ਝੁਕਿਆ ਸੀਸ//ਸ਼ਿਵ ਕੁਮਾਰ ਬਟਾਲਵੀ

Remembering V I Lenin in Poetry by Shiv Kumar Batalvi 

ਝੁਕਿਆ ਸੀਸ//ਸ਼ਿਵ ਕੁਮਾਰ ਬਟਾਲਵੀ

ਮੈਂ ਉਸ ਦਿਨ ਪਹਿਲ ਵਾਰੀ

ਮਿਲ ਕੇ ਤੈਨੂੰ ਆ ਰਿਹਾ ਸਾਂ

ਸਫ਼ਿਆਂ ਦੇ ਸ਼ਹਿਰ ਸਤਰਾਂ ਦੀਆਂ

ਅਣਗਿਣਤ ਸੜਕਾਂ ਸਨ

ਤੇ ਸੜਕਾਂ ਤੇ ਤੇਰੇ ਸ਼ਬਦਾਂ ਦੀ

ਵਗਦੀ ਭੀੜ ਸੰਘਣੀ ਸੀ

ਤੇ ਨੰਗੀ ਅੱਖ ਬਿਨ-ਝਿੰਮਣੀ ਦੇ

ਮੈਂ ਇਹ ਭੀੜ ਲੰਘਣੀ ਸੀ

ਤੇ ਤੈਨੂੰ ਮਿਲ ਕੇ ਗੀਤਾਂ ਵਾਸਤੇ

ਇਕ ਚਿਣਗ ਮੰਗਣੀ ਸੀ

ਮੈਂ ਉਸ ਦਿਨ ਪਹਿਲ ਵਾਰੀ

ਮਿਲ ਕੇ ਤੈਨੂੰ ਆ ਰਿਹਾ ਸਾਂ

ਤੇ ਨੰਗੀ ਅੱਖ ਬਿਨ ਝਿੰਮਣੀ 'ਚ

ਸੂਰਜ ਪਾ ਰਿਹਾ ਸਾਂ

ਮੈਂ ਨੰਗੀ ਅੱਖ ਵਿਚ ਸੂਰਜ ਨੂੰ ਪਾ

ਸਫ਼ਿਆਂ 'ਤੇ ਜਦ ਚੱਲਿਆ

ਮੈਂ ਹਰ ਇਕ ਸਤਰ ਤੋਂ ਡਰਿਆ

ਅਮਨ-ਸ਼ਬਦਾਂ ਦਾ ਹੱਥ ਫੜਿਆ

ਸਫ਼ੇ 'ਤੇ ਵਗ ਰਿਹਾ ਦਰਿਆ

ਮੇਰੇ ਨੈਣਾਂ 'ਚ ਆ ਖੜ੍ਹਿਆ

ਮੈਂ ਤੇਰੀ ਦਾਸਤਾਂ ਸਾਵ੍ਹੇਂ

ਨਮੋਸ਼ਾ ਸੜਕ 'ਤੇ ਮਰਿਆ

ਮੇਰੀ ਛਾਤੀ 'ਚ ਸੁੱਤੇ ਲੋਹੇ ਨੂੰ

ਇਕ ਤਾਪ ਆ ਚੜ੍ਹਿਆ

ਤੇ ਨੰਗੀ ਅੱਖ ਬਿਨ ਝਿੰਮਣੀ 'ਚ

ਇਕ ਸ਼ੁਅਲਾ ਜਿਹਾ ਬਲਿਆ

ਇਹ ਕੈਸਾ ਸ਼ਹਿਰ ਸੀ ਜਿਸ ਵਿਚ

ਸਿਰਫ਼ ਬੱਸ ਕਤਲਗਾਹਾਂ ਸਨ

ਇਹ ਕੈਸਾ ਸ਼ਹਿਰ ਸੀ ਜਿਸ ਵਿਚ

ਸਲੀਬਾਂ ਦਾ ਹੀ ਮੌਸਮ ਸੀ ?

ਪਰ ਤੇਰੇ ਅਜ਼ਮ ਦੀ ਹਰ ਸੜਕ 'ਤੇ

ਕੰਦੀਲ ਰੌਸ਼ਨ ਸੀ

ਮੈਂ ਉਸ ਦਿਨ ਪਹਿਲ ਵਾਰੀ

ਮਿਲ ਕੇ ਤੈਨੂੰ ਜਾ ਰਿਹਾ ਸਾਂ

ਤੇ ਸੂਰਜ ਮਾਂਜ ਕੇ ਮੁੜ ਮੁੜ

ਗਗਨ 'ਤੇ ਲਾ ਰਿਹਾ ਸਾਂ

ਮੈਂ ਹਰਫ਼ਾਂ ਦੇ ਚੁਰਾਹਿਆਂ 'ਤੇ

ਜਦੋਂ ਤੈਨੂੰ ਬੋਲਦਾ ਤੱਕਿਆ

ਮੈਂ ਹਰ ਇਕ ਬੋਲ ਸੰਗ ਰੱਤਿਆ

ਮੈਂ ਤੈਥੋਂ ਚਿਣਗ ਮੰਗਣ ਵਾਸਤੇ

ਤੇਰੇ ਬੋਲ ਵੱਲ ਨੱਸਿਆ

ਤੇਰਾ ਹਰ ਬੋਲ ਮਿੱਠਾ

ਫੱਗਣੀ ਧੁੱਪਾਂ ਤੋਂ ਕੋਸਾ ਸੀ

ਤੇਰਾ ਚਿਹਰਾ ਜਿਵੇਂ ਚੇਤਰ ਦੀਆਂ

ਮਹਿਕਾਂ ਦਾ ਹਉਕਾ ਸੀ

ਤੇ ਤੇਰੇ ਹੱਥ ਵਿਚ ਫੜਿਆ ਹੋਇਆ

ਸੂਰਜ ਦਾ ਟੋਟਾ ਸੀ

ਮੈਂ ਉਸ ਦਿਨ ਪਹਿਲ ਵਾਰੀ

ਮਿਲ ਕੇ ਤੈਨੂੰ ਆ ਰਿਹਾ ਸਾਂ

ਲੋਹੇ ਦਾ ਗੀਤ ਗੰਗਾ ਤੇ ਖਲੋਤਾ

ਗਾ ਰਿਹਾ ਸਾਂ

ਮੈਂ ਉਸ ਦਿਨ ਹਾਜ਼ਰੀ ਤੇਰੀ 'ਚ

ਫਿਰ ਇਕ ਗੀਤ ਗਾਇਆ ਸੀ

ਤੇ ਬਿਨ ਮੇਰੇ ਮੇਰਾ ਉਹ ਗੀਤ

ਕੋਈ ਨਾ ਸੁਣਨ ਆਇਆ ਸੀ

ਤੇ ਤੂੰ ਮੇਰੇ ਸੌਂ ਰਹੇ ਲੋਹੇ 'ਤੇ

ਉਸ ਦਿਨ ਮੁਸਕਰਾਇਆ ਸੀ

ਮੈਂ ਉਸ ਦਿਨ ਪਹਿਲ ਵਾਰੀ

ਮਿਲ ਕੇ ਤੈਨੂੰ ਆ ਰਿਹਾ ਸਾਂ

ਤੇ ਆਪਣੇ ਸੌਂ ਰਹੇ ਲੋਹੇ ਤੋਂ

ਮੈਂ ਸ਼ਰਮਾ ਰਿਹਾ ਸਾਂ

ਤੇ ਫਿਰ ਇਕ ਬੋਲ ਤੇਰੇ ਨੇ

ਮੇਰਾ ਲੋਹਾ ਜਗਾ ਦਿੱਤਾ

ਤੂੰ ਆਪਣੀ ਤਲੀ 'ਤੇ ਧਰਿਆ

ਮੈਨੂੰ ਸੂਰਜ ਫੜਾ ਦਿੱਤਾ

ਤੇ ਮੇਰੇ ਗੀਤ ਨੂੰ ਤੂੰ

ਖੁਦਕੁਸ਼ੀ ਕਰਨੋਂ ਬਚਾ ਲੀਤਾ

ਮੈਂ ਉਸ ਦਿਨ ਪਹਿਲ ਵਾਰੀ

ਮਿਲ ਕੇ ਤੈਨੂੰ ਆ ਰਿਹਾ ਸਾਂ

ਤੇ ਆਪਣਾ ਗੀਤ ਲੈ ਕੇ

ਝੁੱਗੀਆਂ ਵੱਲ ਜਾ ਰਿਹਾ ਸਾਂ

ਤੇ ਝੁਕਿਆ ਸੀਸ ਤੈਨੂੰ

ਅਰਪ ਕੇ ਮੁਸਕਾ ਰਿਹਾ ਸਾਂ

...........

ਵਿਸ਼ਵ ਪੁਸਤਕ ਮੇਲੇ ਦੇ ਨਾਲ ਨਾਲ ਪੰਜਾਬੀ ਪੁਸਤਕਾਂ ਦੀ ਵੀ ਗੱਲ

New Delhi World Book Fair 2026:PIB: 10th Jan 10, 2026 at 5:53 PM X Twitter  Book Culture, Literature

ਸੁਖਦੇਵ ਸਿੰਘ ਸਿੱਧੂ ਦੀ ਪੁਸਤਕ ਜ਼ਿੰਦਗੀ ਹੰਭੀ ਨਹੀਂ ਵੀ ਚਰਚਾ ਵਿੱਚ 

ਕੇਂਦਰੀ ਮੰਤਰੀ ਧਰਮਿੰਦਰ ਪ੍ਰਧਾਨ ਵਿਸ਼ਵ ਪੁਸਤਕ ਮੇਲੇ ਦਾ ਉਦਘਾਟਨ ਕਰਦੇ ਹੋਏ। ਪੁਸਤਕ ਮੇਲੇ ਦਾ ਵਿਸ਼ਾ: "ਭਾਰਤੀ ਫੌਜੀ ਇਤਿਹਾਸ: 75 ਸਾਲ ਦੀ ਬਹਾਦਰੀ ਅਤੇ ਸਿਆਣਪ" ਇਹ ਫੋਟੋ X ਅਰਥਾਤ ਟਵਿੱਟਰ ਤੋਂ ਧੰਨਵਾਦ ਸਹਿਤ 

ਨਵੀਂ ਦਿੱਲੀ: 18 ਜਨਵਰੀ 2026: (ਮੀਡੀਆ ਲਿੰਕ32//ਸਾਹਿਤ ਸਕਰੀਨ ਡੈਸਕ)::

ਸੰਸਾਰ ਪੁਸਤਕ ਮੇਲਾ 18 ਜਨਵਰੀ ਨੂੰ ਬੜੀ ਸਫਲਤਾ ਨਾਲ ਮੁੱਕ ਗਿਆ। ਇਸ ਵਾਰ ਵੀ ਰਿਕਾਰਡ ਤੋੜ ਭੀੜ ਰਹੀ। ਐਤਕੀਂ 35 ਤੋਂ ਵੀ ਵਧੇਰੇ ਦੇਸ਼ਾਂ ਦੇ ਪ੍ਰਸਿੱਧ ਪ੍ਰਕਾਸ਼ਕਾਂ ਨੇ ਸ਼ਮੂਲੀਅਤ ਕੀਤੀ। ਦੂਰੋਂ ਦੂਰੋਂ ਆਏ ਪ੍ਰਕਾਸ਼ਕ ਬੜੀਆਂ ਦੁਰਲਭ ਕਿਤਾਬਾਂ ਲਿਆਏ ਸਨ। ਇੱਕ ਹਜ਼ਾਰ ਤੋਂ ਵਧੇਰੇ ਪ੍ਰਕਾਸ਼ਕਾਂ ਨੇ ਬੜੇ ਜੋਸ਼ੋ-ਖਰੋਸ਼ ਨਾਲ ਇਸ ਪੁਸਤਕ ਮੇਲੇ ਵਿੱਚ ਭਾਗ ਲਿਆ। ਕਿਤਾਬਾਂ ਦੀ ਇਸ ਵੱਡੀ ਮੰਡੀ ਕਹਿ ਲਓ 'ਤੇ ਭਾਵੇਂ ਵੱਡਾ ਬਾਜ਼ਾਰ--ਇਸ ਨੂੰ ਦੇਖ ਕੇ ਅਹਿਸਾਸ ਹੁੰਦਾ ਹੈ ਕਿ ਕਿਤਾਬਾਂ ਦੇ ਪ੍ਰੇਮੀ ਬੜੀ ਵੱਡੀ ਗਿਣਤੀ ਵਿੱਚ ਮੌਜੂਦ ਰਹੇ।  ਇਹਨਾਂ ਕਿਤਾਬਾਂ ਕਰਕੇ ਹੀ ਅਜੇ ਤੀਕ ਹਿੰਮਤਾਂ ਅਤੇ ਆਸਾਂ ਉਮੀਦਾਂ ਜਿਊਂਦੀਆਂ ਹਨ। 

ਏਨੀਆਂ ਸਾਰੀਆਂ ਅਨਮੋਲ ਕਿਤਾਬਾਂ ਅਤੇ ਉਹ ਵੀ ਇੱਕੋ ਥਾਂ ਇਹ ਸੱਚਮੁੱਚ ਜਸ਼ਨ ਵਾਲੀ ਗੱਲ ਸੀ। ਕਿਤਾਬਾਂ ਦੇ ਇਸ ਜਸ਼ਨ ਨੂੰ ਮਨਾਉਣ ਲਈ 600 ਤੋਂ ਵੱਧ ਹੋਏ ਸੱਭਿਆਚਾਰਕ ਆਯੋਜਨ ਵੀ ਵਿਸ਼ੇਸ਼ ਅਤੇ  ਯਾਦਗਾਰੀ ਰਹੇ। ਇਹ ਸਾਰੇ ਹੀ ਬੜੇ ਆਕਰਸ਼ਕ ਅਤੇ ਦਿਲਚਸਪ ਸਨ।  ਇਸ ਵਾਰ ਤਕਰੀਬਨ 20 ਲੱਖ ਤੋਂ ਵੱਧ ਪੁਸਤਕ ਪ੍ਰੇਮੀ ਦਿੱਲੀ ਵਿੱਚ ਲੱਗੇ ਇਸ ਪੁਸਤਕ ਮੇਲੇ ਮੌਕੇ ਪਹੁੰਚੇ। ਇਹ ਗਿਣਤੀ ਸੱਚਮੁੱਚ ਇੱਕ ਰਿਕਾਰਡ ਹੈ। ਇਸ ਪੁਸਤਕ ਮੇਲੇ ਦੌਰਾਨ ਲੇਖਕਾਂ ਨਾਲ ਮਿਲਣੀਆਂ ਵੀ ਕਮਾਲ ਦੀਆਂ ਯਾਦਾਂ ਛੱਡ ਗਈਆਂ। ਇੱਕ ਹਜ਼ਾਰ ਤੋਂ ਵੱਧ ਬੁਲਾਰਿਆਂ ਨੇ ਆਪਣੇ ਵਿਚਾਰ ਵੀ ਪ੍ਰਗਟਾਏ। ਇਸ ਸੰਬੰਧੀ ਵਿਸਥਾਰ ਵਿੱਚ ਵੱਖਰੀ ਖਬਰ ਵੀ ਦਿੱਤੀ ਜਾ ਰਹੀ ਹੈ। 

