ਕਹਾਣੀਕਾਰ ਲਾਲ ਸਿੰਘ ਦੇ ਦੇਹਾਂਤ ’ਤੇ ਕੇਂਦਰੀ ਪੰਜਾਬੀ ਲੇਖਕ ਸਭਾ ਵੱਲੋਂ ਗਹਿਰੇ ਦੁੱਖ ਦਾ ਇਜ਼ਹਾਰ

Sushil Dosanjh Sent on Monday 16th February 2026 at 16:03 Regarding Lal Singh Writer

ਕਹਾਣੀਕਾਰ ਲਾਲ ਸਿੰਘ ਦਾ ਅੰਤਿਮ ਸੰਸਕਾਰ ਹੋਵੇਗਾ 19 ਫਰਵਰੀ ਨੂੰ 

ਚੰਡੀਗੜ੍ਹ: 16 ਫਰਵਰੀ 2026: (ਮੀਡੀਆ ਲਿੰਕ ਰਵਿੰਦਰ//ਸਾਹਿਤ ਸਕਰੀਨ ਡੈਸਕ)::

ਕੇਂਦਰੀ ਪੰਜਾਬੀ ਲੇਖਕ ਸਭਾ (ਰਜਿ) ਨੇ ਪ੍ਰਸਿੱਧ ਪੰਜਾਬੀ ਕਹਾਣੀਕਾਰ ਸ੍ਰੀ ਲਾਲ ਸਿੰਘ ਦੇ ਦੇਹਾਂਤ ’ਤੇ ਗਹਿਰੇ ਦੁੱਖ ਅਤੇ ਅਫ਼ਸੋਸ ਦਾ ਪ੍ਰਗਟਾਵਾ ਕੀਤਾ ਹੈ। ਸਭਾ ਦੇ ਪ੍ਰਧਾਨ ਦਰਸ਼ਨ ਬੁੱਟਰ, ਜਨਰਲ ਸਕੱਤਰ ਸੁਸ਼ੀਲ ਦੁਸਾਂਝ, ਸੀਨੀਅਰ ਮੀਤ ਪ੍ਰਧਾਨ ਮੱਖਣ ਸਿੰਘ ਕੁਹਾੜ ਅਤੇ ਦਫ਼ਤਰ ਸਕੱਤਰ ਦੀਪ ਦੇਵਿੰਦਰ ਸਿੰਘ ਨੇ ਇੱਥੋਂ ਜਾਰੀ ਪ੍ਰੈੱਸ ਬਿਆਨ ਵਿੱਚ ਕਿਹਾ ਕਿ ਲਾਲ ਸਿੰਘ ਦਾ ਵਿਛੋੜਾ ਪੰਜਾਬੀ ਸਾਹਿਤ ਲਈ ਨਾ ਪੂਰਿਆ ਜਾਣ ਵਾਲਾ ਘਾਟਾ ਹੈ।

20 ਅਪ੍ਰੈਲ 1940 ਨੂੰ ਦਸੂਹਾ (ਜ਼ਿਲ੍ਹਾ ਹੁਸ਼ਿਆਰਪੁਰ) ਵਿਖੇ ਜਨਮੇ ਲਾਲ ਸਿੰਘ ਨੇ ਆਪਣੀ ਸਾਹਿਤ ਰਚਨਾ ਅਤੇ ਕਹਾਣੀਆਂ ਰਾਹੀਂ ਪੰਜਾਬੀ ਸਾਹਿਤ ਨੂੰ ਸਮਰੱਥ ਬਣਾਇਆ ਅਤੇ ਸਮਾਜਕ ਸਚਾਈਆਂ ਨੂੰ ਬੜੀ ਸੰਵੇਦਨਸ਼ੀਲਤਾ ਨਾਲ ਪੇਸ਼ ਕੀਤਾ।। ਉਨ੍ਹਾਂ ਨੇ ਸਮਾਜਕ ਹਕੀਕਤਾਂ, ਆਮ ਮਨੁੱਖ ਦੇ ਦੁੱਖ-ਦਰਦ ਅਤੇ ਜੀਵਨ ਸੰਘਰਸ਼ ਨੂੰ ਸੰਵੇਦਨਸ਼ੀਲ ਅਤੇ ਪ੍ਰਭਾਵਸ਼ਾਲੀ ਅੰਦਾਜ਼ ਵਿੱਚ ਪੇਸ਼ ਕੀਤਾ।

ਉਨ੍ਹਾਂ ਦੇ ਕਹਾਣੀ ਸੰਗ੍ਰਹਿ ਮਾਰਖੋਰੋ (1984), ਬਲੌਰ (1986), ਧੁੱਪ-ਛਾਂ (1990), ਕਾਲੀ ਮਿੱਟੀ (1996), ਚੋਣਵੀਂ ਪੰਜਾਬੀ ਕਹਾਣੀ (1996), ਅੱਧੇ ਅਧੂਰੇ (2003), ਸਰਦੇ ਪੁੱਜਦੇ, ਗੜ੍ਹੀ ਬ਼ਖ਼ਸ਼ਾ ਸਿੰਘ (2010) ਅਤੇ ਸੰਸਾਰ (2017) ਪੰਜਾਬੀ ਕਹਾਣੀ ਸਾਹਿਤ ਦੀ ਮਹੱਤਵਪੂਰਨ ਵਿਰਾਸਤ ਹਨ।

