ਪੰਜਾਬੀ ਮਾਤਭਾਸ਼ਾ ਸੰਬੰਧੀ ਸਰਕਾਰ ਦੀ ਜ਼ਿੰਮੇਵਾਰੀ ਤੇ ਡੂੰਘੇ ਦੁੱਖ ਦਾ ਪ੍ਰਗਟਾਵਾ

 ਕੇਂਦਰੀ ਪੰਜਾਬੀ ਲੇਖਕ ਸਭਾ ਨੇ ਪੰਜਾਬੀ ਨੂੰ ਲੈ ਕੇ ਦਿੱਤੀ ਸੰਘਰਸ਼ ਦੀ ਚੇਤਾਵਨੀ 

ਚੰਡੀਗੜ੍ਹ: 21 ਜੂਨ 2020: (ਪੁਸ਼ਪਿੰਦਰ ਕੌਰ//ਸਾਹਿਤ ਸਕਰੀਨ)::

ਕੇਂਦਰੀ ਪੰਜਾਬੀ ਲੇਖਕ ਸਭਾ (ਰਜਿ.) ਪੰਜਾਬ ਸਰਕਾਰ ਵੱਲੋਂ ਆਏ ਦਿਨ ਪੰਜਾਬ ਦੀ ਰਾਜ-ਭਾਸ਼ਾ 'ਪੰਜਾਬੀ' ਨੂੰ ਨਜ਼ਰਅੰਦਾਜ਼ ਕਰਨ ਦੀ ਸਖ਼ਤ ਸ਼ਬਦਾਂ ਵਿੱਚ ਨਿੰਦਿਆ ਕਰਦੀ ਹੈ। ਪੰਜਾਬ ਰਾਜ ਭਾਸ਼ਾ ਐਕਟ ਮੁਤਾਬਕ ਪੰਜਾਬ ਵਿੱਚ ਸਾਰਾ ਪ੍ਰਸ਼ਾਸਕੀ ਕੰਮ ਪੰਜਾਬੀ ਭਾਸ਼ਾ ਵਿੱਚ ਹੋਣਾ ਲਾਜ਼ਮੀ ਹੈ। ਪੰਜਾਬ ਦੇ ਸਿੱਖਿਆ ਵਿਭਾਗ ਵਿੱਚ ਬੀ.ਏ. ਤੱਕ ਪੰਜਾਬੀ ਵਿਸ਼ਾ ਪੜ੍ਹਨਾ/ਪੜ੍ਹਾਉਣਾ ਲਾਜ਼ਮੀ ਹੈ। ਲੋਕਤਾਂਤ੍ਰਿਕ ਪ੍ਰਬੰਧ ਵਿੱਚ ਕਿਸੇ ਰਾਜ ਜਾਂ ਖਿੱਤੇ ਵਿੱਚ ਪ੍ਰਸ਼ਾਸਨ ਦਾ ਸਾਰਾ ਕੰਮ ਉਸ ਖਿੱਤੇ ਦੇ ਲੋਕਾਂ ਦੀ ਭਾਸ਼ਾ 'ਚ ਕਰਨਾ ਸਰਕਾਰ ਦੀ ਸੰਵਿਧਾਨਕ ਜ਼ਿੰਮੇਵਾਰੀ ਹੁੰਦੀ ਹੈ। ਦੁੱਖ ਦੀ ਗੱਲ ਹੈ ਕਿ ਪੰਜਾਬ ਸਰਕਾਰ ਅਤੇ ਉਸ ਦੇ ਅਹਿਲਕਾਰ (ਅਫ਼ਸਰ) ਰਾਜ-ਭਾਸ਼ਾ ਅਤੇ ਮਾਤ-ਭਾਸ਼ਾ ਦੇ ਮਹੱਤਵ ਪ੍ਰਤੀ ਸੰਵੇਦਨਸ਼ੀਲ ਨਹੀਂ। ਹਾਲ ਹੀ ਵਿੱਚ ਵਕਫ਼ ਬੋਰਡ ਪੰਜਾਬ ਵੱਲੋਂ ਨਿਯੁਕਤੀਆਂ ਲਈ ਦਿੱਤੇ ਗਏ ਇਸ਼ਤਿਹਾਰ ਵਿੱਚ ਦਸਵੀਂ ਜਮਾਤ ਤੱਕ ਪੰਜਾਬੀ ਪੜ੍ਹੀ ਹੋਣ ਦੀ ਸ਼ਰਤ ਨੂੰ ਸਾਜ਼ਿਸ਼ੀ ਨੀਤੀ ਤਹਿਤ ਹਟਾ ਦਿੱਤਾ ਗਿਆ ਹੈ। ਇਸ ਨਾਲ ਬਾਹਰਲੇ ਸੂਬਿਆਂ ਦੇ ਉਮੀਦਵਾਰਾਂ ਲਈ ਰਾਹ ਖੋਲ੍ਹ ਕੇ ਪੰਜਾਬੀ ਨੌਜਵਾਨਾਂ ਲਈ ਨੌਕਰੀ ਦੀ ਸੰਭਾਵਨਾ ਨੂੰ ਘਟਾ ਦਿੱਤਾ ਗਿਆ ਹੈ। ਪੰਜਾਬੀ ਮਾਤਭਾਸ਼ਾ ਸੰਬੰਧੀ ਸਰਕਾਰ ਦੀ ਜ਼ਿੰਮੇਵਾਰੀ ਤੇ ਡੂੰਘੇ ਦੁੱਖ ਦਾ ਪ੍ਰਗਟਾਵਾ 

ਪੰਜਾਬ ਸਰਕਾਰ ਨੇ ਪਹਿਲੀ ਜਮਾਤ ਤੋਂ ਸਿੱਖਿਆ ਦਾ ਮਾਧਿਅਮ ਅੰਗਰੇਜ਼ੀ ਕਰਨ ਲਈ ਵੀ ਨੋਟੀਫ਼ਿਕੇਸ਼ਨ ਜਾਰੀ ਕੀਤਾ ਹੈ। ਅੰਗਰੇਜ਼ੀ ਮਾਧਿਅਮ ਅਪਣਾਉਣ ਲਈ ਬੱਚਿਆਂ ਨੂੰ ਪ੍ਰੇਰਿਤ ਕਰਨ ਵਾਲੇ ਪ੍ਰਾਇਮਰੀ ਸਕੂਲਾਂ ਦੇ ਅਧਿਆਪਕਾਂ ਨੂੰ ਕਈ ਤਰ੍ਹਾਂ ਦੇ ਪ੍ਰਲੋਭਣ ਦੇਣ ਦੇ ਵਾਅਦੇ ਕੀਤੇ ਗਏ ਹਨ। ਪੰਜਾਬ ਦੇ ਸਿੱਖਿਆ ਵਿਭਾਗ ਦੇ ਅਧਿਕਾਰੀਆਂ ਦਾ ਇਹ ਤੁਗਲਕੀ ਫ਼ੁਰਮਾਨ ਪੰਜਾਬ ਰਾਜ-ਭਾਸ਼ਾ ਐਕਟ ਦਾ ਉਲੰਘਣ ਤਾਂ ਹੈ ਹੀ, ਇਹ ਸੰਸਾਰ ਭਰ ਦੇ ਸਿੱਖਿਆ ਸ਼ਾਸਤਰੀਆਂ ਅਤੇ ਭਾਸ਼ਾ ਮਾਹਿਰਾਂ ਦੀ ਉਸ ਵਿਗਿਆਨਕ ਧਾਰਨਾ ਦੇ ਵੀ ਖ਼ਿਲਾਫ਼ ਹੈ, ਜੋ ਬੱਚੇ ਦੀ ਪ੍ਰਾਇਮਰੀ ਪੱਧਰ 'ਤੇ ਸਿੱਖਿਆ ਦਾ ਮਾਧਿਅਮ ਉਸ ਦੀ ਮਾਂ-ਬੋਲੀ ਹੋਣ ਦੀ ਸਿਫ਼ਾਰਸ਼ ਕਰਦੀ ਹੈ। ਪੰਜਾਬ ਸਰਕਾਰ ਵੱਲੋਂ ਇਸ ਸਾਲ ਤੋਂ ਪ੍ਰਾਇਮਰੀ ਪੱਧਰ 'ਤੇ 10% ਬੱਚਿਆਂ ਨੂੰ ਹਿਸਾਬ (ਗਣਿਤ) ਦਾ ਵਿਸ਼ਾ ਅੰਗਰੇਜ਼ੀ ਮਾਧਿਅਮ ਵਿੱਚ ਪੜ੍ਹਾਉਣ ਲਈ ਪ੍ਰੇਰਨ ਵਾਸਤੇ ਗਸ਼ਤੀ-ਪੱਤਰ ਜਾਰੀ ਹੋ ਚੁੱਕਾ ਹੈ।

ਕੇਂਦਰੀ ਪੰਜਾਬੀ ਲੇਖਕ ਸਭਾ ਦੇ ਪ੍ਰਧਾਨ ਦਰਸ਼ਨ ਬੁੱਟਰ ਅਤੇ ਜਨਰਲ ਸਕੱਤਰ ਸੁਖਦੇਵ ਸਿੰਘ ਸਿਰਸਾ ਨੇ ਪੰਜਾਬ ਸਰਕਾਰ ਨੂੰ ਇਹ ਦੋਵੇਂ ਫ਼ੈਸਲੇ ਤੁਰੰਤ ਵਾਪਸ ਲੈਣ ਲਈ ਚਿਤਾਵਨੀ ਦਿੱਤੀ ਹੈ। ਉਨ੍ਹਾਂ ਨੇ ਕਿਹਾ ਕਿ ਜੇਕਰ ਪੰਜਾਬ ਸਰਕਾਰ ਖ਼ੁਦ ਹੀ ਪੰਜਾਬ ਰਾਜ ਭਾਸ਼ਾ ਐਕਟ ਦੀ ਉਲੰਘਣਾ ਕਰਨ ਤੋਂ ਅਫ਼ਸਰਸ਼ਾਹੀ ਨੂੰ ਨਹੀਂ ਰੋਕਦੀ ਤਾਂ ਪੰਜਾਬੀ ਲੇਖਕਾਂ ਅਤੇ ਬੁੱਧੀਜੀਵੀਆਂ ਨੂੰ ਪੰਜਾਬ ਸਰਕਾਰ ਖ਼ਿਲਾਫ਼ ਤਿੱਖਾ ਸੰਘਰਸ਼ ਛੇੜਨ ਲਈ ਮਜਬੂਰ ਹੋਣਾ ਪਵੇਗਾ। 

ਇਸ ਪ੍ਰਸਤਾਵਿਤ ਸੰਘਰਸ਼ ਨਾਲ ਜੁੜਣ ਲਈ ਤੁਸੀਂ ਸਰਗਰਮ ਸੰਸਥਾ "ਕੇਂਦਰੀ ਪੰਜਾਬੀ ਲੇਖਕ ਸਭਾ" ਦੇ ਜਨਰਲ ਸਕੱਤਰ ਡਾ. ਸੁਖਦੇਵ ਸਿੰਘ ਸਿਰਸਾ ਨਾਲ ਉਹਨਾਂ ਦੇ ਮੋਬਾਈਲ ਨੰਬਰ  98156-36565 'ਤੇ ਸੰਪਰਕ ਕਰ ਸਕਦੇ ਹੋ। 