ਇਸ ਪੁਸਤਕ ਮੇਲੇ ਨੂੰ ਦੇਖਣ ਅਤੇ ਇਸ ਵਿੱਚ ਆਪਣੀ ਸ਼ਮੂਲੀਅਤ ਦਰਜ ਕਰਾਉਣ ਲਈ ਦੇਸ਼ ਵਿਦੇਸ਼ ਦੇ ਮੰਤਰੀ ਅਤੇ ਹੋਰ ਮਹੱਤਵਪੂਰਨ ਲੋਕ ਵੀ ਪੁੱਜੇ ਹੋਏ ਸਨ ਪਰ ਇਹਨਾਂ ਦੀ ਮੌਜੂਦਗੀ ਸੁਰੱਖਿਆ ਦੇ ਨਾਮ ਹੇਠ ਆਮ ਲੋਕਾਂ ਨਾਲ ਦੂਰੀ ਵਧਾਉਣ ਵਾਲੀ ਨਹੀਂ ਸੀ। ਇਹ ਸਾਰੇ ਇਸ ਪੁਸਤਕ ਮੇਲੇ ਦੇ ਆਨੰਦ ਨੂੰ ਵਧਾ ਹੀ ਰਹੇ ਸਨ।  

ਕਾਸ਼ ਅਜਿਹਾ ਰੁਝਾਣ ਪੰਜਾਬ ਵਿੱਚ ਵੀ ਜ਼ੋਰ  ਫੜ ਸਕੇ। ਦੇ ਇਸ  ਪਿਛਲੇ ਕੁਝ ਕੁ ਅਰਸੇ ਦੌਰਾਨ ਹੀ ਬਹੁਤ ਸਾਰੀਆਂ ਕਿਤਾਬਾਂ ਦੁਨੀਆ ਭਰ ਵਿੱਚ ਰਿਲੀਜ਼ ਹੋਈਆਂ ਹਨ। ਇਹਨਾਂ ਵਿੱਚੋਂ ਬਹੁਤ ਸਾਰੀਆਂ ਪੁਸਤਕਾਂ ਅਨਮੋਲ ਕਿਤਾਬਾਂ ਵਾਂਗ ਹਨ। ਕਈ ਪੁਸਤਕਾਂ ਦੇ ਨਾਂਅ ਤਾਂ ਦਿਲ ਨੂੰ ਧੂਹ ਵੀ ਪਾਉਂਦੇ ਹਨ। 

ਹੱਥਲੀ ਚਰਚਾ ਸੁਖਦੇਵ ਸਿੰਘ ਸਿੱਧੂ ਹੁਰਾਂ ਦੀ ਲਿਖੀ ਪੁਸਤਕ ਬਾਰੇ ਹੈ। ਇਸ ਪੁਸਤਕ ਦਾ ਸਿਰਲੇਖ ਹੀ ਦਿਲ ਨੂੰ ਧੂਹ ਪਾਉਂਦਾ ਹੈ। ਸ ਪੁਸਤਕ ਵਿੱਚ ਉਹਨਾਂ ਬਹੁਤ ਸਾਰੇ ਲੋਕਾਂ ਦੇ ਸੰਘਰਸ਼ਾਂ ਦੀ ਕਹਾਣੀ ਹੋਵੇਗੀ ਜਿਹਨਾਂ ਲਈ ਸੰਘਰਸ਼ ਜਾਰੀ ਹਨ ਅਤੇ ਜ਼ਿੰਦਗੀ ਹੰਭੀ ਨਹੀਂ। ਇਸ ਪੁਸਤਕ ਦੀ ਚਰਚਾ ਸੋਸ਼ਲ ਮੀਡੀਆ "ਤੇ ਕੀਤੀ ਹੈ ਲੇਖਕ ਦੀ ਬੇਟੀ ਨਵਜੋਤ ਕੇ ਸਿੱਧੂ ਨੇ। 

ਕ੍ਰਿਸਮਸ ਅਤੇ ਨਵੇਂ ਸਾਲ ਸੰਬੰਧੀ ਮੁਸ਼ਾਇਰੇ ਦਾ ਰੰਗਾਰੰਗ ਆਯੋਜਨ

B M Fredrick, Brown Hospital WhatsApp on 6th January 2026 at 17:52 Regarding Christmas and New Year 

ਬਰਾਉਨ ਮੈਮੋਰੀਅਲ ਹਸਪਤਾਲ ਇੰਪਲਾਈਜ਼ ਯੂਨੀਅਨ ਵੱਲੋਂ ਵਿਸ਼ੇਸ਼ ਉਪਰਾਲਾ 

ਲੁਧਿਆਣਾ: 6 ਜਨਵਰੀ 2026: (ਮੀਡੀਆ ਲਿੰਕ ਰਵਿੰਦਰ//ਸਾਹਿਤ ਸਕਰੀਨ ਡੈਸਕ):: 

ਕ੍ਰਿਸਮਿਸ ਅਤੇ ਨਵੇਂ ਸਾਲ ਦੇ ਮੌਕੇ ਤੇ ਸੀ ਐਮ ਸੀ ਹਸਪਤਾਲ ਨਾਲ ਜੁੜੇ ਹੋਏ ਪੁਰਾਣੇ ਸੋਸ਼ਲ ਵਰਕਰ ਬੀ ਐਮ ਫ੍ਰੈਡਰਿਕ ਦੀ ਦੇਖਰੇਖ ਹੇਠ ਬਰਾਊਨ ਮੈਮੋਰੀਅਲ ਹਸਪਤਾਲ ਇੰਪਲਾਈਜ਼ ਯੂਨੀਅਨ ਵੱਲੋਂ ਹਰ ਸਾਲ ਬੜਾ ਸਾਫ ਸੁਥਰਾ ਰੰਗਾਰੰਗ ਪ੍ਰੋਗਰਾਮ ਕਰਦੇ ਹਨ। ਇਸ ਆਯੋਜਨ ਵਿੱਚ ਵਿੱਚ ਮਸੀਹੀ ਭਜਨ ਕੀਰਤਨ, ਸੱਭਿਆਚਾਰਕ ਗੀਤ ਸੰਗੀਤ ਅਤੇ ਮੁਸ਼ਾਇਰਾ ਵੀ ਸ਼ਾਮਲ ਹੁੰਦਾ ਹੈ। ਇਸ ਪ੍ਰੋਗਰਾਮ ਨੂੰ ਦੇਖਣ ਲਈ ਵੱਡਿਆਂ ਵੱਡਿਆਂ ਸ਼ਖਸੀਅਤਾਂ ਉਚੇਚ ਨਾਲ ਪਹੁੰਚਦਿਆਂ ਹਨ। 

ਇਸ ਵਾਰ ਵੀ ਲੋਕ ਇਸ ਮੌਕੇ 'ਤੇ  ਹੁੰਮਹੁਮਾ ਕੇ ਪੁੱਜੇ। ਇਹਨਾਂ ਵਿੱਚ ਸ਼੍ਰੀ ਅਸ਼ੋਕ ਪਰਾਸ਼ਰ ਐਮ.ਐਲ.ਏ. ਲੁਧਿਆਣਾ ਸੈਂਟ੍ਰਲ, ਸ਼੍ਰੀ ਦਰਸ਼ਨ ਅਰੋੜਾ, ਚੇਅਰਮੈਨ ਸਿਟੀਜ਼ਨ ਕੌਂਸਿਲ ਲੁਧਿਆਣਾ, ਸ. ਮਨਪ੍ਰੀਤ ਸਿੰਘ ਮੰਨਾ ਕੌਂਸਲਰ, ਸ਼੍ਰੀ ਸਰਵਣ ਸਹਿਗਲ,ਡਾਇਰੈਕਟਰਟ ਜੀ ਐਸ ਫਾਉਂਡੇਸ਼ਨ ਕਾਲਜ ਆਫ ਲਾਅ ਲੁਧਿਆਣਾ, ਡਾ. ਬਲਵਿੰਦਰ ਸਿੰਘ, ਡਰਗ ਸਾਇੰਟਿਸਟ,    ਸ਼੍ਰੀ ਏਲਫਰੇਡ ਗੁਡਵਿਨ ਮੈਂਬਰ, ਕ੍ਰਿਸਚੀਅਨ ਵੈਲਫੇਅਰ ਬੋਰਡ, ਪੰਜਾਬ ਸਰਕਾਰ, ਸ. ਬਲਜੀਤ ਸਿੰਘ ਦੁਖੀਆ, ਸ਼੍ਰੀ ਮੇਜਰ ਸਿੰਘ ਮੈਂਬਰ ਕ੍ਰਿਸਚੀਅਨ ਨੈਸ਼ਨਲ ਫਰੰਟ, ਸ. ਐਮ.ਐਸ.ਭਾਟੀਆ ਅਤੇ ਸ਼੍ਰੀ ਜਗਦੀਸ਼ ਚੰਦ, ਟਰੇਡ ਯੂਨੀਅਨ ਨੇਤਾ ਬਤੌਰ ਮੁੱਖ  ਮਹਿਮਾਨ ਸ਼ਾਮਲ ਹੋਏ।

ਇਸ ਮੁਸ਼ਾਇਰੇ ਵਿੱਚ ਦੀ ਨਜ਼ਾਮਤ ਪਾਦਰੀ ਪ੍ਰੇਮ ਸ਼ਾਰਦਾ “ਆਸੀ” ਵਲੋਂ ਕੀਤੀ ਗਈ ਅਤੇ ਰਾਬਰਟ ਬੀ. ਐਲ ਨਾਦਾਨ, ਪੌਲ ਸੰਸਾਰਪੁਰੀ,ਥਾਮਸ ਫ੍ਰੈਂਕਲਿਨ ‘ਬੇਤਾਬ’, ਸੁਨੀਲ ਕੁਮਾਰ ‘ਮੋਹਸਿਨ’, ਅਨੁਰਾਗ ‘ਮੰਜ਼ਰ’, ਐਸ.ਕੇ.ਪਾਟਿਲ ‘ਨਾਕਾਮ’, ਸੈਮ ‘ਮੁਸਾਫਿਰ’ ਦੁਆਰਾ ਨਜ਼ਮਾਂ ਪੇਸ਼ ਕੀਤੀਆਂ ਗਈਆਂ ਅਤੇ ਰਵਿੰਦਰ ਕੌਰ ਅਤੇ ਟੈਰੀ ਲਾਰੰਸ ਦੁਆਰਾ ਗੀਤ ਪੇਸ਼ ਕੀਤੇ ਗਏ।

ਸੀਪੀਆਈ ਆਗੂ ਐਮ ਐਸ ਭਾਟੀਆ ਨੇ ਵੀ ਇਸ ਮੌਕੇ ਉਚੇਚੇ ਤੌਰ 'ਤੇ ਪਹੁੰਚ ਕੇ ਸਮੂਹ ਭਾਈਚਾਰੇ ਨੂੰ ਕ੍ਰਿਸਮਿਸ ਅਤੇ ਨਵੇਂ ਸਾਲ ਦੀਆਂ ਵਧਾਈਆਂ ਦਿੱਤੀਆਂ ,

ਇਸ ਸਲਾਨਾ ਪ੍ਰੋਗਰਾਮ ਦੇ ਲਈ ਜਨਾਬ ਮੌਲਾਣਾ ਮੁਹੰਮਦ ਉਸਮਾਨ ਲੁਧਿਆਣਵੀ ਸ਼ਾਹੀ ਇਮਾਮ, ਡਾ. ਇਕਬਾਲ ਸਿੰਘ, ਡਾ. ਐਨ ਆਰ ਮਲਹੋਤਰਾ, ਸ. ਬਲਵਿੰਦਰ ਸਿੰਘ ਲਾਇਲਪੁਰੀ, ਸ੍ਰੀ. ਵਿਪਨ ਸਾਗਰ ਪ੍ਰਧਾਨ ਡਿਸਟ੍ਰਿਕਟ ਬਾਰ ਕੌਂਸਲ, ਲੁਧਿਆਣਾ, ਐਡਵੋਕੇਟ ਐਸ.ਕੇ. ਬਾਵਾ,ਸ਼੍ਰੀ ਸੁਖਬੀਰ ਸਿੰਘ, ਸੁਰਿੰਦਰ ਸਿੰਘ ਖੱਕ ਐਡਵੋਕੇਟ, ਪ੍ਰਿੰਸ, ਕੁਨਾਲ ਵੋਹਰਾ, ਨਵਜੋਤ ਸਿਧੂ, ਬਲਰਾਜ ਕੌਰ ਗਿੱਲ, ਸੁਰੀਤੀ ਸੇਠੀ, ਸ਼੍ਰੀ ਰਮੇਸ਼ ਲਾਲ ਰਮਤਾ, ਮੈਂਬਰ ਬਾਰ ਕੌਂਸਲ, ਐਡਵੋਕੇਟ ਸੰਦੀਪ, ਅਮਨਦੀਪ ਸਿੰਘ ਚਾਵਲਾ, ਸੀ.ਐਮ.ਸੀ ਦੇ ਅਧਿਕਾਰੀਆਂ ਅਤੇ ਸਰਬ ਧਰਮਾਂ ਦੇ ਧਾਰਮਿਕ ਆਗੂਆਂ ਦੁਆਰਾ ਨਵੇਂ ਸਾਲ ਅਤੇ ਪ੍ਰੌਗਰਾਮ ਦੀ ਕਾਮਯਾਬੀ ਲਈ ਆਪਣੀਆਂ ਸ਼ੁਭਕਾਮਨਾਵਾਂ ਪੇਸ਼ ਕੀਤੀਆਂ। ਕਰਨ ਕੁਮਾਰ ਅਤੇ ਨਰਸਿੰਗ ਵਿਭਾਗ ਅਤੇ ਕੋਰੀਅਰ ਸੈਕਸ਼ਨ ਦੇ ਕਰਮਚਾਰੀਆਂ ਵਲੋਂ ਪ੍ਰੌਗ੍ਰਾਮ ਦੇ ਪ੍ਰਬੰਧਨ ਵਿੱਚ ਉਚੇਚੀ ਸੇਵਾ ਦਿਤੀ ਗਈ।  