ਉਹ ਕੇਂਦਰੀ ਪੰਜਾਬੀ ਲੇਖਕ ਸਭਾ (ਰਜਿ) ਨਾਲ ਲੰਬੇ ਸਮੇਂ ਤੱਕ ਸਰਗਰਮ ਤੌਰ ’ਤੇ ਜੁੜੇ ਰਹੇ ਅਤੇ ਮੀਤ ਪ੍ਰਧਾਨ ਸਮੇਤ ਕਈ ਅਹੁਦਿਆਂ ’ਤੇ ਆਪਣੀਆਂ ਜ਼ਿੰਮੇਵਾਰੀਆਂ ਨਿਭਾਉਂਦੇ ਰਹੇ। ਸਭਾ ਦੇ ਅਹੁਦੇਦਾਰਾਂ ਨੇ ਕਿਹਾ ਕਿ ਉਨ੍ਹਾਂ ਦੀ ਸਾਹਿਤਕ ਤੇ ਸਮਾਜਕ ਘਾਲਣਾ ਹਮੇਸ਼ਾਂ ਯਾਦ ਰੱਖੀ ਜਾਵੇਗੀ।

ਲਾਲ ਸਿੰਘ ਦਾ ਅੰਤਿਮ ਸੰਸਕਾਰ 19 ਫਰਵਰੀ ਨੂੰ ਬਾਅਦ ਦੁਪਹਿਰ ਇਕ ਵਜੇ ਸ਼ਮਸ਼ਾਨਘਾਟ ਪਿੰਡ ਕਹਿਰਵਾਲੀ, ਨੇੜੇ ਡਰਾਈਵਿੰਗ ਸਕੂਲ (ਦਸੂਹਾ) ਵਿਖੇ ਕੀਤਾ ਜਾਵੇਗਾ। ਉਨ੍ਹਾਂ ਨਮਿਤ ਭੋਗ 23 ਫਰਵਰੀ ਨੂੰ ਪਾਇਆ ਜਾਵੇਗਾ।

ਕੇਂਦਰੀ ਪੰਜਾਬੀ ਲੇਖਕ ਸਭਾ (ਰਜਿ) ਦੀ ਸਮੁੱਚੀ ਕਾਰਜਕਾਰਨੀ ਨੇ ਵਿਛੜੇ ਸਾਹਿਤਕਾਰ ਨੂੰ ਸ਼ਰਧਾਂਜਲੀ ਅਰਪਿਤ ਕਰਦਿਆਂ ਉਨ੍ਹਾਂ ਦੇ ਪਰਿਵਾਰ ਨਾਲ ਡੂੰਘੀ ਸੰਵੇਦਨਾ ਪ੍ਰਗਟ ਕੀਤੀ ਹੈ।

ਜਾਰੀ ਕਰਤਾ:ਸੁਸ਼ੀਲ ਦੁਸਾਂਝ:ਜਨਰਲ ਸਕੱਤਰ, ਕੇਂਦਰੀ ਪੰਜਾਬੀ ਲੇਖਕ ਸਭਾ (ਰਜਿ)//ਸੰਪਰਕ-98887-99870

ਉੱਘੀ ਕਵਿੱਤਰੀ ਭੁਪਿੰਦਰ ਕੌਰ ਵਾਲੀਆ ਦਾ ਦੇਹਾਂਤ

ਸਾਹਿਤਿਕ ਹਲਕਿਆਂ ਵਿੱਚ ਸੋਗ ਦੀ ਲਹਿਰ 

ਪਟਿਆਲਾ: 29 ਜੁਲਾਈ 2025: (ਹਰਪ੍ਰੀਤ ਕੌਰ ਸੰਧੂ//ਸਾਹਿਤ ਸਕਰੀਨ ਡੈਸਕ)::

ਇਹ ਖਬਰ ਸਾਂਝੀ ਕਰਦਿਆਂ ਅਫਸੋਸ ਹੋ ਰਿਹਾ ਹੈ ਕਿ ਪੰਜਾਬੀ ਦੀ ਉੱਘੀ ਕਵਿਤਰੀ ਭੁਪਿੰਦਰ ਕੌਰ ਵਾਲੀਆ (73) ਜੀ ਦਾ ਸਵਰਗਵਾਸ ਹੋ ਗਿਆ ਹੈ। ਉਹ ਪਟਿਆਲਾ ਵਿਖੇ ਰਹਿੰਦੇ ਸਨ। 

