਤ ਅਰਥਭਰਪੂਰ ਹੈ। ਕਿਸਾਨੀ ਜ਼ਿੰਦਗੀ ਬਾਰੇ ਸਮਝ ਰੱਖਣ ਵਾਲੇ ਆਪਣੀਆਂ ਕਹਾਣੀਆਂ ਛੇਤੀ ਨਾਲ ਦੱਸੇ ਗਏ ਪਤੇ ਤੇ ਭੇਜ ਦੇਣ। 

ਸਰਦਾਰ ਕੈਲੇ ਦੇ ਐਲਾਨ ਮੁਤਾਬਿਕ ਅਦਾਰਾ ਅਣੂ ਮੰਚ ਦੇ ਸਾਹਿਤਕ ਮਿੰਨੀ ਪੱਤਰ ਅਣੂ ਵਲੋਂ ਸਮੇਂ ਸਮੇਂ ਵਿਸ਼ੇਸ਼ ਅੰਕ ਪ੍ਰਕਾਸ਼ਿਤ ਕੀਤੇ ਜਾਂਦੇ ਹਨ। ਇਸੇ ਲੜੀ ਅਧੀਨ ਅਗਾਮੀ ਮਿੰਨੀ ਕਹਾਣੀ ਵਿਸ਼ੇਸ਼ ਅੰਕ 'ਕਿਸਾਨੀ ਜਨ ਜੀਵਨ' ਪ੍ਰਕਾਸ਼ਿਤ ਕੀਤਾ ਜਾਵੇਗਾ।

ਉਪਰੋਕਤ ਜਾਣਕਾਰੀ ਦਿੰਦਿਆਂ ਅਣੂ ਦੇ ਸੰਪਾਦਕ ਸ੍ਰੀ ਸੁਰਿੰਦਰ ਕੈਲੇ ਨੇ ਦਸਿਆ ਕਿ ਇਸ ਵਿਸ਼ੇਸ਼ ਅੰਕ ਵਿਚ ਕਿਸਾਨੀ ਪਰਿਵਾਰਕ, ਸਮਾਜਿਕ, ਆਰਥਿਕ, ਧਾਰਮਿਕ ਜੀਵਨ ਦੇ ਨਾਲ ਕਿਸਾਨੀ ਮਸਲੇ, ਮਾਨਸਿਕਤਾ ਆਦਿ ਸੰਬੰਧੀ ਕਹਾਣੀਕਾਰਾਂ ਨੂੰ ਆਪਣੀਆਂ ਨਵੀਆਂ ਅਣਛਪੀਆਂ ਦੋ ਦੋ ਮਿੰਨੀ ਕਹਾਣੀਆਂ ਭੇਜਣ ਦੀ ਬੇਨਤੀ ਕੀਤੀ ਜਾਂਦੀ ਹੈ। ਕਹਾਣੀਆਂ ਸਤਲੁਜ ਫ਼ੌਂਟ ਵਿਚ ਈਮੇਲ (kailayanu0gmail.com) ਤੇ ਪੀ.ਡੀ.ਐਫ ਅਤੇ ਵਰਡ ਫਾਈਲ ਜਾਂ ਡਾਕ ਰਾਹੀਂ ਅਣੂ ਦੇ ਪਤੇ ਤੇ ਭੇਜੀਆਂ ਜਾ ਸਕਦੀਆਂ ਹਨ।

ਸੁਰਿੰਦਰ ਕੈਲੇ, ਸੰਪਾਦਕ ਅਣੂ, ਮੋਬਾਈਲ ਨੰਬਰ: +9198725-91653

ਸਮੇਂ ਦਾ ਸੱਚ//ਇਸ ਵਾਰ ਪਾਲ ਕੌਰ ਹੁਰਾਂ ਦੇ ਵਿਚਾਰ ਅਤੇ ਕਾਵਿ ਰਚਨਾ

ਸਮੇਂ ਦਾ ਸੱਚ ਬੋਲਦੇ ਸ਼ਬਦ-ਜ਼ਰਾ ਪੜ੍ਹੋ-ਸਿੱਧਾ ਤੁਹਾਡੇ ਦਿਲ ਵਿੱਚ ਉਤਰ ਜਾਣਗੇ 

ਹੁਣ ਇਹ ਸਿਰਫ ਕਾਲੇ ਕਾਨੂੰਨ ਦਾ ਵਿਰੋਧ ਨਹੀਂ ਰਿਹਾ । ਲੋਕ ਜਿਆਦਤੀਆਂ ਤੋਂ ਤੰਗ ਆ ਚੁੱਕੇ ਹਨ । ਝੂਠਾਂ , ਲਾਰਿਆਂ ਤੇ ਜੁਮਲਿਆਂ ਨੂੰ ਸਮਝ ਚੁੱਕੇ ਹਨ । ਇਹ ਵਿਰੋਧ ਬਗ਼ਾਵਤ ਦਾ ਰੂਪ ਲੈ ਰਿਹਾ ਹੈ। ਚੰਗੀ ਗੱਲ ਇਹ ਹੈ ਕਿ ਇਹ ਬਗ਼ਾਵਤ ਵਿਦਿਆਰਥੀਆਂ ਤੇ ਨੌਜਵਾਨਾਂ ਵੱਲੋਂ ਹੋ ਰਹੀ ਹੈ, ਉਹ ਵੀ ਬੜੀ ਦੇਰ ਤੋਂ ਇਨ੍ਹਾਂ ਅਨਪੜ੍ਹਾਂ ਦੀਆਂ ਮੂਰਖਤਾਵਾਂ ਦਾ ਸ਼ਿਕਾਰ ਸਨ।   ਇਕ ਗੱਲ ਹੋਰ ਚੰਗੀ ਹੋਈ ਹੈ ਕਿ ਹਕੂਮਤ ਨੇ ਜਿੰਨੀ ਦ੍ਰਿੜ੍ਹਤਾ ਨਾਲ ਸੰਪਰਦਾਈ ਜ਼ਹਿਰ ਫੈਲਾਉਣ ਦੀ ਠਾਣ ਲਈ ਹੈ, ਇਹ ਮੁਹਿੰਮ ਉਤਨੇ ਹੀ ਜ਼ੋਰ ਨਾਲ ਇਸ ਦਾ ਪਰਦਾ ਫਾਸ਼ ਕਰ ਰਹੀ ਹੈ ਤੇ ਇੱਕ ਹੋਣ ਦਾ ਸੁਨੇਹਾ ਦੇ ਰਹੀ ਹੈ।

ਮੈਂ ਇਸ ਮੁਹਿੰਮ ਨਾਲ ਜੁੜੇ ਸਾਰੇ ਸਾਥੀਆਂ ਨੂੰ ਸਲਾਮ ਕਰਦੀ ਹਾਂ ਤੇ ਉਮੀਦ ਕਰਦੀ ਹਾਂ ਅਮਿਤ ਸ਼ਾਹ ਦੀ ਬਦਨੀਤੀ ਹਕੂਮਤ ਦਾ “ਅੰਤਿਮ ਸਾਹ” ਹੋਵੇਗੀ !

-----

ਮੌਜੂਦਾ ਹਾਲਾਤ ਬਾਰੇ ਲਿਖੀ ਪਾਲ ਕੌਰ ਹੁਰਾਂ ਦੀ ਲਿਖੀ ਕਾਵਿ ਰਚਨਾ ਜਿਹੜੈ ਤੇਜ਼ੀ ਨਾਲ ਵਾਇਰਲ ਹੋ ਰਹੀ ਹੈ।  

ਸਬੂਤ

ਸਾਬਿਤ ਤਾਂ ਮੇਰੇ ਪੁਰਖਿਆਂ ਨੇ ਹੀ ਕਰ ਦਿੱਤਾ ਸੀ—

ਆ ਗਏ ਸਨ ਜਦ,

ਆਪਣੀ ਜਨਮ ਭੂਮੀ ਨੂੰ ਪਿੱਠ ਦੇ ਕੇ —-

ਤੇ ਉੱਗਣ ਲੱਗੇ ਸਨ ਇਸ ਜ਼ਮੀਨ ‘ਤੇ !

ਸੋਚਿਆ ਹੋਵੇਗਾ ਸ਼ਾਇਦ ਇਥੇ ਹੀ ਨੇ

ਉਨ੍ਹਾਂ ਦੇ ਆਪਣੇ ਲੋਕ !

ਜ਼ਹਿਰ ਦੀਆਂ ਫਸਲਾਂ ਲਹਿਲਹਾ ਰਹੀਆਂ ਸਨ,

ਗੱਡੀਆਂ ਭਰ ਭਰ ਲਾਸ਼ਾਂ ਆ ਜਾ ਰਹੀਆਂ ਸਨ—-

ਤੇ ਜੋ ਨਹੀਂ ਸਨ ਗਏ ਆਪਣੀ ਜਨਮ ਭੂਮੀ ਛੱਡ ਕੇ,

ਸਾਬਿਤ ਤਾਂ ਉਨ੍ਹਾਂ ਵੀ ਕਰ ਦਿੱਤਾ ਸੀ !

ਪਰ ਤੁਸੀਂ ਭੁੱਲਣ ਕਿੱਥੇ ਦੇਂਦੇ ਹੋ,

ਕਿ ਤੁਹਾਡੇ ਮਜ਼੍ਹਬ ਵੱਡੇ ਨੇ,

ਮਿੱਟੀ ਤੋਂ !

ਚੁਰਾਸੀ ਤੇ ਦੋ ਹਜ਼ਾਰ ਦੋ ਜਿਹੇ ਪਹਾੜ ਵੀ 

ਜਰ ਲਏ ਅਸੀਂ ਸੀਨਿਆਂ ‘ਤੇ ——-

ਤੇ ਫਿਰ ਵੀ ਲਿਖੇ ਜਾਂਦੇ ਰਹੇ ਅਸੀਂ 

ਤੁਹਾਡੇ ਰਜਿਸਟਰਾਂ ਵਿੱਚ !

ਸ਼ਰਨਾਰਥੀਆਂ ਦੀ ਸ਼ਨਾਖ਼ਤ ਹੰਢਾਉਦੇ ਪੁਰਖੇ,

ਨਹੀਂ ਜਾਣਦੇ ਸਨ ਕਿ ਦੋ ਪੀੜ੍ਹੀਆਂ ਮਗਰੋਂ ,

ਉਨ੍ਹਾਂ ਦੇ ਵਾਰਿਸ ਹੋ ਜਾਣਗੇ,

ਫਿਰ ਸਵਾਲੀਆ ਨਿਸ਼ਾਨ !

ਐਨੇ ਸਬੂਤ ਤਾਂ ਉਨ੍ਹਾਂ ਵੀ ਨਹੀਂ ਸਨ ਦਿੱਤੇ,

ਤੇ ਮਿਲ ਗਏ ਸਨ ਘਰ-ਬਾਰ,

ਜ਼ਮੀਨ ਮਕਾਨ !

ਛੱਜ ਦੇ ਛੱਟਿਓ , ਈਰਾਨੀਉ, ਪਰਾਸਤਾਨੀਉ !

ਤੁਹਾਡੀ ਹੈ, ਛੱਟਣ, ਛਾਨਣ,

ਪੁਣਨ ਤੇ ਚੁਣਨ ਦੀ ਰੀਤ ———

ਅਸੀਂ ਹੁਣ ਤੁਹਾਡੀ ਤੱਕੜੀ ਚ ਤੁਲਣ ਤੋਂ 

ਇਨਕਾਰ ਕਰਦੇ ਹਾਂ !

ਨਾ ਵਿਖਾਉ ਸਾਨੂੰ ਆਸਾਮ ‘ਚ ਚੱਲਦੇ,

ਆਪਣੇ ਨਾਜ਼ੀ ਕੈਂਪ ———

ਤੁਹਾਡੀ ਹਰ ਹੁੰਕਾਰ ਨੂੰ ਟੱਕਰਨ ਦਾ ਇਕਰਾਰ ਕਰਦੇ ਹਾਂ !

ਮਾਰ ਮਾਰ ਖੁਰ,

ਜੋ ਉਡਾ ਰਹੇ ਹੋ ਮਿੱਟੀ ——

ਤੁਹਾਡੀਆਂ ਅੱਖਾਂ, ਤੁਹਾਡੇ ਸਿਰਾਂ ਨੂੰ ,

ਉਹੀ ਹੁਣ ਸਾਡਾ ਪਤਾ ਦੇਵੇਗੀ !

               ---ਪਾਲ ਕੌਰ

ਸ਼ੰਗਾਰਾ ਸਿੰਘ ਭੁੱਲਰ ਹੁਰਾਂ ਦੇ ਤੁਰ ਜਾਣ ਤੇ ਸੋਗ ਦੀ ਲਹਿਰ

ਪੀਪਲਜ਼ ਮੀਡੀਆ ਲਿੰਕ ਵੱਲੋਂ ਵੀ ਡੂੰਘੇ ਦੁੱਖ ਦਾ ਪ੍ਰਗਟਾਵਾ 

ਚੰਡੀਗੜ੍ਹ: 11 ਦਸੰਬਰ 2019: (ਸਾਹਿਤ ਸਕਰੀਨ ਬਿਊਰੋ):: 

ਸੀਨੀਅਰ  ਪੱਤਰਕਾਰ ਸ਼ਿੰਗਾਰਾ ਸਿੰਘ ਭੁੱਲਰ ਨਹੀਂ ਰਹੇ। ਉਹ ਪਿਛਲੇ ਕੁਝ ਦਿਨਾਂ ਤੋਂ ਬਿਮਾਰ ਚੱਲ ਰਹੇ ਸਨ। ਉਹਨਾਂ ਦੇ ਇਸ ਬੇਵਕਤੀ ਵਿਛੋੜੇ ਤੇ ਪੀਪਲਜ਼ ਮੀਡੀਆ ਲਿੰਕ ਨੇ ਵੀ ਡੂੰਘੇ ਦੁੱਖ ਦਾ ਪ੍ਰਗਟਾਵਾ ਕੀਤਾ ਹੈ। ਉਹਨਾਂ ਦੀ ਯਾਦ ਵਿੱਚ ਆਯੋਜਿਤ ਸੋਗ ਸਭਾ ਵਿੱਚ ਉਹਨਾਂ ਦੇ ਨੇੜੇ ਰਹੇ ਪੱਤਰਕਾਰ ਰੈਕਟਰ ਕਥੂਰੀਆ ਨੇ ਦੱਸਿਆ ਕਿ ਸਰਦਾਰ ਸ਼ਿੰਗਾਰਾ ਸਿੰਘ ਭੁੱਲਰ ਰੋਜ਼ਾਨਾ ਨਵਾਂ ਜ਼ਮਾਨਾ ਤੋਂ ਆਪਣਾ ਕਲਮੀ ਸਫ਼ਰ ਸ਼ੁਰੂ ਕਰਕੇ ਪੱਤਰਕਾਰਿਤਾ ਵਿੱਚ ਕਈ ਉੱਚੇ ਮੁਕਾਮਾਂ 'ਤੇ ਪਹੁੰਚੇ। ਕਈ ਦਹਾਕੇ ਪਹਿਲਾਂ ਉਹ ਰੋਜ਼ਾਨਾ "ਨਵਾਂ ਜ਼ਮਾਨਾ" ਦੇ ਡੈਸਕ ਤੇ ਕੰਮ ਕਰਦੇ ਰਹੇ।  ਫਿਰ ਆਰਥਿਕ ਤੰਗੀਆਂ ਅਤੇ ਜ਼ਿੰਦਗੀ ਦੀ ਦੌੜ ਉਹਨਾਂ ਨੂੰ ਦਿੱਲੀ ਲੈ ਗਈ ਜਿੱਥੇ ਉਹਨਾਂ ਦਿੱਲੀ ਸਰਕਾਰ ਦੇ ਤ੍ਰੈ ਮਾਸਿਕ ਪੰਜਾਬੀ ਪਰਚੇ ਦਿੱਲੀ ਵਿੱਚ ਸੰਪਾਦਕ ਵੱਜੋਂ ਕੰਮ ਕੀਤਾ। ਉੱਥੇ ਹੀ ਬਾਅਦ ਵਿੱਚ ਕਈ ਹੋਰ ਅਖਬਾਰੀ ਅਦਾਰਿਆਂ ਵਿੱਚ ਲਗਾਤਾਰ ਕੰਮ ਕਰਨ ਦੇ ਬਾਵਜੂਦ ਪੰਜਾਬ ਦੀ ਖਿੱਚ ਉਹਨਾਂ ਦੇ ਦਿਲ ਦਿਮਾਗ ਵਿੱਚ ਬਣੀ ਰਹੀ। ਉਹ ਦਿੱਲੀ ਦੇ ਗਲੈਮਰ ਤੋਂ ਪੱਕੇ ਤੌਰ ਤੇ ਪ੍ਰਭਾਵਿਤ ਨਾ ਹੋ ਸਕੇ। ਜਦੋਂ ਉਹਨਾਂ ਟ੍ਰਿਬਿਊਨ ਟ੍ਰਸਟ ਦੇ ਰੋਜ਼ਾਨਾ ਅਖਬਾਰ ਪੰਜਾਬੀ  ਟ੍ਰਿਬਿਊਨ ਵਿੱਚ ਕੰਮ ਸੰਭਾਲਿਆ ਤਾਂ ਨਵੇਂ ਲੇਖਕਾਂ ਅਤੇ ਕਲਮਕਾਰਾਂ ਲਈ ਇਹ ਇੱਕ  ਸੁਨਹਿਰੀ ਯੁਗ ਸੀ। ਉਹਨਾਂ ਨੇ ਬਹੁਤ ਸਾਰੇ ਲੇਖਕਾਂ ਅਤੇ ਨਵੇਂ ਪੱਤਰਕਾਰਾਂ ਨੂੰ ਛਪਣ ਦਾ ਮੌਕਾ ਦੇ ਕੇ ਉਤਸ਼ਾਹਿਤ ਕੀਤਾ।  "ਪੰਜਾਬੀ ਟ੍ਰਿਬਿਊਨ" ਤੋਂ ਰਿਟਾਇਰ ਹੋਣ ਵੇਲੇ ਬਹੁਤ ਸਾਰੇ ਨਵੇਂ ਲੇਖਕਾਂ ਨੂੰ ਉਦਾਸੀ ਵੀ ਹੋਈ। ਇਸਤੋਂ ਬਾਅਦ ਛੇਤੀ ਹੀ ਉਹ ਹਿੰਦੀ ਦੇ ਪ੍ਰਸਿੱਧ ਮੀਡੀਆ ਸੰਸਥਾਨ ਜਾਗਰਣ ਸਮੂਹ ਦੇ ਅਖਬਾਰ "ਪੰਜਾਬੀ ਜਾਗਰਣ" ਦੇ ਸੰਪਾਦਕ ਬਣ ਗਏ।  ਇਥੇ ਵੀ ਉਹਨਾਂ ਨੇ ਹਿੰਦੀ ਅਤੇ ਪੰਜਾਬੀ ਦੇ ਕਲਮਕਾਰਾਂ ਨੂੰ ਇੱਕ ਦੂਜੇ ਦੇ ਨੇੜੇ ਲਿਆਉਣ ਵਿੱਚ ਅਹਿਮ ਰੋਲ ਅਦਾ ਕੀਤਾ। ਕੁਝ ਦੇਰ ਬਾਅਦ ਨਿਯਮਾਂ ਅਨੁਸਾਰ ਇਥੋਂ ਵੀ ਰਿਟਾਇਰ ਹੋਣਾ ਹੀ ਸੀ।  ਅੱਜ ਕੱਲ੍ਹ ਉਹ  ਰੋਜ਼ਾਨਾ ਸਪੋਕਸਮੈਨ ਦੇ ਐਡੀਟਰ ਵੱਜੋਂ ਵੀ ਸੇਵਾ ਨਿਭਾ ਰਹੇ ਸਨ ਅਤੇ ਰੋਜ਼ਾਨਾ ਨਵਾਂ ਜ਼ਮਾਨਾ ਵਿੱਚ ਅਕਸਰ ਕਾਲਮ ਵੀ ਲਿਖਦੇ ਸਨ। ਇਸ ਵੇਲੇ ਉਹਨਾਂ ਦੀ ਉਮਰ ਭਾਵੇਂ 75 ਸਾਂ ਦੀ ਸੀ ਪਰ ਉਹਨਾਂ ਦੇ ਵਿਚਾਰਾਂ ਤੋਂ ਜਾਣੂ ਹੋ ਕੇ ਉਹ ਬਾਕੀਆਂ ਨੂੰ ਵੀ ਜਵਾਨੀ ਵਾਲੇ ਇਨਕਲਾਬੀ ਜੋਸ਼ ਨਾਲ ਭਰ ਦੇਂਦੇ ਸਨ। ਯਾਰਾਂ ਦੋਸਤਾਂ ਦੇ ਨਾਲ ਨਾਲ ਲੋੜਵੰਦਾਂ ਦੇ ਕੰਮ ਆਉਣ ਵਾਲੇ ਉੱਘੇ ਪੱਤਰਕਾਰ ਸਰਦਾਰ ਸ਼ਿੰਗਾਰਾ ਸਿੰਘ ਭੁੱਲਰ ਹੁਣ ਸਾਡੇ ਦਰਮਿਆਨ ਨਹੀਂ ਰਹੇ। ਅੱਜ ਸ਼ਾਮ ਪੰਜ ਵਜੇ ਉਹ ਅਕਾਲ ਚਲਾਣਾ ਕਰ ਗਏ। ਉਹ ਪਿਛਲੇ ਕੁਝ ਦਿਨਾਂ ਤੋਂ ਬਿਮਾਰ ਵੀ ਚੱਲ ਰਹੇ ਸਨ। ਉਹਨਾਂ ਦੇ ਤੁਰ ਜਾਣ ਨਾਲ ਕਲਮੀ ਹਲਕਿਆਂ ਵਿੱਚ ਇੱਕ ਡੂੰਘੀ ਉਦਾਸੀ ਛਾ ਗਈ ਹੈ। ਉਨ੍ਹਾਂ ਦਾ ਅੰਤਿਮ ਸੰਸਕਾਰ ਮਿਤੀ 12 ਦਸੰਬਰ ਨੂੰ ਦੁਪਹਿਰੇ ਤਿੰਨ ਵਜੇ ਮੁਹਾਲੀ ਸ਼ਮਸ਼ਾਨਘਾਟ ਵਿਖੇ ਕੀਤਾ ਗਿਆ  ਜਿੱਥੇ ਉਹਨਾਂ ਦੇ ਸੱਜਣਾਂ ਮਿੱਤਰਾਂ ਅਤੇ ਰਿਸ਼ਤੇਦਾਰਾਂ ਨੇ ਵੱਡੀ ਗਿਣਤੀ ਵਿੱਚ ਭਾਗ ਲਿਆ। ਉਹਨਾਂ ਦੇ  ਨੇੜੇ ਰਹੇ ਪੱਤਰਕਾਰ ਰੈਕਟਰ ਕਥੂਰੀਆ ਨੇ ਦੱਸਿਆ ਕਿ  ਹੱਥ ਮੁੜ ਮੁੜ ਮੋਬਾਈਲ ਫੋਨ ਵੱਲ ਜਾਂਦਾ ਹੈ ਪਰ ਫਿਰ ਰੁਕ ਜਾਂਦਾ ਹੈ।  ਪੁੱਛਦਾ ਹੈ ਹੁਣ ਕਿਸ ਨੂੰ ਕਰਨਾ ਹੈ ਫੋਨ? ਉੱਥੇ ਜਾ ਕੇ ਕੌਣ ਪਰਤਦਾ ਹੈ? ਕਿਓਂ ਨਹੀਂ ਸਮਾਂ ਕੱਢਿਆ ਇੱਕ ਵਾਰ ਹੋਰ ਮਿਲਣ ਦਾ? ਦਿਲ ਬਹੁਤ ਉਦਾਸ ਹੈ। ਜ਼ਿੰਦਗੀ ਦੇ ਝਮੇਲੇ ਸਾਨੂੰ ਕਿੰਨਾ ਬੇਬਸ ਕਰ ਦੇਂਦੇ ਹਨ।  ਕਾਸ਼ ਉਸ ਦੁਨੀਆ ਵਿੱਚ ਵੀ ਕੋਈ ਮੋਬਾਈਲ ਸੰਪਰਕ ਹੁੰਦਾ! ਕਾਸ਼ੀ ਅਸੀਂ ਅਚਾਨਕ ਵਿਛੜ ਗਏ ਸੱਜਣਾਂ ਨਾਲ ਕੋਈ ਵੀਡੀਓ ਕਾਲ ਹੀ ਕਰ ਸਕਦੇ! ਉਨ੍ਹਾ  ਦੀ ਰਿਹਾਇਸ਼ ਦਾ ਪਤਾ ਹੈ -ਕੋਠੀ ਨੰਬਰ 3602 ਸੈਕਟਰ -69 , ਮੁਹਾਲੀ। ਪੀਪਲਜ਼ ਮੀਡੀਆ ਲਿੰਕ ਦੀ ਇਸ ਸੋਗ ਸਭਾ ਵਿੱਚ ਐਮ ਐਸ ਭਾਟੀਆ, ਪ੍ਰਦੀਪ ਸ਼ਰਮਾ ਇਪਟਾ, ਕਾਰਤਿਕਾ ਸਿੰਘ , ਰੈਕਟਰ ਕਥੂਰੀਆ ਅਤੇ ਹੋਰਨਾਂ ਨੇ ਵੀ ਭਾਗ ਲਿਆ। 