ਇਸ ਪ੍ਰੋਗਰਾਮ ਨੂੰ ਦੇਖਣ ਲਈ ਦੂਰੋਂ ਨੇੜਿਓਂ ਬਹੁਤ ਸਾਰੀਆਂ ਸੰਗਤਾਂ ਇਸ ਪ੍ਰੋਗਰਾਮ ਵਿੱਚ ਸ਼ਾਮਲ ਹੋਣ ਲਈ ਪੁੱਜੀਆਂ। ਸ਼੍ਰੀ ਫ੍ਰੈਡ੍ਰਿਕ ਨੇ ਕਿਹਾ ਕਿ ਭਵਿੱਖ ਵਿੱਚ ਅਸੀਂ ਆਪਣੀ ਟੀਮ ਨਾਲ ਰਲ ਕੇ ਹੋਰ ਵਧੇਰੇ ਚੰਗਾ ਪ੍ਰੋਗਰਾਮ ਪੇਸ਼ ਕਰਨ ਦੀ ਕੋਸ਼ਿਸ਼ ਕਰਾਂਗੇ। 

ਮਹਿੰਦਰ ਸਿੰਘ ਰੰਧਾਵਾਂ, ਯਾਦਗਾਰੀ ਉਤਸਵ 2 ਫਰਵਰੀ ਤੋਂ ਲੈ ਕੇ 7 ਫਰਵਰੀ ਤਕ

Mohinder Singh Randhawa Memorial Function at Kala Bhawan By Punjab Arts Council

ਆਖ਼ਰੀ ਦਿਨ 7 ਫਰਵਰੀ ਨੂੰ ਦਿੱਤੇ ਜਾਣਗੇ ਉਘੀਆਂ ਸ਼ਖਸੀਅਤਾਂ ਨੂੰ ਸਨਮਾਨ

ਚੰਡੀਗੜ੍ਹ: 5 ਜਨਵਰੀ 2026: (ਕਾਰਤਿਕਾ ਕਲਿਆਣੀ ਸਿੰਘ//ਸਾਹਿਤ ਸਕਰੀਨ ਡੈਸਕ)::

ਬਹੁਤ ਲੰਮੇ ਅਰਸੇ ਤੋਂ ਇਨਾਮਾਂ ਸ਼ਨਾਮਾਂ ਅਤੇ ਐਵਾਰਡਾਂ ਵਗੈਰਾ ਦਾ ਮਾਮਲਾ ਅਕਸਰ ਕਿਸੇ ਨ ਕਿਸੇ ਬਹਾਨੇ ਵਿਵਾਦਾਂ ਵਿੱਚ ਘਿਰ ਜਾਂਦਾ ਰਿਹਾ ਹੈ। ਦਿਲਚਸਪ ਗੱਲ ਹੈ ਕਿ ਅੱਜ ਦੇ ਐਲਾਨ ਮੌਕੇ ਖੁਸ਼ੀਆਂ ਵਾਲਾ ਮਾਹੌਲ ਹੀ ਰਿਹਾ। ਸਨਮਾਨਤ ਹੋਣ ਵਾਲਿਆਂ ਸ਼ਖਸੀਅਤਾਂ ਭਾਵੇਂ ਫਰਵਰੀ ਦੇ ਪਹਿਲੇ ਮਹੀਨੇ ਤੁਹਾਡੇ ਸਾਹਮਣੇ ਰੂਬਰੂ ਹੋਣਗੀਆਂ ਪਰ ਉਹਨਾਂ ਨੂੰ ਬੜੇ ਅਦਬ ਨਾਲ ਸਜਦਾ ਕਰਨ ਵਾਲੇ ਹੁਣ ਵੀ ਸਜਦੇ ਵਿੱਚ ਹੀ ਹਨ।

ਇਸ ਵਾਰ ਦੋ ਫਰਵਰੀ ਤੋਂ ਸ਼ੁਰੂ ਹੋਣ ਵਾਲੇ,ਮਹਿੰਦਰ ਸਿੰਘ ਰੰਧਾਵਾ ਯਾਦਗਾਰੀ ਉਤਸਵ ਮੌਕੇ ਇੱਕ ਖੁਸ਼ੀ ਦੇ ਇਜ਼ਹਾਰ ਵਾਲੇ ਅਹਿਸਾਸ ਦਾ ਅਨੁਭਵ ਹੋਇਆ ਹੈ। ਇਸ ਵਾਰ ਜਿਹਨਾਂ ਸ਼ਖਸੀਅਤਾਂ ਨੂੰ ਸਨਮਾਨਿਤ ਕੀਤਾ ਜਾ ਰਿਹਾ ਹੈ ਉਹਨਾਂ ਦਾ ਸਨਮਾਨ ਇਸ ਲਈ ਵੀ ਖੁਸ਼ੀ ਦੇਂਦਾ ਹੈ ਕਿ ਇਹਨਾਂ ਸ਼ਖਸ਼ੀਅਤਾਂ ਨੇ ਕਲਾ ਵਾਲੇ ਪਾਸੇ ਜ਼ਮੀਨੀ ਪੱਧਰ 'ਤੋਂ ਸੰਘਰਸ਼ ਸ਼ੁਰੂ ਕੀਤਾ ਅਤੇ ਲਗਾਤਾਰ ਆਪਣੇ ਅਸੂਲਾਂ ਤੇ ਪਹਿਰਾ ਵੀ ਦਿੱਤਾ। ਇਹੀ ਕਾਰਨ ਹੈ ਕਿ ਇਸ ਲਗਾਤਾਰ ਸਾਧਨਾ ਨੂੰ ਦੇਖਦਿਆਂ ਹੀ ਉਹਨਾਂ ਦੇ ਨਾਵਾਂ ਦਾ ਐਲਾਨ ਅੱਜ ਸਾਨੂੰ ਖੁਸ਼ੀ ਵੀ ਦੇ ਰਿਹਾ ਹੈ।

ਪੰਜਾਬ ਕਲਾ ਪਰਿਸ਼ਦ, ਚੰਡੀਗੜ੍ਹ ਵੱਲੋਂ ਅੱਜ ਕਲਾ ਭਵਨ ਸੈਕਟਰ 16 ਵਿਖੇ ਕਾਰਜਕਾਰਨੀ ਦੀ ਮੀਟਿੰਗ ਹੋਈ, ਜਿਸ ਦੀ ਪ੍ਰਧਾਨਗੀ ਕਲਾ ਪਰਿਸ਼ਦ ਦੇ ਚੇਅਰਮੈਨ ਸ਼੍ਰੀ ਸਵਰਨਜੀਤ ਸਵੀ ਨੇ ਕੀਤੀ। ਇਸ ਮੀਟਿੰਗ ਮਗਰੋਂ ਇੱਕ ਗੈਰ ਰਸਮੀ ਗੱਲਬਾਤ ਦੌਰਾਨ ਪ੍ਰੀਸ਼ਦ ਦੇ ਚੇਅਰਮੈਨ ਸ਼੍ਰੀ ਸਵਰਨਜੀਤ ਸਵੀ ਨੇ ਦੱਸਿਆ ਕਿ ਕਲਾ ਪ੍ਰੀਸ਼ਦ ਵੱਲੋਂ ਪਹਿਲਾਂ ਵਿਨ ਅਜਿਹੇ ਆਯੋਜਨ ਹੁੰਦੇ ਰਹੇ ਹਨ ਪਰ ਇਸ ਵਾਰ ਇਸ ਆਯੋਜਨ ਦਾ ਅੰਦਾਜ਼ ਬਿਲਕੁਲ ਵੱਖਰਾ ਹੋਵੇਗਾ ਜਿਹੜਾ ਇਸ ਨੂੰ ਹੋਰ ਵੀ ਯਾਦਗਾਰੀ ਬਣਾਵੇਗਾ।

ਅੱਜ ਦੀ ਖਾਸ ਗੱਲ ਇਹੀ ਸੀ ਕਿ ਅੱਜ ਪੰਜਾਬ ਕਲਾ ਪਰਿਸ਼ਦ ਵੱਲੋੱ ਰੰਧਾਵਾ ਉਤਸਵ ਮੌਕੇ ਦਿੱਤੇ ਜਾਣ ਵਾਲ਼ੇ ਸਨਮਾਨਾਂ ਦੀ ਘੋਸ਼ਨਾ ਕੀਤੀ ਗਈ। ਨਵੇਂ ਸਾਲ 2026 ਦਾ 'ਪੰਜਾਬ ਰਤਨ' ਇਸ ਵਾਰ ਪ੍ਰੋ. ਕਰਮਜੀਤ ਸਿੰਘ (ਉਪ-ਕੁਲਪਤੀ, ਗੁਰੂ ਨਾਨਕ ਦੇਵ ਯੂਨੀਵਰਸਿਟੀ, ਅੰਮ੍ਰਿਤਸਰ ਨੂੰ, ਮਾਤ ਭਾਸ਼ਾ ਸਨਮਾਨ ਬਚਿੰਤ ਕੌਰ ਨੂੰ ਦਿੱਤਾ ਜਾਵੇਗਾ।

ਇਸੇ ਤਰ੍ਹਾਂ ਪੰਜਾਬ ਗੌਰਵ ਸਨਮਾਨ ਰੰਗਮੰਚ-ਨੀਨਾ ਟਿਵਾਣਾ ਨੂੰ, ਸਿਨੇਮਾ-ਗੁਰਵਿੰਦਰ ਸਿੰਘ ਨੂੰ, ਕਲਾ-ਦੇਵਇੰਦਰ ਨੂੰ ਤੇ ਸਾਹਿਤ ਲਈ ਗੁਰਭਜਨ ਗਿੱਲ ਨੂੰ ਪ੍ਰਦਾਨ ਕੀਤਾ ਜਾਵੇਗਾ।

ਮਹਿੰਦਰ ਸਿੰਘ ਰੰਧਾਵਾਂ, ਯਾਦਗਾਰੀ ਉਤਸਵ 2 ਫਰਵਰੀ ਤੋਂ ਲੈ ਕੇ 7 ਫਰਵਰੀ ਤਕ ਚੱਲੇਗਾ। ਇਸ ਦੌਰਾਨ ਕਵੀ ਦਰਬਾਰ, ਕਲਾ ਕਾਰਗੁਜ਼ਾਰੀਆਂ, ਫਿਲਮ ਅਤੇ ਨਾਟਕ ਦਾ ਮੰਚਨ ਕੀਤਾ ਜਾਵੇਗਾ। ਸਾਰੇ ਅਵਾਰਡੀਆਂ 'ਤੇ ਇਕ ਦਿਨ ਦਾ ਸੈਮੀਨਾਰ ਹੋਵੇਗਾ ਜਿਸ ਵਿਚ ਉਹਨਾਂ ਬਾਰੇ ਪਰਚੇ ਪੜ੍ਹੇ ਜਾਣਗੇ। 2 ਫ਼ਰਵਰੀ ਨੂੰ ਉਦਘਾਟਨੀ ਸਮਾਰੋਹ 3 ਫ਼ਰਵਰੀ ਤੋਂ 6 ਫ਼ਰਵਰੀ ਤਕ ਅਕਾਦਮੀਆਂ ਦੇ ਪ੍ਰੋਗਰਾਮ ਹੋਣਗੇ ਅਤੇ ਆਖ਼ਰੀ ਦਿਨ 7 ਫਰਵਰੀ ਨੂੰ ਸਨਮਾਨ ਦਿੱਤੇ ਜਾਣਗੇ।

ਚੇਅਰਮੈਨ ਸਵਰਨਜੀਤ ਸਵੀ ਹੋਰਾਂ ਨੇ ਸਭ ਕਲਾ ਪ੍ਰੇਮੀਆਂ ਨੂੰ ਇਸ ਵਿਲੱਖਣ ਉਤਸਵ ਦਾ ਹਿੱਸਾ ਬਣਨ ਦੀ ਗੁਜ਼ਾਰਿਸ਼ ਕੀਤੀ।

ਤਰਕਸ਼ੀਲਾਂ ਵੱਲੋਂ ਵੀ ਪੱਤਰਕਾਰਾਂ ਉੱਪਰ ਝੂਠੇ ਕੇਸ ਦਰਜ ਕਰਨ ਦੀ ਸਖ਼ਤ ਨਿਖੇਧੀ

Jaswant Zirakh  on 4th January 2026 at 2:46 PM Regarding Rationalist Society of India

ਤਰਕਸ਼ੀਲਾਂ ਦੇ ਬਹੁਤ ਸਾਰੇ ਵਿਦਵਾਨ ਹਿੰਸਾ ਨਾਲ ਸ਼ਹੀਦ ਕਰ ਦਿੱਤੇ ਗਏ  

ਫਿਰ ਵੀ ਕੱਟੜਵਾਦ ਅਤੇ ਭਗਵਾਕਰਣ ਬਾਰੇ ਲੋਕ ਚੇਤਨਾ ਮੁਹਿੰਮ ਚਲਾਉਣ ਦੇ ਪ੍ਰੋਗਰਾਮ ਉਲੀਕੇ

ਲੁਧਿਆਣਾ: 4 ਜਨਵਰੀ 2026 (ਮੀਡੀਆ ਲਿੰਕ ਰਵਿੰਦਰ//ਸਾਹਿਤ ਸਕਰੀਨ ਡੈਸਕ)::