ਪੰਜਾਬੀ ਸਾਹਿਤ ਸਭਾ ਪਟਿਆਲਾ ਦੇ ਸੀਨੀਅਰ ਮੈਂਬਰ ਸਨ। ਪੰਜਾਬੀ ਸਾਹਿਤ ਸਭਾ ਪਟਿਆਲਾ ਦੇ ਪ੍ਰਧਾਨ ਦਰਸ਼ਨ ਆਸ਼ਟ ਜੀ ਨੇ ਉਨਾਂ ਦੇ ਅਕਾਲ ਚਲਾਣੇ ਤੇ ਗਹਿਰਾ ਦੁੱਖ ਪ੍ਰਗਟਾਇਆ ਹੈ। ਉਹਨਾਂ ਨੇ ਦੱਸਿਆ ਕਿ ਭੁਪਿੰਦਰ ਜੀ ਲੰਬਾ ਸਮਾਂ ਪੰਜਾਬੀ ਸਾਹਿਤ ਸਭਾ ਦੇ ਸਰਗਰਮ ਮੈਂਬਰ ਰਹੇ ਹਨ। ਭੁਪਿੰਦਰ ਜੀ ਕੁਝ ਲੰਬੇ ਸਮੇਂ ਤੋਂ ਬਿਮਾਰ ਸਨ। ਉਹਨਾਂ ਦੀ ਪੁਸਤਕ ਜਿੰਦਗੀ ਬਨਾਮ ਸੰਘਰਸ਼ ਨੂੰ ਭਾਸ਼ਾ ਵਿਭਾਗ ਵੱਲੋਂ ਸਰਵੋਤਮ ਪੁਸਤਕ ਪੁਰਸਕਾਰ ਮਿਲਿਆ ਸੀ।। ਉਨਾਂ ਦੀ ਲਗਨ ਅਤੇ ਪ੍ਰਤਿਭਾ ਬਾਕਮਾਲ ਸੀ। ਉਹਨਾਂ ਦੇ ਇਸ ਤਰ੍ਹਾਂ ਵਿਦਾ ਹੋਣ ਨਾਲ ਪੰਜਾਬੀ ਸਾਹਿਤ ਜਗਤ ਨੂੰ ਇੱਕ ਪ੍ਰਤਿਭਾਸ਼ਾਲੀ ਕਵਿਤਰੀ ਦੀ ਕਮੀ ਮਹਿਸੂਸ ਹੋਈ ਹੈ ਉਥੇ ਹੀ ਸਮਾਜ ਨੂੰ ਇੱਕ ਸੰਵੇਦਨਸ਼ੀਲ ਸੰਵੇਦਨਸ਼ੀਲ ਸ਼ਖਸੀਅਤ ਦੀ ਕਮੀ ਹੋਈ ਹੈ।

ਉਹਨਾਂ ਦੇ ਤੁਰ ਜਾਣ ਨਾਲ ਇੱਕ ਉਦਾਸੀ ਦੀ ਲਹਿਰ ਹੈ ਜਿਹੜੀ ਬਹੁਤ ਹੀ ਮੌਨ ਵੀ ਹੈ। ਉਹਨਾਂ  ਦੀ ਕਮੀ ਤਾਂ ਪੂਰੀ ਨਹੀਂ ਹੋਣੀ ਪਰ ਇਕ ਵਿਗੋਚਾ ਬਣਿਆ ਰਹੇਗਾ। ਫਿਲਹਾਲ ਅਦਾਰਾ ਸਾਹਿਤ ਸਕਰੀਨ ਸਮੇਤ ਅਸੀਂ ਸਾਰੇ ਇਸ ਦੁੱਖ ਵਿੱਚ ਸ਼ਾਮਲ ਹਾਂ। ਸ਼ਾਇਰ ਲੋਕ ਜਦੋਂ ਇਸ ਤਰ੍ਹਾਂ ਬੜੀ ਖਾਮੋਸ਼ੀ ਜਿਹੀ ਨਾਲ,ਅਚਾਨਕ ਤੁਰ ਜਾਂਦੇ ਹਨ ਤਾਂ ਉਦੋਂ ਅਹਿਸਾਸ ਹੁੰਦਾ ਹੈ ਕਿ ਸਾਡੇ ਨਾਲ ਵਾਰਤਾ ਕਰਨ ਲਈ ਉਹ ਬਹੁਤ ਪਹਿਲਾਂ ਹੀ ਆਪਣੀ ਸ਼ਾਇਰੀ ਸਾਡੇ ਲਈ ਛੱਡ ਗਏ ਹਨ। 

ਜਿਹਨਾਂ ਨੇ ਉਹਨਾਂ ਦੇ ਹੁੰਦਿਆਂ ਹੁੰਦਿਆਂ ਉਹਨਾਂ ਨਾਲ ਇਸ ਸ਼ਾਇਰੀ ਬਾਰੇ ਗੱਲਾਂ ਕਰ ਲਈਆਂ-ਉਹ ਸੁਭਾਗੇ ਕਹੇ ਜਾ ਸਕਦੇ ਹਨ।  ਸ਼ਾਇਰੀ ਅਤੇ ਜ਼ਿੰਦਗੀ ਨਾਲ ਸਬੰਧਤ ਇਹਨਾਂ  ਸੁਭਾਗੇ ਪਲਾਂ ਤੋਂ ਵਾਂਝਿਆਂ ਰਹਿ ਜਾਣ ਵਾਲਿਆਂ ਲਈ ਵੀ ਵਿਛੋੜੇ ਦਾ ਇਹ ਸਮਾਂ ਇੱਕ ਅਦ੍ਰਿਸ਼ ਰਹੀ ਕੇ ਮੁੜ ਮਿਲਣ ਦਾ ਹੀ ਹੁੰਦਾ ਹੈ। ਉਹਨਾਂ ਦੀ ਸ਼ਾਇਰੀ ਬਾਰੇ ਚਰਚਾ ਹੁੰਦੀ ਰਹੇ ਇਸ ਬਾਰੇ ਸਾਡੀ ਸੁਚੇਤ ਕੋਸ਼ਿਸ਼ ਵੀ ਰਹੇਗੀ ਅਤੇ ਅਚੇਤ ਵੀ। 

