ਕਲਮਾਂ ਵਾਲਿਆਂ ਵੱਲੋਂ ਕਿਸਾਨ ਸੰਘਰਸ਼ ਦੀ ਹਿਮਾਇਤ ਵਿੱਚ ਮਨੁੱਖੀ ਕੜੀ

Monday:18th January 2021 at 8:18 PM

 ਪ੍ਰਗਤੀਸ਼ੀਲ ਲੇਖਕ ਸੰਘ ਨੇ ਦਿੱਤਾ ਸੀ ਸੱਦਾ 

ਫ਼ਿਰੋਜ਼ਪੁਰ: 18 ਜਨਵਰੀ 2021:(ਸਾਹਿਤ ਸਕਰੀਨ ਬਿਊਰੋ):: 

ਕੇਂਦਰ ਸਰਕਾਰ ਵੱਲੋਂ ਕਾਰਪੋਰੇਟ ਘਰਾਣਿਆਂ ਦੇ ਹੁਕਮ ਮੁਤਾਬਕ ਇਸ ਦੇਸ਼ ਦੀ ਖੇਤੀ ਨੂੰ ਮਲਟੀਨੈਸ਼ਨਲ ਕੰਪਨੀਆਂ ਦੀ ਜ਼ਰਖਰੀਦ ਬਨਾਉਣ ਲਈ ਲਾਗੂ ਕੀਤੇ ਕਿਸਾਨ ਵਿਰੋਧੀ ਲੋਕ ਮਾਰੂ ਤਿੰਨ ਕਾਲੇ ਕਾਨੂੰਨਾਂ ਦੇ ਖ਼ਿਲਾਫ਼ ਪੂਰੇ ਦੇਸ਼ ਵਿਸ਼ੇਸ਼ ਕਰਕੇ ਪੰਜਾਬ ਅਤੇ ਹਰਿਆਣਾ ਦੇ ਕਿਸਾਨ ਸੰਘਰਸ਼ ਦੇ ਰਾਹ ਤੇ ਹਨ। ਇਸ ਦੇਸ਼ ਦੀ ਆਜ਼ਾਦੀ ਦੀ ਦੂਜੀ ਲੜਾਈ ਲੜ ਰਹੀਆਂ ਕਿਸਾਨ ਜਥੇਬੰਦੀਆਂ ਦੇ ਸੰਘਰਸ਼ ਦੀ ਹਿਮਾਇਤ ਕਰਦਿਆਂ ਪ੍ਰਗਤੀਸ਼ੀਲ ਲੇਖਕ ਸੰਘ ਭਾਰਤ ਦੇ ਸੱਦੇ ਤੇ ਫ਼ਿਰੋਜ਼ਪੁਰ ਦੇ ਲੇਖਕਾਂ, ਬੁੱਧੀਜੀਵੀਆਂ, ਅਧਿਆਪਕਾਂ, ਵਿਦਿਆਰਥੀਆਂ ਵੱਲੋਂ ਮਨੁੱਖੀ ਕੜੀ ਬਣਾਈ ਗਈ। ਇਸ ਮੌਕੇ ਤੇ ਬੋਲਦਿਆਂ ਪੰਜਾਬੀ ਦੇ ਪ੍ਰਸਿੱਧ ਸ਼ਾਇਰ ਪ੍ਰੋ.ਜਸਪਾਲ ਘਈ ਅਤੇ ਹਰਮੀਤ ਵਿਦਿਆਰਥੀ ਨੇ ਕਿਹਾ ਕਿ ਅੱਜ ਅਸੀਂ ਮਨੁੱਖੀ ਕੜੀ ਬਣਾ ਕੇ ਦਿੱਲੀ ਦੇ ਬਾਡਰਾਂ ਤੇ ਬੈਠੇ ਸੰਘਰਸ਼ੀ ਯੋਧਿਆਂ ਨਾਲ ਆਪਣੀ ਇੱਕਮੁੱਠਤਾ ਜਾਹਰ ਕਰਦੇ ਹਾਂ ਅਤੇ ਸਰਕਾਰ ਪਾਸੋਂ ਮੰਗ ਕਰਦੇ ਹਾਂ ਕਿ ਇਹ ਕਾਨੂੰਨ ਤੁਰੰਤ ਰੱਦ ਕੀਤੇ ਜਾਣ। ਇਸ ਮੌਕੇ ਤੇ ਪ੍ਰੋ.ਗੁਰਤੇਜ ਕੋਹਾਰਵਾਲਾ, ਅਨਿਲ ਆਦਮ, ਸੁਖਜਿੰਦਰ ਨੇ ਸਰਕਾਰ ਦੀਆਂ ਲੋਕ ਵਿਰੋਧੀ ਨੀਤੀਆਂ ਦੀ ਸਖ਼ਤ ਸ਼ਬਦਾਂ ਵਿੱਚ ਨਿੰਦਾ ਕੀਤੀ। 

ਇਸ ਮਨੁੱਖੀ ਕੜੀ ਵਿੱਚ ਪ੍ਰੋ.ਕੁਲਦੀਪ ਜਲਾਲਾਬਾਦ, ਡਾ.ਮਨਜੀਤ ਕੌਰ ਆਜ਼ਾਦ ਅਤੇ ਡਾ.ਆਜ਼ਾਦਵਿੰਦਰ ਸਿੰਘ,ਪ੍ਰੋ. ਅਨਿਲ ਧੀਮਾਨ, ਡਾ.ਅਮਨਦੀਪ ਸਿੰਘ,ਡਾ.ਜੀਤ ਪਾਲ ਸਿੰਘ,ਪ੍ਰੋ.ਕਪਿਲ ਦੇਵ, ਡਾ.ਨਿਰਮਲ ਸਿੰਘ, ਪ੍ਰੋ.ਮਨਜਿੰਦਰ ਸਿੰਘ, ਪ੍ਰੋ.ਸ਼ਵੇਤਾ, ਪ੍ਰੋ.ਪੁਸ਼ਪਾ, ਪ੍ਰੋ.ਕੁਲਵਿੰਦਰ ਕੌਰ, ਪ੍ਰੋ.ਲਕਸ਼ਮਿੰਦਰ ਅਤੇ ਡਾ.ਸੰਜੀਵ ਕੁਮਾਰ  ਸਮੇਤ ਕਾਫ਼ੀ ਗਿਣਤੀ ਵਿੱਚ ਵਿਦਿਆਰਥੀ ਵੀ  ਸ਼ਾਮਲ ਹੋਏ। ਨਾਅਰਿਆਂ ਦੀ ਗੂੰਜ ਵਿੱਚ ਪ੍ਰੋ.ਕੁਲਦੀਪ ਜਲਾਲਾਬਾਦ ਨੇ ਮਨੁੱਖੀ ਕੜੀ ਵਿੱਚ ਸ਼ਾਮਲ ਹੋਣ ਵਾਲੇ ਸਭ ਸੁਚੇਤ ਲੋਕਾਂ  ਦਾ ਧੰਨਵਾਦ ਕੀਤਾ ਅਤੇ ਐਲਾਨ ਕੀਤਾ ਕਿ ਕਿਸਾਨ ਜਥੇਬੰਦੀਆਂ ਦੇ ਹਰ ਸੱਦੇ ਨੂੰ ਫ਼ਿਰੋਜ਼ਪੁਰ ਵਿੱਚ ਲਾਗੂ ਕਰਨ ਹਰ ਸੰਭਵ ਯਤਨ ਕੀਤਾ ਜਾਵੇਗਾ।

ਦਿੱਲੀਏ! ਦੁੱਲੇ ਦੇ ਵਾਰਸ ਜਾਗ ਪਏ ਨੇ...