ਤਰਕਸ਼ੀਲ ਸੁਸਾਇਟੀ ਪੰਜਾਬ ਦੇ ਜ਼ੋਨ ਲੁਧਿਆਣਾ ਦੀ ਮੀਟਿੰਗ ਜ਼ੋਨ ਦੇ ਦਫਤਰ , ਨੇੜੇ ਬੱਸ ਸਟੈਂਡ ਲੁਧਿਆਣਾ ਵਿਖੇ ਹੋਈ। ਮੀਟਿੰਗ ਦੀ ਕਾਰਵਾਈ ਪ੍ਰੈੱਸ ਨੂੰ ਜਾਰੀ ਕਰਦਿਆਂ ਜ਼ੋਨ ਦੇ ਮੀਡੀਆ ਮੁਖੀ ਹਰਚੰਦ ਭਿੰਡਰ ਨੇ ਦੱਸਿਆ ਕਿ  ਇਸ ਸਮੇਂ ਜ਼ੋਨ ਜੱਥੇਬੰਦਕ ਆਗੂ ਜਸਵੰਤ ਜ਼ੀਰਖ ਨੇ ਮੀਟਿੰਗ ਨੂੰ ਸੰਬੋਧਨ ਕਰਦਿਆਂ ਕਿਹਾ ਕਿ ਤਰਕਸ਼ੀਲ ਸੁਸਾਇਟੀ ਪੰਜਾਬ, ਸਮਾਜ ਨੂੰ ਅੰਧਵਿਸ਼ਵਾਸਾਂ ਤੋਂ ਮੁਕਤ ਕਰਕੇ ਮਨੁੱਖਤਾ ਨੂੰ ਧਰਮਾਂ , ਜ਼ਾਤਾਂ ਤੇ ਫਿਰਕਿਆਂ ਅਧਾਰਿਤ ਵੰਡ ਨੂੰ ਖਤਮ ਕਰ ਕੇ ਉਸਾਰੂ ਅਤੇ ਵਿਗਿਆਨਿਕ ਸੋਚ ਅਤੇ ਬਰਾਬਰਤਾ ਦੇ ਆਧਾਰ ‘ਤੇ ਸਮਾਜ ਉਸਾਰਨ ਲਈ ਯਤਨਸ਼ੀਲ ਹੈ। ਆਪਣੀ ਵਿਚਾਰਧਾਰਾ ਨੂੰ ਹੋਰ ਪ੍ਰਫੁੱਲਤ ਕਰਨ ਲਈ ਤਰਕਸ਼ੀਲ ਸੁਸਾਇਟੀ ਦੇ ਜ਼ੋਨ ਲੁਧਿਆਣਾ ਦੀਆਂ ਇਕਾਈਆਂ ਸੁਧਾਰ,ਜਗਰਾਓਂ ਮਲੇਰ ਕੋਟਲਾ, ਕੋਹਾੜਾ, ਲੁਧਿਆਣਾ ,ਵੱਲੋਂ ਸਮਾਜ ਵਿੱਚ ਧਰਮਾਂ ਦੇ ਨਾਂ ਹੇਠ ਫੈਲਾਏ ਜਾਂਦੇ ਅੰਧਿਵਿਸ਼ਵਾਸੀ ਕੱਟੜਵਾਦੀ ਵਿਚਾਰਾਂ ਅਤੇ ਭਗਵਾਂ ਕਰਣ ਦੇ ਮਨਸੂਬਿਆਂ ਨੂੰ ਠੱਲ ਪਾਉਣ ਲਈ ਚੇਤਨਾ ਫੈਲਾਉਣ ਦੇ ਪ੍ਰੋਗਰਾਮ ਉਲੀਕੇ ਗਏ ਤਾਂ ਕਿ ਮਨੁੱਖਤਾ ਵਿਰੋਧੀ ਫਿਰਕਾਪ੍ਰਸਤਾਂ ਦੀ ਮਾਨਸਿਕਤਾ ਬਾਰੇ ਲੋਕਾਂ ਨੂੰ ਸੁਚੇਤ ਕੀਤਾ ਜਾਵੇ।  

ਮਨੁੱਖੀ ਬਰਾਬਰਤਾ ਤੇ ਅਧਾਰਿਤ ਸਮਾਜ ਦੀ ਸਿਰਜਣਾ ਲਈ ਆਪਣੇ ਕਾਰਜ ਕਰ ਰਹੀ ਤਰਕਸ਼ੀਲ ਸੁਸਾਇਟੀ ਦੇ ਉਪਰਾਲਿਆਂ ਨੂੰ ਹੋਰ ਉਤਸਾਹਿਤ ਕਰਨ ਹਿਤ ਹੀ ਉੱਘੇ ਸਮਾਜ ਚਿੰਤਕ ਅਦਾਰੇ 'ਸੂਹੀ ਸਵੇਰ’ ਵੱਲੋਂ 15 ਫਰਵਰੀ ਨੂੰ ਸਥਾਨਕ ਪੰਜਾਬੀ ਭਵਨ ਵਿਖੇ ਤਰਕਸ਼ੀਲ ਸੁਸਾਇਟੀ ਪੰਜਾਬ ਦਾ ਸਨਮਾਨ ਕੀਤਾ ਜਾ ਰਿਹਾ ਹੈ।

ਇਸ ਦੌਰਾਨ ਪਿਛਲੇ ਦਿਨੀ ਸੁਸਾਇਟੀ ਦੀ ਸੂਬਾ ਵਰਕਿੰਗ ਕਮੇਟੀ ਮੀਟਿੰਗ ਦੇ ਫੈਸਲਿਆਂ ਬਾਰੇ ਜਸਵੰਤ ਜ਼ੀਰਖ ਵੱਲੋਂ ਦਿੱਤੀ ਰਿਪੋਰਟ ਸਬੰਧੀ ਬਹੁਤ ਗੰਭੀਰ ਵਿਚਾਰ ਚਰਚਾ ਹੋਈ। ਇਸ ਦੇ ਅਜੰਡੇ ਤਹਿਤ 5 ਜਨਵਰੀ ਤੋਂ 12 ਜਨਵਰੀ ਤੱਕ ਮੈਗਜੀਨ ਹਫਤਾ ਮਨਾਇਆ ਜਾਵੇਗਾ ਤਾਂ ਕਿ ਤਰਕਸ਼ੀਲ ਮੈਗਜੀਨ ਦੇ ਵੱਧ ਤੋਂ ਵੱਧ ਪਾਠਕ ਬਣਾਏ ਜਾਣ । ਇਸ ਦੌਰਾਨ ਪਿਛਲੇ ਦਿਨੀ ਹੋਈ ਜ਼ੋਨ ਦੀ ਵਰਕਸ਼ਾਪ ਬਾਰੇ ਲੇਖਾ ਜੋਖਾ ਕਰਦਿਆਂ ਲੋਕਾਂ ਵਿੱਚ ਸਮਾਜਿਕ ਸਭਿਆਚਾਰਿਕ ਤਬਦੀਲੀਆਂ ਕਾਰਣ ਵਧ ਰਹੀਆਂ ਮਾਨਸਿਕ ਪ੍ਰੇਸ਼ਾਨੀਆਂ  ਅਤੇ ਦਰਪੇਸ ਸਮੱਸਿਆਵਾਂ ਦੇ ਸਬੰਧ ਵਿੱਚ ਲੋਕ ਚੇਤਨਾ ਫੈਲਾਉਣ ‘ਤੇ ਜ਼ੋਰ ਦਿੱਤਾ ਜਾਵੇ।  ਵਿਦਿਆਰਥੀਆਂ ਨੂੰ ਵਿਗਿਆਨਿਕ ਤੌਰ ‘ਤੇ ਚੇਤਨ ਕਰਨ ਲਈ ਲੇਖ / ਭਾਸ਼ਨ ਮੁਕਾਬਲੇ ਕਰਵਾਉਣ ਲਈ ਤਹਿ ਕੀਤਾ ਗਿਆ।

ਮੀਟਿੰਗ ਵਿੱਚ ਪੰਜਾਬ ਸਰਕਾਰ ਵੱਲੋਂ ਤਾਨਾਸ਼ਾਹੀ ਰਵਈਆ ਅਪਣਾਉਂਦੇ ਹੋਏ ਕਈ ਲੋਕ ਪੱਖੀ ਪੱਤਰਕਾਰਾਂ ਉੱਪਰ ਝੂਠੇ ਕੇਸ ਦਰਜ ਕਰਨ ਦੀ ਸਖ਼ਤ ਨਿਖੇਧੀ ਕਰਦਿਆਂ ਉਹਨਾਂ ਦਾ ਸਾਥ ਦੇਣ ਦਾ ਫੈਸਲਾ ਕੀਤਾ ਗਿਆ। ਇਸੇ ਤਰ੍ਹਾਂ ਸੰਯੁਕਤ ਕਿਸਾਨ ਮੋਰਚੇ ਦੇ ਸੱਦੇ ‘ਤੇ 16 ਜਨਵਰੀ ਨੂੰ ਡੀ ਸੀ ਦਫ਼ਤਰਾਂ ਸਾਹਮਣੇ ਨਿੱਜੀ ਕਰਣ, ਬਿਜਲੀ ਬਿੱਲ, ਬੀਜ਼ ਬਿੱਲ ਅਤੇ 4 ਕਿਰਤ ਕੋਡਾਂ ਖ਼ਿਲਾਫ਼ ਦਿੱਤੇ ਜਾ ਰਹੇ ਧਰਨਿਆਂ ਵਿੱਚ ਵਧ ਚੜ੍ਹਕੇ ਹਿੱਸਾ ਲੈਣਾ ਤਹਿ ਕੀਤਾ ਗਿਆ। ਮੀਟਿੰਗ ਵਿੱਚ ਉਪਰੋਕਤ ਜ਼ੋਨ ਆਗੂਆਂ ਸਮੇਤ ਧਰਮਪਾਲ ਸਿੰਘ, ਸਮਸੇਰ ਨੂਰਪੁਰੀ,  ਕਮਲਜੀਤ ਬੁਜਰਗ ਸਮੇਤ ਇਕਾਈ ਮੁਖੀ ਬਲਵਿੰਦਰ ਲੁਧਿਆਣਾ ,ਕਰਤਾਰ ਵੀਰਾਨ ਜਗਰਾਓਂ,ਪੂਰਨ ਸਿੰਘ ਮਲੇਰਕੋਟਲਾ,ਧਰਮ ਸਿੰਘ ਸੂਜਾਪੁਰ ਸੁਧਾਰ , ਰੁਪਿੰਦਰਪਾਲ ਕੋਹਾੜਾ ਸਮੇਤ ਮਲਕੀਤ ਸਿੰਘ ਸੁਧਾਰ ਸ਼ਾਮਲ ਸਨ।

ਅੰਤ ਵਿੱਚ ਤਰਕਸ਼ੀਲ ਮੈਗਜੀਨ ਦਾ ਨਵਾਂ ਅੰਕ ਸਮੇਤ ਨਵੇਂ ਸਾਲ ਦਾ ਤਰਕਸ਼ੀਲ ਕਲੰਡਰ ਵੀ ਰਲੀਜ਼ ਕੀਤਾ ਜੋ ਮੌਜੂਦਾ ਹਾਲਤਾਂ ਨੂੰ ਤਸਵੀਰ ਰਾਹੀਂ ਦਰਸਾਉਂਦਾ ਹੋਇਆ ਪ੍ਰਸਿੱਧ ਸ਼ਾਇਰ ਸ਼ੌਕਤ ਢੰਡਵਾੜਵੀ ਦੀ ਸ਼ਾਇਰੀ  'ਹੈ ਅਜਬ ਦਿਲਕਸ਼ੀ ਇਹ ਅੱਜ ਕੱਲ੍ਹ ਮਾਹੌਲ ਅੰਦਰ , ਨ੍ਹੇਰੀ ਵੀ ਚੱਲ ਰਹੀ ਹੈ ਦੀਵੇ ਵੀ ਬਲ਼ ਰਹੇ ਨੇ' ਨਾਲ ਤਾਲਮੇਲ ਬਠਾਉਂਦਾ ਹੈ।

ਮੀਟਿੰਗ ਦੌਰਾਨ ਮੈਗਜ਼ੀਨ ਅਤੇ ਕਲੰਡਰ ਰਲੀਜ ਕਰਨ ਵੇਲੇ ਦਾ ਦ੍ਰਿਸ਼ ਵੀ ਜਦੋਂ ਕੈਮਰੇ ਵਿੱਚ ਕੈਦ ਕੀਤਾ ਗਿਆ ਤਾਂ ਹਾਜ਼ਰ ,ਮੈਂਬਰਾਂ ਵਿੱਚ ਉਤਸ਼ਾਹ ਦੀ ਲਹਿਰ ਨਜ਼ਰ ਆਈ। ਤਰਕਸ਼ੀਲ ਮੈਗਜ਼ੀਨ ਅਤੇ ਕਲੰਡਰ ਰਲੀਜ ਕਰਦੇ ਹੋਏ ਆਗੂ ਵੀ ਇੱਕ ਨਵੇਂ ਜੋਸ਼ ਵਿੱਚ ਸਨ।

ਅੰਧ ਵਿਸ਼ਵਾਸ ਵਰਗੇ ਰੁਝਾਨਾਂ ਵਿੱਚ ਹੋ ਰਹੇ ਵਾਧੇ ਦੇ ਖਿਲਾਫ ਤਰਕਸ਼ੀਲਾਂ ਨੂੰ ਚੁਣੌਤੀਆਂ ਦੇਣ ਵਾਲਾ ਰਸਤਾ ਇੱਕ ਵਾਰ ਫਿਰ ਅਖਤਿਆਰ ਕਰਨਾ ਚਾਹੀਦਾ ਹੈ। ਇਸ "ਜਾਦੂ" ਦਾ ਭਾਂਡਾ ਭੰਨਣ ਵਾਲੇ ਸ਼ੋਅ ਵੀ ਫਿਰ ਦੋਬਾਰਾ ਤੇਜ਼ ਹੋਣੇ ਚਾਹੀਦੇ ਹਨ .  ਇਸਦਾ ਵੀ ਪਤਾ ਕੀਤਾ ਜਾਣਾ ਚਾਹੀਦਾ ਹੈ ਕਿ ਅੰਧਵਿਸ਼ਵਾਸ ਅਤੇ ਠੱਗੀ ਵਾਲੀਆਂ ਕਾਰਵਾਈਆਂ ਸਰਕਾਰ ਵੱਲੋਂ ਸਰਕਾਰ ਵੱਲੋਂ ਸਖਤ ਕਾਨੂੰਨਾਂ ਦੇ ਬਾਵਜੂਦ ਕਿਓਂ ਜਾਰੀ ਹਨ। ਇੱਕ ਘੰਟੇ ਵਿੱਚ ਬਵਸ਼ਿਕਰਨ, ਪੰਦਰਾਂ ਮਿੰਟਾਂ ਵਿੱਚ ਵਸ਼ੀਕਰਨ ਵਰਗੇ ਇਸ਼ਤੁਹਾਰ ਕਿਓਂ ਆਮ ਹਨ? ਇਸ ਲਈ ਹੁਣ ਤਰਕਸ਼ੀਲ ਹੀ ਹਨ ਜਿਹੜੇ ਮੈਦਾਨ ਵਿਚ ਆ ਕੇ ਇਹਨਾਂ ਗੱਲਾਂ ਨੂੰ ਬੇਨਕਾਬ ਕਰ ਸਕਦੇ ਹਨ। ਬੱਚਿਆਂ ਦੀ ਵਿਗਿਆਨਕ ਬੁੱਧੀ ਅਤੇ ਮਜ਼ਬੂਤ ਮਾਨਸਿਕ ਸ਼ਕਤੀ ਨੂੰ ਵਿਕਸਿਤ ਕਰਨ ਲਈ ਵਜੀਮਾਂ ਭਰਮਾਂ ਵਾਲਾ ਪ੍ਰਚਾਰ ਪੂਰੀ ਤਰ੍ਹਾਂ ਬੰਦ ਹੋਣਾ ਚਾਹੀਦਾ ਹੈ। ਤਰਕਸ਼ੀਲ ਕਈ ਸਾਲਾਂ ਤੋਂ ਚੁਣੌਤੀ ਵੀ ਦੇਂਦੇ ਆ ਰਹੇ ਹਨ ਕਿ ਜਿਹੜਾ ਕੋਈ ਗੈਬੀ ਸ਼ਕਤੀ ਦਾ ਪ੍ਰਹਤਾਵਾਂ ਸੱਚ ਕਰ ਦਿਖਾਉਂਦਾ ਹੈ ਤਾਂ ਉਸਨੂੰ ਪੰਜ ਲੱਖ ਰੁਪਏ ਇਨਾਮ ਵੀ ਦਿੱਤਾ ਜਾਏਗਾ।  

