ਗੁਰਭਜਨ ਗਿੱਲ ਦੇ ਗ਼ਜ਼ਲ ਸੰਗ੍ਰਿਹ ਮੋਰ ਪੰਖ ਦਾ ਦੂਜਾ ਸੰਸਕਰਨ ਲੋਕ ਅਰਪਨ

29th January 2022 at 7:27 PM

ਰਿਲੀਜ਼ ਕੀਤਾ ਕੇਂਦਰੀ ਪੰਜਾਬੀ ਲੇਖਕ ਸਭਾ ਪ੍ਰਧਾਨ ਦਰਸ਼ਨ ਬੁੱਟਰ ਹੁਰਾਂ ਨੇ 

ਲੁਧਿਆਣਾ: 29 ਜਨਵਰੀ 2022: (ਸਾਹਿਤ ਸਕਰੀਨ ਡੈਸਕ)::

ਕਲਮ ਦੀ ਸਾਧਨਾ ਵਿੱਚ,  ਸਾਹਿਤ ਦੀ ਸਾਧਨਾ ਵਿੱਚ ਜੇ ਕੁਝ ਵਿਅਕਤੀ ਨਿਰੰਤਰ ਜਤਨਸ਼ੀਲ ਹਨ ਤਾਂ ਪ੍ਰੋਫੈਸਰ ਗੁਰਭਜਨ ਗਿੱਲ ਉਹਨਾਂ ਵਿਚੋਂ  ਇੱਕ ਹਨ। ਗੋਡਿਆਂ ਦੀ ਸਮੱਸਿਆ ਦੇ ਬਾਵਜੂਦ ਇਸ ਉਮਰ ਵਿੱਚ ਏਨੀ ਊਰਜਾ, ਏਨੀ ਮਿਹਨਤ, ਏਨੀ ਹਿੰਮਤ, ਏਨੀ ਨਿਰੰਤਰਤਾ, ਏਨਾ ਤਾਲਮੇਲ, ਏਨਾ ਸੁਚੇਤ ਰਹਿਣਾ ਕੋਇਸੇ ਦੈਵੀ ਚਮਤਕਾਰ ਵਰਗਾ ਹੀ ਹੈ। ਹੁਣ ਉਹਨਾਂ ਦੀ ਪੁਸਤਕ ਮੋਰ ਪੰਖ ਦਾ ਦੂਜਾ ਐਡੀਸ਼ਨ ਸਾਹਮਣੇ ਆਇਆ ਹੈ। ਕੇਂਦਰੀ ਪੰਜਾਬੀ ਲੇਖਕ ਸਭਾ ਦੇ ਪ੍ਰਧਾਨ ਦਰਸ਼ਨ ਬੁੱਟਰ ਵੱਲੋਂ ਗੁਰਭਜਨ ਗਿੱਲ ਦੇ ਗ਼ਜ਼ਲ ਸੰਗ੍ਰਿਹ ਮੋਰ ਪੰਖ ਦਾ ਦੂਜਾ ਸੰਸਕਰਨ ਬੀਤੀ ਸ਼ਾਮ ਲੁਧਿਆਣਾ ਦੇ ਸ਼ਹੀਦ ਭਗਤ ਸਿੰਘ ਨਗਰ ਵਿਖੇ ਲੋਕ ਅਰਪਨ ਕੀਤਾ ਗਿਆ। ਇਹ ਇੱਕ ਇਤਿਹਾਸਿਕ ਸਮਾਂ ਸੀ। ਬੜੇ ਹੀ ਯਾਦਗਾਰੀ ਪਲ ਸਨ ਅਤੇ ਬਹੁਤ ਹੀ ਸੁਭਾਗੇ ਲੋਕ ਇਸ ਮੌਕੇ ਸ਼ਾਮਲ ਹੋ ਸਕੇ। 