ਪੰਜਾਬੀ ਦੇ ਚਰਚਿਤ ਗਲਪਕਾਰ ਜੋਰਾ ਸਿੰਘ ਸੰਧੂ ਦਾ ਦੇਹਾਂਤ

ਕੇਂਦਰੀ ਪੰਜਾਬੀ ਲੇਖਕ ਸਭਾ ਵੱਲੋਂ ਡੂੰਘੇ ਦੁੱਖ ਦਾ ਪ੍ਰਗਟਾਵਾ 

ਚੰਡੀਗੜ੍ਹ: 16 ਅਪ੍ਰੈਲ 2020: (ਕਰਮ ਵਕੀਲ//ਸਾਹਿਤ ਸਕਰੀਨ)::

ਲਾਕ ਡਾਊਨ ਦਾ ਦੌਰ ਹੈ। ਬਹੁਤ ਸਾਰੇ ਦਿਲਾਂ ਵਿੱਚ ਉਦਾਸੀ ਹੈ। ਉਦਾਸੀ ਦੇ ਇਸ ਆਲਮ ਵਿੱਚ ਜੇ ਕੋਈ ਮਿੱਤਰ ਪਿਆਰਾ ਸਦਾ ਲਈ ਵਿਛੜ ਜਾਏ ਤਾਂ ਇਹ ਦੁੱਖ ਆਮ ਨਾਲੋਂ ਜ਼ਿਆਦਾ ਅਸਹਿ।  ਕੋਰੋਨਾ ਤੋਂ ਬਚਾਓ ਲਈ ਘਰਾਂ ਵਿੱਚ ਲਾਕ ਡਾਊਨ ਦੀ ਬੰਦੀ ਹੈ। ਗਲੀ ਮੋਹੱਲੇ ਦੇ ਮੋੜਾਂ ਤੇ ਬੈਰੀਕੇਡ ਲੱਗੇ ਹੋਏ ਹਨ। ਅਜਿਹੇ ਉਦਾਸ ਮਾਹੌਲ ਵਿੱਚ ਪੰਜਾਬੀ ਦੇ ਚਰਚਿਤ ਗਲਪਕਾਰ ਜੋਰਾ ਸਿੰਘ ਸੰਧੂ ਲੰਬੀ ਬੀਮਾਰੀ ਉਪਰੰਤ ਅੱਜ ਸਾਨੂੰ ਸਦੀਵੀ ਵਿਛੋੜਾ ਦੇ ਗਏ ਹਨ। ਇਸ ਵਿਛੋੜੇ ਨਾਲ ਪੰਜਾਬੀ ਸਾਹਿਤ ਨੂੰ ਨਾ ਪੂਰਾ ਹੋਣ ਵਾਲਾ ਘਾਟਾ ਪਿਆ ਹੈ। 

ਉਹਨਾਂ ਦੀ ਸਾਹਿਤ ਰਚਨਾ ਦੇ ਪੜਾਅ ਇੱਕ ਇੱਕ ਕਰਕੇ ਯਾਦ ਆ ਰਹੇ ਹਨ। ਸੰਨ 1959 ਈ. ਵਿੱਚ 'ਅੰਮਾਂ' ਕਹਾਣੀ ਲਿਖ ਕੇ ਉਨ੍ਹਾਂ ਨੇ ਪੰਜਾਬੀ ਗਲਪ ਵਿੱਚ ਆਪਣੀ ਪੱਕੀ ਪੈਂਠ ਬਣਾ ਲਈ ਸੀ। ਫਿਰ ਉਸ ਨੇ ਲੰਮੇ ਸਮੇਂ ਤੱਕ ਖ਼ਾਮੋਸ਼ੀ ਧਾਰੀ ਰੱਖੀ ਤੇ ਸਿਰਜਣਾਤਮਿਕ ਸਰਗਰਮੀ ਤੋਂ ਪਾਸਾ ਵੱਟ ਲਿਆ। ਉਸ ਦਾ ਪਹਿਲਾ ਕਹਾਣੀ ਸੰਗ੍ਰਹਿ 'ਪਾਟਦੀ ਧੁੰਦ' 2009 ਈ. ਵਿੱਚ ਛਪਿਆ। ਇਸਤੋਂ ਬਾਅਦ ਸੰਨ 2010 ਵਿੱਚ ਉਸ ਦਾ ਕਹਾਣੀ ਸੰਗ੍ਰਹਿ 'ਬਿਗਾਨਾ ਘਰ' ਪਾਠਕਾਂ ਦੇ ਹੱਥ ਆਇਆ। ਇਸੇ ਸਾਲ ਉਸ ਦਾ ਆਪਣਾ ਪਲੇਠਾ ਨਾਵਲ 'ਮੈਂ ਅਜੇ ਨਾ ਵਿਹਲੀ' ਛਪਿਆ। ਉਸ ਦੇ ਤਿੰਨ ਹੋਰ ਨਾਵਲ ਉੱਤੋੜਿੱਤੀ (ਅੱਗੇ-ਪਿੱਛੇ) ਛਪੇ-'ਹੱਥਾਂ ਬਾਝ ਕਰਾਰਿਆਂ' (2015), 'ਮੋਕਲਾ ਰਾਹ' (2016) ਅਤੇ 'ਮੈਂ ਕਸੁੰਭੜਾ ਚੁਣ ਚੁਣ ਹਾਰੀ' (2016) ਵੀ  ਆਏ। ਇਹਨਾਂ ਪੁਸਤਕਾਂ ਨੇ ਪੰਜਾਬੀ ਪਾਠਕਾਂ ਵਿੱਚ ਆਪਣੀ ਨਵੇਕਲੀ ਥਾਂ ਬਣਾਈ। 

ਕੇਂਦਰੀ ਪੰਜਾਬੀ ਲੇਖਕ ਸਭਾ ਦੇ ਪ੍ਰਧਾਨ ਦਰਸ਼ਨ ਬੁੱਟਰ ਅਤੇ ਜਨਰਲ ਸਕੱਤਰ ਸੁਖਦੇਵ ਸਿੰਘ ਸਿਰਸਾ ਨੇ ਜੋਰਾ ਸਿੰਘ ਸੰਧੂ ਦੇ ਵਿੱਛੜ ਜਾਣ 'ਤੇ ਉਸ ਦੇ ਪਰਿਵਾਰ ਅਤੇ ਸਨੇਹੀਆਂ ਨਾਲ ਆਪਣੀ ਸੰਵੇਦਨਾ ਸਾਂਝੀ ਕਰਦਿਆਂ ਕਿਹਾ ਕਿ ਅਸੀਂ ਇੱਕ ਸੰਵੇਦਨਸ਼ੀਲ ਅਤੇ ਮੋਹਵੰਤੇ ਇਨਸਾਨ ਤੋਂ ਵੀ ਵਾਂਝੇ ਹੋ ਗਏ ਹਾਂ ਅਤੇ ਵੱਡੀਆਂ ਸੰਭਾਵਨਾਵਾਂ ਵਾਲੇ ਪ੍ਰਤੀਬੱਧ ਲੇਖਕ ਦੀ ਸਿਰਜਣਾਤਮਿਕ ਲੇਖਣੀ ਤੋਂ ਵੀ। ਉਨ੍ਹਾਂ ਦੀਆਂ ਲਿਖਤਾਂ ਉਨ੍ਹਾਂ ਦੀ ਸਰੀਰਕ ਰੂਪ ਵਿੱਚ ਗ਼ੈਰਹਾਜ਼ਰੀ ਵਿੱਚ ਵੀ ਸਾਡੇ ਅੰਗ-ਸੰਗ ਰਹਿਣਗੀਆਂ। 

ਮਾਹੌਲ ਠੀਕ ਹੋਣ ਮਗਰੋਂ ਉਹਨਾਂ ਦੀ ਯਾਦ ਵਿੱਚ  ਸੋਗ ਸਭਾ ਦਾ ਉਪਰਾਲਾ ਵੀ ਕੀਤਾ ਜਾਏਗਾ ਤਾਂਕਿ ਉਹਨਾਂ ਨੂੰ ਸ਼ਰਧਾਂਜਲੀ ਦੇਣ ਦੇ ਚਾਹਵਾਨ ਇਕੱਤਰ ਹੋ ਸਕਣ। ਉਹਨਾਂ ਦੇ ਤੁਰ ਜਾਣ ਦਾ ਦੁੱਖ ਤਾਂ ਰਹੇਗਾ ਹੀ। 

ਕੇਂਦਰੀ ਪੰਜਾਬੀ ਲੇਖਕ ਸਭਾ ਵੱਲੋਂ ਪ੍ਰੋ. ਆਨੰਦ ਤੇਲਤੁੰਬੜੇ ਦੀ ਗ੍ਰਿਫ਼ਤਾਰੀ ਦਾ ਵਿਰੋਧ

ਸਾਜ਼ਿਸ਼ੀ ਗ੍ਰਿਫਤਾਰੀਆਂ ਵਿਰੁੱਧ ਪੰਜਾਬੀ ਲੇਖਕ ਵੀ ਪੂਰੀ ਤਰ੍ਹਾਂ ਸਰਗਰਮ 

ਚੰਡੀਗੜ੍ਹ: 14 ਅਪ੍ਰੈਲ 2020: (ਕਰਮ ਵਕੀਲ//ਸਾਹਿਤ ਸਕਰੀਨ)::