ਪੰਜਾਬੀ ਸਾਹਿਤ ਅਕਾਡਮੀ, ਲੁਧਿਆਣਾ ਵੀ ਆਈ ਪੱਤਰਕਾਰਾਂ ਦੇ ਹੱਕ ਵਿੱਚ

Panjabi Bhawan on 3rd January 2026 at 4:53 PM Regarding FIR against Media Persons

ਐੱਫ਼.ਆਈ.ਆਰ. ਤੁਰੰਤ ਰੱਦ ਕਰਨ ਦੀ ਮੰਗ ਵੀ ਕੀਤੀ 

ਲੁਧਿਆਣਾ: 03 ਜਨਵਰੀ  2026: (ਮੀਡੀਆ ਲਿੰਕ ਰਵਿੰਦਰ//ਸਾਹਿਤ ਸਕਰੀਨ ਡੈਸਕ):: 

ਹਰ ਮੋੜ 'ਤੇ ਸਲੀਬਾਂ, ਹਰ ਪੈਰ 'ਤੇ ਹਨੇਰਾ।

ਫਿਰ ਵੀ ਅਸੀਂ ਰੁਕੇ ਨਾ, ਸਾਡਾ ਵੀ ਦੇਖ ਜੇਰਾ।

ਇਸ ਇਤਿਹਾਸਿਕ ਗ਼ਜ਼ਲ ਨੂੰ ਲਿਖਣ ਵਾਲੇ ਡਾਕਟਰ ਜਗਤਾਰ ਦੀਆਂ ਇਹ ਸਤਰਾਂ ਅੱਜ ਵੀ ਸਮਾਗਮਾਂ ਵਿੱਚ ਗੁਣ ਗੁਣਾਈਆਂ ਜਾਂਦੀਆਂ ਹਨ। ਕਈ ਗਾਇਕਾਂ ਨੇ ਵੀ ਇਸ ਗ਼ਜ਼ਲ ਨੂੰ ਆਪੋ ਆਪਣੇ ਅੰਦਾਜ਼ ਵਿੱਚ ਗਿਆ ਹੈ। ਇਹ ਗ਼ਜ਼ਲ ਲੇਖਕਾਂ ਨੂੰ ਉਹਨਾਂ ਦਾ ਧਰਮ ਚੇਤੇ ਕਰਵਾਉਂਦੀ ਹੈ ਕਿ ਜਦੋਂ ਹਾਲਾਤ ਅਜਿਹੇ ਨਾਜ਼ੁਕ ਅਤੇ ਭਿਆਨਕ ਬਣੇ ਹੋਣ ਹੋਣ ਤਾਂ ਉਦੋਂ ਡਾਕਟਰ ਜਗਤਾਰ ਸਾਡੇ ਹਰ ਲੇਖਕ ਵਿੱਚੋਂ ਬੋਲਣਾ ਚਾਹੀਦਾ ਹੈ। ਪੰਜਾਬੀ ਸਾਹਿਤ ਅਕਾਦਮੀ ਦੇ ਬਹੁਤ ਸਾਰੇ ਸੀਨੀਅਰ ਮੈਂਬਰਾਂ ਨੇ ਡਾਕਟਰ ਜਗਤਾਰ ਹੁਰਾਂ ਦੀ ਨੇੜਤਾ ਦਾ ਨਿੱਘ ਮਾਣਿਆ ਹੋਇਆ ਹੈ। ਉਹ ਸਾਰੇ ਲੇਖਕ ਅੱਜ ਵੀ ਬੁਲੰਦ ਆਵਾਜ਼ ਨਾਲ ਉਹਨਾਂ ਕਲਮਕਾਰਾਂ ਦੇ ਨਾਲ ਖੜੋਤੇ ਹਨ ਜਿਹਨਾਂ ਖਿਲਾਫ ਲੁਧਿਆਣਾ ਪੁਲਿਸ ਨੇ ਐਫ ਆਈ ਆਰ ਦਰਜ ਕੀਤੀ ਹੈ।  

ਪੰਜਾਬੀ ਸਾਹਿਤ ਅਕਾਡਮੀ, ਲੁਧਿਆਣਾ ਵੱਲੋਂ ਬਠਿੰਡਾ ਦੇ ਪੱਤਰਕਾਰਾਂ ਅਤੇ ਸਮਾਜਕ ਕਾਰਕੁੰਨਾਂ ਦੇ ਖ਼ਿਲਾਫ਼ ਦਰਜ ਐੱਫ਼.ਆਈ.ਆਰ. ਤੁਰੰਤ ਰੱਦ ਕਰਨ ਦੀ ਮੰਗ ਕੀਤੀ ਹੈ। ਅਕੈਡਮੀ ਦੇ ਅਹੁਦੇਦਾਰਾਂ ਨੇ ਲਿਖਣ-ਬੋਲਣ ਦੀ ਆਜ਼ਾਦੀ ਉੱਤੇ ਹੋ ਰਹੇ ਹਮਲਿਆਂ ਦੀ ਸਖ਼ਤ ਨਿੰਦਾ ਕਰਦਿਆਂ ਅਜਿਹੇ ਵਰਤਾਰੇ ਦਾ ਦਤਿੱਖ ਵਿਰੋਧ ਕੀਤਾ ਹੈ। ਪੰਜਾਬੀ ਸਾਹਿਤ ਅਕਾਡਮੀ, ਲੁਧਿਆਣਾ ਦੇ ਅਹੁਦੇਦਾਰਾਂ, ਪ੍ਰਬੰਧਕੀ ਬੋਰਡ ਦੇ ਮੈਂਬਰਾਂ ਅਤੇ ਸਮੂਹ ਮੈਂਬਰਾਂ ਵਲੋਂ ਪੱਤਰਕਾਰਾਂ ਖ਼ਿਲਾਫ਼ ਦਰਜ ਐੱਫ਼.ਆਈ.ਆਰ. ਦਾ ਗੰਭੀਰ ਨੋਟਿਸ ਲਿਆ ਗਿਆ ਹੈ। 

ਜ਼ਿਕਰਯੋਗ ਹੈ ਕਿ ਇਸਸਹਿਤ ਅਕੈਡਮੀ ਨਾਲ ਜੁੜੇ ਬਹੁਤ ਸਾਰੇ ਕਲਮਕਾਰਾਂ ਨੇ ਲਾਲ ਸਿੰਘ ਦਿਲ, ਸੰਤ ਰਾਮ ਉਦਾਸੀ ਵਰਗੇ ਮਹਾਨ ਸ਼ਾਇਰਾਂ ਨੱਲ ਹੁੰਦੀਆਂ ਵਧੀਕੀਆਂ ਵੀ ਦੇਖੀਆਂ ਹਨ ਅਤੇ ਪਾਸ਼ ਦੀ ਸ਼ਹਾਦਤ ਵੀ। ਇਹ ਬਹਾਦਰ ਲੇਖਕ ਅਜਿਹੀਆਂ ਸਖਤੀਆਂ ਤੋਂ ਡਰਨ ਵਾਲੇ ਨਹੀਂ। ਅਕੈਡਮੀ ਨੇ ਐਫ ਆਈ ਆਰ  ਨੂੰ ਤੁਰੰਤ ਰੱਦ ਕਰਨ ਦੀ ਮੰਗ ਕੀਤੀ ਹੈ। ਅਕਾਡਮੀ ਨੇ ਲਿਖਣ-ਬੋਲਣ ਦੀ ਆਜ਼ਾਦੀ ਉੱਤੇ ਹੋ ਰਹੇ ਅਜਿਹੇ ਹਮਲਿਆਂ ਦੀ ਸਖ਼ਤ ਨਿੰਦਾ ਕਰਦਿਆਂ ਪ੍ਰੈੱਸ ਦੀ ਆਜ਼ਾਦੀ ਨੂੰ ਬਹਾਲ ਕਰਨ ਦੀ ਮੰਗ ਕੀਤੀ ਹੈ।

ਪੰਜਾਬੀ ਸਾਹਿਤ ਅਕਾਡਮੀ, ਲੁਧਿਆਣਾ ਦੇ ਪ੍ਰਧਾਨ ਡਾ. ਸਰਬਜੀਤ ਸਿੰਘ ਨੇ ਕਿਹਾ ਕਿ ਪੰਜਾਬ ਸਰਕਾਰ ਵਲੋਂ ਮਾਨਿਕ ਗੋਇਲ ਵਰਗੇ ਆਰ.ਟੀ.ਆਈ. ਕਾਰਕੁੰਨ ਅਤੇ ਮਿੰਟੂ ਗੁਰੂਸਰੀਆ ਅਤੇ ਮਨਿੰਦਰਜੀਤ ਸਿੱਧੂ ਵਰਗੇ ਪੱਤਰਕਾਰਾਂ ਸਮੇਤ ਲਗਪਗ 10 ਵਿਅਕਤੀਆਂ ਖ਼ਿਲਾਫ਼ ਇਹ ਐੱਫ਼.ਆਈ.ਆਰ. ਦਰਜ ਕਰਨਾ ਜਮਹੂਰੀ ਕਦਰਾਂ ਕੀਮਤਾਂ ਨੂੰ ਤਹਿਸ ਨਹਿਸ ਕਰਨ ਵਾਲੀ ਕਾਰਵਾਈ ਹੈ।  ਉਨ੍ਹਾਂ ਕਿਹਾ ਪੰਜਾਬੀ ਸਾਹਿਤ ਅਕਾਡਮੀ, ਲੁਧਿਆਣਾ ਸਮੂਹ ਪੱਤਰਕਾਰਾਂ ਅਤੇ ਲੋਕ-ਪੱਖੀ ਸਮਾਜਿਕ ਕਾਰਕੁੰਨਾਂ ਦੇ ਨਾਲ ਖੜ੍ਹੀ ਹੈ।

ਇਸੇ ਤਰ੍ਹਾਂ ਸੀਨੀਅਰ ਮੀਤ ਪ੍ਰਧਾਨ ਡਾ. ਪਾਲ ਕੌਰ ਨੇ ਕਿਹਾ ਕਿ ਅਜਿਹੀਆਂ ਕਾਰਵਾਈਆਂ ਨਾਲ ਨਾ ਸਿਰਫ਼ ਪੱਤਰਕਾਰਾਂ ਅਤੇ ਸਮਾਜਕ ਕਾਰਕੁੰਨਾਂ ਨੂੰ ਡਰਾਉਣ ਦਾ ਭਰਮ ਪਾਲਿਆ ਜਾ ਰਿਹਾ ਹੈ, ਸਗੋਂ ਜਨਤਕ ਜਾਣਕਾਰੀ ਅਤੇ ਸੱਚ ਨੂੰ ਲੁਕਾਉਣ ਦੀਆਂ ਕੋਸ਼ਿਸਾਂ ਵੀ ਕੀਤੀਆਂ ਜਾ ਰਹੀਆਂ ਹਨ। 

ਅਕਾਡਮੀ ਦੇ ਜਨਰਲ ਸਕੱਤਰ ਡਾ. ਗੁਲਜ਼ਾਰ ਸਿੰਘ ਪੰਧੇਰ ਨੇ ਕਿਹਾ ਕਿ ਇਹ ਪ੍ਰਗਟਾਵੇ ਦੀ ਆਜ਼ਾਦੀ ਅਤੇ ਮੀਡੀਆ ’ਤੇ ਸਿੱਧਾ ਹਮਲਾ ਹੈ, ਜਿਸ ਨੂੰ ਕਿਸੇ ਵੀ ਕੀਮਤ ’ਤੇ ਬਰਦਾਸ਼ਤ ਨਹੀਂ ਕੀਤਾ ਜਾ ਸਕਦਾ। ਅਕਾਡਮੀ ਸਰਕਾਰ ਨੂੰ ਅਪੀਲ ਕਰਦੀ ਹੈ ਕਿ ਪੱਤਰਕਾਰਾਂ ਖ਼ਿਲਾਫ਼ ਦਰਜ ਐੱਫ਼.ਆਈ.ਆਰ. ਤੁਰੰਤ ਰੱਦ ਕਰੇ ਅਤੇ ਭਵਿੱਖ ਵਿਚ ਅਜਿਹੀਆਂ ਗਲਤ ਕਾਰਵਾਈਆਂ ਤੋਂ ਗੁਰੇਜ਼ ਕਰੇ। ਵਿਚਾਰਾਂ ਦੀ ਆਜ਼ਾਦੀ ਲਈ ਪਹਿਰਾ ਦੇਣਾ ਪੰਜਾਬੀ ਸਾਹਿਤ ਅਕਾਡਮੀ ਦਾ ਮੁੱਢਲਾ ਫ਼ਰਜ਼ ਹੈ।

ਇਸ ਕੋਝੀ ਹਰਕਤ 'ਤੇ ਅਫ਼ਸੋਸ ਦਾ ਪ੍ਰਗਟਾਵਾ ਕਰਨ ਵਾਲਿਆਂ ਵਿਚ ਹੋਰਨਾਂ ਤੋਂ ਇਲਾਵਾ ਡਾ. ਸੁਖਦੇਵ ਸਿੰਘ ਸਿਰਸਾ, ਪ੍ਰੋ. ਗੁਰਭਜਨ ਸਿੰਘ ਗਿੱਲ, ਪ੍ਰੋ. ਰਵਿੰਦਰ ਭੱਠਲ, ਡਾ. ਲਖਵਿੰਦਰ ਜੌਹਲ, ਡਾ. ਪਾਲ ਕੌਰ, ਡਾ. ਅਨੂਪ ਸਿੰਘ, ਸੁਰਿੰਦਰ ਕੈਲੇ, ਡਾ. ਜੋਗਿੰਦਰ ਸਿੰਘ ਨਿਰਾਲਾ, ਬਲਬੀਰ ਮਾਧੋਪੁਰੀ, ਡਾ. ਗੁਰਇਕਬਾਲ ਸਿੰਘ, ਡਾ. ਅਰਵਿੰਦਰ ਕੌਰ ਕਾਕੜਾ, ਡਾ ਗੁਰਚਰਨ ਕੌਰ ਕੋਚਰ, ਡਾ. ਹਰਵਿੰਦਰ ਸਿੰਘ, ਤ੍ਰੈਲੋਚਨ ਲੋਚੀ, ਜਸਪਾਲ ਮਾਨਖੇੜਾ, ਜਨਮੇਜਾ ਸਿੰਘ ਜੌਹਲ, ਡਾ. ਹਰੀ ਸਿੰਘ ਜਾਚਕ, ਜਸਵੀਰ ਝੱਜ, ਸਹਿਜਪ੍ਰੀਤ ਸਿੰਘ ਮਾਂਗਟ, ਸ਼ਬਦੀਸ਼, ਸੰਜੀਵਨ ਸਿੰਘ, ਨਰਿੰਦਰਪਾਲ ਕੌਰ, ਵਾਹਿਦ (ਸਤਿਨਾਮ ਸਿੰਘ), ਸੰਤੋਖ ਸਿੰਘ ਸੁੱਖੀ, ਡਾ. ਹਰਜਿੰਦਰ ਸਿੰਘ, ਕੰਵਰਜੀਤ ਭੱਠਲ, ਪ੍ਰੋ. ਸਰਘੀ, ਪ੍ਰੇਮ ਸਾਹਿਲ, ਦੀਪ ਜਗਦੀਪ ਸਿੰਘ, ਵਰਗਿਸ ਸਲਾਮਤ, ਪ੍ਰੋ. ਬਲਵਿੰਦਰ ਸਿੰਘ ਚਹਿਲ, ਕਰਮਜੀਤ ਸਿੰਘ ਗਰੇਵਾਲ ਸਮੇਤ ਸਮੂਹ ਮੈਂਬਰ ਸ਼ਾਮਲ ਹਨ।

ਹੁਣ ਦੇਖਣਾ ਹੈ ਕਿ ਸਰਕਾਰ ਇਸ ਸੰਬੰਧੀ ਕੀ ਕਦਮ ਉਠਾਉਂਦੀ ਹੈ ਕਿਓਂਕਿ ਸਰਕਾਰਾਂ ਅਤੇ ਕਲਮਕਾਰਾਂ ਦਰਮਿਆਨ ਟਕਰਾਓ ਵਧੇ ਤਾਂ ਨਤੀਜੇ ਕਦੇ ਵੀ ਸੁਖਾਵੇਂ ਨਹੀਂ ਹੁੰਦੇ। 

ਨਹੀਂ ਰਹੇ ਪ੍ਰਕਾਸ਼ ਕੌਰ ਹਮਦਰਦ!