ਜੇ ਤੁਹਾਡੇ ਕੋਲ ਉਹਨਾਂ ਨਾਲ ਜੁੜੀਆਂ ਯਾਦਾਂ ਦਾ ਖਜ਼ਾਨਾ ਮੌਜੂਦ ਹੈ ਤਾਂ ਤੁਸੀਂ ਸਾਨੂੰ ਆਪਣੀਆਂ ਉਹ ਯਾਦਾਂ ਆਪਣੀਆਂ ਲਿਖਤਾਂ ਦੇ ਰੂਪ ਵਿੱਚ ਸਾਹਿਤ ਸਕਰੀਨ ਲਈ ਵੀ ਜ਼ਰੂਰੁ ਭੇਜੋ।  

ਐੱਸ. ਬਲਵੰਤ ਅਤੇ ਮੇਘ ਰਾਜ ਗੋਇਲ ਦਾ ਵਿਛੋੜਾ-ਹਰ ਪਾਸੇ ਸੋਗ ਦੀ ਲਹਿਰ

 Thursday: 19th August 2021 at 05:22 PM WhatsApp

 ਕੇਂਦਰੀ ਲੇਖਕ ਸਭਾ ਨੇ ਵੀ ਡੂੰਘਾ ਸੋਗ ਪ੍ਰਗਟਾਇਆ 

ਚੰਡੀਗੜ੍ਹ:19 ਅਗਸਤ 2021: (ਸਾਹਿਤ ਸਕਰੀਨ ਬਿਊਰੋ)::

ਪੰਜਾਬੀ ਸਾਹਿਤ  ਜਗਤ ਨੂੰ ਲਗਾਤਾਰ ਘਾਟਾ ਪੈ ਰਿਹਾ ਹੈ। ਐਸ ਬਲਵੰਤ, ਮੇਘਰਾਜ ਗੋਇਲ ਅਤੇ ਜਸਵੰਤ ਸਿੰਘ ਅਮਨ ਹੁਰਾਂ ਦੇ ਅਕਾਲ ਚਲਾਣੇ ਦੀਆਂ ਖਬਰਾਂ ਅੱਗੜ ਪਿੱਛੜ ਆਈਆਂ ਹਨ। ਪੰਜਾਬੀ ਸਾਹਿਤ ਨਾਲ ਸਬੰਧਤ ਸਮੂਹ ਸੰਸਥਾਵਾਂ ਵਿੱਚ ਸੋਗ ਦੀ ਲਹਿਰ ਹੈ। ਕੇਂਦਰੀ ਪੰਜਾਬੀ ਲੇਖਕ ਸਭਾ, ਪੰਜਾਬੀ ਸਾਹਿਤ ਅਕਾਦਮੀ, ਲੁਧਿਆਣਾ ਅਤੇ ਕਈ ਹੋਰ ਸੰਸਥਾਵਾਂ ਨੇ ਇਸ ਸਬੰਧੀ ਸੋਗ ਮਤੇ ਵੀ ਪਾਸ ਕੀਤੇ ਹਨ। 