69 ਸਾਲਾਂ ਦੀ ਉਮਰ ਦੇ ਮਰਾਠੀ ਲੇਖਕ ਦੀ ਗ੍ਰਿਫਤਾਰੀ ਵਿਰੁੱਧ ਰੋਸ ਤਿੱਖਾ  

ਕੇਂਦਰੀ ਪੰਜਾਬੀ ਲੇਖਕ ਸਭਾ (ਰਜਿ.) ਮਰਾਠੀ ਮੂਲ ਦੇ ਭਾਰਤੀ ਲੇਖਕ, ਪ੍ਰਤੀਬੱਧ ਚਿੰਤਕ ਅਤੇ ਜਨਤਕ ਬੁੱਧੀਜੀਵੀ ਪ੍ਰੋਫ਼ੈਸਰ ਆਨੰਦ ਤੇਲਤੁੰਬੜੇ ਦੀ ਸਾਜ਼ਿਸ਼ੀ ਤਰੀਕੇ ਨਾਲ ਕੀਤੀ ਗਈ ਗ੍ਰਿਫ਼ਤਾਰੀ ਦੀ ਕਰੜੇ ਸ਼ਬਦਾਂ ਵਿੱਚ ਨਿੰਦਿਆ ਕਰਦੀ ਹੈ। ਸਮਾਜਿਕ ਕਾਰਕੁੰਨ ਤੇ ਅੰਬੇਡਕਰਵਾਦੀ ਚਿੰਤਕ ਤੇਲਤੁੰਬੜੇ ਨੂੰ ਬਾਬਾ ਸਾਹਿਬ ਭੀਮਰਾਉ ਅੰਬੇਡਕਰ ਦੀ ਜੈਅੰਤੀ ਵਾਲੇ ਦਿਨ ਗ੍ਰਿਫ਼ਤਾਰ ਕੀਤਾ ਗਿਆ ਹੈ। ਗੋਆ ਇੰਸਟੀਚਿਊਟ ਆਫ਼ ਮੈਨੇਜਮੈਂਟ ਦੇ ਮੌਜੂਦਾ ਪ੍ਰੋਫ਼ੈਸਰ ਤੇਲਤੁੰਬੜੇ ਨੇ ਭਾਰਤ ਪੈਟਰੋਲੀਅਮ, ਪੈਟਰੋਨਿਟ ਇੰਡੀਆ ਅਤੇ ਇੰਡੀਅਨ ਇੰਸਟੀਚਿਊਟ ਆਫ਼ ਤਕਨਾਲੋਜੀ, ਖੜਗਪੁਰ ਆਦਿ ਨਾਮੀ ਸੰਸਥਾਵਾਂ ਵਿੱਚ ਉੱਚ ਅਹੁਦਿਆਂ ਉੱਪਰ ਕੰਮ ਕੀਤਾ ਹੈ। ਭਾਰਤ ਦੀ ਜਾਤੀ ਪ੍ਰਥਾ ਅਤੇ ਅੰਬੇਡਕਰ ਦੇ ਚਿੰਤਨ ਬਾਰੇ ਉਸ ਦੀਆਂ ਚਰਚਿਤ ਪੁਸਤਕਾਂ ਹਨ: 'ਰੀਪਬਲਿਕ ਆਫ਼ ਕਾਸਟ: ਥਿੰਕਿੰਗ ਇਕੁਐਲਿਟੀ ਇਨ ਦਾ ਇਰਾ ਆਫ਼ ਨਿਊ-ਲਿਬਰਲਿਜ਼ਮ', 'ਦਲਿਤਜ਼: ਪਾਸਟ, ਪ੍ਰੈਜ਼ੈਂਟ ਐਂਡ ਫ਼ਿਊਚਰ', 'ਦਾ ਪ੍ਰਸੈਸਟਿਨਸ ਆਫ਼ ਕਾਸਟ', 'ਮਹਦ:ਦਾ ਮੇਕਿੰਗ ਆਫ਼ ਫ਼ਸਟ ਦਲਿਤ ਰੀਵੋਲਟ' ਅਤੇ 'ਖੈਰਲੰਜੀ: ਏ ਸਟਰੇਂਜਰ ਐਂਡ ਬਿਟਰ ਕਰੌਪ' ਆਦਿ। 'ਦਾ ਰੈਡੀਕਲ ਇਨ ਅੰਬੇਡਕਰ' ਅਤੇ 'ਹਿੰਦੂਤਵਾ ਐਂਡ ਦਲਿਤਜ਼:ਪ੍ਰਸਪੈਕਟਿਵ ਫ਼ਾਰ ਅੰਡਰਸਟੈਂਡਿੰਗ ਕਮਿਊਨਲ ਪ੍ਰੈਕਸਸ' ਉਸ ਦੁਆਰਾ ਸੰਪਾਦਿਤ ਅਤੇ ਚਰਚਿਤ ਪੁਸਤਕਾਂ ਹਨ।

ਪ੍ਰੋ. ਆਨੰਦ ਤੇਲਤੁੰਬੜੇ ਦੀਆਂ ਲਿਖਤਾਂ ਨੇ ਸਮਾਜਿਕ ਬਰਾਬਰੀ ਤੇ ਨਿਆਂ ਲਈ ਸੰਘਰਸ਼ ਕਰ ਰਹੇ ਦਲਿਤਾਂ, ਘੱਟ-ਗਿਣਤੀ ਫ਼ਿਰਕਿਆਂ ਅਤੇ ਸਮਾਜਿਕ ਅਮਲ ਵਿੱਚੋਂ ਪੂਰੀ ਤਰ੍ਹਾਂ ਬੇਦਖ਼ਲ ਕੀਤੇ ਗਏ ਆਦਿ-ਵਾਸੀਆਂ ਤੇ ਜਨ-ਜਾਤੀਆਂ ਦੇ ਜਜ਼ਬਾਤ ਤੇ ਰੋਸ ਨੂੰ ਜ਼ੁਬਾਨ ਦਿੱਤੀ ਹੈ। ਕਲਮ ਦੇ ਨਾਲ-ਨਾਲ ਇੱਕ ਜਨਤਕ ਬੁੱਧੀਜੀਵੀ ਤੇ ਕਰਮੱਠ ਸਮਾਜਿਕ ਕਾਰਕੁੰਨ ਵਜੋਂ ਵੀ ਉਹ ਮੌਜੂਦਾ ਸਿਆਸੀ, ਸਮਾਜਿਕ ਤੇ ਸੱਭਿਆਚਾਰਕ ਸੰਦ੍ਰਿਸ਼ ਵਿੱਚ ਪੇਸ਼-ਪੇਸ਼ ਰਿਹਾ ਹੈ। 'ਆਲ ਇੰਡੀਆ ਫ਼ੋਰਮ ਫ਼ਾਰ ਰਾਈਟ ਟੂ ਐਜੂਕੇਸ਼ਨ' ਦੇ ਚੇਅਰਮੈਨ ਵਜੋਂ ਉਸ ਦੀ ਭੂਮਿਕਾ ਕਿਸੇ ਤੋਂ ਗੁੱਝੀ ਨਹੀਂ। ਉਹ ਭਾਰਤ ਦੇ ਉਹਨਾਂ ਵਿਰਲੇ-ਟਾਵੇਂ ਬੁੱਧੀਜੀਵੀਆਂ ਵਿੱਚੋਂ ਹੈ, ਜੋ ਸਾਡੀ ਧਰਮ-ਨਿਰਪੱਖ (ਸੈਕੂਲਰ), ਲੋਕ-ਤਾਂਤਰਿਕ ਅਤੇ ਵਿਵੇਕਸ਼ੀਲ (ਤਰਕਸ਼ੀਲ) ਗਿਆਨ ਪਰੰਪਰਾ ਦੀ ਰਾਖੀ ਲਈ ਹਰ ਤਰ੍ਹਾਂ ਦਾ ਜੋਖਿਮ ਉਠਾ ਰਹੇ ਹਨ। ਜ਼ੁਬਾਨਬੰਦੀ ਦੇ ਇਸ ਦਹਿਸ਼ਤੀ ਦੌਰ ਵਿੱਚ ਵੀ ਤੇਲਤੁੰਬੜੇ ਤੇ ਉਸ ਦੇ ਸਾਥੀਆਂ ਨੇ ਮਾਨਵੀ ਅਧਿਕਾਰਾਂ, ਸੰਪ੍ਰਦਾਇਕ ਸਦਭਾਵਨਾ, ਜੀਣ-ਥੀਣ ਤੇ ਪ੍ਰਗਟਾਵੇ ਦੀ ਆਜ਼ਾਦੀ ਅਤੇ ਲੋਕਤੰਤਰ ਦੀ ਮਜ਼ਬੂਤੀ ਲਈ ਆਪਣੀ ਆਵਾਜ਼ ਬੁਲੰਦ ਕੀਤੀ ਹੈ।

ਕੇਂਦਰੀ ਪੰਜਾਬੀ ਲੇਖਕ ਸਭਾ ਦੇ ਪ੍ਰਧਾਨ ਦਰਸ਼ਨ ਬੁੱਟਰ ਤੇ ਜਨਰਲ ਸਕੱਤਰ ਸੁਖਦੇਵ ਸਿੰਘ ਸਿਰਸਾ ਨੇ ਪ੍ਰੋ. ਤੇਲਤੁੰਬੜੇ ਤੇ ਗੌਤਮ ਨਵਲੱਖਾ ਦੀ ਗ੍ਰਿਫ਼ਤਾਰੀ ਦੀ ਪੁਰਜ਼ੋਰ ਸ਼ਬਦਾਂ ਵਿੱਚ ਨਿੰਦਿਆ ਕਰਦਿਆਂ, ਕੇਂਦਰ ਸਰਕਾਰ ਨੂੰ ਚੇਤਾਵਨੀ ਦਿੱਤੀ ਹੈ ਕਿ ਉਹ ਇਹਨਾਂ ਬੁੱਧੀਜੀਵੀਆਂ ਨੂੰ ਤੁਰੰਤ ਰਿਹਾਅ ਕਰੇ। ਅੱਜ ਜਦੋਂ ਸਮੁੱਚਾ ਸੰਸਾਰ ਅਤੇ ਦੇਸ਼ ਕਾਰੋਨਾ ਵਰਗੀ ਮਹਾਂਮਾਰੀ ਤੋਂ ਦਹਿਸ਼ਤਜ਼ਦਾ ਤੇ ਪੀੜਤ ਹੈ, ਕੇਂਦਰ ਸਰਕਾਰ ਆਪਣੇ ਫ਼ਾਸ਼ੀਵਾਦੀ ਮਨਸੂਬਿਆਂ ਨੂੰ ਅੰਜਾਮ ਦੇਣ ਦੀ ਤਾਕ ਵਿੱਚ ਹੈ। ਕੇਂਦਰੀ ਸਭਾ ਦੇ ਸੀਨੀਅਰ ਮੀਤ ਪ੍ਰਧਾਨ ਡਾ. ਜੋਗਾ ਸਿੰਘ, ਅਹੁਦੇਦਾਰਾਂ ਅਤੇ ਸਮੁੱਚੀ ਕਾਰਜਕਾਰਨੀ ਨੇ ਆਰ.ਐਸ.ਐਸ. ਦੀਆਂ ਫ਼ਿਰਕੂ ਨੀਤੀਆਂ ਤੇ ਫ਼ਾਸ਼ੀਵਾਦੀ ਵਿਚਾਰਧਾਰਕ ਏਜੰਡੇ ਮੁਤਾਬਕ ਚੱਲਣ ਵਾਲੀ ਕੇਂਦਰ ਸਰਕਾਰ ਨੂੰ ਆਗਾਹ ਕੀਤਾ ਹੈ ਕਿ ਉਹ ਲੇਖਕਾਂ, ਬੁੱਧੀਜੀਵੀਆਂ ਤੇ ਸਮਾਜਿਕ ਕਾਰਕੁਨਾਂ ਦੇ ਪ੍ਰਗਟਾਵੇ ਦੇ ਅਧਿਕਾਰ ਨੂੰ ਖੋਹਣ ਦਾ ਯਤਨ ਨਾ ਕਰੇ। ਪ੍ਰਗਟਾਵੇ ਦੀ ਆਜ਼ਾਦੀ, ਸਮਾਜਿਕ ਬਰਾਬਰੀ, ਨਿਆਂ ਅਤੇ ਭਾਈਚਾਰਕ ਸਾਂਝ ਤੇ ਸਦਭਾਵਨਾ ਲਈ ਆਵਾਜ਼ ਉਠਾਉਣ ਵਾਲੇ ਲੇਖਕਾਂ, ਬੁੱਧੀਜੀਵੀਆਂ ਅਤੇ ਚਿੰਤਕਾਂ ਦੇ ਹੱਕਾਂ ਲਈ ਲੋੜ ਪੈਣ 'ਤੇ ਕੇਂਦਰੀ ਪੰਜਾਬੀ ਲੇਖਕ ਸਭਾ ਸੜਕਾਂ 'ਤੇ ਉਤਰਨ ਅਤੇ ਤਿੱਖੇ ਸੰਘਰਸ਼ ਲਈ ਤਿਆਰ ਹੈ।

ਮੀਡੀਆ ਲਈ ਇਸ ਬਿਆਨ ਨੂੰ ਜਾਰੀ ਕੀਤਾ ਸਭਾ ਦੇ ਜਨਰਲ ਸਕੱਤਰ ਸੁਖਦੇਵ ਸਿੰਘ ਸਿਰਸਾ ਹੁਰਾਂ ਨੇ। ਇਸ ਮੁਹਿੰਮ ਨਾਲ ਜੁੜਨ ਦੇ ਚਾਹਵਾਨ ਲੇਖਕ ਅਤੇ ਹੋਰ ਬੁਧੀਜੀਵੀ ਉਹਨਾਂ ਨਾਲ ਸੰਪਰਕ ਕਰ ਸਕਦੇ ਹਨ ਉਹਨਾਂ ਦੇ ਮੋਬਾਈਲ ਨੰਬਰ 98156-36565 'ਤੇ। 