ਇੱਕ ਯੁੱਗ ਸੀ ਜੋ ਗੁਜ਼ਰ ਗਿਆ-ਹੁਣ ਬਸ ਯਾਦਾਂ ਬਾਕੀ ਹਨ 

ਲੁਧਿਆਣਾ: 2 ਜਨਵਰੀ 2026: (ਮੀਡੀਆ ਲਿੰਕ 32//ਸਾਹਿਤ ਸਕਰੀਨ ਡੈਸਕ ):: 

ਸਚਮੁੱਚ ਸ਼੍ਰੀਮਤੀ ਪ੍ਰਕਾਸ਼ ਕੌਰ ਹਮਦਰਦ ਇੱਕ ਯੁੱਗ ਸਨ। ਸਾਹਿਤ ਸੇਵਾ, ਪੱਤਰਕਾਰਿਤਾ, ਗ਼ਜ਼ਲ ਨਾਲ ਇਸ਼ਕ...ਇਹ ਸਭ ਕੁਝ ਸੀ ਉਹਨਾਂ ਦੀ ਸ਼ਖ਼ਸੀਅਤ ਜਿਹੜਾ ਉਹਨਾਂ ਨੂੰ ਸਵਰਗੀ ਸਾਧੂ ਸਿੰਘ ਹਮਦਰਦ ਹੁਰਾਂ ਦੇ ਨਜ਼ਦੀਕ ਲੈ ਕੇ ਆਇਆ।

ਇਸ ਪਾਕ ਪਵਿੱਤਰ ਰਿਸ਼ਤੇ ਲਈ ਉਹਨਾਂ ਬਹੁਤ ਕੁਝ ਸੁਣਿਆ ਵੀ ਸ਼ੀਂ ਵੀ ਕੀਤਾ ਪਰ ਅਡੋਲ ਰਹੇ।

ਸਭ ਕੁੱਝ ਹੁੰਦਿਆਂ ਵੀ ਉਹਨਾਂ ਦੀ ਜ਼ਿੰਦਗੀ ਦਾ ਵੱਡਾ ਹਿੱਸਾ ਹਨੇਰੀ ਰਾਤ ਵਾਂਗ ਰਿਹਾ। 

ਉਹਨਾਂ ਦੀ ਉਸ ਜ਼ਿੰਦਗੀ ਦੇ ਹਾਲਾਤ ਨੂੰ ਪ੍ਰੋਫੈਸਰ ਗੁਰਭਜਨ ਸਿੰਘ ਗਿੱਲ ਹੁਰਾਂ ਨੇ ਅੱਜ ਆਪਣੇ ਦਰਦ ਭਿੱਜੇ ਸੁਨੇਹੇ ਨਾਲ ਚੇਤੇ ਕਰਵਾਇਆ ਹੈ ਉਹਨਾਂ ਦੀਆਂ ਹੈ ਦੀ ਸਤਰਾਂ ਨਾਲ।

 

ਮੈਂ ਕੈਸਾ ਪਰਕਾਸ਼ ਵੇ ਸੱਜਣਾਂ,

ਜਿਸ ਦੇ ਗਿਰਦ ਸਿਆਹੀ।“

                    ਪ੍ਰਕਾਸ਼ ਕੌਰ ਹਮਦਰਦ

ਡਾ. ਸਾਧੂ ਸਿੰਘ ਹਮਦਰਦ ਟਰਸਟ ਦੇ ਸਕੱਤਰ ਬੀਬੀ ਜੀ ਪ੍ਰਕਾਸ਼ ਕੌਰ ਹਮਦਰਦ ਦਾ ਵਿਛੋੜਾ ਜਾਣ ਕੇ ਦੁੱਖ ਲੱਗਾ ਹੈ। ਜਦ ਕਦੇ ਵੀ ਮਿਲਦੇ, ਵੱਡਿਆਂ ਵਾਲਾ ਸਨੇਹ ਦਿੰਦੇ।  ਇਹ ਤਸਵੀਰ ਉਨ੍ਹਾਂ ਲਾਲ ਜਲੰਧਰ ਅਜੀਤ ਭਵਨ ਵਿੱਚ ਹੋਈ ਆਖਰੀ ਮੁਲਾਕਾਤ ਵੇਲੇ ਦੀ ਹੈ। 

ਜਿਸ ਦਿਨ ਅਜੀਤ ਦੇ ਨਵੇਂ ਦਫ਼ਤਰ ਦਾ ਉਦਘਾਟਨੀ ਸਮਾਗਮ ਸੀ। ਕਿੰਨੇ ਪੁਰਾਣੇ ਵਿੱਛੜੇ ਪਲ ਤੇ ਸੱਜਣ ਚੇਤੇ ਕੀਤੇ। 

ਨਮਨ ਹੈ।

ਗੁਰਭਜਨ ਗਿੱਲ

ਸਵਰਗੀ ਸਾਧੂ ਸਿੰਘ ਹਮਦਰਦ ਸਾਹਿਬ ਅਤੇ ਉਹਨਾਂ ਤੋਂ ਬਾਅਦ ਵੀ ਹਮਦਰਦ ਪਰਿਵਾਰ ਦੇ ਨੇੜੇ ਰਹੀਆਂ ਸ਼ਖ਼ਸੀਅਤਾਂ ਨੂੰ ਸਾਡੀ ਗੁਜ਼ਾਰਿਸ਼ ਹੈ ਕਿ ਉਹ ਜ਼ਰੂਰ ਕੁਝ ਲਿਖ ਭੇਜਣ।

ਬਾਵਾ ਤੇ ਦਾਖਾ ਵੱਲੋਂ ਪੰਜਾਬੀ ਲੇਖਕ ਪ੍ਹੋ. ਗੁਰਭਜਨ ਗਿੱਲ ਨੂੰ ਮਿੱਠੀ ਗਾਗਰ ਵਾਲਾ ਸੱਦਾ

Gurbhajan Singh Gill: WhatsApp: 2nd January 2025 at 10:14 AM:Lohri for Daughters: Sahit Screen 

ਧੀਆਂ ਦੇ ਲੋਹੜੀ ਮੇਲੇ ਲਈ ਤਿਆਰੀਆਂ ਫਿਰ ਸਿਖਰਾਂ 'ਤੇ 

ਲੁਧਿਆਣਾ:  2 ਜਨਵਰੀ 2026: (ਮੀਡੀਆ ਲਿੰਕ 32//ਸਾਹਿਤ ਸਕਰੀਨ ਡੈਸਕ)::

ਮਾਲਵਾ ਸੱਭਿਆਚਾਰਕ ਮੰਚ (ਰਜਿ.) ਪੰਜਾਬ ਵੱਲੋਂ 10 ਜਨਵਰੀ ਨੂੰ ਗੁਰੂ ਨਾਨਕ ਭਵਨ ਲੁਧਿਆਣਾ ਵਿਖੇ ਕਰਵਾਏ ਜਾ ਰਹੇ ਲੋਹੜੀ ਮੇਲੇ ਵਿੱਚ ਵਿਸ਼ੇਸ਼ ਮਹਿਮਾਨ ਵਜੋਂ ਸ਼ਾਮਲ ਹੋਣ ਲਈ ਸੱਦਾ ਦਿੱਤਾ ਗਿਆ ਹੈ। ਪੰਜਾਬੀ ਲੋਕ ਵਿਰਾਸਤ ਅਕਾਡਮੀ ਲੁਧਿਆਣਾ ਦੇ ਚੇਅਰਮੈਨ ਪ੍ਹੋ. ਗੁਰਭਜਨ ਸਿੰਘ ਗਿੱਲ ਨੂੰ ਸੱਦਾ ਪੱਤਰ ਦੇਣ ਲਈ ਮੰਚ ਦੇ ਚੇਅਰਮੈਨ ਸ਼੍ਰੀ ਕ੍ਰਿਸ਼ਨ ਕੁਮਾਰ ਬਾਵਾ ਤੇ ਸਰਪ੍ਰਸਤ ਸ. ਮਲਕੀਤ ਸਿੰਘ ਦਾਖਾ ਸਾਬਕਾ ਕੈਬਨਿਟ ਮੰਤਰੀ ਪੰਜਾਬ ਉਨ੍ਹਾਂ ਦੇ ਗ੍ਰਹਿ ਵਿਖੇ ਪੁੱਜੇ। ਵਿਰਾਸਤ ਨੂੰ ਸਾਂਭਣ ਅਤੇ ਮੌਜੂਦਾ ਚੁਣੌਤੀਆਂ ਨੂੰ ਸਵੀਕਾਰ ਕਰਨ ਵਾਲੇ ਇਹ ਬੜੇ ਯਾਦਗਾਰੀ ਅਤੇ ਅਨਮੋਲ ਪਲ ਸਨ। 

ਦੋਹਾਂ ਆਗੂਆਂ ਨੇ ਧੀਆਂ ਦੇ 30ਵੇਂ ਮੇਲੇ ਵਿੱਚ ਸ਼ਾਮਲ ਹੋਣ ਲਈ ਗੁੜ ਰਿਓੜੀਆਂ ਤੇ ਭੁੱਗਾ ਆਧਾਰਿਤ ਮਿੱਠੀ ਗਾਗਰ ਪ੍ਹੋ. ਗਿੱਲ ਨੂੰ ਭੇਂਟ ਕੀਤੀ। ਇਸ ਲੋਹੜੀ ਮੇਲੇ ਦਾ ਉਦਘਾਟਨ  10 ਜਨਵਰੀ ਸਵੇਰੇ 10 ਵਜੇ ਪ੍ਹਸਿੱਧ ਫਿਲਮ ਅਭਿਨੇਤਰੀ  ਪਦਮ ਸ਼੍ਰੀ ਪ੍ਹੋ. ਨਿਰਮਲ ਰਿਸ਼ੀ ਕਰਨਗੇ। 

ਸ਼੍ਹੀ ਕ੍ਰਿਸ਼ਨ ਕੁਮਾਰ ਬਾਵਾ ਨੇ  ਇਸ ਮੌਕੇ 25 ਸਾਲ ਪੁਰਾਣੀ ਯਾਦ ਸਾਂਝੀ ਕੀਤੀ ਜਦ ਰੱਖੜੀ  ਵਾਲੇ ਦਿਨ ਸ਼ਹੀਦ ਕਰਤਾਰ ਸਿੰਘ ਸਰਾਭਾ ਜੀ ਦੇ ਘੰਟਾ ਘਰ ਚੌਂਕ ਸਥਿਤ ਬੁੱਤ ਤੋਂ  ਉੱਚੇ ਪੁਲ ਤੇ ਲੱਗੇ ਸ਼ਹੀਦ ਭਗਤ ਸਿੰਘ, ਰਾਜਗੁਰੂ ਤੇ ਸੁਖਦੇਵ ਜੀ ਦੇ ਬੁੱਤਾਂ ਤੀਕ “ਧੀਆਂ ਬਚਾਉ ਚੇਤਨਾ ਮਾਰਚ”ਕੱਢਿਆ ਸੀ। ਇਸ ਮੌਕੇ ਪ੍ਹੋ. ਗਿੱਲ ਵੱਲੋਂ ਲਿਖੀ ਕਵਿਤਾ ਲੋਰੀ ਦੀਆਂ ਹਜ਼ਾਰਾਂ ਕਾਪੀਆਂ ਪੋਸਟਰ ਬਣਾ ਕੇ ਲੋਕਾਂ ਵਿੱਚ ਵੰਡੀਆਂ ਸਨ। ਹੁਣ ਫਿਰ ਇਸ ਮੁਹਿੰਮ ਨੂੰ ਨਵੇਂ ਹਾਲਾਤ ਮੁਤਾਬਕ ਆਰੰਭਿਆ ਜਾਵੇਗਾ। 

ਸ਼੍ਰੀ ਬਾਵਾ ਨੇ ਦੱਸਿਆ ਕਿ ਮੇਲੇ ਦੇ ਪ੍ਰਬੰਧਾਂ ਲਈ ਵੱਖ ਵੱਖ ਕਮੇਟੀਆਂ ਦਾ ਗਠਨ ਕੀਤਾ ਗਿਆ ਹੈ ਜਿਸ ਵਿੱਚ ਸ. ਗੁਰਨਾਮ ਸਿੰਘ ਕਲੇਰ ਮੰਚ ਦੇ ਵਾਈਸ ਪ੍ਰਧਾਨ ਅਤੇ ਰਾਕੇਸ਼ ਗੋਇਲ ਨੂੰ ਜਨਰਲ ਸਕੱਤਰ ਨਿਯੁਕਤ ਕੀਤਾ ਗਿਆ ਹੈ। 