ਸਿਰਜਣਧਾਰਾ ਦੀ ਵਿਸ਼ੇਸ਼ ਬੈਠਕ ਵਿੱਚ ਪੰਜਾਬੀ ਦੀ ਚਰਚਾ

ਪ੍ਰਧਾਨ ਅਜੀਤ ਸਿੰਘ ਨੂੰ ਮੁੱਖ ਮਹਿਮਾਨ ਬਣਾਇਆ

ਲੁਧਿਆਣਾ: 1 ਦਸੰਬਰ 2019: (ਗੁਰਮੀਤ ਸਿੰਘ ਸੀਤਲ//ਸਾਹਿਤ ਸਕਰੀਨ):: 

ਸਿਰਜਨਧਾਰਾ ਦੀ ਮਾਸਿਕ ਇੱਕਤਰਤਾ 30 ਨਵੰਬਰ ਦਿਨ ਸ਼ਨੀਵਾਰ ਨੂੰ ਸ. ਕਰਮਜੀਤ ਸਿੰਘ ਔਜਲਾ ਦੀ ਪ੍ਰਧਾਨਗੀ ਹੇਠ ਪੰਜਾਬੀ ਭਵਨ ਵਿਖੇ ਹੋਈ । ਸ਼੍ਰੀ ਗੁਰੁ ਗੋਬਿੰਦ ਸਿੰਘ ਸਟੱਡੀ ਸਰਕਲ ਦੇ ਪ੍ਰਧਾਨ ਅਜੀਤ ਸਿੰਘ ਜੀ ਨੂੰ ਮੁੱਖ ਮਹਿਮਾਨ ਬਣਾਇਆ ਗਿਆ। ਸੱਭ ਨੂੰ ਜੀ ਆਇਆਂ ਆਖਦਿਆਂ ਮੰਚ ਸਚਾਲਕ ਗੁਰਨਾਮ ਸਿੰਘ ਸੀਤਲ ਨੇ ਸ੍ਰੀ ਮਿੱਤਰ ਸੈਨ ਮੀਤ ਨੂੰ ਦਰਖਾਸਤ ਕੀਤੀ ਕਿ ਆਪ ਪੰਜਾਬੀ ਭਾਸ਼ਾ ਪਸਾਰ ਭਾਈਚਾਰਾ-ਕਨੇਡਾ ਵਫਦ ਦੇ ਮੈਂਬਰਾਂ ਦੀ ਜਾਣ ਪਛਾਣ ਕਰਾਉਣ ਅਤੇ ਚੱਲ ਰਹੀਆਂ ਗਤੀ ਵਿਧੀਆਂ ਬਾਰੇ ਜਾਣਕਾਰੀ ਦੇਣ। 

ਸੱਭ ਤੋਂ ਪਹਿਲਾਂ ਮੀਤ ਸਾਹਬ ਨੇ ਦੱਸਿਆ ਪੰਜਾਬੀ ਭਾਸ਼ਾ ਪਸਾਰ ਭਾਈਚਾਰਾ ਨੇ 10 ਚਿੱਠੀਆਂ ਮੁੱਖ ਮੰਤਰੀ ਪੰਜਾਬ ਨੂੰ ਲਿਖੀਆਂ। ਲਗਾਤਾਰ ਕੋਸ਼ਿਸ਼ਾਂ ਸਦਕਾ ਪੰਜਾਬ ਸਰਕਾਰ ਨੇ ਇਹ ਮੰਨਿਆ ਕਿ ਸਰਕਾਰੀ ਕੰਮ ਕਾਜ ਵਿਚ ਪੰਜਾਬੀ ਦੀ ਵਰਤੋਂ ਠੀਕ ਢੰਗ ਨਾਲ ਨਹੀਂ ਹੋ ਰਹੀ। ਪੰਜਾਬ ਰਾਜ ਭਾਸ਼ਾ ਐਕਟ 1967 ਦੀਆਂ ਵਿਵਸਥਾਵਾਂ ਨੂੰ ਹੁਣ ਸਖਤੀ ਨਾਲ ਲਾਗੂ ਕੀਤਾ ਜਾਵੇਗਾ। ਇਸ ਮੰਤਵ ਦੀ ਪੂਰਤੀ ਲਈ ਪੰਜਾਬ ਸਰਕਾਰ ਵਲੋਂ ਇਕ ਨਵਾਂ ਹੁੰਕਮ 25 ਨਵੰਬਰ 2019 ਨੂੰ ਜਾਰੀ ਕੀਤਾ ਗਿਆ ਹੈ। 

ਵਫਦ ਦੇ ਪ੍ਰਧਾਨ ਸ. ਦਵਿੰਦਰ ਸਿੰਘ ਦੱਸਿਆ ਕਿ 1978 ਤੱਕ ਭਾਰਤ ਸਰਕਾਰ ਨੇ ਸਿੱਖਾਂ ਨੂੰ ਬਾਹਰਲੇ ਮੁਲਕਾਂ ਵਿਚ ਬਦਨਾਮ ਕਰਕੇ ਰੱਖਿਆ ਕਿ ਇਹ ਅਤਿਵਾਦੀ ਹਨ-ਨਤੀਜਾ ਸਿੱਖ ਨੇ ਵਾਲ ਕਟਵਾ ਕੇ ਰਹਿਣਾ ਸ਼ੁਰੂ ਕੀਤਾ। ਉਪਰੰਤ ਬਹਿਸ ਦਾ ਦੌਰ ਚੱਲਿਆ ਅਤੇ ਫੇਰ ਸੰਗੀਤ ਦਾ ਬੋਲਬਾਲਾ ਹੋਇਆ। ਇਹ ਸਾਰੇ ਤੰਤਰ  ਸਿੱਖਾਂ ਨੂੰ ਹੀ ਨਹੀਂ ਪੰਜਾਬੀ ਨੂੰ ਵੀ ਢਾਹ ਲਾਉਣ ਵਾਲੇ ਸਿੱਧ ਹੋਏ। ਸ੍ਰੀ ਮਤੀ ਗੁਰਚਰਨ ਕੋਰ ਥਿੰਦ ਨੇ ਬੜੀ ਹੀ ਰੋਚਕ ਜਾਣਕਾਰੀ ਦਿੱਤੀ ਕਿ ਕਨੇਡਾ ਵਿਚ ਪੰਜਾਬੀ ਤੀਸਰੀ ਭਾਸ਼ਾ ਵਜੋਂ ਲਾਗੂ ਕਰ ਦਿੱਤੀ ਗਈ ਹੈ ਜਿਸ ਨੇ ਪੰਜਾਬ ਸਰਕਾਰ ਦੀ ਅੱਖ ਹੀ ਨਹੀਂ, ਸਿਰ ਵੀ ਨੀਵਾਂ ਕਰ ਦਿੱਤਾ। ਪੰਜਾਬੀ ਭਾਸ਼ਾ ਪਸਾਰ ਭਾਈਚਾਰਾ-ਕਨੇਡਾ ਵਲੋਂ ਮੁੱਖ ਮੰਤਰੀ ਪੰਜਾਬ ਅਤੇ ਸ਼੍ਰੋ. ਗੁਰਦੁਆਰਾ ਪ੍ਰੰਬਧਕ ਕਮੇਟੀ ਨੂੰ ਪੰਜਾਬੀ ਨਾਲ ਹੋਣ ਵਾਲੀ ਦੁਰਗਤੀ ਬਾਰੇ ਪੱਤਰ ਲਿਖੇ।

ਅੱਜ ਦੀ ਇੱਕਤਰਤਾ ਵਿਸ਼ੇਸ਼ ਤੌਰ ਤੇ ਪੰਜਾਬੀ ਭਾਸ਼ਾ ਪਸਾਰ ਭਾਈਚਾਰਾ ਸੀ ਜਿਸ ਉਦਮਾਂ ਦੇ ਪ੍ਰਭਾਵ ਪੂਰਣ ਯਤਨਾ ਸਦਕਾ ਸਾਰੇ ਸਰਕਾਰੀ ਅਦਾਰਿਆਂ ਵਿਚ ਖਤੋ-ਖਿਤਾਬ ਮਾਤਰ ਭਾਸ਼ਾ ਵਿਚ ਕਰਨ ਲਈ ਜ਼ਾਰੀ ਲਈ ਸਖਤ ਪਹਿਲ ਕਦਮੀ ਕੀਤੀ  ਗਈ ਹੈ । ਪ੍ਰਾਂਤ ਦੇ ਲੋਕਾਂ ਦੀ ਸ਼ਖਸ਼ੀਅਤ ਦਾ ਮਿਆਰ ਉਥੋਂ ਦੀ ਮਾਤਰ ਭਾਸ਼ਾ ਤੇ ਨਿਰਭਰ ਕਰਦਾ ਹੈ। ਪਰ ਬੜੀ ਹੀ ਤਰਾਸਦੀ ਦੀ ਗੱਲ ਹੈ ਕਿ ਸਮੇ ਦੀਆਂ ਹਕੂਮਤਾਂ ਨੇ ਪੰਜਾਬੀ ਨਾਲ ਵਿਸ਼ੇਸ਼ ਤੌਰ ਤੇ ਧੱਕਾ ਕੀਤਾ।ਇਕ ਹੋਰ ਦਿਲਚਸਪ ਖਬਰ ਮੁਤਾਬਿਕ ਕੇਂਦਰ ਦੀਆਂ ਨੌਕਰੀਆਂ ਦੇ ਟੈਸਟ ਜੋ ਸਿਰਫ ਹਿੰਦੀ ਅਤੇ ਅੰਗਰੇਜ਼ੀ ਵਿਚ ਸੀ, ਹੁਣ ਪੰਜਾਬੀ ਵਿਚ ਵੀ ਹੋਇਆ ਕਰਨਗੇ।

ਸ਼੍ਰੀ ਪਰਦੀਪ ਸ਼ਰਮਾ ਅਤੇ ਗੁਰਸੇਵਕ ਸਿੰਘ ਮਦਰੱਸਾ ਜੋ ਕਿ ਰੰਗ-ਮੰਚ ਅਤੇ ਕੋਰੀੳਗਰਾਫੀ ਨਾਲ ਜੁੜੇ ਹੋਏ ਹਨ, ਬੜੀਆਂ ਰੋਚਕ ਗੱਲਾਂ ਕੀਤੀਆਂ ਕਿ ਕਿਵੇਂ ਸ਼੍ਰੋ. ਗੁਰਦੁਆਰਾ ਪ੍ਰੰਬਧਕ ਕਮੇਟੀ ਦੇ ਹੀ ਸਕੂਲ ਪੰਜਾਬੀ ਨਾਲ ਰੱਜ ਕੇ ਵਿਤਕਰਾ ਕਰ ਰਹੇ ਹਨ। ਉਥੇ ਇਕ ਦੱਸਵੀਂ ਦੀ ਕੁੜੀ ਨੂੰ ਇਹ ਵੀ ਨਹੀਂ ਸੀ ਪਤਾ ਕਿ ਹੀਰ ਕੋਣ ਸੀ ਅਤੇ ਮੁੰਡਿਆਂ ਨੂੰ ਨਹੀਂ ਸੀ ਪਤਾ ਪੰਤਦਰ ਕੋਣ ਹੁੰਦਾ ਹੈ।

ਅਖੀਰ ਵਿਚ ਸ਼੍ਰੀ ਅਮਰਜੀਤ ਸ਼ੇਰਪੂਰੀ ਨੇ ਗੀਤ ਪੇਸ਼ ਕੀਤਾ: ਮਿੱਠੀਆਂ ਲੋਰੀਆਂ ਮਿਲੀਆਂ ਵਿਚ ਪੰਜਾਬੀ ਦੇ ॥ ਅਤੇ ਗੁਰਨਾਮ ਸਿੰਘ ਸੀਤਲ : ਮੈਂ ਤਾਂ ਗੁਰੂਆਂ ਪੀਰਾਂ ਦੇ ਹੱਥ ਕੰਵਲਾਂ ਚ ਪਲੀ ਹਾਂ।   

 ਸਭਾ ਵਿਚ ਹੋਰ ਹਾਜਰ ਸੱਜਣ ਸਨ : ਸੀਨੀਅਰ ਮੀਤ ਪ੍ਰਧਾਨ ਸ਼੍ਰੀ ਦਵਿੰਦਰ ਸਿੰਘ ਸ਼ੇਖਾ, ਸ਼੍ਰੀ ਸੁਖਦੇਵ ਸਿੰਘ ਲਾਜ, ਹਰਬਖਸ਼ ਸਿੰਘ ਗਰੇਵਾਲ, ਸ. ਸੁਰਜਨ ਸਿੰਘ, ਹਰਭਜਨ ਸਿੰਘ ਫਲਵਾਲਦੀ, ਨਵਜੋਤ ਸਿੰਘ, ਹਰਭਜਨ ਸਿੰਘ ਕੋਹਲੀ, ਸਪੂੰਰਣ ਸਨਮ, ਪਰਮਿੰਦਰ ਅਲਬੇਲਾ, ਗੁਰਭੇਜ  ਸਿੰਘ, ਬਲਵੀਰ ਸਿੰਘ ਜੈਸਵਾਲ, ਰੈਕਟਰ ਕਥੂਰੀਆ, ਸਰਬਜੀਤ ਸਿੰਘ ਮਾਨ, ਸਰਬਜੀਤ ਸਿੰਘ ਵਿਰਦੀ , ਆਰ ਪੀ ਸਿੰਘ, ਅਤੇ ਪੰਜਾਬੀ ਭਾਸ਼ਾ ਪਸਾਰ ਭਾਈਚਾਰਾ- ਕਨੇਡਾ ਤੋਂ ਸ. ਜੋਗਿੰਦਰ ਸਿੰਘ, ਸੁਖਵਿੰਦਰ ਸਿੰਘ ਥਿੰਦ, ਸ੍ਰੀ ਮਤੀ ਗੁਰਚਰਨ ਕੋਰ ਥਿੰਦ 

ਅੰਤ ਵਿਚ ਸਕੱਤਰ ਵਲੋਂ ਹਾਜ਼ਰੀਨ ਸ਼ਖਸ਼ੀਅਤਾਂ ਨੂੰ ਜੀ ਆਇਆਂ  ਕਹਿ ਕੇ ਧੰਨਵਾਦ ਕੀਤਾ।  

ਰਾਮਪੁਰ ਸਭਾ ਵੱਲੋਂ ਇਕੱਤਰਤਾ ਪਹਿਲੀ ਦਸੰਬਰ ਨੂੰ

Nov 28, 2019, 3:34 PM

ਸੁਖਮਿੰਦਰ ਰਾਮਪੁਰੀ (ਕਨੇਡਾ) ਵਿਸ਼ੇਸ਼ ਤੌਰ ‘ਤੇ ਹੋਣਗੇ ਸ਼ਾਮਲ

ਦੋਰਾਹਾ//ਰਾਮਪੁਰ: 28 ਨਵੰਬਰ 2019:(ਰੈਕਟਰ ਕਥੂਰੀਆ//ਸਾਹਿਤ ਸਕਰੀਨ)::  

ਜਿਹਨਾਂ ਸਾਹਿਤਿਕ ਸੰਸਥਾਵਾਂ ਅਤੇ ਜੱਥੇਬੰਦੀਆਂ ਨੇ ਸਾਹਿਤਿਕ ਸਰਗਰਮੀਆਂ ਨੂੰ ਨਿਰੰਤਰ ਜਾਰੀ ਰੱਖਿਆ ਹੋਇਆ ਹੈ ਉਹਨਾਂ ਵਿੱਚ ਰਾਮਪੁਰ ਦੀ ਸਾਹਿਤਿਕ ਜੱਥੇਬੰਦੀ "ਲਿਖਾਰੀ ਸਭ ਰਾਮਪੁਰ" ਵੀ ਸ਼ਾਮਲ ਹੈ। ਕਈ ਦਹਾਕਿਆਂ ਤੋਂ ਇਸੇ ਤਰਾਂ ਸਰਗਰਮ ਰਹਿਣ ਵਾਲੀ ਇਹ ਲਿਖਾਰੀ ਸਭਾ ਪੰਜਾਬ ਦੇ ਕਾਲੇ ਸਮੇਂ ਦੌਰਾਨ ਉਦੋਂ ਵੀ ਸਰਗਰਮ ਰਹੀ ਜਦੋਂ ਸਿਰਫ ਏਕੇ-47 ਦੀਆਂ ਗੋਲੀਆਂ ਹੀ ਬੋਲਦੀਆਂ ਸਨ ਤੇ ਬਾਕੀ ਸਾਰੇ ਚੁੱਪ ਹੋ ਗਏ ਸਨ।ਇਸ ਸਾਹਿਤਿਕ ਸੰਸਥਾ ਦੇ ਮੈਂਬਰਾਂ ਨੇ ਉਦੋਂ ਵੀ ਸਿਰ ਚੁੱਕ ਕੇ ਬੋਲਣਾ ਜਾਰੀ ਰੱਖਿਆ। ਭਾਵੇਂ ਗੁਰਚਰਨ ਰਾਮਪੁਰੀ ਹੁਰਾਂ ਦੀ ਗੱਲ ਕਰੀਏ ਤੇ ਭਾਵੇਂ ਸੁਖਮਿੰਦਰ ਰਾਮਪੁਰੀ ਜਾਂ ਸੁਰਿੰਦਰ ਰਾਮਪੁਰੀ ਹੁਰਾਂ ਦਿਤੇ ਭਾਵੇਂ ਮੱਲ ਸਿੰਘ ਰਾਮਪੁਰੀ ਦੀ-ਇਹ ਸਾਰੇ ਉਦੋਂ ਵੀ ਸੱਚ ਬੋਲਣ ਦੇ ਮਾਮਲੇ ਵਿੱਚ ਡਟੇ ਰਹੇ। ਪੀਪਲਜ਼ ਮੀਡੀਆ ਲਿੰਕ ਵੱਲੋਂ ਇਸ ਸਬੰਧੀ ਤਿਆਰ ਕੀਤੀ ਰਿਪੋਰਟ ਵੀ ਜਲਦੀ ਹੀ ਸਭਨਾਂ ਦੇ ਸਾਹਮਣੇ ਲਿਆਂਦੀ ਜਾਵੇਗੀ। ਪੰਜਾਬ ਦਾ ਉਹ ਦੌਰ ਦੇਖਣ ਅਤੇ ਹੱਡੀਂ ਹੰਢਾਉਣ ਵਾਲੀ ਇਸ ਪੀੜ੍ਹੀ ਨੇ ਨਵੀਂ ਪੀੜ੍ਹੀ ਨੂੰ ਇਹਨਾਂ ਰਾਹਾਂ 'ਤੇ ਤੁਰਨਾ ਸਿਖਾਇਆ ਹੈ। ਪੀਪਲਜ਼ ਮੀਡੀਆ ਲਿੰਕ ਇਹਨਾਂ ਨਵੀਂ ਪੀੜ੍ਹੀ ਦੇ ਮੈਂਬਰਾਂਸ਼ਾਇਰਾਂ/ਲੇਖਕਾਂ ਬਾਰੇ ਵੀ ਆਪਣੀ ਰਿਪੋਰਟ ਵਿੱਚ ਵਿਸਥਾਰ ਨਾਲ ਦੱਸੇਗਾ। 

ਪੰਜਾਬੀ ਲਿਖਾਰੀ ਸਭਾ ਰਾਮਪੁਰ ਵੱਲੋਂ ਦਸੰਬਰ ਮਹੀਨੇ ਦੀ ਇਕੱਤਰਤਾ ਇਸ ਵਾਰ ਪਹਿਲੀ ਦਸੰਬਰ, ਐਤਵਾਰ ਨੂੰ ਹੋਵੇਗੀ। ਇਸ ਦੇ ਬਾਰੇ ਜਾਣਕਾਰੀ ਦਿੰਦੇ ਹੋਏ ਸਭਾ ਦੇ ਪ੍ਰਧਾਨ ਜਸਵੀਰ ਝੱਜ, ਮੀਤ ਪ੍ਰਧਾਨ ਲਾਭ ਸਿੰਘ ਬੇਗੋਵਾਲ਼ ਅਤੇ ਜਨਰਲ ਸਕੱਤਰ ਬਲਵੰਤ ਮਾਂਗਟ ਨੇ ਦੱਸਿਆ ਕਿ ਸਭਾ ਦੀ ਇੱਕਤ੍ਰਤਾ ਲਾਈਬ੍ਰੇਰੀ ਹਾਲ ਵਿਖੇ ਸਵੇਰੇ 10 ਵਜੇ ਅਰੰਭ ਹੋ ਜਾਏਗੀ। ਇਸ ਇੱਕਤਰਤਾ ਵਿਚ ਪ੍ਰਮੁੱਖ ਲੇਖਕ ਜਨਾਬ ਸੁਖਮਿੰਦਰ ਰਾਮਪੁਰੀ (ਕਨੇਡਾ) ਮੁੱਖ ਮਹਿਮਾਨ ਵਜੋਂ ਸ਼ਾਮਲ ਹੋਣਗੇ। ਇਸ ਸਮੇਂ ਪੰਜਾਬ ਦੇ ਨਾਮਵਰ ਸਾਹਿਤਕਾਰਾਂ ਸਮੇਤ ਇਲਾਕੇ ਦੇ ਸਾਹਿਤਕਾਰ ਆਪਣੀਆਂ ਤਾਜ਼ਾ ਰਚਨਾਵਾਂ ਸਾਂਝੀਆਂ ਕਰਨਗੇ, ਜਿੰਨ੍ਹਾਂ ਉੱਪਰ ਰਚਨਾਕਾਰਾਂ ਸਮੇਤ ਹਾਜ਼ਰ ਸਾਹਿਤ ਪ੍ਰੇਮੀ ਪੜਚੋਲ਼ ਕਰਦੇ ਹੋਏ ਆਪਣੀ ਰਾਏ ਦੇਣਗੇ। ਕੁਲ ਮਿਲਾ ਕੇ ਇਸ ਵਾਰ ਦੀ ਮੀਟਿੰਗ ਵੀ ਯਾਦਗਾਰੀ ਰਹੇਗੀ।       ਅੰਤ ਵਿੱਚ ਸੁਖਮਿੰਦਰ ਰਾਮਪੁਰੀ ਹੁਰਾਂ ਦੀ ਸ਼ਾਇਰੀ ਦੀ ਝਲਕ ਦੇਂਦੀਆਂ ਉਹਨਾਂ ਦੀਆਂ  ਹੀ ਕੁਝ ਕਾਵਿ ਸਤਰਾਂ:

ਖਾਬਾਂ ਨੂੰ ਅਮਲ ਵਿੱਚ ਨੇ‎,‎ ਜੋ ਲੋਕ ਢਾਲਦੇ।
ਹੁੰਦੇ ਨੇ ਅਸਲ ਵਿੱਚ ਉਹ‎,‎ ਬੰਦੇ ਕਮਾਲ ਦੇ।
                      ਦਿਲ ਦਾ ਲਹੂ ਹਨ੍ਹੇਰ ਵਿੱਚ‎,‎ ਜਿਹੜੇ ਨੇ ਬਾਲਦੇ।
                      ਉਹ ਜਿੰਦਗੀ ਦਾ ਅਸਲ ਵਿੱਚ‎,‎ ਨੇ ਧਰਮ ਪਾਲਦੇ।

ਪੰਜਾਬੀ ਕਵੀ ਤੇ ਪੀ ਏ ਯੂ ਵਿਗਿਆਨੀ ਡਾ: ਸੁਖਚੈਨ ਮਿਸਤਰੀ ਸੁਰਗਵਾਸ

Oct 28, 2019, 7:17 PM

ਅੰਤਿਮ ਸੰਸਕਾਰ 29 ਜਾਂ 30 ਅਕਤੂਬਰ ਨੂੰ ਹੋਵੇਗਾ

ਲੁਧਿਆਣਾ: 28 ਅਕਤੂਬਰ 2019: (ਸਾਹਿਤ ਸਕਰੀਨ ਬਿਊਰੋ)::

ਪੰਜਾਬ ਖੇਤੀ ਯੂਨੀਵਰਸਿਟੀ ਦੇ ਸੇਵਾ ਮੁਕਤ ਸੀਨੀਅਰ ਪਲਾਂਟ ਬਰੀਡਰ ਤੇ ਪੰਜਾਬੀ ਕਵੀ ਡਾ: ਸੁਖਚੈਨ ਸਦੀਵੀ ਅਲਵਿਦਾ ਕਹਿ ਗਏ।

ਪਿੰਡ ਗੋਸਲਾਂ (ਨੇੜੇ ਮਲੌਦ) ਦੇ ਜੰਮਪਲ ਡਾ: ਸੁਖਚੈਨ ਪੰਜਾਬ ਖੇਤੀ ਯੂਨੀਵਰਸਿਟੀ ਦੇ ਵਿਦਿਆਰਥੀ ਸਨ ਅਤੇ ਇਥੇ ਹੀ ਪੂਰੀ ਉਮਰ ਪੜ੍ਹਾਇਆ ਤੇ ਪਲਾਂਟ ਬਰੀਡਿੰਗ ਚ ਖੋਜ ਕਾਰਜ ਕੀਤੇ।

ਡਾ: ਸੁਰਜੀਤ ਪਾਤਰ ਤੇ ਡਾ: ਚਮਨ ਲਾਲ ਦੇ ਸਹਿਯੋਗ ਨਾਲ ਵਰਤਮਾਨ ਦੇ ਰੂਬਰੂ ਪੁਸਤਕ ਸੰਪਾਦਿਤ ਕੀਤੀ।

1976 ਚ ਉਸ ਦਾ ਪਹਿਲਾ ਮੌਲਿਕ ਕਾਵਿ ਸੰਗ੍ਰਹਿ ਮਿੱਟੀ ਦਾ ਮੋਰ ਉਨ੍ਹਾਂ ਦੇ ਮਿੱਤਰ ਡਾ: ਗੁਰਸ਼ਰਨ ਰੰਧਾਵਾ ਨੇ ਸੰਪਾਦਿਤ ਕੀਤਾ ਸੀ। ਦੂਜਾ ਕਾਵਿ ਸੰਗ੍ਰਿਹ ਘਰ ਸੀ। ਡਾ: ਸਤਿੰਦਰ ਬਜਾਜ ਦੀਆਂ ਅੰਗਰੇਜ਼ੀ ਕਵਿਤਾਵਾਂ ਦਾ ਸੰਗ੍ਰਹਿ ਹੁਨਾਲੀ ਧੁੱਪ ਨਾਮ ਹੇਠ ਪੰਜਾਬੀ ਚ ਅਨੁਵਾਦ ਕੀਤੀ।

ਇਹ ਜਾਣਕਾਰੀ ਦਿੰਦਿਆਂ ਡਾ: ਸੁਰਜੀਤ ਪਾਤਰ ਨੇ ਦੱਸਿਆ ਕਿ ਡਾ: ਸੁਖਚੈਨ ਦੇ ਸਪੁੱਤਰ ਗਗਨ ਦੇ ਬੈਂਗਲੌਰ ਤੋਂ ਪੁੱਜਣ ਤੇ ਹੀ ਸੰਭਾਵੀ ਤੌਰ ਤੇ 29 ਜਾਂ 30 ਅਕਤੂਬਰ ਨੂੰ ਅੰਤਿਮ ਸੰਸਕਾਰ ਕੀਤਾ ਜਾਵੇਗਾ।

ਪੰਜਾਬ ਆਰਟਸ ਕੌਸਲ ਦੇ ਚੇਅਰਮੈਨ ਡਾ: ਸੁਰਜੀਤ ਪਾਤਰ, ਸਕੱਤਰ ਜਨਰਲ ਡਾ: ਲਖਵਿੰਦਰ ਜੌਹਲ, ਪੰਜਾਬੀ ਸਾਹਿਤ ਅਕਾਡਮੀ ਲੁਧਿਆਣਾ ਦੇ ਸਾਬਕਾ ਪ੍ਰਧਾਨ ਪ੍ਰੋ. ਗੁਰਭਜਨ ਸਿੰਘ ਗਿੱਲ, ਪ੍ਰਧਾਨ ਪ੍ਰੋ: ਰਵਿੰਦਰ ਸਿੰਘ ਭੱਠਲ, ਪ੍ਰਿੰਸੀਪਲ ਪ੍ਰੇਮ ਸਿੰਘ ਬਜਾਜ, ਕੇਂਦਰੀ ਪੰਜਾਬੀ ਲੇਖਕ ਸਭਾ ਦੇ ਪ੍ਰਧਾਨ ਦਰਸ਼ਨ ਬੁੱਟਰ, ਡਾ: ਫਕੀਰ ਚੰਦ ਸ਼ੁਕਲਾ, ਹਰਬੰਸ ਮਾਲਵਾ, ਗੁਰਚਰਨ ਕੌਰ ਕੋਚਰ, ਡਾ: ਗੁਰਸ਼ਰਨ ਰੰਧਾਵਾ, ਇੰਦਰਜੀਤ ਕੌਰ ਭਿੰਡਰ, ਕਹਾਣੀਕਾਰ ਸੁਖਜੀਤ,ਰਾਗ ਮੈਗਜ਼ੀਨ ਦੇ ਸੰਪਾਦਕ ਅਜਮੇਰ ਸਿੱਧੂ, ਜਸਵੰਤ ਜਫ਼ਰ ਡਾ. ਗੁਰਇਕਬਾਲ ਸਿੰਘ, ਸਹਿਜਪ੍ਰੀਤ ਸਿੰਘ ਮਾਂਗਟ,ਮਨਜਿੰਦਰ ਸਿੰਘ ਧਨੋਆ, ਡਾ. ਜਗਵਿੰਦਰ ਜੋਧਾ, ਤ੍ਰੈਲੋਚਨ ਲੋਚੀ, ਡਾ: ਅਨਿਲ ਸ਼ਰਮਾ, ਨਿੰਦਰ ਘੁਗਿਆਣਵੀ , ਡਾ: ਗੁਲਜ਼ਾਰ ਪੰਧੇਰ,ਡਾ: ਦੇਵਿੰਦਰ ਦਿਲਰੂਪ, ਡਾ: ਸ ਨ ਸੇਵਕ ਨੇ ਵੀ ਡਾ: ਸੁਖਚੈਨ ਮਿਸਤਰੀ ਦੇ ਦੇਹਾਂਤ ਤੇ ਡੂੰਘੇ ਅਫ਼ਸੋਸ ਦਾ ਪ੍ਰਗਟਾਵਾ ਕੀਤਾ ਹੈ।
ਡਾਕਟਰ ਸੁਖਚੈਨ ਮਿਸਤਰੀ ਹੁਰਾਂ ਦੇ ਕੁਝ ਅਹਿਸਾਸ 
“ਬੱਚਾ ਜਲਦੀ ਜਲਦੀ ਵੱਡਾ ਹੁੰਦਾ ਹੈ।
ਸਕੂਲ ਉਹਦੇ ਸੁਫਨਿਆਂ ਨੂੰ ਫਰੇਮ ਕਰਦਾ ਹੈ।
ਅਧਿਆਪਕਾਵਾਂ ਬੱਚੇ ਨੂੰ ਦੱਸਦੀਆਂ ਨੇ-
ਆਦਮੀ ਸਮੁੰਦਰ ਨਹੀਂ ਹੁੰਦਾ,
ਸਗੋਂ ਬਾਰ੍ਹਾਂ ਜਰਬ ਬਾਰ੍ਹਾਂ ਦਾ ਕਮਰਾ ਹੁੰਦਾ ਹੈ,
ਮੁਹੱਬਤ ਗੁਨਾਹ ਹੈ
ਬੱਚਾ ਰਿਸ਼ਤਿਆਂ ਅਤੇ ਘਟਨਾਵਾਂ ਦੇ ਤੌਰ ਤਰੀਕਿਆਂ ਦੇ
ਜੰਗਲ ਵਿਚ ਜਕੜ ਦਿੱਤਾ ਗਿਆ ਹੈ
ਬੱਚਾ ਸੋਚਦਾ ਹੈ ਰੁੱਖਾਂ ਦੇ ਸਿਰਾਂ ‘ਤੇ ਨੱਚਦੇ
ਚੰਨ ਦੇ ਸੁਫਨੇ ਸਿਰਫ ਜੰਗਲ ਲੈਂਦਾ ਹੈ।”

ਰੂਪ ਦੀਆਂ ਲਿਖਤਾਂ ਹਨ ਲੋਕ ਅਵਾਜ਼ – ਬੀਰ ਦਵਿੰਦਰ ਸਿੰਘ

Whats app: Monday:21st  October  2019: 11:37 AM 

ਰਿਪੁਦਮਨ ਸਿੰਘ ਰੂਪ ਦੇ ਕਾਵਿ ਸੰਗ੍ਰਹਿ “ਲਾਲਗੜ੍ਹ” ਤੇ ਕਹਾਣੀ ਸੰਗ੍ਰਹਿ “ਦਿਲ ਦੀ ਅੱਗ” ਦਾ ਹੋਇਆ ਲੋਕ ਅਰਪਣ

ਚੰਡੀਗੜ੍ਹ: 21 ਅਕਤੂਬਰ 2019: (ਸੰਜੀਵਨ ਸਿੰਘ//ਸਾਹਿਤ ਸਕਰੀਨ):: 

 ‘ਦਰਦ ਹੂੰ ਇਸਲੀਏ ਬਾਰ ਬਾਰ ਉਠਤਾ ਹੂੰ, ਜ਼ਖਮ ਹੋਤਾ ਤੋ ਕਬ ਕਾ ਭਰ ਗਿਆ ਹੋਤਾ’ ਸ਼ੇਅਰ ਸਾਂਝਾ ਕਰਦਿਆਂ ਪੰਜਾਬ ਦੇ ਸਾਬਕਾ ਡਿਪਟੀ ਸਪੀਕਰ ਸ਼੍ਰੀ ਬੀਰਦਵਿੰਦਰ ਸਿੰਘ ਨੇ ਪ੍ਰਸਿੱਧ ਪੰਜਾਬੀ ਲੇਖਕ ਰਿਪੁਦਮਨ ਸਿੰਘ ਰੂਪ ਦੇ ਨਵ-ਪ੍ਰਕਾਸ਼ਿਤ ਕਾਵਿ ਸੰਗ੍ਰਹਿ “ਲਾਲਗੜ੍ਹ” ਅਤੇ ਕਹਾਣੀ ਸੰਗ੍ਰਹਿ “ਦਿਲ ਦੀ ਅੱਗ” ਦੇ ਲੋਕ ਅਰਪਣ ਮੌਕੇ ਕਿਹਾ ਕਿ ਸ਼੍ਰੀ ਰੂਪ ਦਾ ਲੋਕਾਈ ਪ੍ਰਤੀ ਦਰਦ ਉਹਨਾਂ ਦੀਆਂ ਲਿਖਤਾਂ ਦਾ ਪ੍ਰਮੁੱਖ ਚਿੰਨ੍ਹ ਹੈ। ਉਹਨਾਂ ਕਿਹਾ ਕਿ ਆਪਣੇ ਪਿਤਾ ਪ੍ਰਸਿਧ ਲੋਕ ਕਵੀ ਗਿਆਨੀ ਇਸ਼ਰ ਸਿੰਘ ਦਰਦ ਅਤੇ ਆਪਣੇ ਵੱਡੇ ਵੀਰ ਸ਼ਿਰੋਮਣੀ ਸਹਿਤਕਾਰ ਸ਼੍ਰੀ ਸੰਤੋਖ ਸਿੰਘ ਧੀਰ ਦੀ ਵਿਰਾਸਤ ਨੂੰ ਸ਼੍ਰੀ ਰੂਪ ਪ੍ਰਤੀਬਧੱਤਾ ਅਤੇ ਸ਼ਿਦੱਤ ਨਾਲ ਅੱਗੇ ਵਧਾ ਰਹੇ ਹਨ। ਇਹ ਵਿਚਾਰ ਉਹਨਾਂ ਪੰਜਾਬੀ ਲੇਖਕ ਸਭਾ (ਰਜਿ.) ਚੰਡੀਗੜ੍ਹ ਵੱਲੋਂ ਅੱਜ ਪੰਜਾਬ ਕਲਾ ਭਵਨ, ਸੈਕਟਰ-16, ਚੰਡੀਗੜ੍ਹ ਵਿਖੇ ਕਰਵਾਏ ਗਏ ਸਮਾਗਮ ਦੌਰਾਨ ਸਹਿਤਕਾਰਾਂ, ਕਲਾਕਾਰਾਂ ਅਤੇ ਸਹਿਤ ਪ੍ਰੇਮੀਆਂ ਦੀ ਭਰਵੀਂ ਹਾਜ਼ਰੀ ਵਿੱਚ ਰੱਖੇ।ਜ਼ਿਕਰਯੋਗ ਹੈ ਕਿ ਸ੍ਰੀ ਰੂਪ ਵੱਲੋਂ ਹੁਣ ਤੱਕ ਕਾਵਿ ਸੰਗ੍ਰਹਿ “ਰਾਣੀ ਰੁੱਤ” , ਕਹਾਣੀ ਸੰਗ੍ਰਹਿ “ਬਹਾਨੇ ਬਹਾਨੇ”, “ਓਪਰੀ ਹਵਾ” ਅਤੇ “ਬਦਮਾਸ਼”, ਨਾਵਲ “ ਝੱਖੜਾਂ ਵਿਚ ਝੂਲਦਾ ਰੁੱਖ”, ਲੇਖ ਸੰਗ੍ਰਿਹ “ ਬੰਨੇ ਚੰਨੇ” ਅਤੇ ਸੰਪਾਦਿਤ ਕਾਵਿ ਸੰਗ੍ਰਹਿ “ ਧੂੜ ਹੇਠਲੀ ਕਵਿਤਾ” ਪੰਜਾਬੀ ਸਾਹਿਤ ਦੀ ਝੋਲੀ ਵਿਚ ਪਾਇਆ ਜਾ ਚੁੱਕਾ ਹੈ। ਆਪਣੀ ਸਿਰਜਣ ਪ੍ਰਕਿਰਿਆ ਬਾਰੇ ਸ਼੍ਰੀ ਰੂਪ ਨੇ ਕਿਹਾ ਕਿ ਜੋ ਘਟਨਾ ਮੇਨੂੰ ਪ੍ਰੇਸ਼ਾਨ ਕਰਦੀ ਹੈ ਮੈਂ ਉਸ ਬਾਰੇ ਲਿਖਦਾ ਹਾਂ, ਫੇਰ ਚਾਹੇ ਉਹ ਕਵਿਤਾ ਦੀ ਸ਼ਕਲ ਅਖਤਿਆਰ ਕਰੇ ਜਾਂ ਕਹਾਣੀ ਦੀ।     

ਕਾਵਿ-ਸੰਗ੍ਰਹਿ “ਲਾਲਗੜ੍ਹ” ਬਾਰੇ ਆਪਣੇ ਵਿਚਾਰ ਰੱਖਦਿਆਂ ਸ਼੍ਰੋਮਣੀ ਬਾਲ ਸਾਹਿਤਕਾਰ ਸ਼੍ਰੀ ਮਨਮੋਹਨ ਸਿੰਘ ਦਾਊਂ ਨੇ ਕਿਹਾ ਕਿ ਸ਼੍ਰੀ ਰੂਪ ਦੀਆਂ ਕਵੀਤਾਵਾਂ ਕਸੀਦਾਕਾਰੀ ਅਤੇ ਕਸ਼ੀਦਾਕਾਰੀ ਦਾ ਸੁਮੇਲ ਹਨ ਅਤੇ ਸੰਵੇਦਨਸ਼ੀਲ ਹਨ। ਉਹਨਾਂ ਕਿਹਾ ਕਿ ਬੁਲੰਦਗੀ ਸ਼੍ਰੀ ਰੂਪ ਦੀਆਂ ਕਵਿਤਾਵਾਂ ਦੀ ਖਾਸੀਅਤ ਹੈ। ਕਹਾਣੀ ਸੰਗ੍ਰਹਿ “ਦਿਲ ਦੀ ਅੱਗ” ਬਾਰੇ ਪ੍ਰਸਿੱਧ ਕਵਿਤਰੀ ਸ਼੍ਰੀਮਤੀ ਪਰਮਜੀਤ ਕੌਰ ਸਰਹਿੰਦ ਨੇ ਕਿਹਾ ਕਿ ਸ਼੍ਰੀ ਰੂਪ ਦੀਆਂ ਕਹਾਣੀਆਂ ਜਿੱਥੇ ਔਰਤ-ਮਨ ਦੀਆਂ ਵੇਦਨਾ-ਸੰਵੇਦਨਾਂ ਦੀ ਗੱਲ ਕਰਦੀਆਂ ਹਨ, ਉਥੇ ਸਮਾਜਿਕ ਕਦਰਾਂ ਕੀਮਤਾਂ ਵਿੱਚ ਆਈ ਗਿਰਾਵਟ ਉਤੇ ਕਰਾਰੀ ਚੋਟ ਕਰਦੀਆਂ ਹਨ। ਕੇਂਦਰੀ ਪੰਜਾਬੀ ਲੇਖਕ ਸਭਾ ਦੇ ਜਨਰਲ ਸੱਕਤਰ ਡਾ. ਸੁਖਦੇਵ ਸਿੰਘ ਸਿਰਸਾ ਨੇ ਕਿਹਾ ਕਿ ਸ਼੍ਰੀ ਰੂਪ ਦੀਆਂ ਰਚਨਾਵਾਂ ਅੱਜ ਦੇ ਕਾਲੇ ਦੌਰ ਵਿੱਚ ਅੱਤ ਪ੍ਰਸੰਗਕ ਹਨ। ਇਸ ਮੌਕੇ ਪ੍ਰਸਿਧ ਕਵਿਤਰੀ ਮਨਜੀਤ ਇੰਦਰਾ ਨੇ ਕਿਹਾ ਕਿ ਰੂਪ ਦੀ ਕਵਿਤਾ ‘ਵਸੀਅਤ’ ਉਹਨਾਂ ਦੀ ਨਿਗਰ ਸੋਚ ਅਤੇ ਵਿਰਾਸਤ ਦਾ ਪ੍ਰਤੀਕ ਹਨ ਜੋ ਉਹ ਆਪਣੀਆਂ ਆਉਣ ਵਾਲੀਆਂ ਪੀੜੀਆਂ ਨੂੰ ਦੇਣਾ ਚਾਹੁੰਦੇ ਹਨ। ਰਿਪੁਦਮਨ ਸਿੰਘ ਰੂਪ ਦੇ ਪੋਤਰੇ ਰਿਸ਼ਮ ਰਾਗ ਸਿੰਘ ਨੇ ਕਿਹਾ ਕਿ ਸਾਨੂ ਆਪਣੇ ਸਹਿਤਕ ਵਿਰਸੇ ਅਤੇ ਪ੍ਰੀਵਾਰ ਉੱਤੇ ਮਾਣ ਹੈ।ਪੰਜਾਬੀ ਲੇਖਕ ਸਭਾ (ਰਜਿ.) ਚੰਡੀਗੜ੍ਹ ਦੇ ਪ੍ਰਧਾਨ ਬਲਕਾਰ ਸਿੱਧੂ ਨੇ ਸੱਭਦਾ ਸਵਾਗਤ ਕੀਤਾ ਅਤੇ ਜਨਰਲ ਸੱਕਤਰ ਦੀਪਕ ਸ਼ਰਮਾ ਚਨਾਰਥਲ ਨੇ ਧੰਨਵਾਦ ਕੀਤਾ। ਮੰਚ ਦੀ ਕਾਰਵਾਈ ਡਾ. ਗੁਰਮੇਲ ਸਿੰਘ ਨੇ ਬੜੇ ਹੀ ਭਾਵਪੂਰਤ ਤਰੀਕੇ ਨਾਲ ਕੀਤੀ।  

--------------------------------

ਗੁਹਾਟੀ ਵਿੱਚ ਮਨਾਇਆ ਗਿਆ ਯੁਗ ਕਵੀ ਪ੍ਰੋ. ਮੋਹਨ ਸਿੰਘ ਦਾ ਜਨਮ ਦਿਨ

Monday: Oct 21, 2019, 10:46 AM

ਨਾਨਕਾਇਣ ਨੂੰ 550ਵੇਂ ਪ੍ਰਕਾਸ਼ ਪੁਰਬ ਮੌਕੇ ਹਰ ਘਰ ਵਿੱਚ ਪਹੁੰਚਾਉਣ ਦੀ ਲੋੜ 

ਪ੍ਰੋ. ਮੋਹਨ ਸਿੰਘ ਦਰਿਆ ਦਿਲ ਇਨਸਾਨ ਤੇ ਸੰਵੇਦਨਸ਼ੀਲ ਯੁਗ ਦ੍ਰਸ਼ਟਾ ਕਵੀ ਸੀ---ਡਾ: ਤੇਜਵੰਤ ਸਿੰਘ ਗਿੱਲ