ਕਵਿਤਾ-ਕਥਾ-ਕਾਰਵਾਂ ਵੱਲੋਂ ਕੌਮਾਂਤਰੀ ਮਹਿਲਾ ਦਿਵਸ 'ਤੇ ਸ਼ਾਨਦਾਰ ਆਯੋਜਨ

ਨਵੀਆਂ ਅਤੇ ਸਥਾਪਿਤ ਕਵਿੱਤਰੀਆਂ ਨੇ ਦਿੱਤਾ ਸਮਾਜ ਨੂੰ ਕਵਿਤਾ ਨਾਲ ਹਲੂਣਾ 

ਲੁਧਿਆਣਾ: 8 ਮਾਰਚ 2020: (*ਸਾਹਿਤ ਸਕਰੀਨ ਟੀਮ):: 

ਅੱਜ ਸਤਲੁੱਜ ਕਲੱਬ ਵਿੱਚ ਹੋਇਆ ਸਾਹਿਤਿਕ ਆਯੋਜਨ ਕਈ ਪੱਖਾਂ ਤੋਂ ਵੱਖਰਾ ਸੀ। ਪੂਰੀ ਤਰਾਂ ਸਾਹਿਤਿਕ ਅਤੇ ਵੱਖ ਵੱਖ ਵਿਚਾਰਾਂ ਵਾਲੇ ਲੋਕਾਂ ਦੀ ਪ੍ਰੇਮ ਮਿਲਣੀ ਦਾ ਅਹਿਸਾਸ ਕਰਾਉਂਦਾ ਹੋਇਆ ਸਮਾਗਮ। ਬੜੇ ਚਿਰਾਂ ਮਗਰੋਂ ਅਜਿਹਾ ਸਮਾਗਮ  ਦੇਖਿਆ ਜਿਸ ਵਿੱਚ ਸਭ ਕੁਝ ਬੜੇ ਹੀ ਨਿਸਚਿਤ ਤਰੀਕੇ ਨਾਲ ਚੱਲ ਰਿਹਾ ਸੀ। ਘੜੀ ਦੀਆਂ ਸੂਈਆਂ ਦੇ ਹਿਸਾਬ ਨਾਲ। ਨਾ ਕੋਈ ਕਿਸੇ ਨੂੰ ਸਟੇਜ ਤੋਂ ਘੂਰ ਰਿਹਾ ਸੀ ਤੇ ਨਾ ਹੀ ਕੋਈ ਕਿਸੇ ਨੂੰ ਅੱਖਾਂ ਅੱਖਾਂ ਨਾਲ ਆਪਣੀ ਗੱਲ ਮੰਨਣ-ਮਨਵਾਉਣ ਦੇ ਇਸ਼ਾਰੇ ਕਰ ਰਿਹਾ ਸੀ। ਇਹ ਇੱਕ ਅਜਿਹਾ ਸਮਾਗਮ ਸੀ ਜਿਸ ਵਿੱਚ ਨਾ ਤਾਂ ਕਿਸੇ ਪਾਰਟੀ ਦੀ ਨਾਅਰੇਬਾਜ਼ੀ ਸੀ ਤੇ ਨਾ ਹੀ ਕਿਸ ਸਿਆਸੀ ਪਾਰਟੀ ਦਾ ਵਿਰੋਧ ਜਾਂ ਹਮਾਇਤ। ਸਿਰਫ ਕਲਮ ਦਾ ਰੰਗ ਅਤੇ ਔਰਤਾਂ ਦੀ ਸਥਿਤੀ। ਸਾਰਾ ਫੋਕਸ ਕੌਮਾਂਤਰੀ ਮਹਿਲਾ ਦਿਵਸ ਵੱਲ ਸੀ।  ਉਸ ਦੇ ਮਕਸਦ ਨੂੰ ਸਫਲ ਬਣਾਉਣ ਲਈ ਸ਼ਾਇਰੀ ਦਾ ਦੌਰ ਵੀ ਚੱਲਿਆ, ਵਿਚਾਰ ਵਟਾਂਦਰੇ ਵੀ ਹੋਏ ਅਤੇ ਪੈਨਲ ਡਿਸਕਸ਼ਨ ਵੀ ਬੇਹੱਦ ਦਿਲਚਸਪ ਰਹੀ। ਸਾਹਿਤਿਕ ਸਮਾਗਮਾਂ ਵਿੱਚ ਨਜ਼ਰ ਆਉਂਦੀਆਂ ਗੁੱਟਬੰਦੀਆਂ ਅਤੇ ਤਿਕੜਮਬਾਜ਼ੀਆਂ ਤੋਂ ਮੁਕਤ ਸੀ ਅੱਜ ਦਾ ਸਮਾਗਮ।

ਸਾਹਿਤ ਨੂੰ ਸਮਰਪਿਤ ਸੰਸਥਾ ਕਵਿਤਾ-ਕਥਾ-ਕਾਰਵਾਂ ਵੱਲੋਂ ਇਹ ਸਮਾਗਮ ਸਤਲੁਜ ਕਲੱਬ ਲੁਧਿਆਣਾ ਵਿਖੇ ਆਯੋਜਿਤ ਕੀਤਾ ਗਿਆ। ਇਸ ਸਮਾਗਮ ਦੇ ਜ਼ਰੀਏ ਕੌਮਾਂਤਰੀ ਮਹਿਲਾ ਦਿਵਸ ਨੂੰ ਬਹੁਤ ਹੀ ਭਾਵਪੂਰਤ ਢੰਗ ਨਾਲ ਮਨਾਇਆ ਗਿਆ। ਸੰਸਥਾ ਦੀ ਪ੍ਰਧਾਨ ਜਸਪ੍ਰੀਤ ਕੌਰ ਫਲਕ ਦੀ ਅਗਵਾਈ 'ਚ ਸਮੁੱਚਾ ਸਮਾਗਮ ਸਫਲਤਾਪੂਰਵਕ ਨੇਪਰੇ ਚੜ੍ਹਿਆ। ਮੁੱਖ ਮਹਿਮਾਨ ਵਜੋਂ ਕਿਰਨ ਬਾਲਾ (ਆਈਆਰਐੱਸ) ਜੁਆਇੰਟ ਕਮਿਸ਼ਨਰ ਜੀਐੱਸਟੀ, ਜਲੰਧਰ ਪਹੁੰਚੇ। ਵਿਸ਼ੇਸ਼ ਮਹਿਮਾਨ ਕਿਰਨ ਸਾਹਨੀ ਭਾਸ਼ਾ ਵਿਭਾਗ ਪੰਜਾਬ ਸਨ। ਆਰੰਭਿਕ ਸੈਸ਼ਨ ਦੀ ਪ੍ਰਧਾਨਗੀ ਸਤਲੁਜ ਕਲੱਬ ਲੁਧਿਆਣਾ ਦੀ ਕਲਚਰਲ ਸਕੱਤਰ ਮੋਨਿਕਾ ਮਿੱਤਲ ਨੇ ਕੀਤੀ, ਜਦਕਿ ਸਟੇਜ ਸੰਚਾਲਨ ਵਿਭਾ ਕੁਮਰੀਆ ਸ਼ਰਮਾ ਨੇ ਕੀਤਾ। ਮਹਿਲਾਵਾਂ ਦੇ ਸਸ਼ਕਤੀਕਰਨ 'ਤੇ ਵਿਚਾਰਾਂ ਦੇ ਸੈਸ਼ਨ ਦੀ ਪ੍ਰਧਾਨਗੀ ਦਵਿੰਦਰ ਕੌਰ ਸੈਣੀ ਨੇ ਕੀਤੀ ਤੇ ਸਟੇਜ ਸੰਚਾਲਨ ਅਨੂਪੁਰੀ ਨੇ ਕੀਤਾ। ਡਾ. ਬਬੀਤਾ ਜੈਨ ਨੇ 'ਮਹਿਲਾ ਸਸ਼ਕਤੀਕਰਨ: ਸਮੇਂ ਦੀ ਲੋੜ' 'ਤੇ ਵਿਚਾਰ ਰੱਖੇ। ਇਸ ਬਹਿਸ ਵਿੱਚ ਭਾਗ ਲੈਣ ਵਾਲੇ ਹੋਰ ਬੁਲਾਰੇ ਪ੍ਰੋ. ਸਰਲਾ ਭਾਰਦਵਾਜ ਤੇ ਨੂਪੁਰ ਸੰਧੂ ਸਨ।