ਇਸੇ ਤਰ੍ਹਾਂ ਆਪਣੀ ਲਗਨ ਵਿੱਚ ਗੰਭੀਰ ਸੁਰ ਲੱਗੇ ਰਹਿਣ ਵਾਲੇ ਸਾਹਿਤਕਾਰ ਦਰਸ਼ਨ ਬੁੱਟਰ ਨੇ ਇਸ ਮੌਕੇ ਬੋਲਦਿਆਂ ਕਿਹਾ ਕਿ ਪਿਛਲੇ ਪੰਜਾਹ ਸਾਲਾਂ ਤੋਂ ਨਿਰੰਤਰ ਸਾਹਿੱਤ ਸਿਰਜਣਾ ਕਰਦਿਆਂ ਗੁਰਭਜਨ ਗਿੱਲ ਜੀ ਨੇ ਸੱਤ ਗ਼ਜ਼ਲ ਸੰਗ੍ਰਹਿ,ਇੱਕ ਰੁਬਾਈ ਸੰਗ੍ਰਹਿ, ਇੱਕ ਗੀਤ ਸੰਗ੍ਰਹਿ ਅਤੇ ਅੱਠ ਕਾਵਿ ਸੰਗ੍ਰਹਿ ਪੰਜਾਬੀ ਸਾਹਿੱਤ ਜਗਤ ਦੀ ਝੋਲੀ ਪਾਏ ਹਨ। ਇਨ੍ਹਾਂ ਵਿੱਚੋਂ ਦੋ ਕਾਵਿ ਸੰਗ੍ਰਹਿ ਰਾਵੀ (ਗ਼ਜ਼ਲਾਂ)ਅਤੇ ਖ਼ੈਰ ਪੰਜਾਂ ਪਾਣੀਆਂ ਦੀ (ਕਵਿਤਾਵਾਂ) ਸ਼ਾਹਮੁਖੀ ਅੱਖਰਾਂ ਵਿੱਚ ਪਾਕਿਸਤਾਨ ਅੰਦਰ ਵੀ ਪ੍ਰਕਾਸ਼ਿਤ ਹੋ ਚੁਕੇ ਹਨ। ਤੀਜੀ ਪੁਸਤਕ ਸੁਰਤਾਲ ਵੀ ਸ਼ਾਹਮੁਖੀ ਚ ਛਪਾਈ ਅਧੀਨ ਹੈ। ਇਹ ਮੁਬਾਰਕ ਯੋਗ ਪ੍ਰਾਪਤੀ ਹੈ। ਉਨ੍ਹਾਂ ਕਿਹਾ ਕਿ ਗੁਰਭਜਨ ਗਿੱਲ ਨੇ ਵੱਡੇ ਭਰਾਵਾਂ ਵਾਂਗ ਸਾਡੀ ਪੀੜ੍ਹੀ ਦੀ ਸਾਹਿੱਤਕ ਤੇ ਸਭਿਆਚਾਰਕ ਅਗਵਾਈ ਕੀਤੀ ਹੈ। ਇਹ ਅਜਿਹੇ ਸ਼ਬਦ ਸਨ ਜਿਹਨਾਂ ਵਿੱਚ ਗੁਰਭਜਨ ਗਿੱਲ ਹੁਰਾਂ ਦੀ ਸ਼ਖ਼ਸੀਅਤ ਦਾ ਸੱਚ ਉਜਾਗਰ ਹੁੰਦਾ ਹੈ। 

ਅਤੀਤ ਅਤੇ ਵਰਤਮਾਨ ਨੂੰ ਜੋੜਦਿਆਂ ਇਸ ਮੌਕੇ ਪ੍ਰੋਫੈਸਰ ਗੁਰਭਜਨ ਗਿੱਲ ਨੇ ਕਿਹਾ ਕਿ ਪੰਜਾਬੀ ਗ਼ਜ਼ਲ ਲਿਖਣ ਦੇ ਰਾਹ ਉਨ੍ਹਾਂ ਨੂੰ ਪ੍ਰਿੰਸੀਪਲ ਤਖ਼ਤ ਸਿੰਘ, ਡਾਃ ਜਗਤਾਰ, ਸਰਦਾਰ ਪੰਛੀ ਤੇ ਸੁਰਜੀਤ ਪਾਤਰ ਜੀ ਨੇ ਉਤਸ਼ਾਹ ਦੇ ਕੇ ਤੋਰਿਆ। ਇਸੇ ਉਤਸ਼ਾਹ ਸਦਕਾ ਹੀ ਉਹ ਲਗਾਤਾਰ ਗ਼ਜ਼ਲ ਸਿਰਜਣਾ ਵਿੱਚ ਤੁਰ ਰਹੇ ਹਨ।