 Wednesday:13th January 2021 at 8:14 AM WhatsApp 

           ਉਲਟੇ ਸਿੱਧੇ ਕਨੂੰਨ ਨਾ ਘੜ                

ਲੁਧਿਆਣਾ: 13 ਜਨਵਰੀ 2021: (ਸਾਹਿਤ ਸਕਰੀਨ ਡੈਸਕ)::  

ਪੋਹ ਦਾ ਮਹੀਨਾ। ਸਰਦੀ ਨਾਲ ਠਿਠੁਰਦੀਆਂ ਸੜਕਾਂ। ਸਰਹੰਦ ਦੇ ਠੰਡੇ ਬੁਰਜ ਵਾਲੇ ਜਬਰ ਦੀ ਯਾਦ ਦੁਆਉਂਦੀਆਂ ਸੜਕਾਂ। ਕਾਨੂੰਨ ਮੰਨ ਲਓ ਦੀ ਸਰਕਾਰੀ ਰੱਟ ਵੀ ਉੱਸੇ ਤਾਨਾਸ਼ਾਹੀ ਦੀ ਯਾਦ ਦੁਆ ਰਹੀ ਹੈ ਜਿਹੜੀ ਸਾਹਿਬਜ਼ਾਦਿਆਂ ਨੂੰ ਸੁਣਾਈ ਗਈ ਸੀ ਕਿ ਈਨ ਮੰਨ ਲਓ ਈਂ ਮੰਨ ਲਓ। ਇਹ ਤੁਹਾਡੇ ਫਾਇਦੇ ਵਿਹੁੱਚ ਹੈ। ਗੁਰੂ ਦੇ ਪੁੱਤਰਾਂ ਨੇ ਉਦੋਂ ਵੀ ਹੁਕਮਰਾਨਾਂ ਦੇ ਜਬਰ ਸਾਹਮਣੇ ਝੁਕਣ ਤੋਂ  ਇਨਕਾਰ ਕਰ ਦਿੱਤਾ ਸੀ ਅਤੇ ਹੁਣ ਵੀ ਗੁਰੂ ਪੁੱਤਰਾਂ ਨੇ ਈਨ ਮੰਨਣ ਤੋਂ ਇਨਕਾਰ ਕੀਤਾ ਹੈ। ਕਿਸਾਨ ਸ਼ਹੀਦ ਹੋ ਰਹੇ ਹਨ ਅਤੇ ਸੱਤਾ ਦੇ ਨਸ਼ੇ ਵਿੱਚ ਗੁਆਚੇ ਲੀਡਰ ਇਹਨਾਂ ਸ਼ਹਾਦਤਾਂ ਨੂੰ ਪਿਕਨਿਕ ਆਖ ਕੇ ਸੁੱਚਾ ਨੰਦ ਦੀ ਯਾਦ ਦੁਆ ਰਹੇ ਹਨ। ਸੁੱਚਾਨੰਦ ਵਾਂਗ ਚਮਚਾਗਿਰੀ ਦੀਆਂ ਹੱਦਾਂ ਪਾਰ ਕਰ ਰਹੇ ਹਨ। ਇਹ  ਅਤੇ  ਦੇ ਭਵਿੱਖ ਨੂੰ ਵੀ ਕਲੰਕਿਤ ਕਰ ਰਹੇ ਹਨ। ਜ਼ੁਲਮ ਅਤੇ ਬੇਇਨਸਾਫ਼ੀ ਦੀ  ਇਸ ਹਨੇਰੀ ਦੇ ਬਾਵਜੂਦ ਜਿਊਂਦੀ ਜਾਗਦੀ ਜ਼ਮੀਰ ਵਾਲੇ ਲੋਕ ਨਵਾਬ ਸ਼ੇਰ ਮੋਹੰਮਦ ਖ਼ਾਨ ਵਾਂਗ ਹਾਅ ਦਾ ਨਾਅਰਾ ਮਾਰ ਰਹੇ ਹਨ। ਨਵਾਂ ਇਤਿਹਾਸ ਰਚਿਆ ਜਾ ਰਿਹਾ ਹੈ। ਸਾਡੇ ਅੱਜ ਦੇ ਜ਼ਿਆਦਾਤਰ ਸਾਹਿਤਕਾਰ ਕਿਸਾਨਾਂ ਨਾਲ ਆ  ਖੜੋਤੇ ਹਨ। ਡਾ. ਗੁਲਜ਼ਾਰ ਸਿੰਘ ਪੰਧੇਰ ਵੀ ਉਹਨਾਂ ਵਿੱਚੋਂ ਇੱਕ ਹਨ। ਉਹਨਾਂ ਦੀ ਇਹ ਨਜ਼ਮ ਵਰਗੀ ਰਚਨਾ ਪੜ੍ਹਦਿਆਂ ਰਸੂਲ ਹਮਜ਼ਾਤੋਵ ਦੀ ਪੁਸਤਕ ਮੇਰਾ ਦਾਗਿਸਤਾਨ ਵਾਲਾ ਅੰਦਾਜ਼ ਵੀ  ਚੇਤੇ ਆਉਣ ਲੱਗਦਾ ਹੈ। ਇਸਦੇ ਬੋਲ ਕਿਸੇ ਦਸਤਾਵੇਜ਼ੀ ਵਾਂਗ ਹਾਲਾਤ ਨੂੰ ਸੰਭਾਲਦੇ ਪ੍ਰਤੀਤ ਹੁੰਦੇ ਹਨ। ਇਸ ਰਚਨਾ ਦੇ ਨਾਲ ਅੱਜ ਦੇ ਅੰਦੋਲਨਕਾਰੀ ਕਿਸਾਨਾਂ ਵਿੱਚ ਦੁੱਲੇ ਭੱਟੀ ਨੂੰ ਮਹਿਸੂਸ ਕਰਦਿਆਂ ਇਹਨਾਂ ਤਸਵੀਰਾਂ ਦਾ ਕੋਲਾਜ ਤਿਆਰ ਕੀਤਾ ਹੈ ਕਾਰਤਿਕਾ ਕਲਿਆਣੀ ਸਿੰਘ ਨੇ। ਤਸਵੀਰਾਂ ਇੰਟਰਨੈਟ ਤੋਂ ਧੰਨਵਾਦ ਸਹਿਤ ਲਈਆਂ ਗਈਆਂ ਹਨ। -ਰੈਕਟਰ ਕਥੂਰੀਆ

 ਦੁੱਲੇ ਭੱਟੀ ਦੀ ਲੋਹੜੀ//ਡਾ.ਗੁਲਜਾਰ ਸਿੰਘ ਪੰਧੇਰ 

ਸਿਖਰ ਦੀ ਸਰਦੀ

ਮੱਕੀ ਦੀ ਰੋਟੀ 

ਸਰੋਂ ਦਾ ਸਾਗ

ਪੋਹ ਰਿੰਨ੍ਹੀ ਮਾਘ ਖਾਧੀ

ਲੋਹੜੀ - - - 

ਨਵੇਂ ਜੀਅ ਨੂੰ  ਜੀ ਆਇਆਂ 

ਕਹਿਣ ਦਾ ਤਿਉਹਾਰ 

o

ਅਸੀਂ ਵਿਕਾਸ ਕਰਨ ਲੱਗੇ

ਚੀਜ਼ਾਂ ਨਾਲ ਚੀਜ਼ਾਂ ਬਦਲਦੇ ਬਦਲਦੇ

ਪੈਸੇ ਨਾਲ ਚੀਜ਼ਾਂ ਬਦਲਨ ਲੱਗੇ.... 