ਉਭਰਦੇ ਕਵੀਆਂ ਦੇ ਕਵਿਤਾ ਪਾਠ ਸੈਸ਼ਨ ਦੀ ਪ੍ਰਧਾਨਗੀ ਰਮ੍ਹਾ ਸ਼ਰਮਾ ਨੇ ਕੀਤੀ, ਜਦਕਿ ਸਟੇਜ ਸੰਚਾਲਨ ਰਸ਼ਮੀ ਅਸਥਾਨਾ ਨੇ ਕੀਤਾ। ਵਾਣੀਪ੍ਰੀਤ ਕੌਰ, ਰੂਪ ਕੰਵਲ, ਸਾਰਾ, ਦੀਪਿਕਾ, ਕਾਰਤਿਕਾ, ਭਾਨੂੰ ਸੂਦ ਤੇ ਲਖਵਿੰਦਰ ਕੌਰ ਨੇ ਕਵਿਤਾ ਪਾਠ ਕੀਤਾ। ਨਾਮਵਰ ਕਵੀਆਂ ਦੇ ਸੈਸ਼ਨ ਦੀ ਪ੍ਰਧਾਨਗੀ ਡਾ. ਸੁਮਨ ਸ਼ਰਮਾ ਨੇ ਕੀਤੀ ਅਤੇ ਸਟੇਜ ਸੰਚਾਲਨ ਡਾ. ਅਨੂ ਸ਼ਰਮਾ ਕੌਰ ਨੇ ਕੀਤਾ। ਸਰਿਤਾ ਜੈਨ ਤੇ ਡਾ. ਸੀਮਾ ਗਰੇਵਾਲ ਨੇ ਕਵੀਤਾ ਪਾਠ ਕੀਤਾ। ਇਸ ਪਿੱਛੋਂ ਮਾਣ ਸਨਮਾਨ ਕੀਤੇ ਗਏ। ਪਾਰਥ ਐਵਾਰਡ ਦੀਪਤੀ ਸਲੂਜਾ (ਐੱਨਜੀਓ) ਨੂੰ ਦਿੱਤਾ ਗਿਆ। ਮਦਰ ਟੈਰੇਸਾ ਐਵਾਰਡ ਨਿਆਸਰੀਆਂ ਬੱਚੀਆਂ ਨੂੰ ਸੰਭਾਲਣ ਤੇ ਪਾਲਣ ਪੋਸ਼ਣ ਕਰਨ ਵਾਲੀ ਪ੍ਰਕਾਸ਼ ਕੌਰ (ਯੂਨੀਕ ਹੋਮ ਜਲੰਧਰ) ਨੂੰ ਦਿੱਤਾ ਗਿਆ। ਮਾਤਾ ਗੁਜਰੀ ਐਵਾਰਡ ਮਨਰਾਜ ਕੌਰ, ਦਲੀਪ ਕੌਰ ਟਿਵਾਣਾ ਐਵਾਰਡ ਇੰਦਰਜੀਤਪਾਲ ਕੌਰ, ਰਾਜਬੀਰ ਕੌਰ ਰਾਏ ਐਵਾਰਡ ਹਾਕੀ ਲਈ ਪੁਸ਼ਪਿੰਦਰ ਕੌਰ, ਬਾਗ ਦੇਵੀ ਐਵਾਰਡ ਪ੍ਰਿੰਸੀਪਲ ਪ੍ਰਵੀਨ ਸ਼ਰਮਾ ਨੂੰ ਦਿੱਤੇ ਗਏ। ਪ੍ਰੋਗਰਾਮ ਦੇ ਦੌਰਾਨ ਹੀ ਜਸਪ੍ਰੀਤ ਕੌਰ ਫਲਕ ਦੀ ਕਾਵਿ ਪੁਸਤਕ 'ਰੇਤ ਪਰ ਰੰਗੋਲੀ ' ਦੀ ਦੂਜੀ ਐਡੀਸ਼ਨ ਵੀ ਲੋਕ ਅਰਪਣ ਕੀਤੀ ਗਈ। ਇਸੇ ਤਰ੍ਹਾਂ ਗਰੈਂਡ-ਮਾਂ ਐਵਾਰਡ ਸੰਤੋਸ਼ ਗੁਪਤਾ, ਕਮਲਾ ਕੌਸ਼ਲ, ਨਿਰਮਲ ਖੁੰਨਾ, ਹਰਜੀਤ ਕੌਰ ਗੋਗੀਆ ਤੇ ਸਤਿਆ ਬਜਾਜ ਨੂੰ ਦਿੱਤੇ ਗਏ। ਇਸ ਸਾਰੇ ਸਮਾਗਮ ਦੀ ਰੂਹ-ਏ-ਰਵਾਂ ਜਸਪ੍ਰੀਤ ਕੌਰ ਫਲਕ ਨੂੰ ਤਮਾਮ ਹਾਜ਼ਰੀਨ ਨੇ ਇੰਨਾ ਸ਼ਾਨਦਾਰ ਪ੍ਰੋਗਰਾਮ ਕਰਵਾਉਣ ਲਈ ਵਧਾਈ ਦਿੱਤੀ। ਇਸ ਮੌਕੇ ਫੋਟੋ ਤੇ ਪੁਸਤਕ ਪ੍ਰਦਰਸ਼ਨੀ ਵੀ ਲਾਈ ਗਈ। ਇਹ  ਫੋਟੋ ਪ੍ਰਦਰਸ਼ਨੀ ਅਸਲ ਵਿੱਚ ਤੇਜ਼ੀ ਨਾਲ ਉਭਰ ਕੇ ਸਾਹਮਣੇ ਆਈ ਕੈਮਰਾ ਕਲਾਕਾਰ ਜਸ ਪ੍ਰੀਤ ਦੀਆਂ ਅਮਲਤਾਸ ਬਾਰੇ ਖਿੱਚੀਆਂ ਤਸਵੀਰਾਂ ਤੇ ਅਧਾਰਿਤ ਸੀ।  ਇਹਨਾਂ ਤਸਵੀਰਾਂ ਨੇ  ਬਹੁਤ ਸ਼ੋਹਰਤ ਖੱਟੀ ਹੈ ਅਤੇ ਦੱਸਿਆ ਹੈ ਕਿ ਜੇ ਕੁਝ ਸਿੱਖਣ ਜਾਂ ਕਰਨ ਦਾ ਜਨੂੰਨ ਚੜ੍ਹ ਜਾਵੇ ਤਾਂ ਕਿਸੇ ਵੀ ਉਮਰੇ ਮੁਹਾਰਤ ਹਾਸਲ ਕੀਤੀ ਜਾ ਸਕਦੀ ਹੈ। ਲੋਕ ਜਸ ਪ੍ਰੀਤ ਨੂੰ ਕੈਮਰੇ ਨਾਲ ਕਵਿਤਾ ਲਿਖਣ ਵਾਲੀ ਸ਼ਾਇਰਾ ਆਖਦੇ ਹਨ। ਅੱਜ ਜਸ ਪ੍ਰੀਤ  ਨੇ ਇੱਕ ਹੋਰ ਕਮਾਲ ਦਿਖਾਇਆ। ਬੁਲੰਦ  ਆਵਾਜ਼ ਵਾਲੇ ਗਾਇਨ ਦਾ ਕਮਾਲ। ਟੱਪਿਆਂ ਦੀ ਝਲਕ ਕਮਾਲ ਦੀ ਸੀ। ਤੇਰੇ ਵਿੱਚੋਂ ਰੱਬ ਦਿੱਸਦਾ-ਤੈਨੂੰ ਸਜਦਾ ਮੈਂ ਤਾਂ ਕੀਤਾ--ਇਹ ਗਾਇਨ ਸਿੱਧਾ ਦਿਲ ਵਿੱਚ ਉਤਰਦਾ ਸੀ। ਇਸੇ ਤਰਾਂ ਹੋਰਨਾਂ ਮਹਿਮਾਨਾਂ ਨੇ ਵੀ ਆਪੋ ਆਪਣੇ ਕਮਾਲ ਦਿਖਾਏ। 

ਜਲੰਧਰ ਤੋਂ ਆਈ ਮੋਹਤਰਮਾ ਨੂਪੁਰ ਸੰਧੂ ਨੇ ਇੱਕ ਜ਼ਬਰਦਸਤ ਨੁਕਤਾ ਰੱਖਿਆ ਕਿ ਕੁੜੀਆਂ ਨੂੰ ਕੁੜੀਆਂ ਹੀ ਰਹਿਣ ਦਿਓ। ਕੁਦਰਤ ਦੀ ਜਾਂ ਰੱਬ ਦੀ ਬੜੀ  ਵੱਡੀ ਸੌਗਾਤ ਹੁੰਦੀਆਂ ਹਨ ਕੁੜੀਆਂ। ਇਹਨਾਂ ਦੀ ਬਾਰ ਬਾਰ ਮੁੰਡਿਆਂ ਨਾਲ ਤੁਲਨਾ ਨਾ ਕਰੋ। ਇਹ ਨਾ ਆਖਿਆ ਕਰੋ ਸਾਡੀ ਕੁੜੀ ਤਾਂ ਮੁੰਡਿਆਂ ਵਰਗੀ ਹੈ। ਅਜਿਹਾ ਕਰਕੇ ਇੱਕ ਤਰਾਂ ਨਾਲ ਮੁੰਡਿਆਂ ਨੂੰ ਵਡਿਆਇਆ ਜਾਂਦਾ ਹੈ ਤੇ ਕੁੜੀਆਂ ਨੂੰ ਛੁਟਿਆਇਆ ਜਾਂਦਾ ਹੈ। ਕੁੜੀਆਂ ਨੂੰ ਮੁੰਡਿਆਂ ਵਰਗਾ ਆਖਣਾ ਇੱਕ ਤਰਾਂ ਨਾਲ ਕੁੜੀਆਂ ਦਾ ਅਪਮਾਨ ਹੀ ਹੈ। 

ਇਸਤੇ ਸਮਾਗਮ ਵਿੱਚ ਮੌਜੂਦ ਸਾਹਿਤਿਕ ਦੁਨੀਆ ਦੇ ਉੱਘੇ ਲੇਖਕ, ਸੰਪਾਦਕ ਅਤੇ ਸ਼ਾਇਰ ਰਾਜਿੰਦਰ ਸਾਹਿਲ ਨੇ ਕਿਹਾ ਕਿ ਮੈਂ ਖੁਦ ਹਮੇਸ਼ਾ ਆਪਣੀ ਬੇਟੀ ਨੂੰ ਬੇਟੀ ਆਖ ਕੇ ਖੁਸ਼ ਹੁੰਦਾ ਹਾਂ।  ਇਸ ਤਰਾਂ ਇੱਕ ਸੋਚ ਸ਼ੁਰੂ ਹੋਈ ਕਿ ਬੇਟੀ ਨੂੰ ਬੇਟੀ ਆਖਿਆ ਜਾਵੇ। ਇਸ ਸੋਚ ਵਿੱਚ ਕਈਆਂ ਨੇ ਆਪਣੀ ਹਾਂ ਮਿਲਾਈ ਜਿਸ ਨੂੰ ਅੱਜ ਦੇ ਸਮਾਗਮ ਦੀ ਇੱਕ ਖਾਸ ਪ੍ਰਾਪਤੀ ਆਖਿਆ ਜਾ ਸਕਦਾ ਹੈ। 

ਵੱਖ ਵੱਖ ਕਾਲਜਾਂ ਤੋਂ ਆਈਆਂ ਮੁਟਿਆਰ ਕਵਿੱਤਰੀਆਂ ਨੇ ਆਪਣੀ ਕਲਮ ਦਾ ਰੰਗ ਦਿਖਾਇਆ ਤਾਂ ਸਾਰੇ ਅਸ਼ ਅਸ਼ ਕਰ ਉੱਠੇ। 

ਇਹਨਾਂ ਦੀ ਸ਼ਾਇਰੀ ਵਿੱਚ ਇਸਤਰੀ ਨਾਲ ਹੋ ਰਹੀਆਂ ਵਧੀਕੀਆਂ ਦਾ ਜ਼ਿਕਰ ਤਾਂ ਜ਼ਰੂਰ ਸੀ ਪਰ ਰੋਣਾ ਧੋਣਾ ਨਹੀਂ ਸੀ। ਇਸ ਜਬਰ ਦੇ ਖਿਲਾਫ ਜੋਸ਼ੀਲੇ ਸੰਘਰਸ਼ ਦਾ ਐਲਾਨ ਸੀ। "ਭਵਿੱਖ ਸਾਡਾ ਹੈ"--ਇਸ ਸੁਰ ਵਾਲੀ ਲਲਕਾਰ ਸੀ। 

ਇਸ ਸਮਾਗਮ ਵਿੱਚ ਜਲੰਧਰ, ਅੰਮ੍ਰਿਤਸਰ, ਹਿਸਾਰ, ਚੰਡੀਗੜ੍ਹ, ਦਿੱਲੀ ਅਤੇ ਹੋਰਨਾਂ  ਸ਼ਹਿਰਾਂ ਤੋਂ ਆਈਆਂ ਸ਼ਖਸੀਅਤਾਂ  ਵੀ ਸ਼ਾਮਲ ਹੋਈਆਂ। ਐਡਵੋਕੇਟ ਦੀਪਤੀ ਸਲੂਜਾ ਨੇ ਖੁਦ ਵਿਕਲਾਂਗ ਹੋਣ ਦੇ ਬਾਵਜੂਦ ਜਿਸ ਹਿੰਮਤ ਦਾ ਪ੍ਰਗਟਾਵਾ ਕੀਤਾ ਉਹ ਇੱਕ ਮਿਸਾਲ ਸੀ। ਇਸੇ ਤਰਾਂ ਬਠਿੰਡਾ ਤੋਂ ਪੁੱਜੇ ਮੈਡਮ ਸੀਮਾ ਗਰੇਵਾਲ ਨੇ ਵੀ ਬਹੁਤ ਸਾਰੀਆਂ ਕਮਾਲ ਦੀਆਂ ਗੱਲਾਂ ਆਖੀਆਂ। ਉਹਨਾਂ ਨੇ ਆਪਣੀ ਖੂਬਸੂਰਤ ਕਿਤਾਬ ਦੇ ਸੰਬੰਧ ਵਿੱਚ ਸਾਹਿਤ ਸਕਰੀਨ ਦੀ ਟੀਮ ਨਾਲ ਵੀ ਗੱਲਾਂ ਕੀਤੀਆਂ। 