ਜ਼ਿਕਰਯੋਗ ਹੈ ਕਿ ਲੇਖਕਾਂ ਅਤੇ ਪ੍ਰਕਾਸ਼ਕਾਂ ਵਿਛਕ ਮਹੱਤਵਪੂਰਨ ਸਥਾਨ ਰੱਖਣ ਵਾਲੇ ਸ਼੍ਰੀ ਐੱਸ. ਬਲਵੰਤ ਸਦੀਵੀ ਵਿਛੋੜਾ ਦੇ ਗਏ ਹਨ। ਉਨ੍ਹਾਂ ਦਾ ਜਨਮ 10 ਫਰਵਰੀ 1946 ਨੂੰ ਜਲੰਧਰ ਨੇੜੇ ਪਿੰਡ ਚਿੱਟੀ ਵਿਖੇ ਹੋਇਆ ਸੀ। ਉਹ ਬਹੁ-ਪੱਖੀ ਪ੍ਰਤਿਭਾ ਦੇ ਮਾਲਕ ਸਨ। ਉਨ੍ਹਾਂ ‘ਅੰਗਰੇਜ਼ੀ-ਪੰਜਾਬੀ (ਰੋਮਨ ਅਤੇ ਗੁਰਮੁਖੀ ਸਕਰਿਪਟ) ਡਿਕਸ਼ਨਰੀ’(1999) ਵਿਚ ਸ਼੍ਰੀ ਜਸਬੀਰ ਅਟਵਾਲ ਨਾਲ ਮਿਲ ਕੇ ਤਿਆਰ ਕੀਤੀ ਸੀ। ‘ਇਨਸਾਇਕਲੋਪੀਡੀਆ ਆਫ਼ ਪੰਜਾਬੀ ਕਲਚਰ ਅਤੇ ਹਿਸਟਰੀ’, ‘ਗੰਮਨਾਮ ਸਿਪਾਹੀ’, ‘ਮਹਾਨਗਰ’ ਅਤੇ ‘ਲਵ ਡਾਇਲਾਗ’ (ਹੀਰ-ਵਾਰਿਸ ’ਚੋਂ) ਉਨ੍ਹਾਂ ਦੀਆਂ ਚਰਚਿਤ ਪੁਸਤਕਾਂ ਹਨ। ਉਹ ਇੰਗਲੈਂਡ ਵਿਚ ਸੈਂਟਰ ਫ਼ਾਰ ਪੰਜਾਬ ਅਤੇ ਫ਼ੈਡਰੇਸ਼ਨ ਆਫ਼ ਇੰਡੀਅਨ ਪਬਲਿਸ਼ਰਜ਼ ਦੇ ਪ੍ਰਧਾਨ ਵੀ ਰਹੇ। ਉਨ੍ਹਾਂ ਦੇ ਸਦੀਵੀ ਵਿਛੋੜੇ ਨਾਲ ਸਾਹਿਤ ਜਗਤ ਨੂੰ ਨਾ ਪੂਰਾ ਹੋਣ ਵਾਲਾ ਘਾਟਾ ਪਿਆ ਹੈ। ਕੁਝ ਦਿਨ ਪਹਿਲਾਂ ਹੀ ਉਹਨਾਂ ਪ੍ਰਸਿੱਧ ਲੇਖਿਕਾ ਸੁਲਤਾਨਾ ਬੇਗਮ ਨਾਲ ਹੋਈ ਟੈਲੀਫ਼ੋਨਿਕ ਗੱਲਬਾਤ ਦੌਰਾਨ  ਦੱਸਿਆ ਸੀ ਕਿ "ਸੁਲਤਾਨਾ ਮੈਂ ਇਕ ਨਾਵਲ ਲਿਖ ਰਿਹਾ ਸੀ ਪਰ ਓਹ ਮੁਕੰਮਲ ਨਹੀਂ ਹੋਇਆ।"

ਸੁਲਤਾਨਾ ਬੇਗਮ ਨੇ ਦਿਲਾਸਾ ਦਿੰਦੇ ਹੋਏ ਕਿਹਾ..

"ਹਿਮੰਤ ਕਰੋ, ਹੌਸਲਾ ਰੱਖੋ। ਬਥੇਰੇ ਨਾਵਲ ਲਿਖਣੇ ਐਂ ਤੁਸੀਂ"

ਉਹਨਾਂ ਨੂੰ ਖੰਘ ਛਿੜ ਪਈ..

ਥੋੜ੍ਹਾ ਸਾਹ ਲੈ ਕੇ ਕਹਿੰਦੇ..

" ਮੈਂ ਲਾਹੌਰ ਘੁੰਮ ਰਿਹਾਂ। ਪੈੜਾਂ ਦੇ ਸਿਰਨਾਵੇਂ ਲੱਭ ਰਿਹਾਂ। ਮੇਰੀ ਤਮੰਨਾ ਸੀ ਕਿ" ਕਤਰਾ ਕਤਰਾ ਜ਼ਿੰਦਗੀ " ਦੀ ਤਰ੍ਹਾਂ" ਲਾਹੌਰ ਕਿੰਨੀ ਦੂਰ" ਲਈ ਵੀ ਕੁਝ ਲਿਖਾਂ ਪਰ ਸਿਹਤ ਇਜਾਜ਼ਤ ਨਹੀਂ ਦਿੰਦੀ"

ਸੁਲਤਾਨਾ ਨੇ ਫਿਰ ਕਿਹਾ..

" ਲੈ ਦੱਸੋ! ਮਿਰਜ਼ਾ ਮਰ ਗਿਆ ਕਿ ਸਾਰੰਗੀ ਟੁੱਟ ਗਈ? ਤੁਸੀਂ ਦੂਜੀ ਐਡੀਸ਼ਨ ਲਈ ਲਿਖ ਦੇਣਾ"

ਅਫ਼ਸੋਸ ਕੱਲ੍ਹ ਉਹ ਖ਼ਬਰ ਆ ਈ ਗਈ।

ਸਾਰੰਗੀ ਟੁੱਟ ਗਈ ਤੇ ਸੁਰ ਖ਼ਾਮੋਸ਼ ਹੋ ਗਏ।

ਉਫ਼..!