ਲੋਹੜੀ ਇਕੱਲਾ ਮੁੰਡਾ ਜੰਮਣ ਦੀ ਹੋ ਗਈ... 

ਅਸੀਂ ਕੁੜੀਆਂ ਨੂੰ ਜੰਮਣ ਤੋਂ ਮਾਰਨ ਤਕ ਪਹੁੰਚ ਗਏ... 

ਇਕ ਮੋੜ ਤੇ ਦੁੱਲਾ ਮਿਲਿਆ 

ਉਸ ਜ਼ਮੀਰ ਦੀ ਆਵਾਜ਼ ਸੁਣੀ

ਡਟ ਕੇ ਖਲੋ ਗਿਆ ਸੁੰਦਰੀ  ਮੁੰਦਰੀ ਦੇ ਹੱਕ ਚ

ਉਹ ਲੋਕ ਮਨ ਵਿਚ ਵਸ ਗਿਆ..

ਅਸੀਂ ਗੀਤ ਗਾਇਆ.. 

ਗਾਊਂਦੇ ਰਹੇ ਸੁੰਦਰੀ ਮੁੰਦਰੀ.. 

ਅਸੀਂ ਸਿਰਫ ਗੀਤ ਗਾਇਆ 

ਗਾਉਂਦੇ ਰਹੇ ਵਾਰਾਂ ..

ਧੰਨ ਦੌਲਤ ਜਾਇਦਾਦ ਦੇ 

ਰਿਸ਼ਤਿਆਂ ਨਾਲ ਹੋਰ ਬੱਝਦੇ ਗਏ.. 

ਹੁਣ ਹਾਕਮ-ਭਾਵੇਂ ਅਕਬਰ ਨਹੀਂ ਹੈ... 

ਹਾਕਮ ਨੇ ਭੇਸ ਬਦਲ ਲਿਆ ਹੈ

 ਨਵੇਂ ਤਰੀਕੇ ਈਜਾਦ ਕਰ ਲਏ ਹਨ

ਨਿਰਭੈਆ ਤੋਂ ਆਇਸਾ ਤੱਕ...

ਨਿਹੱਥੀਆ ਨਿਤਾਣੀਆ ਸਮਝ ਬੈਠਾ ਹੈ...                                                    

ਸਾਡੇ ਦੁੱਲੇ ਪ੍ਰਵਾਸੀ ਹੋ ਰਹੇ ਹਨ

ਦੁੱਲੇ ਦੀ ਧਰਤ ਨੂੰ ਬਾਰ ਬਾਰ 

ਲੁੱਟਿਆ ਜਾ ਰਿਹਾ ਹੈ....

ਦੋਨੋ ਮਾਰ ਖਾ ਜਾਂਦੀਆਂ ਹਨ__

ਤੁਹਾਡੀ ਦਿਮਾਗੀ ਮਸ਼ੀਨ ਤੇ ਵੋਟਿੰਗ ਮਸ਼ੀਨ. 

ਹੁਣ ਜਦੋਂ ਇਸ ਧਰਤ ਦੇ ਜਾਇਆਂ ਨੂੰ 

ਪਾੜ ਕੇ ਰਾਜ ਕਰਨ ਦੀ ਨੀਤ ਨਾਲ 

 ਵੰਡਿਆ ਜਾਣ ਲੱਗਾ ਹੈ

ਜਿੱਥੇ ਧੀਆਂ ਦੀ ਅਜ਼ਮਤ ਮਹਿਫੁਜ ਨਾਂ ਹੋਵੇ

ਦੇਸ਼ ਆਜ਼ਾਦ ਨਹੀਂ  ਹੁੰਦਾ..

ਰਹਿ ਰਹਿ ਕੇ ਯਾਦ  ਆਉਂਦਾ ਹੈ

ਦੁੱਲਾ... ਸਾਡਾ ਸਭ ਦਾ ਦੁੱਲਾ... 

ਆਓ ਮਨਾਈਏ ਦੁੱਲੇ ਭੱਟੀ ਦੀ ਲੋਹੜੀ..

ਆਓ ਮਨਾਈਏ ਦੁੱਲੇ ਭੱਟੀ ਦੀ ਲੋਹੜੀ...

ਦੁੱਲੇ ਦੀ ਤਰਾਂ ਦਿੱਲੀ ਨੂੰ ਆਖੀਏ

ਉਲਟੇ ਸਿੱਧੇ ਕਨੂੰਨ ਨਾ ਘੜ

ਦੁੱਲੇ ਦੇ ਵਾਰਸ ਜਾਗ ਪਏ ਨੇ....

--ਡਾ.ਗੁਲਜਾਰ ਸਿੰਘ ਪੰਧੇਰ//ਮੋਬਾਈਲ ਨੰਬਰ 9464762825.

*ਡਾ.ਗੁਲਜ਼ਾਰ ਸਿੰਘ ਪੰਧੇਰ ਕਈ ਦਹਾਕਿਆਂ ਤੋਂ ਆਪਣੀ  ਸਰਗਰਮ ਹਨ। ਸਰਕਾਰੀ  ਵਿਰੁੱਧ ਵੀ ਅਤੇ ਫਿਰਕਾਪ੍ਰਸਤੀ ਵਾਲੇ ਜਬਰ ਦੇ ਖਿਲਾਫ ਵੀ। ਮਾੜੇ ਅਤੇ ਨਾਜ਼ੁਕ ਵੇਲਿਆਂ ਦੌਰਾਨ ਵੀ ਡਾ. ਗੁਲਜ਼ਾਰ ਪੰਧੇਰ ਡਟੇ ਰਹੇ। ਅੱਜ ਵੀ ਡਟੇ ਹੋਏ ਹਨ। ਧਾਰਮਿਕ ਪੱਖੋਂ ਪਰਿਵਾਰਕ ਸਾਂਝ ਨਾਮਧਾਰੀਆਂ ਨਾਲ ਰਹੀ ਪਰ ਸਿਆਸੀ ਖਿਆਲਾਂ ਪੱਖੋਂ ਪ੍ਰਗਤੀਸ਼ੀਲ ਵਿਚਾਰਧਾਰਾ ਦੇ ਹਾਮੀ ਹਨ। 