ਡਾਕਟਰ ਬਬੀਤਾ ਜੈਨ, ਪ੍ਰੋਫੈਸਰ ਸਰਲ ਭਾਰਦਵਾਜ, ਮੈਡਮ ਰਮਾ ਸ਼ਰਮਾ, ਡਾਕਟਰ ਅਣੂ ਸ਼ਰਮਾ, ਸਰਿਤਾ ਜੈਨ, ਸਾਹਿਤਿਕ ਸਰਗਰਮੀਆਂ ਨੂੰ ਲਗਾਤਾਰ ਬੜੀ ਸ਼ਿੱਦਤ ਨਾਲ ਚਲਾਉਣ ਵਾਲੀ ਮੈਡਮ ਜਤਿੰਦਰ ਕੌਰ ਸੰਧੂ, ਮਿਸ ਵਨਿਤਾ, ਸ਼ਵੇਤਾ ਸ਼ਰਮਾ ਅਤੇ ਹੋਰਨਾਂ ਦੀ ਮੌਜੂਦਗੀ ਅਤੇ ਸ਼ਬਦ ਵੀ ਯਾਦਗਾਰੀ ਬਣ ਗਏ ਅਤੇ ਦਿਲਾਂ ਵਿੱਚ ਉਤਰਦੇ ਹੋਏ ਕੁਝ ਕਰਨ ਦੀ ਪ੍ਰੇਰਨਾ ਵੀ ਦੇ ਗਏ। ਇਹ ਸਾਰੀਆਂ ਰਿਪੋਰਟਾਂ ਵੀ ਵੱਖੋ ਵੱਖ ਤੌਰ ਤੇ ਵੀ ਪਾਈਆਂ ਜਾ ਰਹੀਆਂ ਹਨ। ਸਮਾਗਮ ਦੇ ਅੱਠ ਭਾਗ ਸਨ ਭਾਗ ਦਾ ਪ੍ਰਧਾਨਗੀ ਮੰਡਲ ਵੱਖਰਾ ਸੀ ਅਤੇ ਹਰ ਵਾਰ ਮੰਚ ਸੰਚਾਲਕ ਵੀ ਵੱਖਰਾ ਸੀ। ਕੁਲ ਮਿਲਾ ਕੇ ਇਹ ਇੱਕ ਕੌਮਾਂਤਰੀ ਪੱਧਰ ਦਾ ਸਮਾਗਮ ਹੋ ਨਿੱਬੜਿਆ ਜਿਸ ਵਿੱਚ ਹਿੰਦੀ, ਪੰਜਾਬੀ, ਅੰਗਰੇਜ਼ੀ ਅਤੇ ਉਰਦੂ ਨਾਲ ਜੁੜੇ ਹੋਏ ਲੇਖਕ ਵੀ ਸਨ ਅਤੇ ਸਰੋਤੇ ਵੀ। ਸਮਾਗਮ ਕਾਫੀ ਲੰਮਾ ਸੀ ਪਰ ਇਸਦੇ ਬਾਵਜੂਦ ਦਰਸ਼ਕਾਂ ਅਤੇ ਸਰੋਤਿਆਂ ਨੇ ਇਸ ਸਮਾਗਮ ਨੂੰ ਲਗਾਤਾਰ ਮਾਣਿਆ। 

ਸਮੁੱਚੇ ਪ੍ਰੋਗਰਾਮ ਨੂੰ ਸਮੇਟਦਿਆਂ ਡਾ. ਜਗਤਾਰ ਸਿੰਘ ਧੀਮਾਨ, ਰਜਿਟਰਾਰ ਸੀਟੀ ਯੂਨੀਵਰਸਿਟੀ ਨੇ ਆਪਣੇ ਵਿਚਾਰ ਰੱਖੇ। ਧੰਨਵਾਦ ਦੇ ਸ਼ਬਦ ਰਸ਼ਮੀ ਅਸਥਾਨਾ ਨੇ ਕਹੇ।
ਅਖੀਰ ਵਿੱਚ ਗੱਲ ਕਿਤਾਬਾਂ ਦੀ ਵੀ। ਇਸ ਸਮਾਗਮ ਵਿੱਚ ਸ਼ਾਇਦ ਹੀ ਕੋਈ ਮਹਿਮਾਨ ਬਚਿਆ ਹੋਵੇ ਜਿਸਨੂੰ ਸੌਗਾਤ ਨਾ ਮਿਲੀ ਹੋਵੇ। ਜਿਸ ਜਿਸ ਨੇ ਵੀ ਕਿਤਾਬ ਲੈਣੀ ਚਾਹੀ ਸੀਮਾ ਗਰੇਵਾਲ ਅਤੇ ਰਾਜਿੰਦਰ ਸਾਹਿਲ ਹੁਰਾਂ ਨੇ ਹਰ ਉਸ ਵਿਅਕਤੀ ਨੂੰ ਬੜੇ ਹੀ ਪਿਰਵ ਅਤੇ ਸਤਿਕਾਰ ਨਾਲ ਕਿਤਾਬ ਭੇਂਟ ਕੀਤੀ। ਦਿਲਚਸਪ ਤੱਥ ਇਹ ਵੀ ਕਿ ਸੌਗਾਤ ਵੱਜੋਂ ਦਿੱਤੀਆਂ ਗਈਆਂ ਇਹ ਕਿਤਾਬਾਂ ਸਸਤੀਆਂ ਨਹੀਂ ਸਨ। ਬਹੁਤ ਮਹਿੰਗੀਆਂ ਛਪੀਆਂ ਹੋਈਆਂ ਸਨ ਬੜੇ ਹੀ ਦਿਲਕਸ਼ ਸਟਾਈਲ ਵਾਲੀਆਂ।  ਜੇ ਕਿਸੇ ਨੇ ਕੀਮਤ ਦੇਣੀ ਵੀ ਚਾਹੀ ਤਾਂ ਲੇਖਕਾਂ ਅਤੇ ਪ੍ਰਬੰਧਕਾਂ ਨੇ ਬੜੀ ਹੀ ਨਿਮਰਤਾ ਨਾਲ ਮਨ ਕਰ ਦਿੱਤਾ ਅਤੇ ਸਿਰਫ ਏਨਾ ਹੀ ਕਿਹਾ ਇਸ ਨੂੰ ਪੜ੍ਹਨਾ ਜ਼ਰੂਰ। ਮਹਿਮਾਨ ਝੋਲੀਆਂ ਭਰ ਭਰ ਕਿਤਾਬਾਂ ਦੀਆਂ ਲੈ ਗਏ। 

(*ਸਾਹਿਤ ਸਕਰੀਨ ਟੀਮ ਵਿੱਚ ਸਨ ਕਾਰਤਿਕਾ ਸਿੰਘ, ਰੈਕਟਰ ਕਥੂਰੀਆ ਅਤੇ ਹੋਰ ਮੈਂਬਰ। ਕੁਝ  ਹੋਰ ਸਮਗਰੀ ਦੇਖ ਸਕਦੇ ਹੋ ਹੋਰਨਾਂ ਪੋਸਟਾਂ ਵਿੱਚ)

ਗੁਰਭਜਨ ਗਿੱਲ ਦਾ ਗ਼ਜ਼ਲ ਸੰਗ੍ਰਹਿ ਰਾਵੀ ਸ਼ਾਹਮੁਖੀ ਅੱਖਰਾਂ 'ਚ ਵੀ ਰਿਲੀਜ਼

22nd February 2020 at 5:17 PM

ਰਾਏ ਅਜ਼ੀਜ਼ਉਲਾ ਖਾਨ ਵੱਲੋਂ ਲਾਹੌਰ ਵਿਖੇ ਲੋਕ-ਅਰਪਣ 

ਲੁਧਿਆਣਾ: 22 ਫਰਵਰੀ 2020: (ਸਾਹਿਤ ਸਕਰੀਨ ਬਿਊਰੋ)::

ਲਾਹੌਰ ਵਿਖੇ ਹਾਲ ਹੀ ਵਿੱਚ ਸੰਪੂਰਨ ਹੋਈ 30ਵੀਂ ਵਿਸ਼ਵ ਪੰਜਾਬੀ ਕਾਨਫਰੰਸ ਦੀ ਵਿਦਾਇਗੀ ਸ਼ਾਮ ਨੂੰ ਪਾਕ ਹੈਰੀਟੇਜ ਹੋਟਲ ਵਿਖੇ ਪੰਜਾਬੀ ਸ਼ਾਇਰ ਗੁਰਭਜਨ ਗਿੱਲ ਦਾ ਗ਼ਜ਼ਲ ਸੰਗ੍ਰਹਿ ਰਾਵੀ ਸਾਂਝ ਪ੍ਰਕਾਸ਼ਨ ਲਾਹੌਰ (ਪਾਕਿਸਤਾਨ)ਵੱਲੋਂ ਸ਼ਾਹਮੁਖੀ ਅੱਖਰਾਂ ਚ ਪ੍ਰਕਾਸ਼ਿਤ ਕਰਕੇ ਪਾਕਿਸਤਾਨ ਕੌਮੀ ਪਾਰਲੀਮੈਂਟ ਦੇ ਸਾਬਕਾ ਮੈਂਬਰ ਤੇ ਸਮੂਹ ਪੰਜਾਬੀਆਂ ਦੀ ਸਤਿਕਾਰਤ ਹਸਤੀ ਰਾਏ ਅਜ਼ੀਜ਼ਉਲਾ ਖਾਨ ਸਾਹਿਬ ਹੱਥੋਂ ਲੋਕ ਅਰਪਨ ਕੀਤਾ ਗਿਆ। ਉਨ੍ਹਾਂ ਦੇ ਨਾਲ ਪ੍ਰਧਾਨਗੀ ਮੰਡਲ ਚ ਸ਼ਾਮਿਲ ਪ੍ਰੋ: ਜ਼ਾਹਿਦ ਹਸਨ, ਡਾ: ਸੁਗਰਾ ਸੱਦਫ਼, ਬਾਬਾ ਨਜਮੀ, ਅਫ਼ਜ਼ਲ ਸਾਹਿਰ, ਡਾ: ਦੀਪਕ ਮਨਮੋਹਨ ਸਿੰਘ, ਡਾ: ਸੁਖਦੇਵ ਸਿੰਘ ਸਿਰਸਾ, ਸਰਦਾਰਨੀ ਜਸਵਿੰਦਰ ਕੌਰ ਗਿੱਲ, ਡਾ: ਸੁਲਤਾਨਾ ਬੇਗਮ, ਸ: ਗਿਆਨ ਸਿੰਘ ਕੰਗ ਪ੍ਰਧਾਨ ,ਵਿਸ਼ਵ ਪੰਜਾਬੀ ਕਾਨਫਰੰਸ ਟੋਰੰਟੋ, ਕਮਰ ਮਹਿਦੀ ਤੇ ਅਮਜਦ ਸਲੀਮ ਮਿਨਹਾਸ ਨੇ ਪੁਸਤਕ ਦੀ ਮੂੰਹ ਵਿਖਾਲੀ ਕਰਵਾਈ। 

