“ਭਗਤ ਸਿੰਘ ਦਾ ਸੁਨੇਹਾ"///ਅਰਵਿੰਦਰ ਕੌਰ ਕਾਕੜਾ

Sep 25, 2018, 9:39 AM
ਉਹ ਲਟ ਲਟ...................... ਬਲਦਾ ਦੀਪ  

ਚੇਤਿਆਂ `ਚ ਜਾਗਦਾ
ਇੱਕ ਗਹਿਰਾ ਅਹਿਸਾਸ
ਅਕ੍ਰਿਤੀ ਨੇ ਨਕਸ਼
ਬਣਾ ਰਿਹੈ............
ਜੇਕਰ ਜਿਉਂਦੀ ਦੇਹ ਅੰਦਰ
ਜ਼ਿੰਦਗੀ ਧੜਕ ਪਵੇ
ਤਾਂ ਕਾਲੀਆਂ ਰਾਤਾਂ `ਚ
ਸੂਰਜ ਉੱਗ ਆਉਦੈ।
ਪਾਟੀਆਂ ਤਲੀਆਂ ਅੰਦਰ
ਰੱਤ ਦੀ ਹਰਕਤ.........
ਜਦ ਅਪਨਾ ਹਿੱਸਾ ਮੰਗੇ
ਤਾਂ ਤਖ਼ਤਾ ਉਲਟ ਜਾਦੈ।
ਪੈਰਾਂ ਦਾ ਸਫ਼ਰ..........
ਚੇਤਨਾ ਦੀ ਪਗਡੰਡੀ `ਤੇ ਤੁਰੇ  ਤਾਂ
ਸਮਝੋ....... ਮਾਰੂਥਲ ਵੀ
ਨਖ਼ਲਿਸਤਾਨ ਬਣ ਜਾਦੈ।
ਜਦ ਸੂਹੀ ਪ੍ਰਭਾਤ ਦਾ ਡੋਲਾ
ਕਿਸੇ ਢਾਰੇ `ਚੋਂ ਨਿਕਲੇ ਤਾਂ ................
ਇਤਿਹਾਸ ਬਦਲ ਜਾਦੈ।
ਧੁਆਖੇ ਮੌਸਮਾਂ `ਚ  ਧਰਤੀ ਦੀ ਕੁੱਖ ਅੰਦਰ
ਕੋਈ ਹਲਚਲ ਹੋਵੇ
ਤਾਂ ਭਾਣਾ ਵਰਤ ਜਾਦੈ।
ਤਰਜ਼ਾਂ ਤੇ ਤਰੰਗਾਂ ਦੀ  ਵਾਛੜ `ਚ.........
ਕਾਣੀ ਵੰਡ ਦੀ ਮੌਜੂਦਗੀ  ਖੋਰ ਦੇਵੇ....... ਜਦ
ਦਾਬੇ ਦੇ ਮੁਨਾਰੇ
ਤਾਂ..........
ਇਕ ਚਿਣਗ ਭੱਖਦੀ ਹੈ
ਇਸ ਜ਼ਜਬ ਹੋਈ
ਸੰਵੇਦਨਾ ਅੰਦਰ......
ਖੇਤਾਂ ਵਿੱਚ ਜਦ
ਬਗਾਵਤ ਸੁਲਘਦੀ ਹੈ
ਤਾਂ ਦਾਣਿਆਂ ਦਾ ਮੁੱਲ ਪੈਂਦਾ।
ਜਦ ਕੰਜਕ ਕੁਆਰੀ
ਚੰਡੀ ਬਣ...... ਜਿਸਮ ਨੋਚਦੇ
ਦਰਿੰਦਿਆਂ ਨੂੰ ਕਹੇ.......
ਪੂਜ ਲਵੋਂ ਮੁਲਕ ਅੰਦਰ
ਏਸ ਦੇਵੀ ਨੂੰ...........
ਤਾਂ ਫੈਸਲਾ ਹੋਣ ਲਗਦੈ।
ਨਸ਼ਿਆਂ `ਚ ਰੁੜਦੀ  ਜਵਾਨੀ ਦਾ ਵਹਾਅ........
ਮੁੜ ਕਿਨਾਰੇ ਵੱਲ ਘੱਤ ਕਰੇ
ਉਦੋਂ.........................
ਚੇਤਨਾ ਦੀ ਪੌਦ ਪੁੰਗਰੀ ਜਾਪਦੀ ਹੈ
ਜਦ ਫਿਰਕੂ ਜਨੁੂੰਨ `ਚ
ਭਸਮ ਹੋਇਆ ਮਮਤਾ ਦਾ ਅੰਸ਼
ਸਿਆਸੀ ਪੈੜਾਂ ਦੀ
ਨਿਸ਼ਾਨਦੇਹੀ ਕਰੇ..........
ਨਕਸ਼ ਬਣ ਉਕਰੇ
ਤਾਂ ਲਗਦਾ............
ਕੁਝ ਹਿਲਜੁਲ ਹੈ
ਧਰਤੀ ਬਲਦ ਦੇ ਸਿੰਗਾਂ ਤੇ ਨਹੀ
ਕਿਰਤ ਦੇ ਥੰਮਾਂ `ਤੇ ਖੜ੍ਹੀ ਹੈ।
ਕੀ ਕੁਝ ਤੁਆਰਫ਼ ਕਰਾਉਂਦਾ
ਸੋਹਣੇ ਸਮਾਜ ਦਾ ..........
ਕੈਨਵਸ ਚਿਤਰਦਾ
ਪਰਵਾਜ਼ ਅੰਦਰ ਤਪਸ਼ .............ਭਰ ਰਿਹੈ।
ਉਹ ਲਟ ਲਟ..........
............ ਬਲਦਾ ਦੀਪ
ਕਾਫ਼ਲਾ ਬਣ ਗਿਐ। ਜੇਲ੍ਹ ਨੁਮਾ ਜ਼ਿੰਦਗੀ ਤੋਂ
ਮੁਕਤ ਹੋਣ ਦਾ.........
ਬਣਾ ਗਿਆ ਰਾਹ ਸਾਡਾ।       
--ਮੋ:- 94636-15536