"ਹੁਣ ਇਤਿਹਾਸ ਬਦਲੇਗਾ"//*ਡਾ. ਦੇਵਿੰਦਰ ਦਿਲਰੂਪ

 ਜਦ ਲਹੂ ਡੁੱਲਦਾ ਏ.....ਇਤਿਹਾਸ ਬਦਲਦਾ ਏ 

ਤੀਜੀ ਪੀੜ੍ਹੀ ਪਈ ਸੰਘਰਸ਼ਾਂ ਦੇ ਰਾਹ..ਤੇ ਲੋਟੂਆਂ ਨੂੰ ਸ਼ਰਮ ਨਹੀਂ!ਫੋਟੋ:ਨੱਤ ਪਰਿਵਾਰ  

ਸੱਚ ਨੂੰ ਕੀ ਲੋੜ ਭਲਾ,

ਡਾ. ਦੇਵਿੰਦਰ ਦਿਲਰੂਪ

ਝੂਠਾਂ ਦੇ ਸਾਥ ਦੀ।

ਹੱਕ ਨੂੰ ਫਿਕਰ ਕਾਹਦੀ,

 ਨਿਆਂ-ਇਨਸਾਫ ਦੀ।

ਹੱਕ ਲਈ, ਸੱਚ ਲਈ,

ਜਦ ਲਹੂ ਡੁੱਲਦਾ ਏ।

ਇਤਿਹਾਸ ਗਵਾਹ ਹੈ,

ਇਤਿਹਾਸ ਬਦਲਦਾ ਏ।

ਮਨੁੱਖਤਾ ਦਾ ਘਾਣ ਹੈ ਇਹ,

ਕੇਹਾ ਸ਼ੈਤਾਨ ਹੈ ਇਹ। 

ਹਾਕਮ ਹੈ,ਤਾਂ ਕੀ ਹੋਇਆ,

ਨਹੀਂ ਭਗਵਾਨ ਹੈ ਇਹ।

ਸਾਡਿਆਂ ਸਿਵਿਆਂ ਤੇ ਜੋ,

ਰੋਟੀਆਂ ਹੈ ਸੇਕ ਰਿਹਾ।

ਰੱਬ ਦੀ ਸਹੁੰ, ਰੱਬ ਸੱਭ,

ਬੈਠਾ ਹੈ ਦੇਖ ਰਿਹਾ।

ਇਹ ਮੋਲ ਮੋੜਿਆ ਉਸ,

ਵੋਟਾਂ ਦੇ ਮੁੱਲ ਦਾ।

ਚੋਰ ਰਾਜ ਕਰਦੇ,

ਅੰਨਦਾਤਾ ਏ ਰੁੱਲਦਾ।

ਕਾਲੇ ਕਨੂੰਨ ਇਥੇ,

ਕਾਲੀਆਂ ਨੇ ਨੀਤੀਆਂ।

ਤਾਹੀਓਂ ਨੌਜਵਾਨੀ ਕੂਚਾਂ,

ਵਿਦੇਸ਼ਾਂ ਨੂੰ ਕੀਤੀਆਂ।

ਤੇਰੇ ਕੋਲ ਬਦਨੀਤੀਆਂ,

ਤੇ ਕਾਲੇ ਕਨੂੰਨ ਨੇ।

ਸਾਡੇ ਕੋਲ ਸਬਰ-ਸੱਚ,

ਜੋਸ਼ ਤੇ ਜਨੂੰਨ ਏ।

ਜਿੰਨੇ ਵੀ ਤੂੰ ਸਾਡੇ ਉੱਤੇ,

ਜੁਲਮ ਕਮਾਵੇੰਗਾ।

ਉਨਾਂ ਹੋਰ ਸਾਡੇ ਵਿੱਚ,

ਜੋਸ਼ ਭਰੀ ਜਾਵੇਗਾ।

ਬੁੱਢੇ ਹੱਡੀਂ ਖੂਨ ਵਿੱਚ,

ਆਇਆ ਉਬਾਲ ਏ,

ਮਾਵਾਂ-ਭੈਣਾਂ, ਵੀਰ, ਬੱਚੇ,

ਬੈਠੇ ਸੱਭ ਨਾਲ ਏ।

ਜੋਸ਼ ਅਤੇ ਹੋਸ਼ ਦੀ ਇਹ,

ਸਾਂਝ ਬੇਮਿਸਾਲ ਏ,

ਅੰਦੋਲਨ ਇਹ ਦੁਨੀਆ ਤੇ,

ਵੱਖਰੀ ਮਿਸਾਲ ਏ।

ਸ਼ਹਾਦਤਾਂ ਦਾ ਜਾਮ ਨਿੱਤ,

ਪੀਂਦੇ ਨੇ ਸੂਰਮੇ,

ਸਦਾ ਲਈ ਮਰ ਕੇ ਵੀ,

ਜੀਂਦੇ ਨੇ ਸੂਰਮੇ।

ਹੱਕ ਲਈ, ਸੱਚ ਲਈ,

ਜਦ ਲਹੂ ਡੁੱਲਦਾ ਏ।

ਇਤਿਹਾਸ ਗਵਾਹ ਹੈ,

ਇਤਿਹਾਸ ਬਦਲਦਾ ਹੈ।

ਇਹਨਾਂ ਕਾਵਿ ਸਤਰਾਂ ਦੀ ਲੇਖਿਕਾ ਡਾ. ਦੇਵਿੰਦਰ ਦਿਲਰੂਪ ਇੱਕ ਪ੍ਰਸਿੱਧ ਵਿਦਿਅਕ ਅਦਾਰੇ ਵਿੱਚ ਪ੍ਰੋਫੈਸਰ ਵੱਜੋਂ ਪੜ੍ਹਾਉਂਦੀ ਹੈ ਪਰ ਇਸਦੇ ਨਾਲ ਨਾਲ ਬੇਹੱਦ ਸੰਵੇਦਨਸ਼ੀਲ ਵੀ ਹੈ। ਕਈ ਵਾਰ ਲੱਗਦੈ ਜਿਵੇਂ ਕਵਿਤਾ ਅਤੇ ਦੇਵਿੰਦਰ ਦਿਲਰੂਪ ਇੱਕਮਿੱਕ ਹੋ ਗਏ ਹੋਣ। ਕਵਿਤਾ ਦੀ ਇਸ ਰਚਨਾ ਪ੍ਰਕਿਰਿਆ ਚੋਂ ਵਿਚਰਦਿਆਂ ਦੇਵਿੰਦਰ ਦਿਲਰੂਪ ਨਵੀਆਂ ਕਲਮ ਨੂੰ ਉਤਸ਼ਾਹਿਤ ਕਰਨਾ ਕਦੇ ਨਹੀਂ ਭੁੱਲਦੀ। ਨੌਜਵਾਨ ਪੀੜ੍ਹੀ ਨੂੰ ਮਾਰਗ ਦਰਸ਼ਨ ਦੇਣਾ ਵੀ ਦੇਵਿੰਦਰ ਦਿਲਰੂਪ ਦੀਆਂ ਖੂਬੀਆਂ ਵਿੱਚ ਹੈ। ਸ਼ਾਇਦ ਹੀ ਕੋਈ ਸਾਹਿਤਿਕ ਸਮਾਗਮ ਹੋਵੇ ਜਿਸ ਵਿੱਚ ਦੇਵਿੰਦਰ ਦਿਲਰੂਪ ਮੌਜੂਦ ਨਾ ਹੋਵੇ। ਉਹ ਇੱਕ ਅਜਿਹੀ ਸ਼ਖ਼ਸੀਅਤ ਹੈ ਜੋ ਹਮੇਸ਼ਾਂ ਖੁਸ਼ੀਆਂ ਅਤੇ ਖੇਡੇ ਹੀ ਵੰਡਦੀ ਹੈ ਪਰ ਕਿਸਾਨ ਅੰਦੋਲਨ ਦੇ ਦਰਦ ਨੇ ਉਸਨੂੰ ਵੀ ਉਦਾਸ ਕੀਤਾ ਹੈ। -ਰੈਕਟਰ ਕਥੂਰੀਆ