ਸਾਡਾ ਟੀ ਵੀ ਦੇ ਪੇਸ਼ਕਾਰ ਯੂਸਫ਼ ਪੰਜਾਬੀ ਨੇ  ਗੁਰਭਜਨ ਗਿੱਲ ਦੀ ਸੰਖੇਪ ਜਾਣ ਪਛਾਣ ਕਰਾਈ। ਮੰਚ ਸੰਚਾਲਨ  ਪ੍ਰਮੁੱਖ ਪੰਜਾਬੀ ਕਵੀ ਅਫ਼ਜ਼ਲ ਸਾਹਿਰ ਨੇ ਕਰਦਿਆਂ ਗੁਰਭਜਨ ਗਿੱਲ ਨਾਲ ਵੀਹ ਸਾਲ ਪੁਰਾਣੀ ਸੱਜਣਤਾਈ ਦੇ ਹਵਾਲੇ ਨਾਲ ਗੱਲ ਅੱਗੇ ਤੋਰੀ। 

ਮੁੱਖ ਮਹਿਮਾਨ ਰਾਏ ਅਜੀਜ ਉਲਾ ਖਾਨ ਸਾਹਿਬ ਨੇ ਕਿਹਾ ਕਿ ਗੁਰਭਜਨ ਮੇਰਾ ਨਿੱਕਾ ਭਰਾ ਹੈ ਅਤੇ ਉਸ ਦੇ ਸਾਰੇ ਪਰਿਵਾਰ ਨਾਲ ਸਾਂਝ ਦਾ ਆਧਾਰ ਅਮਨ, ਮੁਹੱਬਤ ਤੇ ਭਾਈਚਾਰਕ ਸ਼ਕਤੀ ਵਧਾਉਣਾ ਹੈ। ਉਨ੍ਹਾਂ ਕਿਹਾ ਕਿ ਦਸਮੇਸ਼ ਪਿਤਾ ਸ਼੍ਰੀ ਗੁਰੂ ਗੋਬਿੰਦ ਸਿੰਘ ਜੀ ਨਾਲ ਮੇਰੇ ਪੁਰਖਿਆਂ ਦੀ ਸਾਂਝ ਕਾਰਨ ਹੀ ਰਾਏਕੋਟ ਛੱਡਣ ਦੇ ਬਾਵਜੂਦ ਮੇਰੀ ਨੌਵੀਂ ਪੀੜ੍ਹੀ ਨੂੰ ਵੀ ਸਤਿਕਾਰ ਮਿਲ ਰਿਹਾ ਹੈ। ਉਨ੍ਹਾਂ ਕਿਹਾ ਕਿ ਮੈਂ ਗੁਰਮੁਖੀ ਵਿੱਚ ਵੀ ਗੁਰਭਜਨ ਗਿੱਲ ਦੀਆਂ ਲਿਖਤਾਂ ਪੜ੍ਹੀਆਂ ਹਨ, ਇਨ੍ਹਾਂ ਚ ਸਰਬੱਤ ਦੇ ਭਲੇ ਦੀ ਅਰਦਾਸ ਵਰਗਾ ਅਹਿਸਾਸ ਹੈ। 

ਕਿਤਾਬ ਦਾ ਮੁੱਖਬੰਦ ਲਿਖਣ ਵਾਲੇ ਲਾਹੌਰ ਯੂਨੀਵਰਸਿਟੀ ਆਫ ਮੈਨੇਜਮੈਂਟ ਸਾਇੰਸਜ਼ ਦੇ ਵਿਦਵਾਨ ਪ੍ਰੋਫੈਸਰ ਜ਼ਾਹਿਦ ਹਸਨ ਨੇ ਬੋਲਦਿਆਂ ਕਿਹਾ ਕਿ ਰਾਵੀ ਸਾਡੇ ਭਾਣੇ ਇੱਕ ਦਰਿਆ ਹੀ ਨਹੀਂ, ਸਾਡਾ ਵਸੇਬ ਤੇ ਸਾਡਾ ਮੂੰਹ ਮੁਹਾਂਦਰਾ ਹੈ ਜੋ ਇਸ ਧਰਤੀ, ਇਸ ਖਿੱਤੇ ਦੀ ਲੋਕਾਈ ਦੀ ਜੂਨ ਬਦਲਦਾ ਰਿਹਾ ਹੈ। ਗੁਰਭਜਨ ਗਿੱਲ ਜੀ ਨੇ ਰਾਵੀ ਕੰਢੇ ਦੀ ਜ਼ਿੰਦਗੀ ਬਾਰੇ ਡੇਰਾ ਬਾਬਾ ਨਾਨਕ ਤੋਂ ਲੈ ਕੇ ਬਾਬਾ ਸ਼ੇਖ ਫ਼ਰੀਦ ਜੀ ਦੇ ਮਨ ਤੇ ਮੁਖ ਤੋਂ ਅੰਦਰ ਤੀਕ ਝਾਤੀ ਮਾਰਦਿਆਂ ਸ਼ਿਅਰੀ ਮੋਤੀ ਢੂੰਡ ਕੇ ਮਾਲਾ ਪਰੋਈ ਹੈ। 

ਇੰਸਟੀਚਿਉਟ ਆਫ ਆਰਟ ਐੰਡ ਕਲਚਰ ਦੇ ਖੋਜੀ ਵਿਦਵਾਨ ਇਕਬਾਲ ਕੈਸਰ ਨੇ ਰਾਵੀ ਬਾਰੇ ਬੋਲਦਿਆਂ ਕਿਹਾ ਕਿ ਇਹ ਗ਼ਜ਼ਲ ਕਿਤਾਬ ਸਾਡਾ ਸਾਂਝਾ ਦਰਦ ਨਾਮਾ ਹੈ , ਜੋ ਸ਼ਬਦਾਂ ਤੋਂ ਪਾਰ ਵੀ ਸਮਝਣਾ ਪਵੇਗਾ। ਰਾਵੀ ਕੰਢੇ ਗੁਰੂ ਨਾਨਕ ਦਾ ਕਰਤਾਰਪੁਰ ਸਾਹਿਬ ਵਿਖੇ ਪੱਕਾ ਡੇਰਾ ਹੈ ਅਤੇ ਉਹ ਸਾਡੀਆਂ ਮਨੁੱਖ ਵਿਰੋਧੀ ਹਰਕਤਾਂ ਨੂੰ ਨਾਲੋ ਨਾਲ ਵੇਖ ਰਹੇ ਹਨ। ਇਹ ਕਿਤਾਬ  ਧਰਤੀ ਪੁੱਤਰਾਂ ਲਈ ਸਬਕ ਜਹੀ ਹੈ ਕਿ ਕਿਵੇਂ ਅਲੱਗ ਰਹਿ ਕੇ ਵੀ ਇੱਕ ਦੂਦੇ ਲਈ ਸ਼ੁਭਚਿੰਤਨ ਕਰਨਾ ਹੈ। 

ਡਾ: ਸੁਖਦੇਵ ਸਿੰਘ ਸਿਰਸਾ ਨੇ ਕਿਹਾ ਕਿ ਗੁਰਭਜਨ ਗਿੱਲ ਦੀ ਸ਼ਾਇਰੀ ਚ ਪੁਰਖਿਆਂ ਦੀ ਜ਼ਮੀਨ ਲਈ ਵਿਯੋਗਿਆ ਮਨੁਖ ਲਗਾਤਾਰ ਦੋਰਾਂ ਪੰਜਾਬਾਂ ਦੀ ਖ਼ੈਰ ਮੰਗਦਾ ਤੇ ਸਿਰਜਣ ਸ਼ੀਲ ਰਹਿੰਦਾ ਹੈ। 

ਪੰਜਾਬ ਇੰਸਟੀਚਿਊਟ ਆਫ ਲੈਂਗੁਏਜ ਐਂਡ ਕਲਚਰ ਦੀ ਸਾਬਕਾ ਡਾਇਰੈਕਟਰ ਜਨਰਲ ਡਾ: ਸੁਗਰਾ ਸੱਦਫ਼ ਨੇ ਕਿਹਾ ਕਿ ਰਾਵੀ ਸਿਰਫ਼ ਗ਼ਜ਼ਲ ਪਰਾਗਾ ਹੀ ਨਹੀਂ, ਹੋਰ ਵੀ ਬਹੁਤ ਕੁਝ ਹੈ, ਜਿਸ ਤੋਂ ਸਾਨੂੰ ਸਭ ਦੇ ਭਲੇ ਦਾ ਸੁਨੇਹਾ ਮਿਲਦਾ ਹੈ। 

ਪ੍ਰਸਿੱਧ ਵਿਦਵਾਨ ਡਾ: ਗੁਲਾਮ ਹੁਸੈਨ ਸਾਜਿਦ ਸਾਹਿਬ ਨੇ ਕਿਤਾਬ ਬਾਰੇ ਲੰਮਾ ਪਰਚਾ ਪੜ੍ਹਿਆ ਤੇ ਕਿਹਾ ਕਿ ਲੋਕ ਜ਼ਬਾਨ ਚ ਲਿਖੀ ਇਹ ਸ਼ਾਇਰੀ ਸਾਨੂੰ ਧਰਤੀ ਨਾਲ ਜੋੜਦੀ ਹੈ। 

ਡਾ: ਦੀਪਕ ਮਨਮੋਹਨ ਸਿੰਘ ਨੇ ਕਿਹਾ ਕਿ ਮੈਂ ਤਾਂ  ਅੱਜ ਹੀ ਆਪਣੇ ਸਾਥੀਆਂ ਪੰਮੀ ਬਾਈ, ਡਾ: ਰਤਨ ਸਿੰਘ ਢਿੱਲੋਂ ਤੇ ਖਾਲਿਦ ਹੁਸੈਨ ਸਮੇਤ ਰਾਵੀ ਕੰਢੇ ਜਾ ਕੇ ਕਰਤਾਰਪੁਰ ਸਾਹਿਬ ਵਿਖੇ ਗੁਰਭਜਨ ਗਿੱਲ ਦੀ ਕਿਤਾਬ ਬਾਬਾ ਨਾਨਕ ਦੀ ਸੰਗਤ ਨੂੰ ਭੇਂਟ ਕਰਕੇ ਆਇਆ ਹਾਂ। 

ਸਾਂਝ ਪ੍ਰਕਾਸ਼ਨ ਦੇ ਅਮਜਦ ਸਲੀਮ ਮਿਨਹਾਸ ਨੇ ਕਿਹਾ ਕਿ ਇਹ ਸ਼ਾਇਰੀ ਸਾਨੂੰ ਦੱਸਦੀ ਹੈ ਕਿ ਅਮਨ ਚੈਨ ਨੇ ਹੀ ਵਿਕਾਸ ਦਾ ਰਾਹ ਖੋਲ੍ਹਣਾ ਹੈ ਅਤੇ ਜੰਗ ਨੇ ਸਾਂਝੀ ਪੰਜਾਬੀ ਰਹਿਤਲ ਦਾ ਘਾਣ ਕਰਨਾ ਹੈ। ਸੁਚੇਤ ਕਰਨ ਵਾਲੀ ਇਹ ਸ਼ਾਇਰੀ ਭਾਰਤ ਪਾਕਿਸਤਾਨ ਦੇ ਅਵਾਮ ਲਈ ਬੇਹੱਦ ਅਰਥਵਾਨ ਹੈ। 