ਗੁਹਾਟੀ: 21 ਅਕਤੂਬਰ 2019: (ਪੰਜਾਬ ਸਕ੍ਰੀਨ ਬਿਊਰੋ)::

ਭਾਰਤੀ ਸਾਹਿੱਤ ਅਕਾਡਮੀ ਨਵੀਂ ਦਿੱਲੀ ਦੇ ਬੁਲਾਵੇ ਤੇ ਗੁਹਾਟੀ(ਆਸਾਮ) ਆਏ ਪੰਜਾਬੀ ਲੇਖਕਾਂ ਨੇ ਬੀਤੀ ਸ਼ਾਮ ਯੁਗ ਕਵੀ ਪ੍ਰੋ: ਮੋਹਨ ਸਿੰਘ ਜੀ ਦਾ 115ਵਾਂ ਜਨਮ ਦਿਨ ਮਨਾਇਆ ਜਿਸ ਦੀ ਪ੍ਰਧਾਨਗੀ ਡਾ. ਦੀਪਕ ਮਨਮੋਹਨ ਸਿੰਘ ਨੇ ਕੀਤੀ।  

ਪ੍ਰੋ. ਮੋਹਨ ਸਿੰਘ ਜੀਵਨ ਤੇ ਕਾਵਿ ਰਚਨਾ ਬਾਰੇ ਚਰਚਾ ਛੇੜਦਿਆਂ ਸਿਰਕੱਢ ਵਿਦਵਾਨ ਡਾ. ਤੇਜਵੰਤ ਸਿੰਘ ਗਿੱਲ ਨੇ ਕਿਹਾ ਕਿ ਉਹ ਦਰਿਆ ਦਿਲ ਇਨਸਾਨ ਤੇ ਅਤਿ ਸੰਵੇਦਨਸ਼ੀਲ ਕਵੀ ਸਨ ਜਿੰਨ੍ਹਾਂ ਨੇ ਸਿਰਫ਼ ਆਪ ਹੀ ਸਾਹਿੱਤ ਸਿਰਜਣਾ ਨਹੀਂ ਕੀਤੀ ਸਗੋਂ  ਨੌਜਵਾਨ ਲੇਖਕਾਂ ਨੂੰ ਵੀ ਪ੍ਰੇਰਨਾ ਦੇ ਕੇ ਸਾਹਿੱਤ ਖੇਤਰ ਚ ਸਰਗਰਮ ਕੀਤਾ। 

ਉਨ੍ਹਾਂ ਦੱਸਿਆ ਕਿ ਪ੍ਰੋ. ਮੋਹਨ ਸਿੰਘ ਜੀ ਨੇ ਆਪਣੀ ਆਖਰੀ ਕਿਤਾਬ ਬੂਹੇ ਦਾ ਮੁੱਖ ਬੰਦ ਮੇਰੇ ਤੋਂ ਸ: ਜਗਦੇਵ ਸਿੰਘ ਜੱਸੋਵਾਲ ਦੇ ਘਰ ਸੁਰਜੀਤ ਪਾਤਰ ਦੀ ਹਾਜ਼ਰੀ ਚ ਇਹ ਕਹਿ ਕੇ ਲਿਖਵਾਇਆ ਕਿ ਮੇਰੀ ਪਹਿਲੀ ਕਿਤਾਬ ਦਾ ਮੁੱਖ ਬੰਦ ਪ੍ਰਿੰਸੀਪਲ ਤੇਜਾ ਸਿੰਘ ਨੇ ਲਿਖੀ ਸੀ ਤੇ ਹੁਣ ਤੇਜਵੰਤ ਸਿੰਘ ਲਿਖੇਗਾ। 

ਇਹ ਗੱਲ ਵੀ ਮਹੱਤਵ ਪੂਰਨ ਸੀ ਕਿ ਪ੍ਰੋ: ਮੋਹਨ ਸਿੰਘ ਆਪਣੇ ਸਮਕਾਲੀਆਂ ਲਈ ਵੀ ਹਮੇਸ਼ਾਂ ਸਹਿਯੋਗੀ ਧਿਰ ਬਣੇ। 

ਡਾ. ਦੀਪਕ ਮਨਮੋਹਨ ਸਿੰਘ ਨੇ ਕਿਹਾ ਕਿ ਪ੍ਰੋ. ਮੋਹਨ ਸਿੰਘ ਦੀ ਕਵਿਤਾ ਜੀਵਨ ਵਿਹਾਰ ਤੇ ਕਰਮਸ਼ੀਲ ਰਹਿਣ ਦੀ ਕਵਿਤਾ ਹੈ। ਪਲ ਪਲ ਰੰਗ ਵਟਾਉਂਦੇ ਸ਼ਾਇਰ ਦਾ ਕਾਵਿ ਮੈਨੀਫੈਸਟੋ ਕਮਾਲ ਦਾ ਸੀ। ਹੈ ਜੀਵਨ ਅਦਲਾ ਬਦਲੀ ਤੇ ਹੋਣਾ ਰੰਗ ਬਰੰਗਾ। ਸੌ ਮੁਰਦੇ ਭਗਤਾਂ ਗੇ ਨਾਲੋਂ ਇੱਕ ਖੋਜੀ ਕਾਫਰ ਚੰਗਾ। 

ਡਾ. ਜਗਬੀਰ ਸਿੰਘ ਨੇ ਕਿਹਾ ਕਿ ਮੈਨੂੰ ਨਿਜੀ ਤੌਰ ਤੇ ਪ੍ਰੋ. ਮੋਹਨ ਸਿੰਘ ਦੇ ਨੇੜੇ ਰਹਿਣ ਦਾ ਮੌਕਾ ਨਹੀਂ ਮਿਲਿਆ ਪਰ ਉਨ੍ਹਾਂ ਦੀ ਕਵਿਤਾ ਮੇਰੇ ਲਈ ਹਮੇਸ਼ਾਂ ਪ੍ਰੇਰਨਾ ਸਰੋਤ ਰਹੀ ਹੈ। 

ਪੰਜਾਬੀ ਅਕਾਡਮੀ ਦਿੱਲੀ ਦੇ ਸਕੱਤਰ ਗੁਰਭੇਜ ਸਿੰਘ ਗੁਰਾਇਆ ਨੇ ਕਿਹਾ ਕਿ ਮੋਹਨ ਸਿੰਘ ਸਰਬਕਾਲੀ ਮਹੱਤਵ ਵਾਲਾ ਸਮਰੱਥ ਕਵੀ ਸੀ ਜਿਸਨੇ ਹਰ ਸਮਾਂ ਕਾਲ ਵਿੱਚ ਸਿਰਫ਼ ਪਾਠਕਾਂ ਨੂੰ ਹੀ ਨਹੀਂ ਸਗੋਂ ਲੇਖਕਾਂ ਨੂੰ ਵੀ ਉਂਗਲੀ ਫੜ ਕੇ ਨਾਲ ਨਾਲ ਤੋਰਿਆ। 

ਦਿੱਲੀ ਯੂਨੀ: ਦਿੱਲੀ ਦੇ ਪ੍ਰੋਫੈਸਰ ਡਾ. ਰਵੀ ਰਵਿੰਦਰ ਕੁਮਾਰ ਨੇ ਕਿਹਾ ਕਿ ਮੋਹਨ ਸਿੰਘ ਦੇਸ਼ ਪਿਆਰ ਕਵਿਤਾ ਰਾਹੀਂ ਉਸ ਸਿਖ਼ਰ ਤੇ ਪਹੁੰਚ ਗਿਆ ਹੈ ਜਿੱਥੇ ਮੁਲਕਾਂ ਦੀਆਂ ਹੱਦਾਂ ਸਰਹੱਦਾਂ ਅਰਥਹੀਣ ਨੇ। ਪੰਜਾਬੀ ਯੂਨੀਵਰਸਿਟੀ ਪਟਿਆਲਾ ਦੇ ਸਾਹਿੱਤ ਅਧਿਐਨ ਵਿਭਾਗ ਦੇ ਮੁਖੀ ਡਾ: ਭੀਮ ਇੰਦਰ ਸਿੰਘ ਨੇ ਕਿਹਾ ਅੱਜ ਦੀਆਂ ਚੁਣੌਤੀਆਂ ਦੇ ਟਾਕਰੇ ਲਈ ਪ੍ਰੋ. ਮੋਹਨ ਸਿੰਘ ਦੀ ਇਹ ਕਵਿਤਾ 

ਦਾਤੀਆਂ ਕਲਮਾਂ ਅਤੇ ਹਥੌੜੇ 

ਕੱਠੇ ਕਰ ਲਉ ਸੰਦ ਓ ਯਾਰ। 

ਤਕੜੀ ਇੱਕ ਤ੍ਰਿਸ਼ੂਲ ਬਣਾਉ 

ਯੁੱਧ ਕਰੋ ਪ੍ਰਚੰਡ ਓ ਯਾਰ

ਇਹ ਕਾਵਿਕ ਰਸ ਅਗਵਾਈ ਕਰਨ  ਦੇ ਸਮਰੱਥ ਹੈ। ਦਿੱਲੀ ਯੂਨੀਵਰਸਿਟੀ ਦੇ ਪ੍ਰੋ. ਮਨਜੀਤ ਸਿੰਘ ਨੇ ਕਿਹਾ ਕਿ ਪ੍ਰੋ. ਮੋਹਨ ਸਿੰਘ ਦੀ ਰਚਨਾ ਨਾਨਕਾਇਣ ਸਾਖੀ ਕਾਵਿ ਦੀ ਪ੍ਰਮਾਣੀਕ ਕਿਰਤ ਹੈ। 

ਭਾਰਤੀ ਸਾਹਿੱਤ ਅਕਾਡਮੀ ਪੁਰਸਕਾਰ ਵਿਜੇਤਾ ਕਵਿੱਤਰੀ ਡਾ: ਵਨੀਤਾ ਨੇ ਕਿਹਾ ਕਿ ਗੁਰੂ ਨਾਨਕ ਦੇਵ ਜੀ ਦੇ 500ਵੇਂ ਪ੍ਰਕਾਸ਼ ਪੁਰਬ ਮੌਕੇ ਲਿਖੀ ਨਾਨਕਾਇਣ ਨੂੰ 550ਵੇਂ ਪ੍ਰਕਾਸ਼ ਉਤਸਵ ਮੌਕੇ ਹਰ ਘਰ ਵਿੱਚ ਪਹੁੰਚਾਉਣ ਦੀ ਲੋੜ ਹੈ। 

ਭਾਰਤੀ ਸਾਹਿੱਤ  ਅਕਾਡਮੀ ਦੇ ਸੰਪਾਦਕ ਅਨੂਪਮ ਤਿਵਾੜੀ ਨੇ ਸੁਝਾਅ ਦਿੱਤਾ ਕਿ ਅੱਜ ਵਾਂਗ ਆਪਣੇ ਪੁਰਖੇ ਲਿਖਾਰੀਂਆਂ ਨੂੰ ਯਾਦ ਕਰਨਾ ਚਾਹੀਦਾ ਹੈ। ਬਾਤ ਰਸ ਦੀ ਆਪਣੀ ਮਹੱਤਤਾ ਹੈ। 

ਸਮੂਹ ਵਿਦਵਾਨਾਂ ਦਾ ਧੰਨਵਾਦ ਕਰਦਿਆਂ ਪ੍ਰੋ ਮੋਹਨ ਸਿੰਘ ਮੈਮੋਰੀਅਲ ਫਾਉਂਡੇਸ਼ਨ ਦੇ ਸਰਪ੍ਰਸਤ ਪ੍ਰੋ. ਗੁਰਭਜਨ ਸਿੰਘ ਗਿੱਲ ਨੇ ਕਿਹਾ ਕਿ ਮੈਨੂੰ ਪ੍ਰੋ. ਮੋਹਨ ਸਿੰਘ ਜੀ ਦੀ ਸੰਗਤ ਮਾਨਣ ਦਾ ਆਪਣੇ ਅਧਿਆਪਕ ਡਾ. ਐੱਸ ਪੀ ਸਿੰਘ ਤੇ ਸ: ਜਗਦੇਵ ਸਿੰਘ ਜੱਸੋਵਾਲ ਜੀ ਕਾਰਨ ਲਗਪਗ ਸੱਤ ਸਾਲ ਮੌਕਾ ਮਿਲਿਆ ਹੈ। ਉਹ ਦਿਲਦਾਰ ਇਨਸਾਨ ਸਨ ਜਿੰਨ੍ਹਾਂ ਦੀ ਹਾਜ਼ਰੀ  ਚ ਨਿੱਕੇ ਹੋਣ ਦਾ ਅਹਿਸਾਸ ਨਹੀਂ ਸੀ ਹੁੰਦਾ।  

ਉਹ ਸਮਕਾਲੀ ਘਟਨਾਵਾਂ ਤੇ ਬੜੀ ਸਟੀਕ ਕਾਵਿ ਟਿਪਣੀ ਕਰਨੀ ਜਾਣਦੇ ਸਨ। ਜਨਤਾ ਸਰਕਾਰ ਬਣਨ ਤੇ 1977 ਚ ਜਦ ਵੱਖ ਵੱਖ ਸਿਆਸੀ ਧਿਰਾਂ ਨੇ ਇਸ ਤਬਦੀਲੀ ਨੂੰ ਲੋਕ ਉਭਾਰ ਵਜੋਂ ਪੇਸ਼ ਕਰਨ ਦੀ ਕੋਸ਼ਿਸ਼ ਕੀਤੀ ਤਾਂ ਪ੍ਰੋ. ਮੋਹਨ ਸਿੰਘ ਜੀ ਨੇ ਲਿਖਿਆ। 

ਨਾ ਹਿਣਕੋ ਘੋੜਿਉ! 

ਬੇਸ਼ੱਕ ਨਵਾਂ ਨਿਜ਼ਾਮ ਆਇਆ। 

ਨਵਾਂ ਨਿਜ਼ਾਮ ਹੈ ਲੈ ਕੇ ਨਵੀਂ ਲਗਾਮ ਆਇਆ। 

ਅਯੁੱਧਿਆ ਵਿੱਚ ਅਜੇ ਵੀ ਭੁੱਖਿਆਂ ਦੀ ਭੀੜ ਬੜੀ, 

ਪਿਆ ਕੀ ਫ਼ਰਕ ਜੇ ਰਾਵਣ ਗਿਆ ਤੇ ਰਾਮ ਆਇਆ। 

ਉਨ੍ਹਾਂ ਦੀ ਯਾਦ ਵਿੱਚ ਲੱਗਣ ਵਾਲੇ ਮੇਲੇ ਚ ਮੈਂ 1978 ਤੋਂ 2014 ਤੀਕ ਵੱਖ ਵੱਖ ਜ਼ਿੰਮੇਵਾਰੀਆਂ ਨਿਭਾਉਂਦਾ ਰਿਹਾ ਹਾਂ। ਸਿਰਫ਼ ਤਿੰਨ ਮੌਕੇ ਅਜਿਹੇ ਹਨ ਜਦ ਮੈਂ 20 ਮਈ ਨੂੰ ਪ੍ਰੋ. ਮੋਹਨ ਸਿੰਘ ਦੇ ਜਨਮ ਦਿਹਾੜੇ ਮੌਕੇ ਮੈਂ ਲੁਧਿਆਣਾ ਚ ਨਹੀਂ ਸਾਂ। ਦੋ ਵਾਰ ਕੈਨੇਡਾ ਚ ਸਾਂ ਤੇ ਐਤਕੀਂ ਗੁਹਾਟੀ ਚ ਹਾਂ ਮੈਂ ਪ੍ਰੋ. ਮੋਹਨ ਸਿੰਘ ਫਾਉਂਡੇਸ਼ਨ ਵੱਲੋਂ ਸਭ ਦਾ ਧੰਨਵਾਦੀ ਹਾਂ ਜਿੰਨ੍ਹਾਂ ਨੇ ਮੇਰੀ ਬੇਨਤੀ ਪ੍ਰਵਾਨ ਕਰਕੇ ਇਹ ਵਿਚਾਰ ਚਰਚਾ ਕੀਤੀ।

ਸਰਹੱਦੀ ਇਲਾਕੇ ਫਿਰੋਜ਼ਪੁਰ ਵਿੱਚ ਕਲਾਪੀਠ ਵੱਲੋਂ ਵਿਸ਼ੇਸ਼ ਆਯੋਜਨ

Sunday: 20th October 2019: 2:13 PM Messenger

ਸਾਹਿਤਿਕ ਖੇਤਰ ਦੀਆਂ ਸਿਰਕੱਢ ਸ਼ਖਸੀਅਤਾਂ ਨੇ ਕੀਤੀ ਸ਼ਮੂਲੀਅਤ

ਫ਼ਿਰੋਜ਼ਪੁਰ: 20 ਅਕਤੂਬਰ 2019:(ਪੰਜਾਬ ਸਕਰੀਨ ਬਿਊਰੋ)::

ਫ਼ਿਰੋਜ਼ਪੁਰ ਵਰਗੇ ਸਰਹੱਦੀ ਇਲਾਕੇ ਵਿੱਚ ਸ਼ਬਦ ਸਭਿਆਚਾਰ ਦੇ ਪਸਾਰ ਲਈ ਨਿਰੰਤਰ ਯਤਨਸ਼ੀਲ ਸੰਸਥਾ ਕਲਾਪੀਠ (ਰਜਿ:)ਵੱਲੋਂ ਕੈਨੇਡਾ ਵਿੱਚ ਵੱਸਦੇ ਪੰਜਾਬੀ ਸ਼ਾਇਰ ਪ੍ਰੀਤ ਮਨਪ੍ਰੀਤ ਦੇ ਸਨਮਾਨ ਵਿੱਚ ਇੱਕ ਸਾਹਿਤਕ ਸਮਾਗਮ ਕਰਵਾਇਆ ਗਿਆ। ਇਸ ਸਾਦੇ ਪਰ ਭਾਵਪੂਰਤ ਸਮਾਗਮ ਦੀ ਪ੍ਰਧਾਨਗੀ ਉੱਘੇ ਨਾਵਲਕਾਰ ਬਲਦੇਵ ਸਿੰਘ ਸੜਕਨਾਮਾ ਨੇ ਕੀਤੀ ਜਦੋਂਕਿ ਪ੍ਰਧਾਨਗੀ ਮੰਡਲ ਵਿੱਚ ਮਹਿਮਾਨ ਸ਼ਾਇਰ ਪ੍ਰੀਤ ਮਨਪ੍ਰੀਤ ਦੇ ਨਾਲ ਸ਼ਾਇਰ ਗੁਰਤੇਜ ਕੋਹਾਰਵਾਲਾ, ਕਲਾਪੀਠ ਦੇ ਪ੍ਰਧਾਨ ਪ੍ਰੋ.ਜਸਪਾਲ ਘਈ ਅਤੇ ਚਰਚਿਤ ਕਥਾਕਾਰ ਗੁਰਮੀਤ ਕੜਿਆਲਵੀ ਸ਼ਾਮਲ ਹੋਏ। ਨੌਜਵਾਨ ਸ਼ਾਇਰ ਅਨਿਲ ਆਦਮ ਵੱਲੋਂ ਨਿਭਾਏ ਗਏ ਬੜੇ ਕਾਵਿਕ ਅਤੇ ਰੋਚਕ ਸੰਚਾਲਨ ਵਿੱਚ ਪ੍ਰੋ ਜਸਪਾਲ ਘਈ ਨੇ ਆਏ ਹੋਏ ਮਹਿਮਾਨਾਂ ਦਾ ਸਵਾਗਤ ਕਰਦਿਆਂ ਪ੍ਰੀਤ ਮਨਪ੍ਰੀਤ ਦੀਆਂ ਗ਼ਜ਼ਲਾਂ ਦੇ ਗੁਣਾਂ ਦੀ ਗੱਲ ਛੇੜੀ। ਗੁਰਮੀਤ ਕੜਿਆਲਵੀ ਨੇ ਮਹਿਮਾਨ ਸ਼ਾਇਰ ਦੀ ਸਖ਼ਸ਼ੀਅਤ,ਸੁਭਾਅ, ਸੰਵੇਦਨਾ ਅਤੇ ਸਿਰਜਣਾ ਦੀ ਗੱਲ ਛੇੜੀ। ਮੋਗੇ ਜ਼ਿਲ੍ਹੇ ਦੇ ਮਨਾਵਾਂ ਪਿੰਡ ਚੋਂ ਉੱਠ ਕੇ ਕੈਨੇਡਾ ਦੀ ਧਰਤੀ ਤੇ ਰਹਿ ਕੇ ਵੀ ਪੰਜਾਬੀ ਜ਼ੁਬਾਨ, ਰਹਿਤਲ ਅਤੇ ਸਭਿਆਚਾਰ ਨਾਲ ਪ੍ਰੀਤ ਦੇ ਮੋਹ ਦੀ ਬਾਤ ਪਾਈ।ਉਪਰੰਤ ਸਰੋਤਿਆਂ ਦੇ ਰੂਬਰੂ ਹੋਇਆ ਪ੍ਰੀਤ ਮਨਪ੍ਰੀਤ, ਜਿਸ ਨੇ ਆਪਣੀ ਜ਼ਿੰਦਗੀ ਦੇ ਸਫ਼ਰ ਦੀ ਗੱਲ ਛੋਹੀ। ਨਿੱਕੇ ਨਿੱਕੇ ਸੁਪਨਿਆਂ ਲਈ ਕੀਤੇ ਸੰਘਰਸ਼ ਦੀ ਕਹਾਣੀ ਸੁਣਾਉਂਦਿਆਂ ਉਹ ਭਾਵੁਕ ਵੀ ਹੋਇਆ। ਮਨਪ੍ਰੀਤ ਨੇ ਆਪਣੀਆਂ ਕੁਝ ਰਚਨਾਵਾਂ ਵੀ ਸੁਣਾਈਆਂ

ਉਹ ਮੇਰੀ ਪੀੜ ਦੇ ਅਹਿਸਾਸ ਤੋਂ ਏਨਾ ਕੁ ਵਾਕਿਫ਼ ਸੀ
ਕਿ ਵਰ੍ਹਦੇ ਮੀਂਹ ‘ਚ ਵੀ, ਮੇਰੇ ਜੋ ਹੰਝੂ ਸਿਆਣ ਸਕਦਾ ਸੀ।