ਕਿਸਾਨ ਅੰਦੋਲਨ: ਅੰਤਰਨੀਰਵ ਦੀ ਇੱਕ ਹੋਰ ਬੇਬਾਕ ਕਾਵਿ ਰਚਨਾ

 ਜਿਹੜੀ ਅੱਜ ਦੇ ਨਾਲ ਨਾਲ ਭਵਿੱਖ ਦੀ ਤਸਵੀਰ ਵੱਲ ਵੀ ਇਸ਼ਾਰਾ ਕਰਦੀ ਹੈ 

ਸੰਘਰਸ਼ਾਂ ਦਾ ਚਾਅ ਵੀ ਰੰਗ ਦਿਖਾਉਂਦਾ ਹੈ-ਸਰਗਰਮ ਲੋਕ ਪੱਖੀ ਸ਼ਖ਼ਸੀਅਤ ਸੁਰਿੰਦਰ ਜੈਪਾਲ 

ਉਨ੍ਹਾਂ ਨੇ

ਉਨ੍ਹਾਂ

ਸ਼ਾਇਰ ਸਵਾਮੀ ਅੰਤਰ ਨੀਰਵ 

ਖਾਲੀ ਪਏ ਲਿਫਾਫਿਆਂ ਵਿਚ

ਸੂਰਜ ਉਗਾ ਲਏ ਹਨ

ਧਰਤੀ ਨੂੰ

ਹਰੇ ਰੰਗ ਦਾ ਰੰਗ ਦਿੱਤਾ ਹੈ

ਮੀਂਹਾਂ ਨੂੰ 

ਚਿੱਠੀਆਂ ਘੱਲਣੀਆਂ 

ਅੱਗ ਤੋਂ

ਥਾਪੜਾ ਲੈਣਾ

ਹਵਾ ਨਾਲ ਗੱਲਾਂ ਕਰਨੀਆਂ

ਪਾਣੀ ਵਿਚ

ਪਰੋਂਠੇ ਤਲਨੇ ਸਿਖ ਲਏ ਹਨ

ਸਰਬੱਤ ਦਾ ਭਲਾ ਆਖਦੇ ਮੰਗਦੇ

ਬਿਨਾਂ ਚੀਕੇ ਬੋਲਣਾ ਜਾਣ ਲਿਆ ਹੈ

ਚੁੱਪ ਨੂੰ ਪਹਿਣ ਲਿਆ ਹੈ

ਬਾਰਡਰਾਂ ਨੂੰ

ਤੀਰਥ ਕਰ ਲਿਆ ਹੈ।

(ਸਵਾਮੀ ਅੰਤਰ ਨੀਰਵ)

Swami Antar Nirav

ਲੇਖਕਾਂ ਦੀਆਂ ਦਿੱਲੀ ਵੱਲ ਵਹੀਰਾਂ

ਪ੍ਰਗਤਿਸ਼ੀਲ ਲੇਖਕ ਸੰਘ ਦੇ ਮੈਂਬਰ ਪੁੱਜੇ ਸੰਘਰਸ਼ਾਂ ਦੇ ਮੈਦਾਨ ਵਿੱਚ ਦਿੱਲੀ 

ਚੰਡੀਗੜ੍ਹ: 8 ਦਸੰਬਰ 2020: (ਕਾਰਤਿਕਾ ਸਿੰਘ//ਸਾਹਿਤ ਸਕਰੀਨ)::

ਜਦੋਂ ਪਤਾ ਹੋਵੇ ਸੀਨਿਆਂ ਚ ਛੇਕ ਹੋਣਗੇ!

ਉਦੋਂ ਜੰਗ ਜਾਣ ਵਾਲੇ ਬੰਦੇ ਆਮ ਨਹੀਓਂ ਹੁੰਦੇ!

ਅਗਾਂਹਵਧੂ ਲੇਖਕਾਂ ਦਾ ਸਰਗਰਮ ਗਰੁੱਪ ਇਕ ਵਾਰ ਫੇਰ ਸੰਘਰਸ਼ਾਂ ਵਾਲੇ ਮੈਦਾਨ ਵਿੱਚ ਹੈ। ਇਹ ਲੇਖਕ ਆਪਣੀ ਸਹਿਤ ਸਮੱਸਿਆਵਾਂ ਅਤੇ ਪਰਿਵਾਰਕ ਜ਼ੁੰਮੇਵਾਰੀਆਂ ਨੂੰ ਪਿਛੇ ਛੱਡ ਕੇ ਕਿਸਾਨਾਂ ਨਾਲ ਇਕੱਕਜੁੱਟਤਾ ਕਰਨ ਲਈ ਦਿੱਲੀ ਵਾਲੇ ਬਾਰਡਰ ਤੇ ਪਹੁੰਚੇ। ਇਹਨਾਂ ਵਿਛਕ ਪੁਰਸ਼ ਵੀ ਸਨ ਅਤੇ ਮਹਿਲਾਵਾਂ ਵੀ। ਇਹਨਾਂ ਨੇ ਖੁੱਲ ਕੇ ਕਿਸਾਨਾਂ ਦੀ ਹਮਾਇਤ ਕੀਤੀ ਅਤੇ ਲੋਕਪੱਖੀ ਲੇਖਕਾਂ ਵਾਲੀ ਜ਼ਿੰਮੇਵਾਰੀ ਨਿਭਾਈ। 