ਪਰੈੱਸ ਕਲੱਬ ਲਾਹੌਰ ਦੇ ਪ੍ਰਤੀਨਿਧ ਤੇ ਪ੍ਰਸਿੱਧ ਸ਼ਾਇਰ ਸਰਫ਼ਰਾਜ਼ ਸ਼ਫ਼ੀ ਨੇ ਵੀ ਸੰਬੋਧਨ ਕੀਤਾ।

ਇਸ ਮੌਕੇ ਪੰਜਾਬ ਤੋਂ ਗਏ ਪ੍ਰਮੁੱਖ ਲੇਖਕ ਦਰਸ਼ਨ ਬੁੱਟਰ ਪ੍ਰਧਾਨ ਕੇਂਦਰੀ ਪੰਜਾਬੀ ਲੇਖਕ ਸਭਾ, ਡਾ: ਹਰਕੇਸ਼ ਸਿੰਘ ਸਿੱਧੂ, ਸਹਿਜਪ੍ਰੀਤ ਸਿੰਘ ਮਾਂਗਟ, ਡਾ: ਜਸਵਿੰਦਰ ਕੌਰ ਮਾਂਗਟ, ਡਾ: ਨਰਵਿੰਦਰ ਸਿੰਘ ਕੌਸ਼ਲ,ਡਾ: ਸੁਨੀਤਾ ਧੀਰ, ਸੁਸ਼ੀਲ ਦੋਸਾਂਝ ਸਮੇਤ ਪਾਕਿਸਤਾਨ ਦੇ ਵੀ ਕੁਝ ਲੇਖਕ ਹਾਜ਼ਰ ਸਨ।

ਅਲੱਗ ਸ਼ਬਦ ਯਗ ਟਰੱਸਟ ਵੱਲੋਂ ਸ੍ਰ ਗਿਆਨ ਸਿੰਘ ਕੋਟਲੀ ਦਾ ਸਨਮਾਨ

Saturday: 18th January 2020 at 5:58 PM

ਪੰਜਾਬੀ ਪ੍ਰੈਸ ਕਲੱਬ ਬੀ ਸੀ ਕਨੇਡਾ ਦੇ ਪ੍ਰਧਾਨ ਹਨ ਸ੍ਰ ਕੋਟਲੀ 

ਲੁਧਿਆਣਾ: 18 ਜਨਵਰੀ 2020: (ਸਾਹਿਤ ਸਕਰੀਨ ਬਿਊਰੋ)::

ਪੰਜਾਬੀ ਪ੍ਰੈਸ ਕਲੱਬ ਬੀ ਸੀ ਕਨੇਡਾ ਦੇ ਪ੍ਰਧਾਨ ਸ ਗਿਆਨ ਸਿੰਘ ਕੋਟਲੀ ਦਾ ਅਲੱਗ ਸ਼ਬਦ ਯਗ ਟਰੱਸਟ ਵੱਲੋਂ ਸਨਮਾਨ ਕੀਤਾ ਗਿਆ। ਉਨ੍ਹਾਂ ਨੂੰ ਟਰੱਸਟ ਦੇ ਚੇਅਰਮੈਨ ਡਾਕਟਰ ਸਰੂਪ ਸਿੰਘ ਅਲੱਗ ਦੀਆਂ ਲਿਖਤਾਂ ਦਾ ਸੈਟ ਭੇਂਟ ਕੀਤਾ ਗਿਆ। ਟਰੱਸਟ ਦੇ ਸਕਤਰ ਜਨਰਲ ਸ ਸੁਖਿੰਦਰ ਪਾਲ ਸਿੰਘ ਅਲੱਗ ਤੇ ਪ੍ਰਕਾਸ਼ਨਾ ਸਕੱਤਰ ਸ ਰਮਿੰਦਰ ਦੀਪ ਸਿੰਘ ਅਲੱਗ ਨੇ ਕੋਟਲੀ ਸਾਹਿਬ ਨੂੰ ਡਾਕਟਰ ਸਰੂਪ ਸਿੰਘ ਅਲੱਗ ਦੀਆਂ ਪੁਸਤਕਾਂ ਭੇਟ ਕੀਤੀਆਂ ਤੇ ਜੀ ਆਇਆਂ ਕਿਹਾ। ਸ ਗਿਆਨ ਸਿੰਘ ਕੋਟਲੀ ਨੇ ਵੀ ਡਾਕਟਰ ਅਲੱਗ ਦੀ ਸੇਵਾ ਦੀ ਭਰਪੂਰ ਸ਼ਲਾਘਾ ਕੀਤੀ ਅਤੇ ਇਸ ਨੂੰ ਇੱਕ ਲੋੜਵੰਦਾਂ ਤੇ ਜ਼ਰੂਰੀ ਕਾਰਜ ਦਸਿਆ। ੳਨਾ ਦਸਿਆ ਕਿ ਵੈਨਕੂਵਰ ਦੀ ਸੰਗਤ ਵੀ ਡਾਕਟਰ ਅਲੱਗ ਦੀਆਂ ਲਿਖਤਾਂ ਦੀ ਦੀਵਾਨੀ ਹੈ। ਸ ਗਿਆਨ ਸਿੰਘ ਕੋਟਲੀ ਨੇ ਵੀ ਆਪਣੀਆਂ ਪੁਸਤਕਾਂ ਸਕੱਤਰ ਜਨਰਲ ਟਰੱਸਟ ਨੂੰ ਭੇਂਟ ਕੀਤੀਆਂ। 

ਪੰਜਾਬੀ ਗ਼ਜ਼ਲ ਮੰਚ ਦੀ ਮੀਟਿੰਗ ਇਸ ਵਾਰ 19 ਜਨਵਰੀ ਨੂੰ

 Friday:Whats App: 17th January 2020 at 21:45 PM
ਹਰ ਸਾਲ ਦਿਤੇ ਜਾਂਦੇ ਇਨਾਮਾਂ ਬਾਰੇ ਵੀ ਹੋਵੇਗਾ ਵਿਚਾਰ ਵਿਟਾਂਦਰਾ 

ਪੰਜਾਬੀ ਗ਼ਜ਼ਲ (ਰਜਿ.) ਦੀ ਇੱਕ ਫਾਈਲ ਫੋਟੋ

ਲੁਧਿਆਣਾ: 17 ਜਨਵਰੀ 2020: (ਕਾਰਤਿਕਾ ਸਿੰਘ//ਸਾਹਿਤ ਸਕਰੀਨ)::

ਆਧੁਨਿਕਤਾ ਦੇ  ਰੌਲੇ ਰੱਪੇ ਵਾਲੇ ਮਾਹੌਲ ਵਿੱਚ ਵੀ ਗ਼ਜ਼ਲ ਦੇ ਜਾਦੂ  ਜਿਊਂਦਿਆਂ ਰੱਖ ਵਾਲੀਆਂ ਸੰਸਥਾਵਾਂ ਅਤੇ ਸੰਗਠਨਾਂ ਵਿੱਚੋਂ ਇੱਕ ਹੈ ਪੰਜਾਬੀ ਗ਼ਜ਼ਲ ਮੰਚ ਪੰਜਾਬ (ਰਜਿ:) ਫਿਲੌਰ।  ਇਹ ਸੰਗਠਨਾਂ ਲੰਮੇ ਅਰਸੇ ਤੋਂ ਬਿਨਾ ਕਿਸੇ ਗੈਰਹਾਜ਼ਰੀ ਦੇ ਗ਼ਜ਼ਲ ਦੀ ਅਲਖ ਜਗਾਉਂਦਾ ਹੈ। ਬੜੀ ਹੀ ਖਾਮੋਸ਼ੀ ਅਤੇ ਸਾਦਗੀ ਨਾਲ ਪੁਰਾਤਨ ਸਮਿਆਂ ਦੀ ਤਰਾਂ ਮੀਟਿੰਗਾਂ ਸੱਦਣੀਆਂ, ਬੁਲਾਉਣੀਆਂ ਅਤੇ ਬੜੇ ਹੀ ਪਿਆਰ ਅਤੇ ਸਤਿਕਾਰ ਨਾਲ ਸਭਨਾਂ ਨੂੰ ਸੁਣਨਾ ਇਹਨਾਂ ਮੀਟਿੰਗਾਂ ਦੀ ਖਾਸੀਅਤ ਹੁੰਦੀ ਹੈ। ਕਈ ਵਾਰ ਗ਼ਜ਼ਲ ਦੇਖੇਤਰ ਵਿਚ ਮੁਹਾਰਤ ਰੱਖਣ ਵਾਲਿਆਂ ਨਾਮਿ ਸ਼ਖਸੀਅਤਾਂ ਨੂੰ ਵੀ ਸੱਦਿਆ ਜਾਂਦਾ ਹੈ। ਇਸ ਵਾਰ ਇਸ ਗ਼ਜ਼ਲ ਮੰਚ ਦੀ ਮਹੀਨਾਵਾਰ ਮੀਟਿੰਗ 19 ਜਨਵਰੀ 2020 ਐਤਵਾਰ ਨੂੰ ਹੋਣੀ ਹੈ। ਮੀਟਿੰਗ ਸ਼ੁਰੂ ਹੋਣ ਦਾ ਸਮਾਂ ਵੀ ਹਮੇਸ਼ਾਂ ਦੀ ਤਰਾਂ ਸਵੇਰੇ 10:30 ਵਜੇ ਅਤੇ ਮੀਟਿੰਗ ਦਾ ਥਾਂ ਵੀ ਪੰਜਾਬੀ ਭਵਨ ਲੁਧਿਆਣਾ। ਇਸ ਵਾਰ ਦੀ ਮੀਟਿੰਗ ਵਿੱਚ ਕੌਣ ਕੌਣ ਕਿਹੜਾ ਕਿਹੜਾ ਕਲਾਮ ਪੜ੍ਹੇਗਾ ਇਸਦਾ ਪਤਾ ਤਾਂ ਮੀਟਿੰਗ ਵਿੱਚ ਜਾ ਕੇ ਹੀ ਲੱਗ ਸਕੇਗਾ। 

ਇਸ ਵਾਰ ਦੀ ਇੱਕ ਹੋਰ ਖਾਸੀਅਤ ਇਹ ਕਿ ਇਸ ਮੀਟਿੰਗ ਵਿਚ ਹਰ ਸਾਲ ਦਿਤੇ ਜਾਂਦੇ ਇਨਾਮਾਂ ਬਾਰੇ ਵੀ ਵਿਚਾਰ ਵਿਟਾਂਦਰਾ ਕੀਤਾ ਜਾਵੇਗਾ। ਇਸ ਲਈ ਇਸ ਮੀਟਿੰਗ ਵਿੱਚ ਸਾਰੇ ਗ਼ਜ਼ਲ ਪ੍ਰੇਮੀ ਜ਼ਰੂਰ ਪਹੁੰਚਣ ਜੀ। ਇਸ ਮਕਸਦ ਲਈ ਪੰਜਾਬੀ ਗ਼ਜ਼ਲ ਮੰਚ ਫਿਲੌਰ ਵੱਲੋਂ  ਜ. ਸ. ਪਰੀਤ ਨੇ ਉਚੇਚੀ ਬੇਨਤੀ ਸਾਰੇ ਗ਼ਜ਼ਲ ਪ੍ਰੇਮੀਆਂ ਨੂੰ ਕੀਤੀ ਹੈ ਕਿ ਉਹ ਜ਼ਰੂਰ ਪਹੁੰਚਣ।