ਮਾਲਵਾ ਸੱਭਿਆਚਾਰਕ ਮੰਚ ਪੰਜਾਬ ਦੀ ਮੀਟਿੰਗ ਮੰਚ ਦੇ ਚੇਅਰਮੈਨ ਕ੍ਰਿਸ਼ਨ ਕੁਮਾਰ ਬਾਵਾ, ਮੰਚ ਦੇ ਪ੍ਰਧਾਨ ਜਸਵੀਰ ਸਿੰਘ ਰਾਣਾ ਝਾਂਡੇ ਅਤੇ ਇੰਦਰਜੀਤ ਕੌਰ ਪ੍ਰਧਾਨ ਮਹਿਲਾ ਵਿੰਗ ਪੰਜਾਬ ਦੀ ਸਰਪ੍ਰਸਤੀ ਹੇਠ ਮੇਲੇ ਦਾ ਸਮੁੱਚਾ ਪ੍ਰਬੰਧ ਕੀਤਾ ਜਾਵੇਗਾ। ਜਨਰਲ ਸਕੱਤਰ ਮੰਚ ਸ. ਰੇਸ਼ਮ ਸਿੰਘ ਸੱਗੂ, ਸੁਖਵਿੰਦਰ ਸਿੰਘ ਜਗਦੇਵ, ਅਮਰਪਾਲ ਸਿੰਘ ਅਤੇ ਮਾਸਟਰ ਹਰੀਦੇਵ ਬਾਵਾ ਵੱਲੋਂ ਮੇਲੇ ਦੀ ਸਮੁੱਚੀ ਦੇਖ ਰੇਖ ਕੀਤੀ ਜਾਵੇਗੀ। 

ਸ਼੍ਰੀ ਬਾਵਾ  ਨੇ ਦੱਸਿਆ ਕਿ ਇਸ ਵਾਰ  ਧੀਆਂ ਦੇ ਲੋਹੜੀ ਮੇਲੇ 'ਤੇ ਨਾਨੀਆਂ ਅਤੇ ਦਾਦੀਆਂ ਦਾ ਵੀ ਵਿਸ਼ੇਸ਼ ਸਨਮਾਨ ਕੀਤਾ ਜਾਵੇਗਾ। ਉਹਨਾਂ ਦੱਸਿਆ ਕਿ ਮੇਲੇ ਵਿੱਚ 125 ਨੰਨ੍ਹੀਆਂ ਬੱਚੀਆਂ ਜਿਨਾਂ ਦਾ ਜਨਮ ਸਾਲ 2025 ਵਿੱਚ ਹੋਇਆ ਹੈ। ਇਸ ਮੇਲੇ ਨੂੰ ਸ. ਅੰਮ੍ਰਿਤਪਾਲ ਸਿੰਘ ਗਰੇਵਾਲ ਮਾਲਵਾ ਟੀ ਵੀ ਵੱਲੋਂ ਲਾਈਵ ਟੈਲੀਕਾਸਟ ਕੀਤਾ ਜਾਵੇਗਾ।

ਉਮੀਦ ਹੈ ਕਿ ਇਸ ਮੇਲੇ ਵਰਗੇ ਆਯੋਜਨ ਧੀਆਂ ਦੇ ਮਾਨ  ਸਨਮਾਨ ਨੂੰ ਹੋਰ ਭਾਲ ਕਰਨ ਵਿੱਚ ਤਾਂ ਯੋਗਦਾਨ ਦੇਣਗੇ ਹੀ ਲੋੜ ਪੈਣ'ਤੇ ਦੁੱਲੇ ਭੱਟੀ ਵਰਗੇ ਕਿਰਦਾਰਾਂ ਨੂੰ ਫਿਰ ਸੁਰਜੀਤ ਵੀ ਕਰਨਗੇ। ਬਹੁਤ ਸਾਰੇ ਕਾਨੂੰਨਾਂ ਅਤੇ ਨਵੇਂ ਨਿਯਮਾਂ ਦੇ ਬਾਵਜੂਦ ਧੀਆਂ ਭੈਣਾਂ ਅਤੇ ਨੂੰਹਾਂ ਦੀ ਮੁਕੰਮਲ ਸੁਰਖਿਆ ਅਜੇ ਵੀ ਯਕੀਨੀ ਨਹੀਂ ਬਣੀ। ਅਜੇ ਵੀ ਮੁਹੱਲੇ, ਗਲੀਆਂ ਅਤੇ ਸੜਕਾਂ ਪੂਰੀ ਤਰ੍ਹਾਂ ਸੁਰਖਿਅਤ ਨਹੀਂ ਬਣੀਆਂ।  

ਪੱਤਰਕਾਰਾਂ ਦੇ ਹੱਕ ਵਿੱਚ ਖੁੱਲ੍ਹ ਕੇ ਆਈ ਕੇਂਦਰੀ ਪੰਜਾਬੀ ਲੇਖਕ ਸਭਾ (ਰਜਿ.)

Sushil Dosanjh:2nd January 2025 at 15:08 Regarding FIR on Media Persons of Bathinda 

ਪੱਤਰਕਾਰਾਂ ਨਾਲ ਲੇਖਕਾਂ ਨੇ ਵੀ ਲਿਆ ਵੱਡੀ ਪੱਧਰ ਤੇ ਸਟੈਂਡ 

ਚੰਡੀਗੜ੍ਹ: 2 ਜਨਵਰੀ 2026: (ਮੀਡੀਆ ਲਿੰਕ 32//ਕਾਰਤਿਕਾ ਕਲਿਆਣੀ ਸਿੰਘ//ਸਾਹਿਤ ਸਕਰੀਨ ਡੈਸਕ)::

ਪੱਤਰਕਾਰਾਂ ਅਤੇ ਆਰ ਟੀ ਆਈ ਕਾਰਕੁਨਾਂ ਦੇ ਖਿਲਾਫ ਸੱਤਾ ਦੀ ਕਰੋਪੀ ਦਾ ਤਿੱਖਾ ਵਿਰੋਧ ਕਰਨ ਲਈ ਲੇਖਕ ਸਭਾਵਾਂ ਦੀ ਪ੍ਰਤੀਨਿਧੀ ਜੱਥੇਬੰਦੀ "ਕੇਂਦਰੀ ਪੰਜਾਬੀ ਲੇਖਕ ਸਭਾ (ਰਜਿਸਟਰਡ)" ਵੀ ਸਰਗਰਮੀ ਨਾਲ ਅੱਗੇ ਆਈ ਹੈ। ਕੇਂਦਰੀ ਪੰਜਾਬੀ ਲੇਖਕ ਸਭਾ ਨੇ ਪੱਤਰਕਾਰਾਂ ਖ਼ਿਲਾਫ਼ ਦਰਜ FIR ਤੁਰੰਤ ਰੱਦ ਕਰਨ ਦੀ ਮੰਗ ਵੀ ਉਠਾਈ ਹੈ। ਇਹ ਉਹੀ ਸੰਗਠਨ ਹੈ ਜਿਹੜਾ ਲੋਕ ਪੱਖੀ ਕਲਮਾਂ ਦੇ ਹੱਕ ਵਿੱਚ ਅਕਸਰ ਸਟੈਂਡ ਲੈਂਦਾ ਰਿਹਾ ਹੈ। ਇਸ ਵਾਰ ਵੀ ਲਿਖਣ-ਬੋਲਣ ਦੀ ਆਜ਼ਾਦੀ ਉੱਤੇ ਹੋ ਰਹੇ ਹਮਲਿਆਂ ਦੀ ਇਸ ਸੰਗਠਨ ਨੇ ਸਖ਼ਤ ਨਿੰਦਾ ਨਿਖੇਧੀ ਕੀਤੀ ਹੈ। 

ਕੇਂਦਰੀ ਪੰਜਾਬੀ ਲੇਖਕ ਸਭਾ (ਰਜਿ.) ਨੇ ਪੰਜਾਬ ਵਿੱਚ ਪੱਤਰਕਾਰਾਂ ਅਤੇ ਆਰ.ਟੀ.ਆਈ. ਕਾਰਕੁੰਨਾਂ ਖ਼ਿਲਾਫ਼ ਦਰਜ ਕੀਤੀ ਗਈ ਐੱਫ.ਆਈ.ਆਰ. ਦੀ ਸਖ਼ਤ ਨਿੰਦਾ ਕੀਤੀ ਹੈ ਅਤੇ ਇਸ ਨੂੰ ਤੁਰੰਤ ਰੱਦ ਕਰਨ ਦੀ ਮੰਗ ਕੀਤੀ ਹੈ।  ਸਭਾ ਨੇ ਲਿਖਣ-ਬੋਲਣ ਦੀ ਆਜ਼ਾਦੀ ਉੱਤੇ ਹੋ ਰਹੇ ਅਜਿਹੇ ਹਮਲਿਆਂ ਦੀ ਸਖ਼ਤ ਨਿੰਦਾ ਕਰਦਿਆਂ  ਪ੍ਰੈੱਸ ਦੀ ਆਜ਼ਾਦੀ ਨੂੰ ਬਹਾਲ ਕਰਨ ਦੀ ਮੰਗ ਕੀਤੀ ਹੈ। 

ਸਭਾ ਦੇ ਪ੍ਰਧਾਨ ਦਰਸ਼ਨ ਬੁੱਟਰ, ਜਨਰਲ ਸਕੱਤਰ ਸੁਸ਼ੀਲ ਦੁਸਾਂਝ, ਸੀਨੀਅਰ ਮੀਤ ਪ੍ਰਧਾਨ ਮੱਖਣ ਸਿੰਘ ਕੁਹਾੜ ਅਤੇ ਦਫ਼ਤਰ ਸਕੱਤਰ ਦੀਪ ਦੇਵਿੰਦਰ ਸਿੰਘ ਨੇ ਇੱਥੋਂ ਜਾਰੀ ਸਾਂਝੇ ਪ੍ਰੈੱਸ ਬਿਆਨ ਵਿਚ ਕਿਹਾ ਹੈ ਕਿ ਇਹ ਕਾਰਵਾਈ ਲਿਖਣ ਅਤੇ ਬੋਲਣ ਦੀ ਆਜ਼ਾਦੀ ਅਤੇ ਪ੍ਰੈੱਸ ਦੀ ਆਜ਼ਾਦੀ ਉੱਤੇ ਸਿੱਧਾ ਹਮਲਾ ਹੈ, ਜਿਸ ਨੂੰ ਕਿਸੇ ਵੀ ਕੀਮਤ ਉੱਤੇ ਬਰਦਾਸ਼ਤ ਨਹੀਂ ਕੀਤਾ ਜਾ ਸਕਦਾ।  

ਉਨ੍ਹਾਂ ਕਿਹਾ ਕਿ ਪੰਜਾਬ ਸਰਕਾਰ ਵੱਲੋਂ ਮਾਨਿਕ ਗੋਇਲ ਵਰਗੇ ਆਰ.ਟੀ.ਆਈ. ਕਾਰਕੁੰਨ ਅਤੇ ਮਿੰਟੂ ਗੁਰੂਸਰੀਆ ਅਤੇ ਮਨਿੰਦਰਜੀਤ ਸਿੱਧੂ ਵਰਗੇ ਪੱਤਰਕਾਰਾਂ ਸਮੇਤ ਲਗਭਗ 10 ਵਿਅਕਤੀਆਂ ਖ਼ਿਲਾਫ਼ ਇਹ ਐੱਫ਼.ਆਈ.ਆਰ. ਦਰਜ ਕਰਨਾ ਜਮਹੂਰੀ ਕਦਰਾਂ-ਕੀਮਤਾਂ ਨੂੰ ਤਹਿਸ-ਨਹਿਸ ਕਰਨ ਵਾਲੀ ਕਾਰਵਾਈ ਹੈ। ਅਜਿਹੀਆਂ ਕਾਰਵਾਈਆਂ ਨਾਲ ਨਾ ਸਿਰਫ਼ ਪੱਤਰਕਾਰਾਂ ਅਤੇ ਸਮਾਜਕ ਕਾਰਕੁੰਨਾਂ ਨੂੰ ਡਰਾਉਣ ਦਾ ਭਰਮ ਪਾਲ਼ਿਆ ਜਾ ਰਿਹਾ ਹੈ, ਸਗੋਂ ਜਨਤਕ ਜਾਣਕਾਰੀ ਅਤੇ ਸੱਚ ਨੂੰ ਲੁਕਾਉਣ  ਦੀਆਂ ਕੋਸ਼ਿਸ਼ਾਂ ਵੀ ਕੀਤੀਆਂ ਜਾ ਰਹੀਆਂ ਹਨ।

ਉਨ੍ਹਾਂ ਕਿਹਾ ਕਿ ਕੇਂਦਰੀ ਪੰਜਾਬੀ ਲੇਖਕ ਸਭਾ ਸਮੂਹ ਪੱਤਰਕਾਰਾਂ ਅਤੇ ਲੋਕ-ਪੱਖੀ ਸਮਾਜਕ ਕਾਰਕੁੰਨਾਂ ਨਾਲ ਖੜ੍ਹੀ ਹੈ ਅਤੇ ਅਪੀਲ ਕਰਦੀ ਹੈ ਕਿ ਸਰਕਾਰ ਤੁਰੰਤ ਇਸ ਐੱਫ.ਆਈ.ਆਰ. ਨੂੰ ਰੱਦ ਕਰੇ ਅਤੇ ਭਵਿੱਖ ਵਿੱਚ ਅਜਿਹੀਆਂ ਗਲਤ ਕਾਰਵਾਈਆਂ ਤੋਂ ਗੁਰੇਜ਼ ਕਰੇ।

ਹੁਣ ਦੇਖਣਾ ਹੈ ਕਿ ਸਰਕਾਰ ਇਸ ਮਾਮਲੇ ਨੂੰ ਗੰਭੀਰਤਾ ਅਤੇ ਪਾਰਦਰਸ਼ਿਤਾ ਨਾਲ ਸਾਹਮਣੇ ਲਿਆ ਕੇ ਕੋਈ ਉਸਾਰੂ ਰੁੱਖ ਅਖਤਿਆਰ ਕਰਦੀ ਹੈ ਜਾਂ ਫਿਰ ਲੇਖਕਾਂ ਨੂੰ ਇੱਕ ਵਾਰ ਫੇਰ ਇਸ ਮੁੱਦੇ ਬਾਰੇ ਕੋਈ ਨਵਾਂ ਅੰਦੋਲਨ ਵੱਡੀ ਪੱਧਰ ਤੇ ਚਲਾਉਣ ਲਈ ਮਜਬੂਰ ਹੋਣਾ ਪੈਂਦਾ ਹੈ।

ਦਸਮੇਸ਼ ਪਿਤਾ ਗੁਰੂ ਗੋਬਿੰਦ ਸਿੰਘ ਜੀ ਦੀ ਪਵਿੱਤਰ ਨਿਸ਼ਾਨੀ “ਗੰਗਾ ਸਾਗਰ” ਬਾਰੇ ਖਾਸ ਪੁਸਤਕ

Gurbhajan Singh Gill Emailed on 1st January 2026 at 6:03 PM Regarding Book Release

2 ਜਨਵਰੀ ਨੂੰ ਰਾਏਕੋਟ ਜੋੜ ਮੇਲੇ ਦੌਰਾਨ ਸੰਗਤ ਅਰਪਨ ਹੋਵੇਗੀ ਇਤਿਹਾਸਕ ਪੁਸਤਕ 

ਰਾਏਕੋਟ//ਲੁਧਿਆਣਾ: 1 ਜਨਵਰੀ 2026: (ਮੀਡੀਆ ਲਿੰਕ 32/ਸਾਹਿਤ ਸਕਰੀਨ ਡੈਸਕ)::