ਨੀਤੂ ਅਰੋੜਾ ਅਤੇ ਹੋਰ ਲੇਖਿਕਾਵਾਂ ਸਿੰਘੂ ਬਾਰਡਰ ਤੇ 

ਜ਼ਿਕਰਯੋਗ ਹੈ ਕਿ ਸੰਘਰਸ਼ ਕਰ ਰਹੀਆਂ ਕਿਸਾਨ ਜਥੇਬੰਦੀਆਂ ਨੂੰ ਪ੍ਰਗਤੀਸ਼ੀਲ ਲੇਖਕ ਸੰਘ ਵੱਲੋਂ ਪੁਰਜ਼ੋਰ ਹਮਾਇਤ ਦਿੱਤੀ ਜਾ ਰਹੀ ਹੈ। ਅੱਜ ਟੀਕਰੀ ਬਾਰਡਰ 'ਤੇ ਬਹਾਦਰਗੜ੍ਹ ਨੇੜੇ ਕਿਸਾਨ ਜਥੇਬੰਦੀਆਂ ਵੱਲੋਂ ਬਣਾਏ ਗਏ ਬਾਬਾ ਬੰਦਾ ਸਿੰਘ ਬਹਾਦਰ ਨਗਰ ਦੇ ਮੰਚ 'ਤੋਂ ਪ੍ਰਗਤੀਸ਼ੀਲ ਲੇਖਕ ਸੰਘ ਅਤੇ ਕੇਂਦਰੀ ਪੰਜਾਬੀ ਲੇਖਕ ਸਭਾ ਦੇ ਜਨਰਲ ਸਕੱਤਰ ਡਾ. ਸੁਖਦੇਵ ਸਿੰਘ ਸਿਰਸਾ ਅਤੇ ਪ੍ਰਗਤੀਸ਼ੀਲ ਲੇਖਕ ਸੰਘ ਪੰਜਾਬ ਦੇ ਜਨਰਲ ਸਕੱਤਰ ਪ੍ਰੋ. ਸੁਰਜੀਤ ਜੱਜ ਨੇ ਕਿਸਾਨ ਨੇਤਾ ਜੁਗਿੰਦਰ ਸਿੰਘ ਉਗਰਾਹਾਂ ਅਤੇ ਪਲਸ ਮੰਚ ਦੇ ਆਗੂ ਅਮੋਲਕ ਸਿੰਘ ਦੇ ਨਾਲ ਕਿਸਾਨਾਂ ਨੂੰ ਸੰਬੋਧਨ ਕੀਤਾ। ਡਾ. ਸੁਖਦੇਵ ਸਿੰਘ ਸਿਰਸਾ ਨੇ ਕਿਹਾ ਕਿ ਪ੍ਰਗਤੀਸ਼ੀਲ ਲੇਖਕ ਸੰਘ ਕਿਸਾਨਾਂ ਦੇ ਇਸ ਹੱਕੀ ਸੰਘਰਸ਼ ਵਿੱਚ ਆਖ਼ਰੀ ਦਮ ਤੱਕ ਉਨ੍ਹਾਂ ਦੇ ਨਾਲ ਰਹੇਗਾ, ਕਿਉਂਕਿ ਇਹ ਸੰਘਰਸ਼ ਕੇਵਲ ਪੰਜਾਬ ਦੇ ਕਿਸਾਨਾਂ ਅਤੇ ਆਰਥਿਕ ਮੁੱਦਿਆਂ ਲਈ ਨਹੀਂ, ਸਗੋਂ ਇਹ ਸੰਘਰਸ਼ ਹਿੰਦੁਸਤਾਨ ਦੇ ਕਿਰਤ ਕਰਨ ਵਾਲੇ ਆਵਾਮ ਦਾ ਸੰਘਰਸ਼ ਹੈ, ਅਤੇ ਭਾਰਤ ਦੇ ਸੰਘੀ ਢਾਂਚੇ, ਸੈਕੂਲਰ ਪਰੰਪਰਾਵਾਂ ਅਤੇ ਭਾਈਚਾਰਕ ਸਦਭਾਵਨਾ ਦੀ ਬਹਾਲੀ ਦਾ ਸੰਘਰਸ਼ ਹੈ। ਪ੍ਰੋ. ਸੁਰਜੀਤ ਜੱਜ ਨੇ ਕਿਹਾ ਕਿ ਇੱਕ ਪਾਸੇ ਕੇਂਦਰ ਸਰਕਾਰ ਨਵੇਂ ਖੇਤੀ ਕਾਨੂੰਨਾਂ ਨਾਲ ਪੰਜਾਬ ਤੇ ਭਾਰਤ ਦੀ ਖੇਤੀ ਆਰਥਿਕਤਾ ਨੂੰ ਤਬਾਹ ਕਰਨਾ ਚਾਹੁੰਦੀ ਹੈ ਅਤੇ ਦੂਜੇ ਪਾਸੇ ਨਵੀਂ ਸਿੱਖਿਆ ਨੀਤੀ ਤਹਿਤ ਸਧਾਰਨ ਲੋਕਾਂ ਦੇ ਬੱਚਿਆਂ ਨੂੰ ਸਿੱਖਿਆ ਤੋਂ ਵਾਂਝਾ ਕਰਨਾ ਚਾਹੁੰਦੀ ਹੈ। ਨਵੀਂ ਸਿੱਖਿਆ ਨੀਤੀ ਵਿੱਚ ਸੰਸਕ੍ਰਿਤ ਭਾਸ਼ਾ ਨੂੰ ਬੇਲੋੜਾ ਮਹੱਤਵ ਦੇ ਕੇ ਕੌਮੀ ਤੇ ਖੇਤਰੀ ਜ਼ਬਾਨਾਂ ਨੂੰ ਗੁੱਠੇ ਲਾਉਣ ਦਾ ਯਤਨ ਹੋ ਰਿਹਾ ਹੈ। ਉੱਘੇ ਕਿਸਾਨ ਨੇਤਾ ਜੁਗਿੰਦਰ ਸਿੰਘ ਉਗਰਾਹਾਂ ਨੇ ਕਿਹਾ ਕਿ ਇਸ ਸੰਘਰਸ਼ ਵਿੱਚ ਹਿੰਦੁਸਤਾਨ ਦੇ ਬੁੱਧੀਜੀਵੀ, ਲੇਖਕ ਅਤੇ ਕਾਲਾਕਾਰ ਵੱਡੀ ਗਿਣਤੀ ਵਿੱਚ ਸ਼ਾਮਲ ਹੋ ਰਹੇ ਹਨ। ਉਨ੍ਹਾਂ ਨੇ ਕਿਹਾ ਕਿ ਅਸੀਂ ਮੰਗ ਕਰਦੇ ਹਾਂ ਕਿ ਜੇਲ੍ਹਾਂ ਵਿੱਚ ਬੰਦ ਲੇਖਕਾਂ ਤੇ ਬੁੱਧੀਜੀਵੀਆਂ ਨੂੰ ਤੁਰੰਤ ਰਿਹਾਅ ਕੀਤਾ ਜਾਵੇ। ਉਨ੍ਹਾਂ ਨੇ ਕਿਹਾ ਕਿ ਲੇਖਕ ਤੇ ਬੁੱਧੀਜੀਵੀ ਸਾਡਾ ਕੌਮੀ ਸਰਮਾਇਆ ਹਨ ਅਤੇ ਸਾਡੇ ਲਈ ਗਿਆਨ ਤੇ ਪ੍ਰੇਰਨਾ ਦਾ ਸਰੋਤ ਹਨ। ਜੇਕਰ ਉਨ੍ਹਾਂ ਉਤੇ ਕੋਈ ਤਸ਼ੱਦਦ ਹੁੰਦਾ ਹੈ ਤਾਂ ਕਿਸਾਨ ਜਥੇਬੰਦੀਆਂ ਚੁੱਪ ਕਿਵੇਂ ਰਹਿ ਸਕਦੀਆਂ ਹਨ। ਡਾ. ਸਿਰਸਾ ਅਤੇ ਪ੍ਰੋ. ਜੱਜ ਦੀ ਅਗਵਾਈ ਵਿੱਚ ਅੰਮ੍ਰਿਤਸਰ, ਜਲੰਧਰ, ਨਵਾਂ ਸ਼ਹਿਰ, ਬਠਿੰਡਾ, ਪਟਿਆਲਾ, ਰੋਪੜ ਅਤੇ ਮੁਹਾਲੀ ਦੇ 70 ਲੇਖਕਾਂ ਨੇ ਸ਼ਮੂਲੀਅਤ ਕੀਤੀ ਅਤੇ ਕਿਸਾਨ ਜਥੇਬੰਦੀਆਂ ਨੂੰ ਆਰਥਿਕ ਮਦਦ ਦਿੱਤੀ।