ਉਹਨਾਂ  ਦੱਸਿਆ ਕਿ ਟੋਰੰਟੋ ਸਥਿਤ ਏਕਮ ਟੀ ਵੀ ਤੇ ਰੇਡੀਓ ਸੰਚਾਲਕ ਅਮਰਜੀਤ ਸਿੰਘ ਰਾਏ ਉਨ੍ਹਾਂ ਦੀਆਂ ਹੁਣ ਤੀਕ ਲਿਖੀਆਂ ਲਗਪਗ 800 ਗ਼ਜ਼ਲਾਂ ਨੂੰ ਇੱਕ ਜਿਲਦ ਵਿੱਚ ਪ੍ਰਕਾਸ਼ਿਤ ਕਰਵਾ ਰਹੇ ਹਨ। ਇਹ ਉਨ੍ਹਾਂ ਲਈ ਬੜੇ ਮਾਣ ਵਾਲੀ ਗੱਲ ਹੈ। ਇਸ ਮੌਕੇ ਨਾਭਾ ਤੋਂ ਆਏ ਪੰਜਾਬੀ ਕਵੀ ਸੁਰਿੰਦਰਜੀਤ ਚੌਹਾਨ ਤੇ ਸਃ ਜਗਦੀਸ਼ਪਾਲ ਸਿੰਘ ਗਰੇਵਾਲ ਸਰਪੰਚ ਦਾਦ (ਲੁਧਿਆਣਾ) ਵੀ ਹਾਜ਼ਰ ਸਨ। ਦਿਲਚਸਪ ਗੱਲ ਹੈ ਕਿ ਪੰਜਾਬੀ ਸਾਹਿਤ ਐਕਡਮੀ ਦੀਆਂ ਚੋਣਾਂ ਵਿਹਚ ਰੁਝੇ ਹੋਏ ਹੋਣ ਦੇ ਬਾਵਜੂਦ ਇਸ ਮਕਸਦ ਲਈ ਸਮਾਂ ਕੱਢਿਆ। ਇਹ ਸਭ ਕੁਝ ਗਿੱਲ ਸਾਹਿਬ ਅੰਦਰਲੀ ਸਹਿਜਤਾ ਕਾਰਨ ਹੀ ਸੰਭਵ ਹੋ ਸਕਿਆ।

ਚੰਗਾ ਹੋਵੇ ਜੇ ਗਿੱਲ ਸਾਹਿਬ ਆਪਣੀ ਇਸ ਸਹਿਜਤਾ ਅਤੇ ਊਰਜਾ ਦੇ ਸਰੋਤਾਂ ਬਾਰੇ ਅੱਜ ਦੀ ਪੀੜ੍ਹੀ ਨੂੰ ਕੁਝ ਗੁਰ ਵੀ ਸਮਝਾਉਣ। ਰਫਤਾਰ, ਕੁਆਲਿਟੀ ਅਤੇ ਸੰਖਿਆ--ਤਿੰਨਾਂ ਮਾਮਲਿਆਂ ਵਿੱਚ ਬੜੀ ਹੀ ਸਹਿਜਤਾ ਨਾਲ ਅੱਗੇ ਰਹਿਣਾ ਇੱਕ ਕ੍ਰਿਸ਼ਮਾ ਹੈ ਜਿਸਦੇ ਗੁਰ ਸਿੱਖੇ ਜਾਣੇ ਚਾਹੀਦੇ ਹਨ।