ਦਸਮੇਸ਼ ਪਿਤਾ ਸਾਹਿਬ ਸ਼੍ਰੀ ਗੋਬਿੰਦ ਸਿੰਘ ਜੀ ਮਹਾਰਾਜ ਦੇ  ਛੋਟੇ ਸਾਹਿਬਜ਼ਾਦਿਆਂ ਦੀ ਸ਼ਹਾਦਤ ਵਾਲੇ ਦਿਨਾਂ ਦੌਰਾਨ  ਰਾਏਕੋਟ ਠਹਿਰ ਵੇਲੇ ਰਾਏਕੋਟ ਦੇ ਹਾਕਮ ਰਾਏ ਕੱਲ੍ਹਾ ਜੀ ਦੀ ਸੇਵਾ ਤੋਂ ਪ੍ਰਸੰਨ ਹੋ ਕੇ ਬਖ਼ਸੇ “ ਪਵਿੱਤਰ ਗੰਗਾ ਸਾਗਰ “ ਬਾਰੇ ਰਾਏ ਅਜ਼ੀਜ਼ ਉਲਾ ਖਾਂ ਸਾਹਿਬ ਵੱਲੋਂ ਮੁਹੱਈਆ ਕਰਵਾਏ ਦਸਤਾਵੇਜ਼ਾਂ ਤੇ ਆਧਾਰਿਤ ਪੁਸਤਕ 2 ਜਨਵਰੀ ਨੂੰ ਗੁਰਦੁਆਰਾ ਟਾਹਲੀਆਣਾ ਸਾਹਿਬ ਰਾਏਕੋਟ ਵਿਖੇ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਪ੍ਰਧਾਨ ਐਡਵੋਕੇਟ ਹਰਜਿੰਦਰ ਸਿੰਘ ਧਾਮੀ ਸੰਗਤ ਅਰਪਨ ਕਰਨਗੇ।

ਇਹ ਕਿਤਾਬ ਪੰਜਾਬੀ ਲੋਕ ਵਿਰਾਸਤ ਅਕੈਡਮੀ ਲੁਧਿਆਣਾ ਵੱਲੋਂ ਪ੍ਰਕਾਸ਼ਿਤ ਕੀਤੀ ਗਈ ਹੈ ਅਤੇ “ਦਸਮੇਸ਼ ਪਿਤਾ ਬਖ਼ਸ਼ਿਸ਼: ਪਵਿੱਤਰ ਗੰਗਾ ਸਾਗਰ – ਸੁੱਚੀ ਸੇਵਾ ਸੰਭਾਲ”  ਸਿਰਲੇਖ ਵਾਲੀ ਇਹ ਪੁਸਤਕ ਪ੍ਰਸਿੱਧ ਲੇਖਕ ਅਤੇ ਇਤਿਹਾਸਕਾਰ ਪ੍ਰੋ. ਗੁਰਦੇਵ ਸਿੰਘ ਸਿੱਧੂ ਵੱਲੋਂ ਲਿਖੀ ਗਈ ਹੈ। ਇਸ ਵਿੱਚ ਗੁਰੂ ਗੋਬਿੰਦ ਸਿੰਘ ਜੀ ਦੇ ਰਾਏਕੋਟ ਆਗਮਨ, ਰਾਇ ਕਲ੍ਹਾ ਅਤੇ ਉਨ੍ਹਾਂ ਦੇ ਪਰਿਵਾਰ ਵੱਲੋਂ ਕੀਤੀ ਗਈ ਅਤੁੱਲ ਸੇਵਾ, ਅਤੇ ਗੁਰੂ ਸਾਹਿਬ ਦੀ ਪਵਿੱਤਰ ਨਿਸ਼ਾਨੀ ਗੰਗਾ ਸਾਗਰ ਦੇ ਅਧਿਆਤਮਿਕ ਅਤੇ ਇਤਿਹਾਸਕ ਮਹੱਤਵ ਨੂੰ ਵਿਸਥਾਰ ਨਾਲ ਦਰਸਾਇਆ ਗਿਆ ਹੈ। ਇਸ  ਕਿਤਾਬ ਦਾ ਮੁੱਖਬੰਧ ਵੀ ਪ੍ਰੋ ਗੁਰਭਜਨ ਗਿੱਲ ਨੇ ਲਿਖਿਆ ਹੈ। ਗੰਗਾ ਸਾਗਰ 17ਵੀਂ ਸਦੀ ਦਾ ਧਾਤ ਦਾ ਪੁਰਾਤਨ ਸੁਰਾਹੀਨੁਮਾ ਬਰਤਨ ਹੈ, ਜੋ ਗੁਰੂ ਗੋਬਿੰਦ ਸਿੰਘ ਜੀ ਦੀ ਪਵਿੱਤਰ ਨਿਸ਼ਾਨੀ ਵਜੋਂ ਅਤਿ ਆਦਰ ਨਾਲ  ਰਾਏ ਕੱਲ੍ਹਾ ਪਰਿਵਾਰ ਵੱਲੋਂ ਅੱਜ ਤੀਕ ਸੰਭਾਲਿਆ ਜਾ ਰਿਹਾ ਹੈ। ਇਸ ਦੀ ਸੰਭਾਲ ਇਸ ਸਮੇਂ ਰਾਏ ਕੱਲ੍ਹਾ ਜੀ ਦੇ ਵਾਰਸ ਰਾਇ ਅਜ਼ੀਜ਼ ਉੱਲਾ ਖ਼ਾਨ, ਪਾਕਿਸਤਾਨ ਦੇ ਸਾਬਕਾ ਮੈਂਬਰ ਪਾਰਲੀਮੈਂਟ ਅਤੇ ਉਨ੍ਹਾਂ ਦੇ ਸਪੁੱਤਰ ਰਾਏ ਮੁਹੰਮਦ ਅਲੀ ਵੱਲੋਂ ਸ਼ਰਧਾ  ਅਤੇ ਜ਼ਿੰਮੇਵਾਰੀ ਨਾਲ ਕੀਤੀ ਜਾ ਰਹੀ ਹੈ।

ਇਤਿਹਾਸਕ ਰਿਕਾਰਡ ਦਰਸਾਉਂਦੇ ਹਨ ਕਿ ਰਾਏਕੋਟ ਤੋਂ ਵਿਦਾ ਲੈਂਦੇ ਸਮੇਂ, ਰਾਇ ਕੱਲ੍ਹਾ ਵੱਲੋਂ ਆਪਣੇ ਅਤੇ ਆਪਣੇ ਪਰਿਵਾਰ ਦੀ ਜਾਨ ਜੋਖ਼ਮ ਵਿੱਚ ਪਾ ਕੇ ਕੀਤੀ ਗਈ ਨਿਰਸਵਾਰਥ ਸੇਵਾ ਤੋਂ ਪ੍ਰਸੰਨ ਹੋ ਕੇ, ਗੁਰੂ ਗੋਬਿੰਦ ਸਿੰਘ ਜੀ ਨੇ ਉਨ੍ਹਾਂ ਨੂੰ ਗੰਗਾ ਸਾਗਰ, ਇਕ ਤਲਵਾਰ ਅਤੇ ਇਕ ਰਿਹਲ (ਪਾਠ ਲਈ ਲੱਕੜੀ ਦਾ ਸਟੈਂਡ) ਨਿੱਜੀ ਤੌਰ ’ਤੇ ਬਖ਼ਸ਼ੀਸ਼ ਵਜੋਂ ਭੇਟ ਕੀਤੇ ਸਨ ।

ਰਾਇ ਅਜ਼ੀਜ਼ ਉੱਲਾ ਖ਼ਾਨ ਅਤੇ ਉਨ੍ਹਾਂ ਦੇ ਪੁੱਤਰ ਰਾਇ ਮੁਹੰਮਦ ਅਲੀ ਖ਼ਾਨ, ਜੋ ਇਸ ਵੇਲੇ ਕੈਨੇਡਾ ਵਿੱਚ ਵੱਸਦੇ ਹਨ, ਨੇ ਇਸ ਇਤਿਹਾਸਕ ਪੁਸਤਕ ਲਈ ਪ੍ਰੋ. ਗੁਰਦੇਵ ਸਿੰਘ ਸਿੱਧੂ ਦਾ ਧੰਨਵਾਦ ਕੀਤਾ ਹੈ । ਉਨ੍ਹਾਂ ਇਸ ਪੁਸਤਕ ਦੇ ਉੱਦਮ ਲਈ ਪ੍ਰੋ ਗੁਰਭਜਨ ਗਿੱਲ ਅਤੇ ਪੰਜਾਬੀ ਲੋਕ ਵਿਰਾਸਤ ਅਕੈਡਮੀ ਦਾ ਵੀ ਸ਼ੁਕਰੀਆ ਅਦਾ  ਕੀਤਾ ਹੈ ।

ਦੋਹਾਂ ਪਿਓ-ਪੁੱਤਾਂ ਨੇ ਰਾਏਕੋਟ ਜੋੜ ਮੇਲੇ ਦੇ ਮੌਕੇ ’ਤੇ ਸਿੱਖ ਸੰਗਤ ਦਾ ਧੰਨਵਾਦ ਕੀਤਾ ਹੈ ਜਿੰਨ੍ਹਾ ਨੇ ਸਾਨੂੰ ਪ੍ਰੇਰਨਾ ਦੇ ਕੇ ਇਹ ਕਾਰਜ ਕਰਨ ਦਾ ਉੱਦਮ ਬਖ਼ਸ਼ਿਆ ਹੈ।

ਇਹ ਪੁਸਤਕ ਗੁਰੂ ਗੋਬਿੰਦ ਸਿੰਘ ਜੀ ਵੱਲੋਂ ਪ੍ਰਗਟ ਕੀਤੀਆਂ ਮਨੁੱਖੀ ਕਦਰਾਂ ਕੀਮਤਾਂ —ਸਾਹਸ, ਸੇਵਾ, ਧਰਮ-ਨਿਰਪੱਖ  ਸਾਂਝ ਅਤੇ ਇਨਸਾਫ਼—ਬਾਰੇ ਚੇਤਨਾ ਨੂੰ ਹੋਰ ਮਜ਼ਬੂਤ ਕਰਨ ਦੀ ਉਮੀਦ ਜਗਾਉਂਦੀ ਹੈ।

ਰਾਏਕੋਟ ਤੋਂ ਮੈਂਬਰ ਸ਼੍ਰੋਮਣੀ ਗੁਰਦੁਆਰਾ ਪ੍ਹਬੰਧਕ ਕਮੇਟੀ ਸ. ਜਗਜੀਤ ਸਿੰਘ ਤਲਵੰਡੀ, ਰਾਏਕੋਟ ਨਗਰ ਕੌਂਸਲ ਦੇ ਸਾਬਕਾ ਪ੍ਰਧਾਨ ਅਮਨਦੀਪ ਸਿੰਘ ਗਿੱਲ, ਵਿਵੇਕ ਵਿੱਕੀ ਕੌੜਾ ਤੇ ਡਾ. ਰਮੇਸ਼ ਸਦਾਵਰਤੀ ਨੇ ਰਾਏ ਅਜ਼ੀਜ਼ ਉਲਾ ਖਾਂ ਸਾਹਿਬ ਦਾ ਇਹ ਮਹੱਤਵਪੂਰਨ ਖੋਜ ਪੁਸਤਕ ਤਿਆਰ ਕਰਵਾਉਣ ਲਈ ਧੰਨਵਾਦ ਕੀਤਾ ਹੈ।

ਪੰਜਾਬੀ ਲੋਕ ਵਿਰਾਸਤ ਅਕਾਡਮੀ ਦੇ ਚੇਅਰਮੈਨ  ਪ੍ਹੋ. ਗੁਰਭਜਨ ਸਿੰਘ ਗਿੱਲ ਨੇ ਪੰਜਾਬ ਸਰਕਾਰ ਸਥਾਨਕ ਮੈਂਬਰ ਪਾਰਲੀਮੈਂਟ ਡਾ. ਅਮਰ ਸਿੰਘ ਤੇ ਸ਼੍ਰੋਮਣੀ ਗੁਰਦੁਆਰਾ ਪ੍ਹਬੰਧਕ  ਕਮੇਟੀ ਨੂੰ ਅਪੀਲ ਕੀਤੀ ਹੈ ਕਿ ਰਾਏ ਕੱਲ੍ਹਾ ਜੀ ਦੀ ਦਸਮੇਸ਼ ਪਿਤਾ ਜੀ ਲਈ ਸਮਰਪਿਤ ਨਿਰਸਵਾਰਥ ਸੇਵਾ ਨੂੰ ਧਿਆਨ ਵਿੱਚ ਰੱਖਦੇ ਹੋਏ ਰਾਏਕੋਟ ਵਿੱਚ ਲਾਇਬਰੇਰੀ ਵਰਗੀ ਕੋਈ ਯੋਗ ਯਾਦਗਾਰ ਸਥਾਪਤ ਕੀਤੀ ਜਾਵੇ ਜਿਸ ਤੋਂ ਇਲਾਕਾ ਨਿਵਾਸੀ ਪ੍ਰੇਰਨਾ ਤੇ ਜੀਵਨ ਸੇਧ ਲੈ ਸਕਣ। ਮੇਰੀ ਜਾਣਕਾਰੀ ਮੁਤਾਬਕ ਇਸ ਕਾਰਜ ਲਈ ਕਈ ਸਾਲ ਪਹਿਲਾਂ ਸ. ਪ੍ਰਕਾਸ਼ ਸਿੰਘ ਬਾਦਲ ਜੀ ਨੇ ਨਗਰ ਕੌਂਸਲ ਤੋਂ ਥਾਂ ਵੀ ਰਾਖਵੀਂ ਕਰਵਾਈ ਸੀ ਅਤੇ ਕੁਝ ਗਰਾਂਟ ਵੀ ਜਾਰੀ ਕੀਤੀ ਸੀ। ਉਸ ਦੀ ਪੈਰਵੀ ਕੀਤੀ ਜਾ ਸਕਦੀ ਹੈ।

ਇਤਿਹਾਸ ਦੀ ਸੰਭਾਲ ਕਰਨ ਵਾਲਿਆਂ ਅਜਿਹੀਆਂ ਪੁਸਤਕਾਂ ਦੀ ਸਾਂਭ ਸੰਭਾਲ ਅਤੇ ਪ੍ਰਚਾਰ ਪ੍ਰਸਾਰ ਲਈ ਵੱਧ ਤੋਂ ਵੱਧ ਬੁਧੀਜੀਵੀਆਂ ਨੂੰ ਸਰਗਰਮੀ ਨਾਲ ਅੱਗੇ ਆਉਣਾ ਚਾਹੀਦਾ ਹੈ।