ਬਾਬਾ! ਤੇਰੇ ਪੁੱਤ ਤੁਰੇ ਨੇ//-ਵਰਿਆਮ ਸਿੰਘ ਸੰਧੂ

 ਅੱਗੇ ਬੈਠੇ ਰਾਜੇ ਸ਼ੀਂਹ, ਮੁਕਦਮ ਕੁੱਤੇ 

ਬਾਬਾ!

ਤੇਰੇ ਪੁੱਤ ਤੁਰੇ ਨੇ
ਲੰਮੀ ਵਾਟ ਉਦਾਸੀ ਵਾਲੀ।

ਸਭ ਬਾਲੇ, ਮਰਦਾਨੇ, ਲਾਲੋ ਕੱਠੇ ਹੋ ਕੇ,
ਸਭੇ ਤੇਰੇ ਧੀਆਂ ਪੁੱਤਰ
ਭਰ ਮਿੱਟੀ ਦੀਆਂ ਮੁੱਠਾਂ
ਤੇਰੇ ਖ਼ੇਤਾਂ ਵਿਚੋਂ
ਧਰ ਕੇ ਮੋਢੇ
ਤੇਰੇ ਹਲ਼ ਨੂੰ
ਜਿਸਦੇ ਫਾਲੇ ਉੱਤੇ ਬੈਠਾ
ਇਸ ਵੇਲੇ ਪੰਜਾਬ ਪਿਆਰਾ

ਸੁਣ ਤੇਰੀ ਲਲਕਾਰ
ਧਰ ਕੇ ਸੀਸ ਤਲ਼ੀ 'ਤੇ
ਪੈ ਨਿਕਲੇ ਨੇ ਗਲੀ ਯਾਰ ਦੀ
ਮਨ ਵਿਚ ਪੂਰੀ ਨਿਹਚਾ
ਅਪਨੀ ਜੀਤ ਕਰੂੰ ਦੀ

ਅੱਗੇ ਬੈਠੇ
ਰਾਜੇ ਸ਼ੀਂਹ, ਮੁਕਦਮ ਕੁੱਤੇ
ਕੌਡੇ ਰਾਖ਼ਸ਼ ਬੰਦੇ ਖਾਣੇ
'ਭੁੱਖੇ-ਭਾਣੇ!'
ਲਹੂ ਪਿਆਸੇ
ਭਾਗੋ ਜਰਵਾਣੇ
ਸੱਜਣ ਠੱਗ
ਮਿੱਠ ਬੋਲੜੇ, ਮੋਮੋ-ਠਗਣੇ,
ਜਾਦੂਗਰ ਗੁਜਰਾਤੀ
ਫਾਹੁਣਾ ਚਾਹੁੰਦੇ ਜਾਲ ਵਿਛਾ ਕੇ

ਤੂੰ ਆਪਣੇ ਪੁੱਤਾਂ ਦੇ ਅੰਗ-ਸੰਗ
ਤੂੰ ਆਪਣੀਆਂ ਧੀਆਂ ਦਾ ਬਾਪੂ
ਸਭ ਦੇ ਸਿਰ 'ਤੇ ਹੱਥ ਤੇਰਾ ਹੈ
ਮਿਹਰਾਂ ਭਰਿਆ

ਲੈ ਕੇ ਤੇਰਾ ਨਾਂ
ਜਿੱਤ ਦਾ ਝੰਡਾ ਹੱਥੀਂ ਫੜ ਕੇ
ਲੈ ਉੱਡਣਗੇ ਜਾਲ
ਵਿੰਹਦਾ ਰਹੂ ਸ਼ਿਕਾਰੀ ਬੈਠਾ

ਬਾਬਾ!
ਇਹ ਮਾਸੂਮ ਜਿਹਾ ਹੈ ਸੁਪਨਾ ਮੇਰਾ
ਤੇਰਾ ਸਿਰ 'ਤੇ ਹੱਥ ਰਿਹਾ ਤਾਂ
ਹੋ ਜੂ ਪੂਰਾ

-ਵਰਿਆਮ ਸਿੰਘ ਸੰਧੂ 

ਲੋਕ ਸੰਘਰਸ਼ਾਂ  ਨਾਲ ਚਿਰਾਂ ਤੋਂ ਜੁੜੇ ਹੋਏ ਸਾਡੇ ਖਾੜਕੂ ਸਾਹਿਤਕਾਰ ਵਰਿਆਮ ਸਿੰਘ ਸੰਧੂ  ਹੁਰਾਂ ਨੇ ਇਹ ਕਾਵਿ ਰਚਨਾ ਐਤਵਾਰ 29 ਨਵੰਬਰ 2020 ਨੂੰ ਸ਼ਾਮੀ -07:08 ਵਜੇ ਆਪਣੇ ਫੇਸਬੁੱਕ ਪੇਜ ਤੇ ਪੋਸਟ ਕੀਤੀ ਸੀ। ਅਗਲੇ ਹੀ ਦਿਨ ਗੁਰਪੂਰਬ ਵੀ ਸੀ। ਸ਼ਾਇਦ ਇਹ ਕਾਵਿ ਰਚਨਾ ਸਾਹਿਬ  ਗੁਰੂਨਾਨਕ ਦੇਵ ਜੀ ਦੀਆਂ ਸਿੱਖਿਆਵਾਂ ਰਸਤਿਆਂ ਦੀ ਗੱਲ  ਸੰਦਰਭਾਂ ਵਿਚ ਕਰਦੀ ਹੈ। ਸਾਡੇ    ਦਸਤਾਵੇਜ਼ ਵੀ  ਸਕਦੈ।   --ਰੈਕਟਰ ਕਥੂਰੀਆ  