ਆ ਕਿ ਮੁੜ ਤੋਂ ਸੁਪਨਿਆਂ ਦੇ ਬੀਅ ਉਗਾ ਕੇ ਦੇਖੀਏ

ਉਸਨੇ ਆਪਣੇ ਸਾਹਿਤਕ ਸਫ਼ਰ ਨੂੰ ਹੱਲਾਸ਼ੇਰੀ ਦੇਣ ਲਈ ਕਲਾਪੀਠ ਦਾ ਸ਼ੁਕਰੀਆ ਅਦਾ ਕੀਤਾ। ਪ੍ਰੋ.ਗੁਰਤੇਜ ਕੋਹਾਰਵਾਲਾ ਨੇ ਕਿਹਾ ਕਿ ਮਨਪ੍ਰੀਤ ਨੂੰ ਸੁਣ ਕੇ ਚੰਗਾ ਲੱਗਦਾ ਹੈ ਅਤੇ ਖੁਸ਼ੀ ਦੀ ਗੱਲ ਹੈ ਕਿ ਪੰਜਾਬੀ ਗ਼ਜ਼ਲ ਵਿੱਚ ਪੰਜਵੀਂ ਪੀੜ੍ਹੀ ਸਰਗਰਮ ਹੋ ਗਈ ਹੈ। ਗੁਰਤੇਜ ਕੋਹਾਰਵਾਲਾ ਨੇ ਆਪਣੀਆਂ ਗ਼ਜ਼ਲਾਂ ਦੇ ਕੁਝ ਸ਼ੇਅਰ ਸੁਣਾ ਕੇ ਕਵੀ ਦਰਬਾਰ ਦਾ ਆਗ਼ਾਜ਼ ਕੀਤਾ। ਗਿੱਲ ਗੁਲਾਮੀਵਾਲਾ, ਵਿਜੇ ਵਿਕਟਰ ਬੌਬੀ ਅਤੇ ਗੁਰਨਾਮ ਸਿੱਧੂ ਨੇ ਗੀਤਾਂ ਨਾਲ ਸਾਂਝ ਪਾਈ।ਕੁਲਦੀਪ ਜਲਾਲਾਬਾਦ, ਸੁਖਜਿੰਦਰ ਫ਼ਿਰੋਜ਼ਪੁਰ,ਅਨਿਲ ਆਦਮ, ਗੁਰਮੀਤ ਕੜਿਆਲਵੀ, ਹਰਮੀਤ ਵਿਦਿਆਰਥੀ ਅਤੇ ਪ੍ਰੋ.ਜਸਪਾਲ ਘਈ ਨੇ ਕਵਿਤਾਵਾਂ ਨਾਲ ਸ਼ਾਮ ਨੂੰ ਕਾਵਿਕ ਕਰ ਦਿੱਤਾ। ਕਲਾਪੀਠ ਵੱਲੋਂ ਮਨਪ੍ਰੀਤ ਨੂੰ ਯਾਦ ਨਿਸ਼ਾਨੀ ਵਜੋਂ ਪੁਸਤਕਾਂ ਦਾ ਸੈੱਟ ਭੇਂਟ ਕੀਤਾ। ਆਪਣੇ ਪ੍ਰਧਾਨਗੀ ਭਾਸ਼ਣ ਵਿੱਚ ਬਲਦੇਵ ਸਿੰਘ ਸੜਕਨਾਮਾ ਨੇ ਮਨਪ੍ਰੀਤ ਦੀ ਸ਼ਲਾਘਾ ਕਰਦਿਆਂ ਕਲਾਪੀਠ ਦੇ ਇਸ ਸਮਾਗਮ ਨੂੰ ਸ਼ਾਇਰੀ ਦੇ ਪੱਧਰ ਪੱਖੋਂ ਇੱਕ ਵੱਡਾ ਸਮਾਗਮ ਦੱਸਿਆ।

ਧਰਤ ਸਾਡੇ ਪਿਆਰ ਦੀ, ਜ਼ਰਖੇਜ਼ ਹੈ, ਬੰਜ਼ਰ ਨਹੀਂ।

ਰਾਜੀਵ ਖਯਾਲ,ਪ੍ਰੋ.ਅਨਿਲ ਧੀਮਾਨ,ਪ੍ਰੋ.ਲਕਸ਼ਮਿੰਦਰ,ਡਾ.ਅਮਨਦੀਪ, ਪ੍ਰੋ.ਆਜ਼ਾਦਵਿੰਦਰ, ਮਿਹਰਦੀਪ,ਸੁਰਿੰਦਰ ਕੰਬੋਜ਼ ਸਮੇਤ ਬਹੁਤ ਸਾਰੇ ਸਾਹਿਤ ਪ੍ਰੇਮੀਆਂ ਨੇ ਭਾਗ ਲਿਆ।ਅੰਤ ਵਿੱਚ ਹਰਮੀਤ ਵਿਦਿਆਰਥੀ ਨੇ ਸਭ ਦਾ ਧੰਨਵਾਦ ਕੀਤਾ।

ਕੇਂਦਰੀ ਪੰਜਾਬੀ ਲੇਖਕ ਸਭਾ ਦੀਆਂ ਜੁਝਾਰੂ ਰਵਾਇਤਾਂ ਨੂੰ ਕਾਇਮ ਰੱਖਾਂਗੇ

‘ਸਰਬ ਸਾਂਝਾ ਲੇਖਕ ਮੋਰਚਾ’ ਵਲੋਂ ਖਰੀਆਂ ਖਰੀਆਂ

ਕੇਂਦਰੀ ਪੰਜਾਬੀ ਲੇਖਕ ਸਭਾ (ਰਜਿ.) ਦੀ ਚੋਣ 6 ਅਕਤੂਬਰ,

ਦਿਨ ਐਤਵਾਰ, ਪੰਜਾਬੀ ਭਵਨ ਲੁਧਿਆਣਾ

ਸੌ ਫੁੱਲ ਖਿੜਨ ਦਿਓ।

ਸੌ ਵਿਚਾਰ ਭਿੜਨ ਦਿਓ।

‘ਸਰਬ ਸਾਂਝਾ ਲੇਖਕ ਮੋਰਚਾ’ ਪੈਨਲ ਦੇ ਉਮੀਦਵਾਰ

ਪ੍ਰਧਾਨ  :

ਦਰਸ਼ਨ ਬੁੱਟਰ (ਨਾਭਾ) 

ਸੀਨੀਅਰ ਮੀਤ ਪ੍ਰਧਾਨ:

ਜੋਗਾ ਸਿੰਘ ਡਾ. (ਪਟਿਆਲਾ)

ਜਨਰਲ ਸਕੱਤਰ:

ਸੁਸ਼ੀਲ ਦੁਸਾਂਝ (ਮੋਹਾਲੀ)

ਮੀਤ ਪ੍ਰਧਾਨ:

ਤਰਲੋਚਨ ਝਾਂਡੇ (ਲੁਧਿਆਣਾ)

ਸੁਰਿੰਦਰ ਪ੍ਰੀਤ ਘਣੀਆ (ਬਠਿੰਡਾ)

ਅਸ਼ਵਨੀ ਬਾਗੜੀਆਂ (ਨਾਭਾ)

ਵਰਗਿਸ ਸਲਾਮਤ (ਬਟਾਲਾ)

ਧੀਆਂ ਭੈਣਾਂ ਲਈ ਸੁਰੱਖਿਅਤ

ਮੀਤ ਪ੍ਰਧਾਨ:

ਕੇ. ਤਿ੍ਪਤਾ ਸਿੰਘ (ਹੁਸ਼ਿਆਰਪੁਰ)

ਸਕੱਤਰ:

ਦੀਪ ਦਵਿੰਦਰ ਸਿੰਘ (ਅੰਮਿ੍ਰਤਸਰ)

ਜਗਦੀਪ ਸਿੱਧੂ (ਖਰੜ)

ਡਾ. ਰਾਮ ਮੂਰਤੀ (ਧਰਮਕੋਟ)

ਧੀਆਂ ਭੈਣਾਂ ਲਈ ਰਾਖਵੀਂ

ਸਕੱਤਰ : ਡਾ. ਸਰਘੀ (ਅੰਮਿ੍ਰਤਸਰ)

ਸਾਡਾ ਮਨੋਰਥ

ਗੁਰੂ ਨਾਨਕ ਦੇਵ ਜੀ ਦੇ 550 ਵੇਂ ਸਾਲ ਪ੍ਰਕਾਸ਼ ਉਤਸਵ ਨੂੰ ਸਮਰਪਿਤ ਹੋ ਕੇ

ਭਾਸ਼ਾ ਸਾਹਿਤ, ਸਭਿਆਚਾਰ ਦੇ ਵਿਕਾਸ, ਸੰਭਾਲ ਤੇ ਸਨਮਾਨਿਤ ਸਥਾਨ ਲਈ ਨਿਰੰਤਰ ਪਹਿਰੇਦਾਰੀ।

ਸਤਿਕਾਰਤ ਦੋਸਤੋ

ਕੇਂਦਰੀ ਪੰਜਾਬੀ ਲੇਖਕ ਸਭਾ (ਰਜਿ.) ਦੀ 6 ਅਕਤੂਬਰ 2019 ਨੂੰ ਲੁਧਿਆਣਾ ਦੇ ਪੰਜਾਬੀ ਭਵਨ ਵਿਚ ਹੋ ਰਹੀ ਚੋਣ ਵਿਚ ਅਸੀਂ ‘ਸਰਬ ਸਾਂਝਾ ਲੇਖਕ ਮੋਰਚਾ’ ਵਲੋਂ ਤੁਹਾਡੇ ਹੁੰਗਾਰੇ ਸਦਕਾ ਸਮਰਪਿਤ ਭਾਵਨਾ ਨਾਲ ਮੈਦਾਨ ’ਚ ਹਾਂ।

ਦੋਸਤੋ,

28 ਸਤੰਬਰ, ਸ਼ਾਮ ਚਾਰ ਵਜੇ ਤੱਕ ਨਾਮਜ਼ਦਗੀਆਂ ਵਾਪਸ ਲੈਣ ਦਾ ਸਮਾਂ ਸੀ। ਅਸੀਂ ਉਦੋਂ ਤੱਕ ਸੋਸ਼ਲ ਮੀਡੀਆ ਜਾਂ ਅਖ਼ਬਾਰਾਂ ਵਿਚ ਆਪਣੇ ਵਲੋਂ ਇਕ ਵੀ ਸਤਰ ਨਹੀਂ ਲਿਖੀ ਲਿਖਾਈ।

ਸਾਡਾ ਹਰ ਸੰਭਵ ਯਤਨ ਸੀ ਕਿ ਤੁਹਾਡੀ ਸ਼ੁਭ ਭਾਵਨਾ ਅਨੁਸਾਰ ਕੇਂਦਰੀ ਪੰਜਾਬੀ ਲੇਖਕ ਸਭਾ ਦੀ ਇਹ ਚੋਣ ਸਰਬ ਸਹਿਮਤੀ ਨਾਲ ਹੋਵੇ ਪਰ ਦੂਸਰੀ ਧਿਰ ਦੇ ਹਾਕਮਾਨਾ ਰਵੱਈਏ ਨੇ ਇਸ ਨੂੰ ਸਫ਼ਲ  ਨਹੀਂ ਹੋਣ ਦਿੱਤਾ। ਉਨ੍ਹਾਂ ਨੂੰ ਲਗਦਾ ਹੈ ਕਿ ਅਸੀਂ ਹੀ ਸਭ ਤੋਂ ਜ਼ਿਆਦਾ ਸੁਰਖ਼ ਹਾਂ।

ਚਲੋ ਖ਼ੈਰ, ਉਨ੍ਹਾਂ ਦੀ ‘ਸੁਰਖ਼ੀ’ ਉਨ੍ਹਾਂ ਨੂੰ ਮੁਬਾਰਕ।

ਜਿਉਂਦਾ ਖ਼ੂਨ ਸਭ ’ਚ ਇਕੋ ਜਿਹਾ ਦੌੜਦਾ ਹੈ, ਉਸ ਲਈ ਯੂਨੀਵਰਸਿਟੀਆਂ ਦੇ ਪਾਵੇ ਬਣਨਾ ਕੋਈ ਸ਼ਰਤ ਨਹੀਂ।

ਅਸੀਂ ਜਦੋਂ ਅੱਜ ਆਪਣੀ ਇਸ ਪਹਿਲੀ ਚਿੱਠੀ ਰਾਹੀਂ ਆਪਣਾ ਚੋਣ ਪੈਨਲ ਐਲਾਨ ਰਹੇ ਹਾਂ ਤਾਂ ਨਾਲ ਹੀ ਅਸੀਂ ਇਹ ਵੀ ਅਹਿਦ ਕਰ ਰਹੇ ਹਾਂ ਕਿ ਕੇਂਦਰੀ ਪੰਜਾਬੀ ਲੇਖਕ ਸਭਾ ਦੀਆਂ ਜੁਝਾਰੂ ਰਵਾਇਤਾਂ ਨੂੰ ਕਾਇਮ ਤਾਂ ਰੱਖਾਂਗੇ ਹੀ, ਸਗੋਂ ਇਸ ਨੂੰ ਹੋਰ ਅੱਗੇ ਲੈ ਕੇ ਜਾਵਾਂਗੇ।

ਅਹਿਦ ਇਹ ਵੀ ਹੈ ਕਿ ਅੱਜ ਦੀ ਲਗਾਤਾਰ ਗੰਭੀਰ ਹੁੰਦੀ ਜਾ ਰਹੀ ਸਥਿਤੀ, ਸਾਹਿਤ, ਭਾਸ਼ਾ/ਬੋਲੀ ਤੇ ਸਭਿਆਚਾਰ ਨੂੰ ਦਰਪੇਸ਼ ਹਮਲੇ ਖ਼ਿਲਾਫ਼ ਜੱਦੋ-ਜਹਿਦ ਹੋਰ ਤਿੱਖੀ ਕੀਤੀ ਜਾਵੇਗੀ।

ਪ੍ਰਧਾਨ ਦੇ ਅਹੁਦੇ ਲਈ ‘ਸਰਬ ਸਾਂਝਾ ਲੇਖਕ ਮੋਰਚੇ’ ਵਲੋਂ ਦਰਸ਼ਨ ਬੁੱਟਰ ਨਾਭਾ (ਪਟਿਆਲਾ) ੁਮੀਦਵਾਰ ਹਨ। ਦਰਸ਼ਨ ਬੁੱਟਰ ਉਹ ਸ਼ਾਇਰ ਹਨ ਜਿਨ੍ਹਾਂ ਭਾਰਤ ਅੰਦਰ ਅਸਹਿਣਸ਼ੀਲਤਾ ਦੇ ਖ਼ਿਲਾਫ਼ ਉੱਠੇ ਅੰਦੋਲਨ ਦੌਰਾਨ ਪੰਜਾਬ ਵਿਚੋਂ ਸਭ ਤੋਂ ਪਹਿਲਾਂ ਭਾਰਤੀ ਸਾਹਿਤ ਅਕਾਦਮੀ ਦਾ ਇਨਾਮ ਵਾਪਸ ਕੀਤਾ। ਇਸ ਤੋਂ ਵੱਡੀ ਪ੍ਰਗਤੀਸ਼ੀਲਤਾ ਹੋਰ ਕਿਹੜੀ ਹੈ?

ਸੀਨੀਅਰ ਮੀਤ ਪ੍ਰਧਾਨ ਦੇ ਅਹੁਦੇ ਲਈ ਸਾਡੇ ਉਮੀਦਵਾਰ ਡਾ. ਜੋਗਾ ਸਿੰਘ ਹਨ। ਭਾਸ਼ਾ ਵਿਗਿਆਨੀ ਡਾ. ਜੋਗਾ ਸਿੰਘ ਪੂਰੇ ਭਾਰਤ ਵਿਚ ਮਾਤ ਭਾਸ਼ਾਵਾਂ ਦੇ ਚੱਲ ਰਹੇ ਅੰਦੋਲਨ ਵਿਚ ਭਰਪੂਰ ਹਿੱਸਾ ਪਾ ਰਹੇ ਹਨ।

ਜਨਰਲ ਸਕੱਤਰ ਦੇ ਅਹੁਦੇ ਲਈ ਸੁਸ਼ੀਲ ਦੁਸਾਂਝ ਉਮੀਦਵਾਰ ਹਨ। ਜਨਰਲ ਸਕੱਤਰ ਵਜੋਂ ਪਿਛਲੇ ਤਿੰਨ ਸਾਲਾਂ ਦਾ ਕਾਰਜਕਾਲ ਆਪ ਜੀ ਦੇ ਸਨਮੁੱਖ ਹੈ। ਸੁਸ਼ੀਲ ਦੁਸਾਂਝ ਨੇ ਪੰਜਾਬੀ ਦੀ ਸਾਹਿਤਕ ਪੱਤਰਕਾਰੀ ਵਿਚ ‘ਹੁਣ’ ਰਸਾਲੇ ਰਾਹੀਂ ਜੋ ਯੋਗਦਾਨ ਪਾਇਆ ਹੈ, ਉਹ ਆਪਣੇ ਆਪ ਵਿਚ ਮਿਸਾਲ ਹੈ।

ਇਕ ਗੱਲ ਹੋਰ

ਅਸੀਂ ਨਾਲ ਹੀ ਇਹ ਵਾਅਦਾ ਵੀ ਕਰ ਰਹੇ ਹਾਂ ਕਿ ਪੰਜਾਬੀ ਦੇ ਵੱਡੇ ਲੇਖਕਾਂ ਦੇ ਨਾਵਾਂ ਨੂੰ ਇਸ ਚੋਣ ਮੈਦਾਨ ਵਿਚ ਵਰਤਣ ਦੀ ਹਮਾਕਤ ਨਹੀਂ ਕਰਾਂਗੇ। ਪੰਜਾਬੀ ਦੇ ਵੱਡੇ ਲੇਖਕਾਂ ਦੇ ਮਾਣ-ਸਤਿਕਾਰ ਲਈ ਇਹ ਜ਼ਰੂਰੀ ਵੀ ਹੈ ਕਿ ਉਨ੍ਹਾਂ ਦੀ ਸ਼ਾਨ ਨੂੰ ਬਰਕਰਾਰ ਰੱਖਿਆ ਜਾਵੇ ਤੇ ਉਨ੍ਹਾਂ ਦੇ ਨਾਵਾਂ ਨੂੰ ਕਿਸੇ ਦੇ ਹੱਕ ਜਾਂ ਵਿਰੋਧ ਵਿਚ ਨਾ ਵਰਤਿਆ ਜਾਵੇ। ਦੂਸਰੀ ਧਿਰ ਨੇ ਕਈ ਅਜਿਹੇ ਨਾਂ ਵਰਤ ਲਏ ਹਨ, ਪਰ ਉਨ੍ਹਾਂ ’ਚੋਂ ਬਹੁਤਿਆਂ ਨੇ ਸਾਨੂੰ ਫ਼ੋਨ ਕਰਕੇ ਦੱਸਿਆ ਹੈ ਕਿ ਉਨ੍ਹਾਂ ਤੋਂ ਕਿਸੇ ਕਿਸਮ ਦੀ ਆਗਿਆ ਨਹੀਂ ਲਈ ਗਈ।

ਪਰ ਸਾਡਾ ਤੁਹਾਡੇ ਨਾਲ ਵਾਅਦਾ ਹੈ ਕਿ ਅਸੀਂ ਸਿਰਫ਼ ਉਹ ਨਾਂਅ ਹੀ ਆਪਣੀ ਅਪੀਲ ਵਿਚ ਸ਼ਾਮਲ ਕਰਾਂਗੇ, ਜਿਹੜੇ ਸਾਡੇ ਇਸ ਪੈਨਲ ਦੀ ਚੋਣ ਮੈਦਾਨ ਵਿਚ ਅਗਵਾਈ ਕਰ ਰਹੇ ਹਨ।

ਸਾਥੀਓ

ਦੂਸਰੀ ਧਿਰ ਫੇਸਬੁੱਕ ਅਤੇ ਵਟਸਐਪ ’ਤੇ ਕੇਂਦਰੀ ਪੰਜਾਬੀ ਲੇਖਕ ਸਭਾ ਦੀ ਆਉਣ ਵਾਲੀ ਟੀਮ ਬਣਾ ਰਹੀ ਹੈ ਜਦਕਿ ਅਸੀਂ ਕੇਂਦਰੀ ਸਭਾ ਨਾਲ ਸਬੰਧਤ ਸਾਹਿਤ ਸਭਾਵਾਂ ਦੇ ਲੇਖਕਾਂ ਅਤੇ ਲੇਖਕ ਜੀਵਨ ਮੈਂਬਰਾਂ ਦੇ ਸੰਪਰਕ ਤੇ ਸਹਿਯੋਗ ਨਾਲ ਇਸ ਟੀਮ ਦੀ ਉਸਾਰੀ ਕਰਾਂਗੇ।

ਤੁਹਾਡੇ ਭਰਵੇਂ ਸਹਿਯੋਗ ਨਾਲ।

ਸਾਡੇ ਅਪੀਲ ਕਰਤਾ ਸਰਪ੍ਰਸਤ

ਹਰਭਜਨ ਸਿੰਘ ਹੁੰਦਲ ਕਪੂਰਥਲਾ, ਪ੍ਰੋ. ਗੁਰਭਜਨ ਗਿੱਲ, ਪ੍ਰੋ. ਅਨੂਪ ਵਿਰਕ ਪਟਿਆਲਾ, ਡਾ. ਕਰਮਜੀਤ ਸਿੰਘ ਹੁਸ਼ਿਆਰਪੁਰ, ਅਤਰਜੀਤ, ਡਾ. ਅਨੂਪ ਸਿੰਘ ਬਟਾਲਾ, ਮੱਖਣ ਕੁਹਾੜ ਗੁਰਦਾਸਪੁਰ, ਡਾ. ਗੁਰਇਕਬਾਲ ਸਿੰਘ, ਗ਼ਜ਼ਲਗੋ ਜਸਵਿੰਦਰ, ਸੁਲੱਖਣ ਸਰਹੱਦੀ, ਗੁਰਚਰਨ ਕੌਰ ਕੋਚਰ, ਸੁਮੇਲ ਸਿੱਧੂ, ਸੁਰਿੰਦਰ ਰਾਮਪੁਰੀ, ਬਰਜਿੰਦਰ ਚੌਹਾਨ, ਸੁਖਜੀਤ, ਗੁਰਦਿਆਲ ਦਲਾਲ, ਜਸਵੰਤ ਜ਼ਫਰ ਅਤੇ ਐਸ. ਨਸੀਮ