ਇਸੇ ਤਰ੍ਹਾਂ ਪ੍ਰਸਿਧ ਨਾਵਲਕਾਰ ਸ਼੍ਰੀ ਮੇਘ ਰਾਜ ਗੋਇਲ ਸਦੀਵੀ ਵਿਛੋੜਾ ਦੇ ਗਏ ਹਨ। ਉਹ ਕੇਂਦਰੀ ਪੰਜਾਬੀ ਲੇਖਕ ਸਭਾ (ਰਜਿ.) ਦੇ ਜੀਵਨ ਮੈਂਬਰ ਅਤੇ ਮਾਲਵਾ ਲਿਖਾਰੀ ਸਭਾ ਬਰਨਾਲਾ ਦੇ ਮੀਤ ਪ੍ਰਧਾਨ ਸਨ। ਉਨ੍ਹਾਂ ਨੇ ‘ਕੱਚੇ ਕੋਠੇ ਵਾਲੀ’, ‘ਕਰਤਾਰ’ ਅਤੇ ‘ਅਰਮਾਨ’ ਤਿੰਨ ਨਾਵਲ, ਦੋ ਕਾਵਿ ਸੰਗ੍ਰਹਿ ‘ਵਲਵਲੇ’ ਅਤੇ ‘ਦਿਲ ਦਾ ਦਰਪਣ’ ਅਤੇ ਕਹਾਣੀ ਸੰਗ੍ਰਹਿ ‘ਸੱਚ ਦਾ ਪਰਾਗਾ’ ਸਾਹਿਤ ਜਗਤ ਦੀ ਝੋਲੀ ਪਾਇਆ।

ਕੇਂਦਰੀ ਪੰਜਾਬੀ ਲੇਖਕ ਸਭਾ (ਰਜਿ.) ਦੇ ਪ੍ਰਧਾਨ ਸ਼੍ਰੀ ਦਰਸ਼ਨ ਬੁੱਟਰ ਅਤੇ ਜਨਰਲ ਸਕੱਤਰ ਡਾ. ਸੁਖਦੇਵ ਸਿੰਘ ਸਿਰਸਾ ਨੇ ਸ਼੍ਰੀ ਐੱਸ. ਬਲਵੰਤ ਅਤੇ ਸ਼੍ਰੀ ਮੇਘ ਰਾਜ ਗੋਇਲ ਦੇ ਸਦੀਵੀ ਵਿਛੋੜੇ ਉਤੇ ਉਨ੍ਹਾਂ ਦੇ ਪਰਿਵਾਰ ਅਤੇ ਸਨੇਹੀਆਂ ਨਾਲ ਹਾਰਦਿਕ ਸੰਵੇਦਨਾ ਸਾਂਝੀ ਕੀਤੀ ਹੈ। 

ਪ੍ਰਸਿੱਧ ਪੰਜਾਬੀ ਲੇਖਕ ਪੂਰਨ ਸਿੰਘ ਯੂ ਕੇ ਦੇ ਦੇਹਾਂਤ ਤੇ ਅਫਸੋਸ ਦਾ ਪ੍ਰਗਟਾਵਾ

May 30, 2019, 8:04 PM
ਉਹਨਾਂ ਦੀਆਂ ਲਗਪਗ ਦੋ ਦਰਜਨ ਵਾਰਤਕ ਪੁਸਤਕਾਂ ਛਪ ਚੁਕੀਆਂ ਹਨ

ਲੁਧਿਆਣਾ: 30 ਮਈ 2019: (ਗੁਰਭਜਨ ਸਿੰਘ ਗਿੱਲ)::

ਇੰਗਲੈਂਡ ਤੇ ਦੀਨਾ ਨਗਰ (ਗੁਰਦਾਸਪੁਰ ) ਤੋਂ ਇੱਕੋ ਵੇਲੇ  ਛਪਦੇ ਤ੍ਰੈਮਾਸਿਕ ਸਾਹਿੱਤਕ ਮੈਗਜ਼ੀਨ ਰੂਪਾਂਤਰ ਦੇ ਸੰਚਾਲਕ ਪੂਰਨ ਸਿੰਘ ਯੂ ਕੇ ਦਾ ਇੰਗਲੈਂਡ ਵਿੱਚ ਦੇਹਾਂਤ ਹੋ ਗਿਆ ਹੈ। ਇਹ ਜਾਣਕਾਰੀ ਸਿੰਘ ਬਰਦਰਜ਼ ਪ੍ਰਕਾਸ਼ਨ ਘਰ ਅੰਮ੍ਰਿਤਸਰ ਦੇ ਸ: ਗੁਰਸਾਗਰ ਸਿੰਘ ਨੇ ਦਿੱਤੀ ਹੈ। 

