22nd June at 10:30 PM Via WhatsApp
ਰੂਹ ਤੋਂ ਰੂਹ ਦਾ ਸਫ਼ਰ ਕਰਨ ਦੀ//ਬਹੁਤ ਜਰੂਰਤ ਹੈ ਨਜ਼ਰਾਂ ਨੂੰ
ਚੰਦਨ
ਬਹੁਤ ਜ਼ਰੂਰਤ ਹੈ ਨਜ਼ਰਾਂ ਨੂੰ
ਸਾਦ ਮੁਰਾਦੇ ਆਸ਼ਕ ਮਨ ਦੀ
ਬਹੁਤ ਜ਼ਰੂਰਤ ਹੈ ਨਜ਼ਰਾਂ ਨੂੰ।
ਸੋਨੇ ਦੇ ਵਰਕਾਂ ਵਿੱਚ ਲਿਪਟੇ
ਲੱਖਾਂ ਹੀ ਤਨ ਵੇਖ ਚੁੱਕਾ ਹਾਂ
ਸ਼ੀਸ਼ੇ ਦੇ ਟੁਟਦੇ ਤੇ ਜੁੜਦੇ
ਲੱਖਾਂ ਹੀ ਮਨ ਵੇਖ ਚੁੱਕਾ ਹਾਂ
ਪਰ ਇੱਕ ਰੂਹ ਵਿੱਚ ਭੋਲੇ ਪਨ ਦੀ
ਬਹੁਤ ਜ਼ਰੂਰਤ ਹੈ ਨਜ਼ਰਾਂ ਨੂੰ।
ਵੀਨਸ ਜੇਹੀ ਸ਼ਾਹਕਾਰ ਕੋਈ ਰਚਨਾ
ਜਿਸ ਦੇ ਪੈਰੀਂ ਹੋਵਣ ਛਾਲੇ
ਯਾ ਸਾਗਰ ਵਿੱਚ ਸਿਪ ਮੂੰਹ ਖੋਲ੍ਹੀ
ਇੱਕ ਸਵਾਂਤੀ ਬੂੰਦ ਨੂੰ ਭਾਲੇ
ਸੂਲ ਤੇ ਠਹਿਰੀ ਹੋਈ ਕਿਰਨ ਦੀ
ਬਹੁਤ ਜ਼ਰੂਰਤ ਹੈ ਨਜ਼ਰਾਂ ਨੂੰ।
ਜਿਸ ਦੀ ਦੀਦ ਹੀ ਉਤਸਵ ਹੋਵੇ
ਕਦੀ ਕਦਾਈਂ ਚੜਿਆ ਤਾਰਾ
ਲੰਘਦੀ ਹੋਈ ਅੰਬਰ ਦੀ ਬਿਹੀਉਂ
ਜਿਉਂ ਹੋਵੇ ਕੌਸਰ ਦੀ ਧਾਰਾ
ਰੂਹ ਤੋਂ ਰੂਹ ਦਾ ਸਫ਼ਰ ਕਰਨ ਦੀ
ਬਹੁਤ ਜਰੂਰਤ ਹੈ ਨਜ਼ਰਾਂ ਨੂੰ।
ਨਾ ਪੱਤਣ ਨਾ ਪਾਣੀ ਹੋਵੇ
ਆਪਣੇ ਆਪ ਚ ਜਿਸਦਾ ਰੇਤਾ
ਗੁਜ਼ਰੀ ਹੋਈ ਕਹਾਣੀ ਹੋਵੇ
ਆਸ ਨਾ ਹੋਵੇ ਫ਼ਿਰ ਛਲਕਣ ਦੀ
ਬਹੁਤ ਜ਼ਰੂਰਤ ਹੈ ਨਜ਼ਰਾਂ ਨੂੰ।
ਚੰਦਨ ਜੇਹੇ ਮਹਿਕੇ ਤਨ ਦੀ
ਬਹੁਤ ਜ਼ਰੂਰਤ ਹੈ ਨਜ਼ਰਾਂ ਨੂੰ
ਸਾਦ ਮੁਰਾਦੇ ਆਸ਼ਕ ਮਨ ਦੀ
ਬਹੁਤ ਜ਼ਰੂਰਤ ਹੈ ਨਜ਼ਰਾਂ ਨੂੰ।
--ਡਾਕਟਰ ਗੁਰਚਰਨ ਗਾਂਧੀ
ਸੰਪਾਦਕ ਸੂਹੀ ਸਵੇਰ ਪੰਜਾਬੀ ਮੈਗਜ਼ੀਨ
ਸੂਹੀ ਸਵੇਰ ਪੰਜਾਬੀ ਮੈਗਜ਼ੀਨ ਦੇ ਸੰਪਾਦਕ ਡਾ. ਗੁਰਚਰਨ ਗਾਂਧੀ ਚੜ੍ਹਦੀ ਜਵਾਨੀ ਵੇਲੇ ਤੋਂ ਹੀ ਖੱਬੇਪੱਖੀ ਵਿਚਾਰਧਾਰਾ ਨਾਲ ਜੁੜੇ ਹੋਏ ਹਨ। ਪਰਿਵਾਰਿਕ ਮੁਸ਼ਕਲਾਂ, ਸਮਾਜਿਕ ਮੁਸ਼ਕਲਾਂ, ਨਿਜੀ ਮੁਸ਼ਕਲਾਂ ਅਤੇ ਪੰਜਾਬ ਦੇ ਅੱਸੀਵਿਆਂ ਵਾਲੇ ਹਾਲਾਤ--ਸਭ ਕੁਝ ਬਹੁਤ ਨਾਜ਼ੁਕ ਸੀ ਪਰ ਡਾ. ਗਾਂਧੀ ਡਟੇ ਰਹੇ। ਮੈਡੀਕਲ ਪ੍ਰੈਕਟਿਸ ਦੇ ਨਾਲ ਨਾਲ ਸਮਾਜਿਕ ਚੇਤਨਾ ਜਗਾਉਣ ਦਾ ਵੀ ਫਰਜ਼ ਜਾਰੀ ਰੱਖਦੇ ਹਨ। --ਰੈਕਟਰ ਕਥੂਰੀਆ