ਅਪੀਲਕਾਰ : ਵੱਖ ਵੱਖ ਸਾਹਿਤ ਸਭਾਵਾਂ ਦੇ ਸਤਿਕਾਰਯੋਗ ਅਹੁਦੇਦਾਰ ਲੇਖਕ

ਜਤਿੰਦਰ ਹਾਂਸ, ਸੁਦਰਸ਼ਨ ਗਾਸੋ, ਪਰਮਜੀਤ ਢੀਂਗਰਾ, ਕਵਿੰਦਰ ਚਾਂਦ, ਤ੍ਰੈਲੋਚਨ ਲੋਚੀ, ਜਸਵੀਰ ਸਿੰਘ ਰਾਣਾ, ਬੂਟਾ ਸਿੰਘ ਚੌਹਾਨ, ਡਾ. ਸ਼ਰਨਜੀਤ ਕੌਰ, ਸਤੀਸ਼ ਗੁਲਾਟੀ, ਡਾ. ਸਵੈਰਾਜ ਸੰਧੂ, ਡਾ. ਸ਼ਿੰਦਰਪਾਲ ਸਿੰਘ, ਵਿਸ਼ਾਲ, ਮਨਜਿੰਦਰ ਧਨੋਆ, ਡਾ. ਰਵਿੰਦਰ ਬਟਾਲਾ, ਦਵਿੰਦਰ ਦੀਦਾਰ, ਮਲਵਿੰਦਰ, ਬਖ਼ਤਾਵਰ  ਧਾਲੀਵਾਲ, ਬਲਦੇਵ ਚੀਮਾ, ਹਰਦਮ ਮਾਨ, ਗੁਰਚਰਨ ਪੱਬਾਰਾਲੀ, ਗੋਪਾਲ ਬੁੱਟਰ, ਤਜਿੰਦਰ ਵਿਰਲੀ, ਕਮਲਜੀਤ ਭੁੱਲਰ, ਰਾਜਿੰਦਰ ਬਿਮਲ, ਸੁਖਵਿੰਦਰ ਪੱਪੀ, ਜਗੀਰ ਸਿੰਘ ਪ੍ਰੀਤ, ਬਲਵਿੰਦਰ ਸਿੰਘ ਟਿਵਾਣਾ, ਡਾ. ਗੁਰਨੈਬ ਸਿੰਘ, ਮਾਨ ਸਿੰਘ ਢੀਂਡਸਾ, ਭਗਵਾਨ ਢਿਲੋਂ, ਡਾ. ਕਰਨੈਲ ਚੰਦ, ਪ੍ਰੋ. ਰਮਨ, ਅਰਵਿੰਦਰ ਕਾਕੜਾ, ਗੋਬਿੰਦ ਸ਼ਰਮਾ (ਕੈਨੇਡਾ), ਉਜਾਗਰ ਸਿੰਘ ਲਲਤੋਂ, ਕਿਰਪਾਲ ਸਿੰਘ ਯੋਗੀ, ਕੁਲਤਾਰ ਸਿੰਘ ਕੁਲਤਾਰ, ਜਸਵੰਤ ਰਾਏ, ਅਰਤਿੰਦਰ ਸੰਧੂ, ਦੇਵ ਦਰਦ, ਸਤਵੰਤ ਕਲੋਟੀ, ਸਰਬਜੀਤ ਸੰਧੂ, ਜਗਜੀਤ ਪਿਆਸਾ, ਦਿਆਲ ਸਿੰਘ ਪਿਆਸਾ, ਕਰਮ ਸਿੰਘ ਜ਼ਖ਼ਮੀ, ਤਰਸੇਮ, ਸੰਪੂਰਨ ਟੱਲੇਵਾਲੀਆ, ਹਰਬੰਸ ਮਾਛੀਵਾੜਾ, ਬਲਦੇਵ ਆਜ਼ਾਦ, ਬਲਵਿੰਦਰ ਸੰਧੂ, ਮਨਜੀਤ ਪੂਰੀ, ਜੈਨਿੰਦਰ ਚੌਹਾਨ, ਦਰਸ਼ਨ ਬੋਪਾਰਾਏ, ਰਜਿੰਦਰ ਮੱਲਾ, ਸੁਖਦੇਵ ਸਿੰਘ ਪ੍ਰੇਮੀ, ਜਸਵੰਤ ਹਾਂਸ, ਮੰਗਤ ਚੰਚਲ, ਗੁਰਪ੍ਰੀਤ ਰੰਗੀਲਪੁਰ, ਗੁਰਮੀਤ ਪਾੜ੍ਹਾ, ਭੁਪਿੰਦਰ ਬੇਦੀ, ਡਾ. ਲੇਖ ਰਾਜ, ਅਮਰਜੀਤ ਜੀਤ, ਸਰਬਜੀਤ ਕੌਰ ਜੱਸ, ਸੰਦੀਪ, ਸ਼ੈਲਿੰਦਰਜੀਤ ਰਾਜਨ, ਗਗਨਦੀਪ ਸ਼ਰਮਾ, ਸਹਿਜਪ੍ਰੀਤ ਮਾਂਗਟ, ਕੰਵਰ ਜਸਵਿੰਦਰਪਾਲ ਸਿੰਘ, ਕੰਵਰ ਇਕਬਾਲ, ਡਾ. ਭੁਪਿੰਦਰ ਕੌਰ ਕਪੂਰਥਲਾ, ਪਰਵੇਸ਼ ਖੰਨਾ, ਹਰਪਾਲ ਨਾਗਰਾ, ਜਗੀਰ ਸਿੰਘ ਪ੍ਰੀਤ, ਮਾਸਟਰ ਗਿਆਨ ਸਿੰਘ ਦੁਸਾਂਝ, ਸੋਹਣ ਸਿੰਘ ਭਿੰਡਰ, ਰਾਮ ਪ੍ਰਕਾਸ਼ ਟੋਨੀ, ਬਲਬੀਰ ਜਲਾਲਾਬਾਦੀ, ਦਵਿੰਦਰ ਪ੍ਰੀਤ, ਛਾਇਆ ਸ਼ਰਮਾ, ਨੀਲੂ ਬੱਗਾ, ਨਰਵਿੰਦਰ ਕੌਸ਼ਲ, ਪ੍ਰੋ. ਨਵਰੂਪ ਕੌਰ, ਜਾਗੀਰ ਸਿੰਘ ਨੂਰ, ਡਾ. ਸੁਖਵਿੰਦਰ ਰੰਧਾਵਾ, ਗੁਰਮੀਤ ਪਨਾਗ, ਲਾਲ ਸਿੰਘ ਦਸੂਹਾ, ਬਲਬੀਰ ਮੁਕੇਰੀਆਂ, ਸਰਦਾਰਾ ਸਿੰਘ ਚੀਮਾ ਅਤੇ ਹਜ਼ਾਰਾ ਸਿੰਘ ਚੀਮਾ।

ਵਿਸ਼ੇਸ਼ ਨੋਟ :  ਲੇਖਕ ਸਾਥੀ ਵੋਟ ਪਾਉਣ ਲਈ ਆਪਣਾ ਕੋਈ ਇਕ ਸ਼ਨਾਖ਼ਤੀ ਪੱਤਰ ਜ਼ਰੂਰ ਲੈ ਕੇ ਆਉਣ।

ਸ਼ਹੀਦ ਭਗਤ ਸਿੰਘ ਜਨਮ ਦਿਵਸ ਮੌਕੇ ਪੰਜਾਬੀ ਭਵਨ ਵਿੱਚ ਵਿਸ਼ੇਸ਼ ਆਯੋਜਨ

ਕਰਨੈਲ ਸਿੰਘ ਮਾਂਗਟ ਦਾ ਕਾਵਿ ਸੰਗ੍ਰਹਿ ਬੇਪ੍ਰਵਾਹੀਆਂ ਰਿਲੀਜ਼ 

ਪੁਸਤਕ ਦਾ ਲੋਕ ਅਰਪਣ ਕੀਤਾ ਸਰਗਰਮ ਲੇਖਕ ਪ੍ਰੋ. ਗੁਰਭਜਨ ਗਿੱਲ ਨੇ  

ਲੁਧਿਆਣਾ: 28 ਸਤੰਬਰ 2019: (ਸਾਹਿਤ ਸਕਰੀਨ ਬਿਊਰੋ)::

ਪੰਜਾਬੀ ਲੇਖਕ ਸਭਾ ਲੁਧਿਆਣਾ ਵੱਲੋਂ  ਸ਼ਹੀਦ ਭਗਤ ਸਿੰਘ ਜੀ ਦੇ 115ਵੇਂ ਜਨਮ ਦਿਹਾੜੇ ਮੌਕੇ ਪੰਜਾਬੀ ਭਵਨ ਲੁਧਿਆਣਾ ਚ ਕਰਨੈਲ ਸਿੰਘ ਮਾਂਗਟ ਦੇ ਵੇ ਜੋਗੀਆ, ਮਹਿਕ ਪੁਰੇ ਦੀਆਂ ਵਾਵਾਂ,ਤੇ ਹੱਥੀਂ ਮਹਿੰਦੀ ਬਾਹੀਂ ਚੂੜਾ ਤੋਂ ਬਾਦ ਚੌਥੇ ਗੀਤ  ਸੰਗ੍ਰਹਿ ਬੇ ਪ੍ਰਵਾਹੀਆਂ ਨੂੰ ਲੋਕ ਅਰਪਣ ਕਰਦਿਆਂ ਪੰਜਾਬੀ ਸਾਹਿੱਤ ਅਕਾਡਮੀ ਦੇ ਸਾਬਕਾ ਪ੍ਰਧਾਨ ਤੇ ਸ਼੍ਰੋਮਣੀ ਪੰਜਾਬੀ ਕਵੀ ਪ੍ਰੋ: ਗੁਰਭਜਨ ਸਿੰਘ ਗਿੱਲ ਨੇ ਕਿਹਾ ਹੈ ਕਿ

ਭਾਸ਼ਾ ਸਾਹਿੱਤ ਤੇ ਸਭਿਆਚਾਰ ਦੇ ਵਿਕਾਸ ਲਈ ਸਿਰਜਣਾ ਦੇ ਨਾਲ ਨਾਲ

ਲੋਕ ਸੰਘਰਸ਼ਾਂ ਦਾ ਸਾਥ ਵੀ ਜ਼ਰੂਰੀ ਹੈ। 

ਪੁਸਤਕ ਲੋਕ ਅਰਪਣ ਵਿੱਚ ਡਾ: ਜੋਗਾ ਸਿੰਘ ਪੰਜਾਬੀ ਯੂਨੀ: ਪਟਿਆਲਾ,ਪ੍ਰੋ: ਰਵਿੰਦਰ ਭੱਠਲ ਪ੍ਰਧਾਨ ਪੰਜਾਬੀ ਸਾਹਿੱਤ ਅਕਾਡਮੀ ਲੁਧਿਆਣਾ,ਗੁਰਚਰਨ ਕੌਰ ਕੋਚਰ, ਸਹਿਜਪ੍ਰੀਤ ਸਿੰਘ ਮਾਂਗਟ, ਸੁਸ਼ੀਲ ਦੇਸਾਂਝ ਸੰਪਾਦਕ ਹੁਣ, ਪ੍ਰੋ: ਅਨੂਪ ਵਿਰਕ, ਦਰਸ਼ਨ ਬੁੱਟਰ, ਡਾ: ਗੁਰਇਕਬਾਲ ਸਿੰਘ ਤੇ ਮਨਜਿੰਦਰ ਧਨੋਆ ਸ਼ਾਮਿਲ ਹੋਏ। 

ਪ੍ਰੋ: ਰਵਿੰਦਰ ਭੱਠਲ ਨੇ ਕਿਹਾ ਕਿ ਕਰਨੈਲ ਸਿੰਘ ਮਾਂਗਟ ਦੇ ਗੀਤ ਤਰਲ ਮਨ ਦਾ ਸਹਿਜ ਪ੍ਰਗਟਾਵਾ ਹਨ। 

ਡਾ: ਗੁਰਇਕਬਾਲ ਸਿੰਘ ਨੇ  ਇਸ ਗੀਤ ਸੰਗ੍ਰਹਿ ਨੂੰ ਸਮਾਜਿਕ ਕੁਰੀਤੀਆਂ ਦੇ ਖ਼ਿਲਾਫ਼ ਹਮਲਾਵਰ ਸਿਰਜਣਾ ਕਿਹਾ। 

ਦਰਸ਼ਨ ਬੁੱਟਰ ਮੁਤਾਬਕ ਇਹ ਗੀਤ ਸਮਾਜਿਕ ਵਰਤਾਰੇ ਤੇ ਰਿਸ਼ਤਾ ਨਾਤਾ ਪ੍ਰਬੰਧ ਦਾ ਜ਼ਿਕਰ ਤੇ ਫ਼ਿਕਰ ਕਰਦੇ ਹਨ। ਪ੍ਰੋ: ਅਨੂਪ ਸਿੰਘ ਵਿਰਕ ਨੇ ਕਿਹਾ ਕਿ ਕਿਸੇ ਵੀ ਗੀਤ ਸੰਗ੍ਰਹਿ ਦੀ ਪ੍ਰਕਾਸ਼ਨਾ ਮੇਰੇ ਲਈ ਹਮੇਸ਼ਾਂ ਹੀ ਸ਼ੁਭ ਯਤਨ ਰਿਹਾ ਹੈ। ਮਾਂਗਟ ਕੋਲ ਸੁਰ ਵੀ ਹੈ ਤੇ ਸੰਵੇਦਨਾ ਵੀ। 

ਪੰਜਾਬੀ ਯੂਨੀਵਰਸਿਟੀ ਪਟਿਆਲਾ ਦੇ ਡਾ: ਜੋਗਾ ਸਿੰਘ ਨੇ ਕਿਹਾ ਕਿ ਕਰਨੈਲ ਸਿੰਘ ਮਾਂਗਟ ਨੇ ਗੀਤ ਨੂੰ ਸਤਿਕਾਰਯੋਗਤਾ ਬਖ਼ਸ਼ੀ ਹੈ। ਉਨ੍ਹਾਂ ਕਿਹਾ ਕਿ ਮਾਂਗਟ ਦੀ ਗੀਤਕਾਰੀ ਰੂਹਦਾਰੀ ਹੈ। 

ਇਸ ਮੌਕੇ ਬੋਲਦਿਆਂ ਗੁਰਚਰਨ ਕੌਰ ਕੋਚਰ  ਨੇ ਕਿਹਾ ਕਿ ਕਰਨੈਲ ਸਿੰਘ ਮਾਂਗਟ ਨੇ ਪੰਜਾਬੋਂ ਬਾਹਰ ਰਹਿ ਕੇ ਵੀ ਪੰਜਾਬ ਦੀ ਮਿੱਟੀ ਨੂੰ ਬੋਲਣ ਲਾਇਆ ਹੈ। 

ਇਸ ਮੌਕੇ ਪ੍ਰੋ: ਸੰਤੋਖ ਸਿੰਘ ਔਜਲਾ, ਉੱਘੇ ਲੋਕ ਗਾਇਕ ਕੇ ਦੀਪ, ਕੁਲਦੀਪ ਤੂਰ, ਪਰਮਜੀਤ ਸਿੰਘ ਧਾਲੀਵਾਲ, ਸੁਮਿਤ ਗੁਲਾਟੀ, ਸਰਬਜੀਤ ਵਿਰਦੀ, ਨੀਲੂ ਬੱਗਾ,ਜਸਪ੍ਰੀਤ ਫਲਕ, ਸਿਮਰਨ ਧੁੱਗਾ, ਦੀਪ ਦੇਵਿੰਦਰ ਸਿੰਘ ਅੰਮ੍ਰਿਤਸਰ, ਪ੍ਰੋ: ਜਸਬੀਰ ਸਿੰਘ ਵਿਰਕ, ਪ੍ਰਿੰ: ਸੇਵਾ ਸਿੰਘ ਕੌੜਾ, ਜਗਦੀਪ ਸਿੱਧੂ ਮੋਹਾਲੀ, ਰਾਮ ਸਿੰਘ ਅਲਬੇਲਾ, ਗੁਰਦਰਸ਼ਨ ਧੂਰੀ,ਹਰਪ੍ਰੀਤ ਸਿੰਘ, ਰਵਿੰਦਰ ਦੀਵਾਨਾ, ਪਰਮਜੀਤ ਮਹਿਕ, ਅਮਨਦੀਪ ਫੱਲੜ,ਤ੍ਰੈਲੋਚਨ ਲੋਚੀ, ਬੁੱਧ ਸਿੰਘ ਨੀਲੋਂ, ਤਰਲੋਚਨ ਝਾਂਡੇ, ਪਰਮਿੰਦਰ ਅਲਬੇਲਾ ਸ਼ਾਮਿਲ ਹੋਏ। 

ਸ਼ਹੀਦ ਭਗਤ ਸਿੰਘ ਜਨਮ ਦਿਹਾੜੇ ਨੂੰ ਸਮਰਪਿਤ ਕਵੀ ਦਰਬਾਰ ਵੀ ਕੀਤਾ ਗਿਆ ਜਿਸ ਚ ਪੰਦਰਾਂ ਕਵੀਆਂ ਨੇ ਹਿੱਸਾ ਲਿਆ।

ਕੇਂਦਰੀ ਪੰਜਾਬੀ ਲੇਖਕ ਸਭਾ (ਰਜਿ.) ਦੀਆਂ ਚੋਣਾਂ ਲਈ ਉਮੀਦਵਾਰਾਂ ਦੀ ਅੰਤਿਮ ਸੂਚੀ

Sep 28, 2019, 4:46 PM

ਡਾ. ਸਰਬਜੀਤ ਕੌਰ ਸੋਹਲ ਅਤੇ ਕੇ. ਤ੍ਰਿਪਤਾ ਸਿੰਘ ਵੀ ਚੋਣ ਮੈਦਾਨ ਵਿੱਚ 

ਲੁਧਿਆਣਾ: 28 ਸਤੰਬਰ 2019: (ਸਾਹਿਤ ਸਕਰੀਨ ਬਿਊਰੋ)::

ਕੇਂਦਰੀ ਪੰਜਾਬੀ ਲੇਖਕ ਸਭਾ (ਰਜਿ.) ਦੀਆਂ ਪੰਜਾਬੀ ਭਵਨ, ਲੁਧਿਆਣਾ ਵਿਖੇ 6 ਅਕਤੂਬਰ 2019 ਨੂੰ ਹੋ ਰਹੀਆਂ ਚੋਣਾਂ ਲਈ ਨਾਮਜ਼ਦਗੀ ਵਾਪਸ ਲੈਣ ਦਾ ਅੱਜ ਆਖ਼ਰੀ ਦਿਨ ਸੀ। ਚੋਣ ਅਧਿਕਾਰੀ ਪ੍ਰੋ. ਜਗਮੋਹਨ ਸਿੰਘ ਅਨੁਸਾਰ ਪ੍ਰਧਾਨਗੀ ਦੇ ਅਹੁਦੇ ਲਈ ਦਰਸ਼ਨ ਬੁੱਟਰ ਅਤੇ ਡਾ. ਸਰਬਜੀਤ ਸਿੰਘ ਵਿਚਕਾਰ ਸਿੱਧਾ ਮੁਕਾਬਲਾ ਹੈ। ਜਨਰਲ ਸਕੱਤਰ ਦੇ ਮਹੱਤਵਪੂਰਨ ਅਹੁਦੇ ਲਈ ਸੁਸ਼ੀਲ ਦੁਸਾਂਝ ਅਤੇ ਡਾ. ਸੁਖਦੇਵ ਸਿੰਘ (ਸਿਰਸਾ) ਵਿਚਕਾਰ ਟੱਕਰ ਹੈ। ਸੀਨੀਅਰ ਮੀਤ ਪ੍ਰਧਾਨ ਲਈ ਡਾ. ਜੋਗਾ ਸਿੰਘ ਅਤੇ ਦੇਸ ਰਾਜ ਕਾਲੀ ਮੈਦਾਨ ਵਿਚ ਹਨ। ਮੀਤ ਪ੍ਰਧਾਨ ਦੇ ਅਹੁਦਿਆਂ ਲਈ ਤਰਲੋਚਨ ਝਾਂਡੇ, ਸੁਰਿੰਦਰ ਪ੍ਰੀਤ ਘਣੀਆਂ, ਵਰਗਿਸ ਸਲਾਮਤ, ਕਰਮ ਸਿੰਘ ਵਕੀਲ, ਜਸਪਾਲ ਮਾਨਖੇੜਾ, ਕੁਲਦੀਪ ਸਿੰਘ ਬੇਦੀ, ਡਾ. ਹਰਵਿੰਦਰ ਸਿੰਘ, ਅਸ਼ਵਨੀ ਬਾਗੜੀਆਂ ਤੋਂ ਇਲਾਵਾ ਦੋ ਇਸਤਰੀ ਉਮੀਦਵਾਰ ਡਾ. ਸਰਬਜੀਤ ਕੌਰ ਸੋਹਲ ਅਤੇ ਕੇ. ਤ੍ਰਿਪਤਾ ਸਿੰਘ ਚੋਣ ਪਿੜ ਵਿਚ ਡਟੇ ਹੋਏ ਹਨ। ਸਕੱਤਰ ਦੇ ਚਾਰ ਅਹੁਦਿਆਂ ਲਈ ਦੀਪ ਦੇਵਿੰਦਰ ਸਿੰਘ, ਜਗਦੀਪ ਸਿੱਧੂ, ਡਾ. ਸਰਘੀ, ਡਾ. ਨੀਤੂ ਅਰੋੜਾ, ਡਾ. ਗੁਰਮੀਤ ਕੱਲਰਮਾਜਰੀ, ਧਰਵਿੰਦਰ ਸਿੰਘ ਔਲਖ, ਡਾ. ਰਾਮ ਮੂਰਤੀ ਅਤੇ ਜਸਵੀਰ ਝੱਜ ਉਮੀਦਵਾਰ ਹਨ।

ਪ੍ਰੋ. ਜਗਮੋਹਨ ਸਿੰਘ ਨੇ ਦੱਸਿਆ ਕਿ ਉਪਰੋਕਤ ਬਾਰਾਂ ਅਹੁਦਿਆਂ ਲਈ ਮਿਤੀ 06 ਅਕਤੂਬਰ 2019, ਦਿਨ ਐਤਵਾਰ ਨੂੰ ਸਵੇਰੇ 10 ਵਜੇ ਤੋਂ ਸ਼ਾਮ ਪੰਜ ਵਜੇ ਤੱਕ ਗੁਪਤ ਮਤਦਾਨ ਹੋਵੇਗਾ ਅਤੇ ਨਤੀਜਿਆਂ ਦਾ ਐਲਾਨ ਉਸੇ ਦਿਨ ਹੀ ਕਰ ਦਿੱਤਾ ਜਾਵੇਗਾ। ਲੇਖਕ/ਵੋਟਰ ਭਾਰਤੀ ਚੋਣ ਕਮਿਸ਼ਨਰ ਵੱਲੋਂ ਨਿਰਧਾਰਿਤ ਪਛਾਣ ਪੱਤਰਾਂ ਵਿਚੋਂ ਕੋਈ ਇੱਕ ਪਛਾਣ ਦਿਖਾਉਣ ਉਪਰੰਤ ਹੀ ਵੋਟ ਪਾ ਸਕਣਗੇ।

ਜਸਵੀਰ ਝੱਜ ਦਾ ਗੀਤ ਸੰਗ੍ਰਹਿ ‘ਜਾਣਾ ਅੱਗੇ ਹੋਰ’ ਲੋਕ ਅਰਪਣ

Aug 19, 2019, 3:07 PM

ਪ੍ਰਗਤੀਸ਼ੀਲ ਲੇਖਕ ਸੰਘ ਪੰਜਾਬ ਤੇ ਚੰਡੀਗੜ੍ਹ ਵੱਲੋਂ ਵਿਸ਼ੇਸ਼ ਆਯੋਜਨ 

ਚੰਡੀਗੜ੍ਹ//ਦੋਰਾਹਾ//ਲੁਧਿਆਣਾ:

ਦੋਰਾਹਾ,19 ਅਗਸਤ (ਪੱਤਰ ਪ੍ਰੇਰਕ)-ਪ੍ਰਗਤੀਸ਼ੀਲ ਲੇਖਕ ਸੰਘ ਪੰਜਾਬ ਤੇ ਚੰਡੀਗੜ੍ਹ ਦੀਆਂ ਇਕਾਈਆਂ ਦੀ ਸੂਬਾ ਕਾਨਫ੍ਰੰਸ ਤੇ ਸੈਮੀਨਾਰ, ਪੀਪਲ ਕਨਵੈਸ਼ਨ ਹਾਲ, ਸੈਕਟਰ 36 ਚੰਡੀਗੜ੍ਹ ਵਿਖੇ ਕੀਤਾ ਗਿਆ। ਇਸ ਸਮਾਗਮ ਵਿਚ ਕਾਰਜਕਾਰੀ ਕੌਮੀ ਪ੍ਰਧਾਨ ਡਾ. ਅਲੀ ਜਾਵੇਦ (ਜੇ.ਐਨ.ਯੂ. ਦਿੱਲੀ) , ਡਾ. ਸਵਰਾਜਬੀਰ ਸੰਪਾਦਕ ਪੰਜਾਬੀ ਟਿ੍ਰਬਿਊਨ ਚੰਡੀਗੜ, ਕੌਮੀ ਪ੍ਰੀਜ਼ਡੀਅਮ ਮੈਂਬਰ ਸੁਖਦੇਵ ਸਿੰਘ, ਇਕਾਈ ਪੰਜਾਬ ਦੇ ਪ੍ਰਧਾਨ ਤੇਜਵੰਤ ਸਿੰਘ ਗਿੱਲ, ਜਨਰਲ ਸਕੱਤਰ ਸੁਰਜੀਤ ਜੱਜ, ਜੁਇੰਟ ਜਨਰਲ ਸਕੱਤਰ ਡਾ. ਗੁਲਜ਼ਾਰ ਸਿੰਘ ਪੰਧੇਰ, ਇਕਾਈ ਚੰਡੀਗੜ੍ਹ ਦੇ ਪ੍ਰਧਾਨ ਸਰਬਜੀਤ ਸਿੰਘ, ਜਨਰਲ ਸਕੱਤਰ, ਡਾ. ਗੁਰਮੇਲ ਸਿੰਘ, ਡਾ. ਅਨੂਪ ਸਿੰਘ ਸਾਬਕਾ ਸੀ. ਮੀਤ ਪ੍ਰਧਾਨ ਪੰਜਾਬੀ ਸਾਹਿਤ ਅਕਾਡਮੀ ਲੁਧਿਆਣਾ ਨੇ ਇਕਾਈ ਪੰਜਾਬ ਦੇ ਸਕੱਤਰ ਤੇ ਪੰਜਾਬੀ ਲਿਖਾਰੀ ਸਭਾ ਰਾਮਪੁਰ ਦੇ ਪ੍ਰਧਾਨ ਜਸਵੀਰ ਝੱਜ ਦਾ ਗੀਤ ਸੰਗ੍ਰਹਿ ‘ਜਾਣਾ ਅੱਗੇ ਹੋਰ’ ਨੂੰ ਲੋਕ ਅਰਪਣ ਕੀਤਾ। ਜਿਸ ਦੇ ਬਾਰੇ ਬਲਵੰਤ ਮਾਂਗਟ ਜਨਰਲ ਸਕੱਤਰ ਪੰਜਾਬੀ ਲਿਖਾਰੀ ਸਭਾ ਰਾਮਪੁਰ ਨੇ ਦੱਸਿਆ ਕਿ ਝੱਜ ਦੇ ਗੀਤ ਸੰਗ੍ਰਹਿ ਦੀ ਭੂਮਿਕਾ ਡਾ. ਸੁਖਦੇਵ ਸਿੰਘ ਸਿਰਸਾ ਨੇ ‘ਲੰਮੇਰੀ ਵਾਟ ਦਾ ਪਾਂਧੀ:ਜਸਵੀਰ ਝੱਜ’ ਵਿਚ ਕਿਹਾ ਹੈ ਕਿ ਝੱਜ ਦੇ ਗੀਤ ਦਰਬਾਰੀ ਤੇ ਰੁਮਾਨੀ ਭਾਸ਼ਾ ‘ਚ ਨਾ ਹੋ ਕੇ ਲੋਕ ਪੱਖੀ ਹੁੰਦੇ ਹੋਏ, ਮਨੁੱਖ ਨੂੰ ਵੇਲ ਨਹੀਂ ਰੁੱਖ ਬਣਨ ਲਈ ਪ੍ਰੇਰਤ ਕਰਦੇ ਹਨ। ਡਾ. ਗਲਜ਼ਾਰ ਸਿੰਘ ਪੰਧੇਰ ਨੇ ‘ਲੋਕ ਪੱਖੀ ਗੀਤਕਾਰੀ- ‘ਜਾਣਾ ਅੱਗੇ ਹੋਰ’ ਵਿਚ ਕਿਹਾ ਹੈ ਕਿ ‘ਕਹਾਵਤਾਂ ਤੇ ਮੁਹਾਵਰੇਦਾਰ ਪੇਂਡੂ ਸ਼ਬਦਕੋਸ਼ੀ ਸ਼ਬਦਾਵਲੀ ਨਾਲ਼ ਭਰਪੂਰ, ਝੱਜ ਦਾ ਇਹ ਗੀਤ ਸੰਗ੍ਰਹਿ ਸਾਡੇ ਸਮਿਆਂ ਦੀਆਂ ਦਰਪੇਸ਼ ਚੁਣੌਤੀਆਂ ਤੇ ਸੂਖ਼ਮ ਵਾਰ ਕਰਦਾ ਇੱਕ ਹਥਿਆਰ ਵਰਗਾ ਹੈ’। ਇਸ ਸਮੇਂ ਉੱਕਤ ਦੇ ਨਾਲ਼ ਨਾਲ਼ ਸੁਰਿੰਦਰ ਗਿੱਲ (ਮੁਹਾਲ਼ੀ), ਡਾ. ਜੋਗਿੰਦਰ ਨਿਰਾਲਾ (ਬਰਨਾਲ਼ਾ), ਕੇਂਦਰੀ ਪੰਜਾਬੀ ਲੇਖਕ ਸਭਾ ਸਾਬਕਾ ਪ੍ਰਧਾਨ ਡਾ. ਲਾਭ ਸਿੰਘ ਖੀਵਾ, ਡਾ. ਸ਼ਮਸ਼ੇਰ ਮੋਹੀ, ਸ਼੍ਰੀ ਰਾਮ ਅਰਸ਼, ਅਮਨਦੀਪ ਆਜ਼ਾਦ, ਹਰਬੰਸ ਹੀਓਂ (ਨਵਾਂ ਸ਼ਹਿਰ), ਕਹਾਣੀਕਾਰਾ ਕਾਹਨਾ ਸਿੰਘ, ੳੂਸ਼ਾ ਕੰਵਰ, ਡਾ. ਅਰਵਿੰਦਰ ਕੌਰ ਕਾਕੜਾ, ਦਲਬੀਰ ਲੁਧਿਆਣਵੀ, ਬਲਕੌਰ ਸਿੰਘ ਗਿੱਲ, ਡਾ. ਬਲਵਿੰਦਰ ਚਹਿਲ, ਜਸਪਾਲ ਮਾਨਖੇੜਾ (ਬਠਿੰਡਾ),  ਕਰਮ ਸਿੰਘ ਵਕੀਲ, ਹਰਦੀਪ ਢਿਲ੍ਹੋਂ, ਭੋਲਾ ਸਿੰਘ ਸੰਘੇੜਾ, ਮੇਜਰ ਸਿੰਘ ਬਰਨਾਲ਼ਾ ਅਦਿ ਲੇਖਕ ਵੱਡੀ ਗਿਣਤੀ ਵਿਚ ਹਾਜ਼ਰ ਸਨ। 

19ਪੀ.ਡਬਯੂ.ਏ.- ਪ੍ਰਗਤੀਸ਼ੀਲ ਲੇਖਕ ਸੰਘ ਪੰਜਾਬ ਤੇ ਚੰਡੀਗੜ੍ਹ ਵੱਲੋਂ ਸ਼ਾਇਰ ਝੱਜ ਦਾ ਗੀਤ ਸੰਗ੍ਰਹਿ ‘ਜਾਣਾ ਅੱਗੇ ਹੋਰ’ ਲੋਕ ਅਰਪਣ ਕਰਨ ਸਮੇਂ ਡਾ. ਜਾਵੇਦ, ਡਾ. ਸਵਰਾਜਬੀਰ, ਡਾ. ਗਿੱਲ, ਡਾ. ਸਿਰਸਾ, ਜੱਜ, ਡਾ. ਪੰਧੇਰ, ਡਾ. ਸਰਬਜੀਤ, ਡਾ. ਗੁਰਮੇਲ, ਝੱਜ ਅਤੇ ਮਾਂਗਟ।  

ਗ਼ਜ਼ਲ//ਕਾਰਤਿਕਾ ਸਿੰਘ

ਜੇ ਮੀਟਿੰਗ ਵਿੱਚ ਮੈਂ ਨ ਜਾਂਦੀ ਤਾਂ ਆਲਮ ਹੋਰ ਹੋਣਾ ਸੀ।

ਜੇ ਹਾਂ ਵਿੱਚ ਹਾਂ ਮਿਲਾ ਆਂਦੀ ਤਾਂ ਆਲਮ ਹੋਰ ਹੋਣਾ ਸੀ।

ਮੈਂ ਮੁੱਦਾ ਚੁੱਕ ਲਿਆ ਸੱਚ ਦਾ ਤੇ ਹੁਣ ਤੱਕ ਭੁਗਤਿਆ ਵੀ ਹੈ,

ਜੇ ਝੂਠਾ ਰਾਗ ਗਾ ਆਂਦੀ ਤਾਂ ਆਲਮ ਹੋਰ ਹੋਣਾ ਸੀ।

ਮੋਹੱਬਤ ਸੀ ਬੜੀ ਸੱਚੀ, ਪਰਖ ਵਿੱਚ ਹਾਰ ਗਈ ਐਪਰ,

ਗਲੇ ਸੂਲੀ ਨੂੰ ਲਾ ਆਂਦੀ ਤਾਂ ਆਲਮ ਹੋਰ ਹੋਣਾ ਸੀ।

ਬੜੀ ਬਦਰੰਗ ਹੈ ਦੁਨੀਆ ਮਗਰ ਰੰਗੀਨ ਲੱਗਦੀ ਹੈ,

ਜੇ ਅਸਲੀ ਰੰਗ 'ਚ ਆ ਜਾਂਦੀ ਤਾਂ ਆਲਮ ਹੋਰ ਹੋਣਾ ਸੀ।

ਬੜੀ ਹੀ ਤੇਜ਼ ਬਾਰਿਸ਼ ਹੈ, ਬਣੂ ਝੁੱਗੀਆਂ ਦਾ ਕੀ ਆਖਿਰ,

ਜੇ ਮਹਿਲਾਂ ਨੂੰ ਵਹਾ ਜਾਂਦੀ ਤਾਂ ਆਲਮ ਹੋਰ ਹੋਣਾ ਸੀ।

ਕਦੇ ਕਸ਼ਮੀਰ ਦੀ ਚਰਚਾ, ਕਦੇ ਲਾਹੌਰ ਦੀ ਚਰਚਾ,

ਜੇ ਗੱਲ ਲੋਕਾਂ ਦੀ ਛਾ ਜਾਂਦੀ ਤਾਂ ਆਲਮ ਹੋਰ ਹੋਣਾ ਸੀ।

ਮੋਹੱਬਤ ਸੀ ਮਗਰ ਇਜ਼ਹਾਰ ਇਸਦਾ ਕਰ ਨਹੀਂ ਹੋਇਆ,

ਜ਼ੁਬਾਂ 'ਤੇ ਗੱਲ ਜੇ ਆ ਜਾਂਦੀ ਤਾਂ ਆਲਮ ਹੋਰ ਹੋਣਾ ਸੀ।

ਉਹਨੇ ਇਜ਼ਹਾਰ ਕੀਤਾ ਸੀ ਮੋਹੱਬਤ ਦਾ ਮਗਰ ਉਸ ਵਿੱਚ,

ਮੋਹੱਬਤ ਨਜ਼ਰ ਆ ਜਾਂਦੀ ਤਾਂ ਆਲਮ ਹੋਰ ਹੋਣਾ ਸੀ।

ਇਹ ਦੁਨੀਆ ਮੈਂ ਨਹੀਂ ਸਿਰਜੀ, ਇਹ ਸਿਰਜੀ ਹੈ ਕਿਸੇ ਰੱਬ ਨੇ,

ਜੇ ਮੈਨੂੰ ਜਾਚ ਆ ਜਾਂਦੀ ਤਾਂ ਆਲਮ ਹੋਰ ਹੋਣਾ ਸੀ।

ਬੜੇ ਹੀ ਇੰਨਕਲਾਬੀ ਸਨ, ਤੁਰੇ ਇਸ ਰਾਹ ' ਤੇ ਜਿਹੜੇ!

ਕਣੀ ਸਭਨਾਂ 'ਚ ਆ ਜਾਂਦੀ ਤਾਂ ਆਲਮ ਹੋਰ ਹੋਣਾ ਸੀ।

ਅਸੀਂ ਲੈ ਕੇ ਤੁਰੇ ਝੰਡਾ ਕਿ ਦੁਨੀਆ ਬਦਲ ਦੇਵਾਂਗੇ,

ਜੇ ਸੱਚੀਂਓਂ ਜਾਚ ਆ ਜਾਂਦੀ ਤਾਂ ਆਲਮ ਹੋਰ ਹੋਣਾ ਸੀ।

ਕਦੇ ਖਿਚੜੀ, ਕਦੇ ਚਾਵਲ, ਕਦੇ ਦਲੀਆ, ਕਦੇ ਡੋਸਾ!

ਜੇ ਉਪਮਾ ਵੀ ਬਣਾ ਜਾਂਦੀ ਤਾਂ ਆਲਮ ਹੋਰ ਹੋਣਾ ਸੀ।

ਸਹੇਲੀ ਹੈ ਮੇਰੀ ਪਰ ਗੱਲ ਚਾਹ ਪੀ ਕੇ ਹੀ ਸੁਣਦੀ ਹੈ,

ਜੇ ਦੋ ਘੁੱਟ ਚਾਹ ਪਿਆ ਜਾਂਦੀ ਤਾਂ ਆਲਮ ਹੋਰ ਹੋਣਾ ਸੀ।
                 ----------------

ਨਿਰੋਲ ਇਸਤਰੀਆਂ ਦੀ ਬਣੀ ”ਜੀਵਨ ਜੋਤ” ਸਾਹਿਤ ਸਭਾ

Jul 30, 2019, 5:25 PM

ਪਲੇਠੇ ਉਦਘਾਟਨੀ ਸਮਾਗਮ ਸਮੇਂ ਪੁੱਜੀਆਂ ਕਈ ਸਾਹਿਤਿਕ ਸ਼ਖਸੀਅਤਾਂ 

ਸਾਹਨੇਵਾਲ (ਲੁਧਿਆਣਾ): 30 ਜੁਲਾਈ 2019: (ਰਵਿੰਦਰ ਸਿੰਘ ਦੀਵਾਨਾ//ਪੰਜਾਬ ਸਕਰੀਨ)::

ਕਸਬਾ ਸਾਹਨੇਵਾਲ ਦੇ ਕਮਿਊਨਟੀ ਸੈਂਟਰ ਨੇੜੇ ਡਰੀਮ ਪਾਰਕ ਵਿਖੇ ”ਜੀਵਨ ਜੋਤ” ਪੰਜਾਬੀ ਸਾਹਿਤ ਸਭਾ ਦਾ ਗਠਨ ਕੀਤਾ ਗਿਆ ਜਿਸ ਵਿੱਚ ਮੁੱਖ ਮਹਿਮਾਨ ਵਜੋਂ ਮਹੰਤ ਹਰਪਾਲ ਦਾਸ ਤੇ ਡਾ. ਗੁਰਚਰਨ ਕੌਰ ਕੋਚਰ ਨੇ ਸ਼ਮੂਲੀਅਤ ਕੀਤੀ। ਇਸ ਮੌਕੇ ਸਟੇਜ ਦਾ ਸੰਚਾਲਨ ਕਰਦਿਆਂ ਕਵੀਸ਼ਰ ਗੁਰਸੇਵਕ ਸਿੰਘ ਢਿੱਲੋਂ ਨੇ ਬੜੇ ਫਖ਼ਰ ਨਾਲ ਐਲਾਨ ਕੀਤਾ ਕਿ ਇਹ ”ਜੀਵਨ ਜੋਤ” ਸਾਹਿਤ ਸਭਾ ਨਿਰੋਲ ਇਸਤਰੀਆਂ ਦੀ ਬਣਾਈ ਗਈ ਹੈ, ਜਿਸ ਦੀ ਪ੍ਰਧਾਨ ਜਤਿੰਦਰ ਕੌਰ ਸੰਧੂ ਅਤੇ ਖਜ਼ਾਨਚੀ ਸਿਮਰਨ ਕੌਰ ਧੁੱਗਾ ਹੈ। ਇਸ ਮੌਕੇ ਡਾ. ਗੁਰਚਰਨ ਕੌਰ ਕੌਚਰ ਨੇ ਵੱਡੀ ਗਿਣਤੀ ਵਿੱਚ ਮਰਦ ਕਵੀਆਂ ਅਤੇ ਕਵਿਤਰੀਆਂ ਨੂੰ ਸੰਬੋਧਨ ਕਰਦਿਆਂ ਕਿਹਾ ਕਿ ਭਾਵੇਂ ਗੁਰੂ ਨਾਨਕ ਸਾਹਿਬ ਨੂੰ ਇਸ ਧਰਤੀ  ਤੇ ਆਇਆ ਨੂੰ 500 ਸਾਲ ਤੋਂ ਉਪਰ ਹੋ ਗਏ ਹਨ, ਜਿੰਨ੍ਹਾਂ ਨੇ ਇਸਤਰੀਆਂ ਬਾਰੇ ਕਿਹਾ ਸੀ ਕਿ ”ਸੋ ਕਿਉਂ ਮੰਦਾ ਆਖੀਏ-ਜਿੱਤ ਜੰਮੇ ਰਾਜਾਨ” ਇਸਤਰੀਆਂ ਨੇ ਪੜ੍ਹ ਲਿਖ ਕੇ ਬੜੀਆਂ ਮੱਲਾਂ ਮਾਰੀਆਂ ਹਨ ਇਸਤਰੀਆਂ ਫੌਜ ਦੇ ਵਿੱਚ ਬਹਾਦਰੀ ਦਿਖਾ ਰਹੀਆਂ ਹਨ ਤੇ ਪੀ.ਟੀ. ਊਸ਼ਾ ਵਰਗੀਆਂ ਅਸਮਾਨ ਛੋਹਣ ਵਰਗੀਆਂ ਦੌੜਾਂ ਦੌੜ ਕੇ ਇਸਤਰੀਆਂ ਦੀ ਅਗਵਾਈ ਕਰ ਰਹੀਆਂ ਹਨ ਪਰ ਬੜੇ ਅਫਸੋਸ ਨਾਲ ਕਹਿਣਾ ਪੈਂਦਾ ਹੈ ਕਿ ਹਾਲੇ ਵੀ ਸਾਡੇ ਸਮਾਜ ਵਿੱਚ ਇਸਤਰੀਆਂ ਦਾ ਸਤਿਕਾਰ ਉਹ ਨਹੀ ਹੋ ਰਿਹਾ ਜੋ ਹੋਣਾ ਚਾਹੀਦਾ ਹੈ। ਅੱਜ ਮੈਂ ਬੜੇ ਫਖਰ ਨਾਲ ਕਹਿ ਰਹੀ ਹਾਂ ਕਿ ਸਾਡੀ ਇਹ ਜੀਵਨ ਜੋਤ ਸਾਹਿਤ ਸਭਾ ਭਾਵੇ ਮਰਦ ਕਵੀ ਵੀ ਬਹੁਤ ਆਏ ਹੋਏ ਹਨ ਤੇ ਆਉਂਦੇ ਰਹਿਣਗੇ ਪਰ ਇਸ ਸਭਾ ਦੀ ਅਗਵਾਈ ਸਿਰਫ ਇਸਤਰੀਆਂ ਹੀ ਕਰਨਗੀਆਂ ਇਸ ਮੌਕੇ ਮਹੰਤ ਹਰਪਾਲ ਦਾਸ ਨੇ ਵੀ ਆਪਣੇ ਵੱਡਮੁਲੇ ਵਿਚਾਰਾ ਨਾਲ ਇਸਤਰੀਆਂ ਦੀ ਸਲਾਘਾ ਕਰਦਿਆਂ ਸਭ ਨੂੰ ਵਧਾਈ ਦਿੱਤੀ ਇਸ ਮੌਕੇ ਪਰਮਜੀਤ ਕੌਰ ਮਹਿਕ, ਬਲਵਿੰਦਰ ਕੌਰ ਕਿਰਨ, ਸੁਰਿੰਦਰ ਕੌਰ ਬਾੜਾ, ਨੀਤੂ ਰਾਮਪੁਰ, ਰਜਿੰਦਰ ਕੌਰ ਪੰਨੂ, ਜਸਪ੍ਰੀਤ ਕੌਰ ਮਾਂਗਟ ਅਤੇ ਮਰਦ ਕਵੀਆਂ ਵਿੱਚੋਂ ਜਸਵੀਰ ਝੱਜ, ਰਵਿੰਦਰ ਸਿੰਘ ਦੀਵਾਨਾ, ਪਰਮਿੰਦਰ ਅਲਬੇਲਾ ਆਦਿ ਵੱਡੀ ਗਿਣਤੀ ਵਿੱਚ ਕਵੀ ਹਾਜ਼ਰ ਸਨ ਜਿਨ੍ਹਾਂ ਨੇ ਆਪਣੀਆਂ ਵੱਖੋ-ਵੱਖਰੀਆਂ ਕਵਿਤਾਵਾਂ ਸੁਣਾ ਕੇ ਫਿਜ਼ਾ ਵਿੱਚ ਰੰਗ ਘੋਲੇ। ਅਖੀਰ ਵਿੱਚ ਪ੍ਰਧਾਨ ਜਤਿੰਦਰ ਕੌਰ ਸੰਧੂ ਨੇ ਕਿਹਾ ਕਿ ਮੈਂ ਪ੍ਰਧਾਨ ਹੋਣ ਦੇ ਨਾਤੇ ਇਹ ਐਲਾਨ ਕਰਦੀ ਹਾਂ ਕਿ ਇਸ ਸਾਹਿਤ ਸਭਾ ਵਿੱਚ ਮਰਦ ਕਵੀਆਂ ਨੂੰ ਵੀ ਮਾਨ ਸਨਮਾਨ ਦਿੱਤਾ ਜਾਵੇਗਾ। ਪਰ ਇਸਤਰੀ ਕਵਿਤਰੀਆਂ ਨੂੰ ਪਿਛੇ ਨਹੀ ਰਖਿਆ ਜਾਵੇਗਾ। ਮੈਂ ਆਪਣੀ ਜਿੰਮੇਵਾਰੀ ਪੂਰੀ ਤਨਦੇਹੀ ਨਾਲ ਨਿਭਾਵਾਗੀ। ਜੀਵਨ ਜੋਤ ਸਾਹਿਤ ਸਭਾ ਸਾਹਨੇਵਾਲ ਦਾ ਇਹ ਪਲੇਠਾ ਕਵੀ ਦਰਬਾਰ ਯਾਦਗਾਰੀ ਹੋ ਨਿਭਰਿਆ।

  

ਪੰਜਾਬੀ ਸ਼ਾਇਰਾ ਕੁਲਵਿੰਦਰ ਕਿਰਨ ਨੇ ਪ੍ਰਗਟਾਈ ਹਿੰਦੀ ਸਰੋਤਿਆਂ ਨਾਲ ਨਾਰਾਜ਼ਗੀ

ਜੁਆਬ ਵਿੱਚ ਹਿੰਦੀ ਸਰੋਤਿਆਂ ਨੇ ਦੂਰ ਕੀਤੇ ਸਾਰੇ ਗਿਲੇ

ਲੁਧਿਆਣਾ: 21 ਜੁਲਾਈ 2019: (ਕਾਰਤਿਕਾ  ਸਿੰਘ//ਸਾਹਿਤ ਸਕਰੀਨ)::