ਪੰਜਾਬੀ ਲੋਕ ਵਿਰਾਸਤ ਅਕਾਡਮੀ ਦੇ ਚੇਅਰਮੈਨ ਪ੍ਰੋ: ਗੁਰਭਜਨ ਸਿੰਘ ਗਿੱਲ ਨੇ ਸ਼ਰਧਾ ਦੇ ਫੁੱਲ ਭੇਂਟ ਕਰਦਿਆਂ ਕਿਹਾ ਕਿ ਪੂਰਨ ਸਿੰਘ ਦੀਆਂ ਵਾਰਤਕ ਲਿਖਤਾਂ ਵਿੱਚ ਤਰਕਸ਼ੀਲ ਜੀਵਨ ਦਾ ਆਚਾਰ, ਵਿਹਾਰ, ਕਿਰਦਾਰ ਉਸਾਰੀ ਤੇ ਸਵੈ ਵਿਕਾਸ ਮਾਰਗ ਬਹੁਤ ਸਪਸ਼ਟ ਰੂਪ ਚ ਸੁਭਾਇਮਾਨ ਸੀ। 

ਪੂਰਨ ਸਿੰਘ ਜੀ ਦੀਆਂ ਲਗਪਗ ਦੋ ਦਰਜਨ ਵਾਰਤਕ ਪੁਸਤਕਾਂ ਛਪ ਚੁਕੀਆਂ ਹਨ ਜਿੰਨ੍ਹਾਂ ਚੋਂ ਪ੍ਰਮੁੱਖ ਘਰ ਸੁਖ ਵਸਿਆ ਬਾਹਰ ਸੁਖ ਪਾਇਆ,ਸ਼ਕਤੀ: ਇੱਕ ਦਾਰਸ਼ਨਿਕ ਅਧਿਐਨ, ਸੰਘਰਸ਼: ਇੱਕ ਸਮਾਜਿਕ ਅਧਿਐਨ, ਮਨੋਵਿਕਾਸ: ਕੁਝ ਸੰਕੇਤ ਕੁਝ ਸੁਝਾਉ, ਸੁੰਦਰਤਾ ਅਤੇ ਆਨੰਦ, ਸ਼ਾਕਾਹਾਰ ਇੱਕ ਸੁੰਦਰਤਾ, ਪ੍ਰਬੰਧ: ਰਾਜਨੀਤਕ, ਆਰਥਿਕ, ਸਮਾਜਿਕ ਅਤੇਧਾਰਮਿਕ ਪ੍ਰਬੰਧਾਂ ਦਾ ਦਾਰਸ਼ਨਿਕ ਅਧਿਐਨ, ਬਾਬਾ ਰੂਡ਼ਾ ਤੇ ਹੋਰ ਕਹਾਣੀਆਂ, ਅਠਵਾਂ ਅਜੂਬਾ ਤੇ ਹੋਰ ਕਹਾਣੀਆਂ, ਪ੍ਰਸੰਨਤਾ ਦੀ ਭਾਲ ਵਿੱਚ, ਸਾਇੰਸ ਦਾ ਸੰਸਾਰ, ਸਭਿਅਤਾ ਤੇ ਸੱਭਿਆਚਾਰ, ਸੋਚ ਦਾ ਸਫ਼ਰ(ਚਾਰ ਭਾਗ) ਵਿਸ਼ਵਾਸ ਤੋਂ ਵਿਚੇਤਨਾ ਤੀਕ, ਪਰਹਿਵਾਰ ਸੰਸਾਰ(ਅੱਜ ਕੱਲ੍ਹ ਤੇ ਭਲਕ) ਪਰਲੋਕ ਦਾ ਭਰਮ ਪ੍ਰਮੁੱਖ ਹਨ। 

ਉਨ੍ਹਾਂ ਨੂੰ ਸ਼ਰਧਾ ਦੇ ਫੁੱਲ ਭੇਂਟ ਕਰਦਿਆਂ ਪੰਜਾਬੀ ਸਾਹਿੱਤ ਅਕਾਡਮੀ ਦੇ ਪ੍ਰਧਾਨ ਪ੍ਰੋ: ਰਵਿੰਦਰ ਭੱਠਲ ਨੇ ਕਿਹਾ ਕਿ ਰੂਪਾਂਤਰ ਮੈਗਜ਼ੀਨ ਦਾ ਸੰਪਾਦਨ ਉਨ੍ਹਾਂ ਨੇ ਆਪਣੇ ਵੀਰ ਪ੍ਰੋ:,ਵਰਿੰਦਰ ਸਿੰਘ ਨਾਲ ਰਲ ਕੇ ਦੋ ਦਹਾਕੇ ਪਹਿਲਾਂ ਆਰੰਭਿਆ ਸੀ ਅਤੇ ਉਨ੍ਹਾਂ ਦੀ ਮੌਤ ਮਗਰੋਂ ਹੁਣ ਦੀਨਾ ਨਗਰ ਵੱਸਦੇ ਕਵੀ ਸ: ਧਿਆਨ ਸਿੰਘ ਸ਼ਾਹ ਸਿਕੰਦਰ ਇਹ ਜੁੰਮੇਵਾਰੀ ਨਿਭਾ ਰਹੇ ਹਨ। 