ਇਹ ਬਾਤ-ਸੁਰਜੀਤ ਪਾਤਰ

  ਮੈਨੂੰ ਫਿਕਰ ਹੈ ਲਾਲੋ ਦੇ ਕੋਧਰੇ ਦਾ, ਤੈਨੂੰ ਭਾਗੋ ਦੇ ਪਕਵਾਨ ਦਾ ਏ,

ਇਹ ਬਾਤ ਨਿਰੀ ਇੰਨੀ ਹੀ ਨਹੀ

ਨਾਂ ਇਹ ਮਸਲਾ ਸਿਰਫ ਕਿਸਾਨ ਦਾ ਏ ,

ਇਹ ਪਿੰਡ ਦੇ ਵਸਦੇ ਰਹਿਣ ਦਾ ਏ ,

ਇਹ ਤੌਖਲਾ ਉੱਜੜ ਜਾਂਣ ਦਾ ਏ ,

ਉੰਜ ਤਾਂ ਇਹ ਚਿਰਾਂ ਦਾ ਉੱਜੜ ਰਿਹਾ ,

ਇਹ ਅੱਜ ਨਹੀ ਉੱਜੜਨ ਲੱਗਿਆ ਏ ,

ਇਹਨੂੰ ਗੈਰਾਂ ਨੇ ਵੀ ਲੁੱਟਿਆ ਏ,

ਤੇ ਆਪਣਿਆਂ ਵੀ ਠੱਗਿਆ ਏ ,

ਇਹਦਾ ਮਨ ਪਿੰਡੇ ਤੋਂ ਵੱਧ ਜ਼ਖਮੀ ,

ਦੁੱਖ ਰੂਹ ਤੋਂ ਵਿੱਛੜ ਜਾਂਣ ਦਾ ਏ ,

ਇਹ ਬਾਤ ਨਿਰੀ ਇੰਨੀ ਹੀ ਨਹੀ ....

ਇਹ ਬਾਤ ਨਿਰੀ ਖੇਤਾਂ ਦੀ ਨਹੀਂ ,

ਇਹ ਗੱਲ ਤਾਂ ਸਫ਼ਿਆਂ ਦੀ ਵੀ ਹੈ ,

ਅੱਖਰ ਨੇ ਜਿਨ੍ਹਾਂ ਤੇ ਬੀਜਾਂ ਜਿਹੇ,

ਉਹਨਾਂ ਸੱਚ ਦੇ ਫਲਸਫਿਆਂ ਦੀ ਵੀ ਹੈ,

ਮੈਨੂੰ ਫਿਕਰ ਹੈ ਲਾਲੋ ਦੇ ਕੋਧਰੇ ਦਾ ,

ਤੈਨੂੰ ਭਾਗੋ ਦੇ ਪਕਵਾਨ ਦਾ ਏ,

ਇਹ ਬਾਤ ਨਿਰੀ ਇੰਨੀ ਹੀ ਨਹੀਂ.....

ਉਹ ਆਖੀ ਸੀ ਇਕ ਪੁਰਖੇ ਨੇ ,

ਉਹ ਬਾਤ ਅਜੇ ਤੱਕ ਹੈ ਸੱਜਰੀ ,

ਨਹੀ ਕੰਮ ਥਕਾਉਂਦਾ ਬੰਦੇ ਨੂੰ ,

ਬੰਦੇ ਨੂੰ ਥਕਾਉਂਦੀ ਬੇਕਦਰੀ,

ਇਹ ਦੁੱਖ ਉਸੇ ਬੇਕਦਰੀ ਦਾ,

ਇਹ ਸਲ੍ਹ ਉਸੇ ਅਪਮਾਂਨ ਦਾ ਏ

ਇਹ ਬਾਤ ਨਿਰੀ ਇੰਨੀ ਹੀ ਨਹੀਂ ....

ਖੂਹ ਵਗਦੇ ਵਗਦੇ ਸ਼ਪਨ ਹੋਏ,

ਹੁਣ ਬਾਤ ਨੀ ਸਦੀਆਂ ਗਈਆਂ ਦੀ ,

ਮੈਂ ਜਾਣਦਾਂ ਯੁੱਗ ਬਦਲਦੇ ਨੇ ,

ਤਿੱਖੀ ਰਫ਼ਤਾਰ ਹੈ ਪਹੀਆਂ ਦੀ ,

ਬੰਦੇ ਨੂੰ ਮਿੱਧ ਕੇ ਨਾਂ ਲੰਘ ਜਾਵਣ ,

ਇਹ ਫਰਜ਼ ਵੀ ਨੀਤੀਵਾਂਨ ਦਾ ਏ,

ਇਹ ਬਾਤ ਨਿਰੀ ਇੰਨੀ ਹੀ ਨਹੀਂ ....

ਤੇਰੇ ਵੱਡੇ ਵੱਸਣ ਘਰਾਂਣੇ ਵੀ ,

ਸਾਡੇ ਰਹਿਣ ਦੇ ਨਿੱਕੇ ਘਰ ਵਸਦੇ ,

ਸੱਭ ਚੁੱਲ੍ਹਿਆਂ ਵਿੱਚ ਅੱਗ ਬਲਦੀ ਰਹੇ,

ਸੱਭ ਧੀਆਂ ਪੁੱਤ ਵਸਦੇ ਰਸਦੇ ,

ਇਹ ਗੱਲ ਸਭਨਾਂ ਦੇ ਵੱਸਣ ਦੀ ਹੈ,

ਇਹ ਜਸ਼ਨ ਤਾਂ ਵੰਡਕੇ ਖਾਂਣ ਦਾ ਏ ,

ਇਹ ਬਾਤ ਨਿਰੀ ਇੰਨੀ ਹੀ ਨਹੀਂ ....

ਕਿਉਂ ਧੀ ਕਿਸੇ ਕਿਰਤੀ ਕੰਮੀ ਦੀ ,

ਉਹਨਾਂ ਦੀ ਖਾਤਿਰ ਧੀ ਹੀ ਨਹੀਂ ,

ਜੋ ਪੁੱਤ ਨੇ ਡਾਢਿਆਂ ਦੇ ਜਾਏ ,

ਉਹਨਾਂ ਦੀ ਕਿਤੇ ਪੇਸ਼ੀ ਹੀ ਨਹੀਂ ,

ਤੂੰ ਡਰ ਉਹਨਾਂ ਦੀ ਅਦਾਲਤ ਤੋਂ ,

ਜਿੱਥੇ ਹੋਣਾਂ ਅਦਲ ਇਮਾਂਨ ਦਾ ਏ ,

ਇਹ ਬਾਤ ਨਿਰੀ ਇੰਨੀ ਹੀ ਨਹੀਂ ....

ਤੇਰੇ ਨਾਲ ਵਜ਼ੀਰ ਅਮੀਰ ਖੜੇ ,

ਮੇਰੇ ਨਾਲ ਪੈਗ਼ੰਬਰ ਪੀਰ ਖੜੇ ,

ਰਵਿਦਾਸ ਫਰੀਦ ਕਬੀਰ ਖੜੇ ,

ਮੇਰੇ ਨਾਨਕ ਸ਼ਾਹ ਫਕੀਰ ਖੜੇ ,

ਮੇਰਾ ਨਾਮਦੇਵ ਮੇਰਾ ਧੰਨਾਂ ਵੀ ,

ਮੈਨੂੰ ਮਾਣ ਆਪਣੀ ਇਸ ਸ਼ਾਨ ਦਾ ਏ ,

ਇਹ ਬਾਤ ਨਿਰੀ ਇੰਨੀ ਹੀ ਨਹੀਂ ....

ਚਰਨ ਗਿੱਲ ਹੁਰਾਂ ਦੇ ਫੇਸਬੁੱਕ ਪੇਜ ਤੋਂ ਧੰਨਵਾਦ ਸਹਿਤ