ਅੱਜ ਪ੍ਰਸਿੱਧ ਸ਼ਾਇਰਾ ਕੁਲਵਿੰਦਰ ਕੌਰ ਕਿਰਨ ਨੂੰ ਉਸ ਵੇਲੇ ਗੁਸਾ ਆ ਗਿਆ ਜਦੋਂ ਉਹਨਾਂ ਨੂੰ ਲੱਗਿਆ ਕਿ ਸਮਾਗਮ ਵਿੱਚ ਹਿੰਦੀ ਦੇ ਸਰੋਤਿਆਂ ਦੀ ਬਹੁਤਾਤ ਹੈ ਇਸ ਲਈ ਬਹੁਤੇ ਸਰੋਤੇ ਉਹਨਾਂ ਦੀ ਪੰਜਾਬੀ ਸ਼ਾਇਰੀ ਵੱਲ ਧਿਆਨ ਨਹੀਂ ਦੇ ਰਹੇ। ਇਸ ਗੱਲ ਦਾ ਪ੍ਰਗਟਾਵਾ ਉਹਨਾਂ ਮਾਈਕ 'ਤੇ ਆਪਣੀ ਕਵਿਤਾ ਸ਼ੁਰੂ ਕਰਨ ਤੋਂ ਪਹਿਲਾਂ ਪਹਿਲਾਂ ਹੀ ਖੁੱਲ ਕੇ ਵੀ ਕਰ ਦਿੱਤਾ। ਉਹ ਅੱਜ ਪੰਜਾਬੀ ਭਵਨ ਵਿਖੇ ਹੋਏ ਤ੍ਰੈ-ਭਾਸ਼ੀ ਮੁਸ਼ਾਇਰੇ ਵਿੱਚ ਸ਼ਾਮਲ ਹੋਣ ਲਈ ਆਏ ਹੋਏ ਸਨ। ਇਸਦਾ ਆਯੋਜਨ "ਅਲਫਾਜ਼-ਏ-ਅਦਬ" ਅਤੇ "ਆਗਮਨ" ਨਾਮਕ ਸੰਸਥਾਵਾਂ ਵੱਲੋਂ ਸ਼ਾਇਰਾ ਨੀਲੂ ਬੱਗਾ ਦੇ ਜਨਮਦਿਨ ਮੌਕੇ ਸਾਂਝੇ ਤੌਰ 'ਤੇ ਕੀਤਾ ਗਿਆ ਸੀ। ਇਸ 'ਤੇ ਪ੍ਰਬੰਧਕਾਂ ਅਤੇ ਸਰੋਤਿਆਂ ਨੇ ਉਹਨਾਂ ਨੂੰ ਯਕੀਨ ਦੁਆਇਆ ਕਿ ਅਜਿਹਾ ਕੁਝ ਵੀ ਨਹੀਂ ਹੈ ਤੁਸੀਂ ਆਪਣੀ ਕਵਿਤਾ ਦਾ ਪਾਠ ਸ਼ੁਰੂ ਕਰੋ। ਅੱਜ ਦੇ ਮੁਸ਼ਾਇਰੇ ਵਿਚਕ ਉਹਨਾਂ  ਨਾਲ ਗ਼ਜ਼ਲਾਂ ਵੀ ਸੁਣਾਈਆਂ ਅਤੇ ਨਾਲ ਹੀ ਸੁਣਾਈਆਂ ਆਪਣੀ ਹਿੰਦੀ ਕਾਵਿ ਰਚਨਾ ਦੀਆਂ ਦੋ ਕੁ ਸਤਰਾਂ।  ਸਰੋਤਿਆਂ ਨੇ ਬਹੁਤ ਹੀ ਧਿਆਨ ਨਾਲ ਸੁਣਿਆ ਅਤੇ ਤਾੜੀਆਂ ਨਾਲ ਬੱਲੇ ਬੱਲੇ ਕਰਵਾ ਦਿੱਤੀ।

ਸਰਕਾਰ ਪੰਜਾਬੀ ਲੇਖਕਾਂ ਨੂੰ ਵੀ ਜਲਦੀ ਸਨਮਾਨਿਤ ਕਰੇ-ਡਾ. ਟਾਂਡਾ

Jul 12, 2019, 3:24 AM

ਸਰਕਾਰ ਉੱਚ ਦਰਜੇ ਦਾ ਸਾਹਿਤ ਛਾਪਣ 'ਚ ਵੀ ਮਦਦ ਕਰੇ

ਸਿਡਨੀ: 12 ਜੁਲਾਈ 2019: (ਸਾਹਿਤ ਸਕਰੀਨ ਬਿਊਰੋ)::

‘ਵਿਸ਼ਵ ਪੰਜਾਬੀ ਸਾਹਿਤ ਪੀਠ’ ਦੇ ਡਾਇਰੈਕਟਰ, ਕੇਂਦਰੀ ਪੰਜਾਬੀ ਲੇਖਕ ਸਭਾ ਦੇ ਸਲਾਹਕਾਰ ਡਾ ਅਮਰਜੀਤ ਟਾਂਡਾ ਨੇ ਪਰੈਸ ਦੇ ਨਾਂ ਨੋਟ ਜਾਰੀ  ਕਰਦਿਆਂ ਰੋਜਹਿੱਲ ਸਿਡਨੀ ਵਿਖੇ ਕਿਹਾ ਹੈ ਕਿ ‘ਵਿਸ਼ਵ ਪੰਜਾਬੀ ਸਾਹਿਤ ਪੀਠ’ ਪੰਜਾਬ ਦੇ ਪ੍ਰਸਿੱਧ ਖਿਡਾਰੀਆਂ ਨੂੰ ਉਨ੍ਹਾਂ ਦਾ ਖੇਡਾਂ ਦੇ ਖੇਤਰ 'ਚ ਵੱਡਾ ਨਾਮਣਾ ਖੱਟਣ ਸਦਕਾ ਸਨਮਾਨਿਤ ਕਰਨ ਤੇ ਖੁਸ਼ੀ ਜ਼ਾਹਰ ਕਰਦੀ ਹੈ। 

ਡਾ. ਟਾਂਡਾ ਨੇ ਕਿਹਾ ਕਿ ਅਸੀਂ ਸਰਕਾਰ ਦੇ ਇਸ ਕਾਰਜ ਦੀ ਸ਼ਲਾਘਾ ਕਰਦੇ ਹਾਂ ਤੇ ਇਹ ਵੀ ਅਰਜ਼ ਕਰਦੇ ਹੈ ਕਿ ਉਹ ਪੰਜਾਬੀ ਦੇ ਨਾਮਵਰ ਪਰਸਿੱਧ ਲੇਖਕਾਂ ਨੂੰ ਵੀ ਸਨਮਾਨਿਤ ਕਰੇ। ਇੰਜ ਕਰਨ ਨਾਲ ਪੰਜਾਬੀ ਕਲਮਾਂ ਚ ਅੱਛਾ ਤੇ ਉਚਪੱਧਰੀ ਲਿਖਣ ਦੀ ਪਿਰਤ ਪਏਗੀ।

ਡਾ. ਟਾਂਡਾ ਨੇ ਕਿਹਾ ਕਿ ਅਸੀਂ ਸਰਕਾਰ ਨੂੰ ਇਹ ਵੀ ਬੇਨਤੀ ਕਰਾਂਗੇ ਕਿ ਉਹ ਉੱਚ ਦਰਜੇ ਦਾ ਸਾਹਿਤ ਵੀ ਛਾਪਣ ਚ ਮੱਦਦ ਕਰੇ। ਉਹ ਲੇਖਕ ਜਿਹਨਾਂ ਸਾਹਿੱਤ ਦੇ ਖੇਤਰ ਚ ਵਿਲੱਖਣ ਪੇਸ਼ਕਸ਼ ਕਾਰਣ ਨਾਮਣਾ ਖੱਟਿਆ ਹੈ ਉਹਨਾਂ ਦੀ ਧਨ ਨੌਕਰੀ ਨਾਲ ਸਹਾਇਤਾ ਕੀਤੀ ਜਾਵੇ ਡਾ ਟਾਂਡਾ ਨੇ ਜ਼ੋਰ ਪਾ ਕੇ ਕਿਹਾ।

ਡਾ ਟਾਂਡਾ ਨੇ ਕਿਹਾ ਕਿ ਸਰਕਾਰ ਨੂੰ ਚਾਹੀਦਾ ਹੈ ਕਿ ਲੇਖਕਾਂ ਨੂੰ ਲਿਖਣ ਲਈ ਉਤਸ਼ਾਹਤ ਕਰਨ ਲਈ ਉਹਨਾਂ ਨੂੰ ਸਾਹਿਤ ਫੈਲੋਸਿਪ ਖਾਸ ਐਵਾਰਡ  ਦੇ ਕੇ ਨਿਵਾਜਿਆ ਜਾਵੇ।

ਡਾ. ਟਾਂਡਾ ਨੇ ਕਿਹਾ ਕਿ ਪੰਜਾਬੀ ਵਿਚ ਬਹੁਤ ਕਵੀ ਅਤੇ ਵਿਦਵਾਨ ਲੇਖਕ ਹਨ ਤੇ ਉਹ ਆਪਣੀਆਂ ਰਚਨਾਵਾਂ ਰਾਹੀਂ ਸੁਹਜ ਤੇ ਉਦਾਰਤਾ ਸਿਰਜ ਰਹੇ ਹਨ। ਲੇਖਕ ਸਥੂਲਤਾ ਭਰੇ ਬਿੰਬ ਅਨੁਭਵ ਦਾ ਚਿੱਤਰ ਸਿਰਜਦੇੇ ਸੰਪੂਰਨਤਾ ਦਾ ਸਾਹ ਲੈਂਦੇ ਹਟਕੋਰੇ ਵੀ ਭਰਦੇ ਹਨ। ਤੇ ਓਸੇ ਹੀ ਗਤੀਸ਼ੀਲਤਾ ਵਿੱਚ ਕਲਪਨਾ ਲੋਕ ਅੱਖ ਖੋਲਦੀ ਤੇ ਖਿੜਦੀ ਹੈ।

ਏਸੇ ਹੀ ਸਾਹਿਤਕ ਕਾਵਿ ਕਲਪਨਾ, ਵਿਸ਼ਾਲਤਾ ਤੇ ਜ਼ਰਖੇਜ਼ ਪਾਰਦਰਸ਼ੀ ਦ੍ਰਿਸ਼ਟਤਾ ਨਾਲ ਸਮਾਜ ਸਿਰਜਿਆ ਜਾਂਦਾ ਹੈ। ਤੇ ਇੰਜ ਹੀ ਡਾਟਾਂ ਵਾਲੇ ਉਚੇ ਬੂਹੇ ਪਿੰਡਾਂ ਸ਼ਹਿਰਾਂ ਵਿਚ ਉਸਾਰੇ ਜਾ ਸਕਦੇ ਹਨ।

ਜੇ ਸਰਕਾਰ ਮਦਦ ਕਰੇ ਬੂੰਦ 2 ਸਮੁੰਦਰ ਵੀ ਬਣ ਸਕਦੀ ਹੈ। ਗੂੜ੍ਹੀ ਲਿਖਤ ਵਾਲੇ ਵਰਕੇ ਕਿਤਾਬਾਂ ਬਣ ਵਿਚਰ ਸਕਦੇ ਹਨ ਡਾ ਟਾਂਡਾ ਨੇ ਕਿਹਾ।

ਡਾ. ਟਾਂਡਾ ਨੇ ਕਿਹਾ ਕਿ ਲੇਖਕ ਇੰਜ ਵਿਸ਼ਵ ਸਾਹਿਤ ਅਨੁਭਵ ਵਿਚ ਅਹਿਸਾਸ ਭਰ ਦਿੰਦਾ ਹੈ। ਯਥਾਰਕਤਾ ਕਲਪਨਾ ਦੀ ਸੰਪੂਰਨਤਾ ਨੂੰ ਤਲਾਸ਼ ਕਰਦਾ ਤਾਂਬੇ ਦੀ ਤਸਤਰੀ ਤੇ ਇਕ ਸ਼ਾਲ ਤੱਕ ਬਹੁਤ ਦੇਰ ਬਾਅਦ ਪਹੁੰਚਾਇਆ ਗਿਆ ਲੇਖਕ ਪਾਠਕਾਂ ਦੇ ਸੀਨਿਆਂ ਚ ਦੇਰ ਤੋਂ ਵਸਦਾ ਸਰਕਾਰ ਦਰਬਾਰ ਤੋਂ ਅਣਪਛਾਤਾ ਰਹਿੰਦਾ ਹੈ।        

ਡਾ. ਟਾਂਡਾ ਨੇ ਕਿਹਾ ਕਿ ਅੱਛੀ ਕਿਰਤ ਤੇ ਲੇਖਕ ਸਮੇਂ ਸਿਰ ਪਛਾਣੇ ਜਾਣੇ ਚਾਹੀਦੇ ਹਨ ਨਹੀਂ ਤਾਂ ਕਲਮਾਂ ਨੂੰ ਗੀਤ ਭੁੱਲ ਜਾਣਗੇ। ‘ਵਿਸ਼ਵ ਪੰਜਾਬੀ ਸਾਹਿਤ ਪੀਠ’ ਨੇ ਵੀ ਫੈਸਲਾ ਕੀਤਾ ਹੈ ਕਿ ਸੁਹਿਰਦ ਲੇਖਕ ਜਲਦੀ ਪਛਾਣੇ ਜਾਣ ਤੇ ਭਵਿੱਖ ਵਿਚ ਅਣਪਛਾਤੇ ਨਾ ਰਹਿ ਜਾਣ। ਇੰਜ ਹੋਇਆ ਤਾਂ ਸਦੀਆਂ ਸਾਨੂੰ ਮੁਆਫ ਨਹੀਂ ਕਰਨਗੀਆਂ। ਚੁੱਪ ਨਾਲ ਕੋਈ ਨਹੀਂ ਕਰੇਗਾ ਸੰਵਾਦ। ਸੋ ਸਰਕਾਰਾਂ ਨੂੰ ਅਜਿਹੇ ਕਾਰਜ ਜਲਦੀ ਅਰੰਭਣੇ ਚਾਹੀਦੇ ਹਨ ਡਾ. ਟਾਂਡਾ ਨੇ ਸਲਾਹ ਦਿੰਦਿਆਂ ਕਿਹਾ।

ਉਹਨਾਂ ਇਹ ਗੱਲ ਸਪਸ਼ਟ ਨਹੀਂ ਕੀਤੀ ਕਿ ਸਥਾਪਤੀ ਅਤੇ ਸੱਤਾ ਦੇ ਖਿਲਾਫ ਲਿਖਣ ਵਾਲੇ ਲੇਖਕਾਂ ਦੀਆਂ ਪੁਸਤਕਾਂ ਕੌਣ ਛਾਪੇਗਾ? ਅਸਹਿਣਸ਼ੀਲ ਅਨਸਰਾਂ ਦੇ ਹਮਲਿਆਂ ਦਾ ਸ਼ਿਕਾਰ ਹੋ ਰਹੇ ਲੇਖਕਾਂ ਲਈ ਕੌਣ ਬਣੇਗਾ ਸਹਾਇਕ?

ਗੀਤਕਾਰ ਅਮਰਜੀਤ ਸ਼ੇਰਪੁਰੀ ਦੀ ਪੁਸਤਕ 'ਗਾਉਂਦੇ ਹਰਫ਼' ਲੋਕ ਅਰਪਣ

Jul 10, 2019, 5:49 PM

ਉੱਘੀਆਂ ਸ਼ਖਸੀਅਤਾਂ ਨੇ ਕੀਤੀ ਸਮਾਗਮ ਵਿੱਚ ਸ਼ਮੂਲੀਅਤ 

ਲੁਧਿਆਣਾ: 10 ਜੁਲਾਈ 2019: (ਕਾਰਤਿਕਾ ਸਿੰਘ//ਪੰਜਾਬ ਸਕਰੀਨ)::

'ਕੌਮੀ ਸਾਹਿਤ ਅਤੇ ਕਲਾ ਪ੍ਰੀਸ਼ਦ ਅਤੇ ਪੰਜਾਬੀ ਸਾਹਿਤ ਅਕਾਡਮੀ, ਲੁਧਿਆਣਾ ਦੇ ਸਹਿਯੋਗ ਨਾਲ ਉੱਘੇ ਗੀਤਕਾਰ ਅਮਰਜੀਤ ਸ਼ੇਰਪੁਰੀ ਦੁਆਰਾ ਲਿਖੀ ਹੋਈ ਗੀਤਾਂ ਦੀ ਪਲੇਠੀ ਕਾਵਿ-ਪੁਸਤਕ 'ਗਾਉਂਦੇ ਹਰਫ਼' ਪੰਜਾਬੀ ਭਵਨ, ਲੁਧਿਆਣਾ ਵਿਖੇ ਲੋਕ ਅਰਪਣ ਕੀਤੀ ਗਈ। "ਗਾਉਂਦੇ ਹਰਫ਼" ਲਿਖਣ ਵਾਲੇ ਅਮਰਜੀਤ ਸ਼ੇਰਪੁਰੀਦੀ ਬੁਲੰਦ ਆਵਾਜ਼ ਤੋਂ ਸਾਰੇ ਪੰਜਾਬੀ ਸਰੋਤੇ ਵਾਕਿਫ ਹਨ। ਜੇ ਬਿਜਲੀ ਵੀ ਚਲੀ ਜਾਏ ਤਾਂ ਵੀ ਸਪੀਕਰ ਤੋਂ ਉੱਚੀ ਆਵਾਜ਼ ਹੁੰਦੀ ਹੈ ਅਮਰਜੀਤ ਸ਼ੇਰਪੁਰੀ ਦੀ। ਨਗਰ ਨਿਗਮ ਵਿੱਚ ਕੁਰਸੀ 'ਤੇ ਬੈਠੀਆਂ ਵੀ ਉਸਦੇ ਨਿੱਘੇ ਸੁਭਾਅ ਤੋਂ ਸਾਰੇ ਵਾਕਿਫ ਹਨ। ਇਸ ਮੌਕੇ 'ਤੇ ਪ੍ਰਧਾਨਗੀ ਮੰਡਲ ਵਿਚ ਸ਼ਾਮਿਲ ਪੰਜਾਬੀ ਸਾਹਿਤ ਅਕਾਡਮੀ ਦੇ ਪ੍ਰਧਾਨ, ਪ੍ਰੋ. ਰਵਿੰਦਰ ਸਿੰਘ ਭੱਠਲ, ਸਾਬਕਾ ਪ੍ਰਧਾਨ ਪ੍ਰੋ. ਗੁਰਭਜਨ ਸਿੰਘ ਗਿੱਲ, ਪ੍ਰੋ. ਅਨੂਪ ਵਿਰਕ, ਉੱਘੇ ਪੱਤਰਕਾਰ ਸਤਿਬੀਰ ਸਿੰਘ, ਪ੍ਰਗਟ ਸਿੰਘ ਗਰੇਵਾਲ ਅਤੇ ਗਾਇਕ ਪਾਲੀ ਦੇਤਵਾਲੀਆ ਸਮੇਤ ਸਮੂਹ ਸ਼ਖ਼ਸ਼ੀਅਤਾਂ ਨੇ ਸਾਂਝੇ ਤੌਰ ਤੇ ਲੋਕ ਅਰਪਣ ਕੀਤੀ। ਪੁਸਤਕ ਸੰਬੰਧੀ ਆਪਣੇ ਵਿਚਾਰ ਪੇਸ਼ ਕਰਦਿਆਂ ਪ੍ਰੋ. ਰਵਿੰਦਰ ਸਿੰਘ ਭੱਠਲ ਨੇ ਕਿਹਾ ਕਿ ਅਮਰਜੀਤ ਸ਼ੇਰਪੁਰੀ ਨੇ ਵੱਖ ਵੱਖ ਸਮਾਜਿਕ ਵਿਸ਼ਿਆਂ 'ਤੇ ਗੀਤ ਲਿਖ ਕੇ ਚੰਗੀ ਪਿਰਤ ਪਾਈ ਹੈ। ਇਸ ਮੌਕੇ ਪ੍ਰੋ. ਗੁਰਭਜਨ ਸਿੰਘ ਗਿੱਲ ਨੇ ਪੁਸਤਕ ਵਿਚਲੇ ਗੀਤਾਂ ਬਾਰੇ ਭਰਪੂਰ ਚਾਨਣਾ ਪਾਇਆ। ਸਮਾਗਮ ਦੌਰਾਨ ਉੱਘੇ ਗੀਤਕਾਰ ਸਰਬਜੀਤ ਸਿੰਘ ਬਿਰਦੀ ਨੇ ਮੰਚ ਸੰਚਾਲਨ ਕਰਦੇ ਹੋਏ ਸਮੂਹ ਸ਼ਖਸੀਅਤਾਂ ਨੂੰ ਸਰੋਤਿਆਂ ਦੇ  ਰੂਬਰੂ  ਕਰਵਾਇਆ।
ਇਸ ਸਮਾਗਮ ਵਿਚ ਸ. ਹਰਵਿੰਦਰ ਸਿੰਘ, ਡਾ. ਗੁਰਇਕਬਾਲ ਸਿੰਘ, ਡਾ. ਨਿਰਮਲ ਜੌੜਾ, ਤ੍ਰਿਲੋਚਨ ਲੋਚੀ, ਮਨਜਿੰਦਰ ਧਨੋਆ, ਗੁਰਚਰਨ ਕੌਰ ਕੋਚਰ, ਡਾ. ਗੁਲਜ਼ਾਰ ਸਿੰਘ ਪੰਧੇਰ, ਡਾ. ਪਰਮਜੀਤ ਸਿੰਘ ਸੋਹਲ, ਸ. ਜਸਬੀਰ ਸਿੰਘ ਸੋਹਲ, ਸ.ਜਨਮੇਜਾ ਸਿੰਘ ਜੌਹਲ, ਜਸਮੇਰ ਸਿੰਘ ਢੱਟ, ਤਰਲੋਚਨ ਸਿੰਘ ਰੰਗ ਕਰਮੀ, ਕੇ. ਸਾਧੂ ਸਿੰਘ, ਗੁਰਸ਼ਰਨ ਸਿੰਘ ਨਰੂਲਾ, ਹਰਬੰਸ ਮਾਲਵਾ, ਕੁਲਵਿੰਦਰ ਕੌਰ ਕਿਰਨ, ਸਿਮਰਨ ਕੌਰ ਧੁੱਗਾ, ਜਸਪ੍ਰੀਤ ਕੌਰ ਮਾਂਗਟ, ਕਿੱਕਰ ਡਾਲੇ ਵਾਲਾ, ਰਵਿੰਦਰ ਦੀਵਾਨਾ, ਦਵਿੰਦਰ ਸਿੰਘ ਸੇਖਾ, ਚਮਕੌਰ ਸਿੰਘ, ਗਿਆਨੀ ਗੁਰਦੇਵ ਸਿੰਘ, ਪ੍ਰੋ. ਜਸਬੀਰ ਸਿੰਘ, ਸੁਖਬੀਰ ਸੰਧੇ, ਪਰਮਿੰਦਰ ਅਲਬੇਲਾ ਸਮੇਤ ਹੋਰ ਕਈ ਸ਼ਖ਼ਸੀਅਤਾਂ ਹਾਜ਼ਰ ਸਨ। ਕੁਲ ਮਿਲਾ ਕੇ ਇਹ ਇੱਕ ਯਾਦਗਾਰੀ ਸਮਾਗਮ ਸੀ।