ਪੰਜਾਬੀ ਕਵੀ ਤ੍ਰੈਲੋਚਨ ਲੋਚੀ ਨੇ ਕਿਹਾ ਕਿ ਅਜੇ ਪਿਛਲੇ ਹਫ਼ਤੇ ਹੀ ਪੂਰਨ ਸਿੰਘ ਜੀ  ਦੀ ਸੱਜਰੀ ਗਿਆਨ ਪੁਸਤਕ ਮਨੁੱਖਤਾ ਦਾ ਭਵਿੱਖ: ਸਾਡੇ ਬੱਚੇ ਛਪ ਕੇ ਆਈ ਸੀ ਜੋ ਮੈਨੂੰ ਉਨ੍ਹਾਂ ਨੇ ਭੇਜੀ ਸੀ। 

ਪੂਰਨ ਸਿੰਘ ਜੀ ਨੂੰ ਵਿਸਾਰਨਾ ਆਸਾਨ ਨਹੀਂ ਹੋਵੇਗਾ। 

ਪੂਰਨ ਸਿੰਘ ਜੀ ਨੂੰ ਡਾ: ਗੁਰਇਕਬਾਲ ਸਿੰਘ, ਮਨਜਿੰਦਰ ਧਨੋਆ,ਸਹਿਜਪ੍ਰੀਤ ਸਿੰਘ ਮਾਂਗਟ, ਸਰਬਜੀਤ ਵਿਰਦੀ, ਰਾਜਦੀਪ ਤੂਰ, ਅਮਰਜੀਤ ਸ਼ੇਰਪੁਰੀ ਨੇ ਵੀ ਅਕੀਦਤ ਦੇ ਫੁੱਲ ਭੇਂਟ ਕੀਤੇ ਹਨ।

ਲੇਖਿਕਾ ਅਮਰਜੀਤ ਕੌਰ "ਹਿਰਦੇ" ਨੂੰ ਸਦਮਾ

ਪਿਤਾ ਦਾ ਦੇਹਾਂਤ-ਭੋਗ 13 ਅਪਰੈਲ ਨੂੰ ਅੰਮ੍ਰਿਤਸਰ ਵਿੱਚ 

ਮੋਹਾਲੀ: 11 ਅਪਰੈਲ 2019: (ਸਾਹਿਤ ਸਕਰੀਨ ਬਿਊਰੋ)::  

ਸਾਹਿਤਿਕ ਅਤੇ ਸਮਾਜਿਕ ਖੇਤਰਾਂ ਵਿੱਚ ਅਕਸਰ ਵਿਵਾਦਿਤ ਅਤੇ ਨਾਜ਼ੁਕ ਵਿਸ਼ਿਆਂ ਬਾਰੇ ਵੀ ਬੜੀ ਬੇਬਾਕੀ ਨਾਲ ਆਪਣੇ ਵਿਚਾਰ ਰੱਖਣ ਵਾਲੀ ਕਲਮਕਾਰਾ ਅਮਰਜੀਤ ਕੌਰ ਹਿਰਦੇ ਦੇ ਪਿਤਾ ਸੋਹਨ ਸਿੰਘ ਇਸ ਨਾਸ਼ਵਾਨ ਦੁਨੀਆ ਵਿੱਚ ਨਹੀਂ ਰਹੇ। ਇਸ ਸਦਮੇ ਵਾਲੀ ਘੜੀ ਵਿੱਚ ਸਾਹਿਤਿਕ ਜਗਤ ਅਤੇ ਸਾਹਿਤ ਸਕਰੀਨ  ਹੈ। ਉਹਨਾਂ ਨਮਿਤ ਰੱਖੇ ਗਏ ਪਾਠ ਦਾ ਭੋਗ ਕਾਰਡ ਵਿੱਚ ਦਿੱਤੇ ਪਰੋਗਰਾਮ ਮੁਤਾਬਿਕ ਪੈਣਾ ਹੈ। ਸਬੰਧਤ ਸੱਜਣਾਂ ਅਤੇ ਸੰਸਥਾਵਾਂ ਨੂੰ ਸਮੇਂ ਸਿਰ ਪਹੁੰਚ ਕੇ ਪਰਿਵਾਰ ਦਾ  ਵੰਡਾਉਣਾ ਚਾਹੀਦਾ ਹੈ। ਪਿਛਲੇ ਦਿਨੀਂ 6 ਅਪਰੈਲ ਨੂੰ  ਉਹ ਸਦੀਵੀ ਵਿਛੋੜਾ ਦੇ ਗਏ। ਪਹੁੰਚਣ ਵਿੱਚ ਕੋਈ  ਦਿੱਕਤ ਆਵੇ ਤਾਂ ਮੈਡਮ ਅਮਰਜੀਤ ਕੌਰ "ਹਿਰਦੇ" ਨਾਲ +91 6464958236 'ਤੇ ਸੰਪਰਕ ਕੀਤਾ ਜਾ ਸਕਦਾ ਹੈ। ਉਹਨਾਂ  ਨੂੰ ਹਮਦਰਦੀ ਅਤੇ ਹੋਂਸਲੇ ਵਾਲੇ ਸੋਗ ਸੰਦੇਸ਼ ਵੀ ਇਸੇ ਨੰਬਰ 'ਤੇ ਵਾਟਸਅਪ ਕੀਤੇ ਜਾ ਸਕਦੇ ਹਨ।